1-2. Txini ennikamihedha ononelamo mukalelo oviwilemo Yehova mmaleli nzina naye opigidhiwa?

 KATANALELA eji: Muttu onimukweletxiwe onologa elobo yabure vaddiddi mwaha wawo. Weyo onoziwa wila elogiliye kahiye ebaribari mbwenyi attu ena anorumela ottambiya. Yottabwaya, awene anoroma ovaviha muselu obu wottambi nanda attu enji vina anorumela. Ogaviwilemo dhavi? Akala attuya abo ahikana ttima vamentoni vawo vina weyo onovaha ttima mikalelo dhawo, kugaviwilemo deretu, kahiye mwenemo?—Gano 22:1.

² Yotagiha eji enonikamihedha ononelamo mukalelo oviwilemo Yehova mudhidhi opigidhiwe nzina naye. Mmodha wa anaye omuyani ohimuzivalela muyana woroma, Eva, vina iyene ohirumela ottambiya. Sabwa ya ottambi oku amambali ehu oroma ahimusadduwela Yehova. Yodhelavoyá, ottega vina okwa dhihapatta attu otene. (Wita 3:​1-6; Rom. 5:12) Makattamiho otene anonihu mwilaboni masaka abano ninga—okwa, koddo na makattamiho mena—atoteyile sabwa ya ottambi ologile Satana mmunddani mwa Edeni. Yehova oniviwamo dhavi agonaga makattamiho otene atoteyile sabwa ya ottambi obu? Se waganyedha eji enompa vaddiddi Yehova. Masiki dhawene iyene kaludduwile vina kakoyile ntxiga. Mwebaribari Yehova onodhowavi akalaga Mulugu wowagalala.—1 Tim. 1:11.

3. Gari gani enihu?

³ Iyo nihikana gari enddimuwa ya olagiha wi Satana ohiloga ottambi mwaha wa nzina na Mulugu modhela ovirihamo nlamulo ntti nihinrutxa: Ttittimihani nzina na Yehova. (Masal.  113:1) Iyo ninomuttittimiha Yehova modhela wawaddela ena ebaribari mwaha wa iyene. Kito weyo oli omala-nawale wi okose ejuwene? Ninele wona mikalelo miraru dhapama dhinanikamihedhe ottittimiha nzina na Yehova na murima wehu wetene.

YEHOVA ONOWAGALALA NIGATTITTIMIHAGA NZINA NAYE

4. Txini enimuttukulela Yehova wagalala sabwa ya iyo ottittimiha nzina naye? Kaladdaniha. (Koona vina foto.)

⁴ Babi wehu wa wirimu onowagalala nigattittimihaga nzina naye. (Masal. 119:108) Attu ena kaniviwonana ttima vina anojedhela wi ena àsibege vina àlogege pama, kito empadduwa yakene na Yehova? Nne. Kobuwela nladdaniho ntti. Mwana wa muyana onomukubatta babe nokwela vaddiddi vina onologa, “Mwilaboni kawo babi waderetu opitta nyuwo!” Babiya oddu onowagalala vaddiddi, vina onoziveliwana eji ekosile mwanaye. Sabwaya jani? Eji enoniha wi iyene kanivyonana ttima nanda wila avyonena ttima onofwanyela osibiwa na mwanaye? Nne, kahiye mwenemo. Ottiya ejo iyene onoziwa wi babi wapama, mbwenyi onowagalala vaddiddi sabwa ya omoona mwanaye alagihaga okwela waye vina amutamalelaga. Iyene onoziwa wi mikalelo esi samakamaka vaddiddi wila mwanaye akane wagalala agonuwa. Na mukalelo wakakene, Yehova Babi wehu onowagalala nigamuttittimihaga.

5. Nigattittimiha nzina na Yehova ninoniha dhavi wi Satana muttambi?

⁵ Nigamuttittimihaga Yehova, ninomukamihedha iyene olagiha wi Satana ohiloga ottambi mwaha wehu. Dhavi? Iyene ohiloga wi kawo muttu agawodhile okalavi oweddeyana na Yehova vina obarela nzina naye. Satana ohiloga wi kawo muttu ompattiwa dhoweha nanda bawodha okalavi oweddeyana. Iyene vina ohiloga wi iyo notene nigahimunyanyala Yehova kovahiwa elobo ya ttima na muttu mwina. (Job 1:​9-11; 2:4) Mbwenyi Job mulobwana wororomeleya ohilagiha wi Satana muttambi. Kito mwa mpaddi wehu? Masaka abano muttu-muttu wa iyo ohikana gari ya obarela nzina na Yehova vina omwagalaliha modhela omulabela nororomeleya. (Gano 27:11) Eji gari enddimuwa vaddiddi.

6. Ninawodhe dhavi omutagiha Mwene Davidi na Alevita? (Nehemiya 9:5)

⁶ Otene animukwela Yehova anofuna omuttittimiha na murima wawa wotene. Mwene Davidi ohileba: “Murimaga wé, [omuttittimihe] Nabuya, ekalelo yaga yotene [ettittimihe] nzina naye nokoddela.” (Masal 103:1) Davidi ohinonelamo wi ottittimiha  nzina na Yehova yakala ninga omuttittimiha mwinyene Yehova. Nzina na Yehova ninowiwanana na omuttu waye, nona eji enonubutxedha mikalelo dhaye dhokoddela vina dhilobo dhapama dhinkosiye. Davidi wanfuna okoddeliha vina ottittimiha nzina na Yehova. Iyene wanfuna okosa ejuwene na omuttu waye wotene—kuloga, na murima waye wotene. Na mukalelo wakakene, Alevita ansogorhela mabasa a omuttittimiha Yehova. Na oviyeviha awene anziwa wi na mazu awa txipo kàwodhe olagiha nttittimiho ninfwanyela nzina nokoddela na Yehova. (Kengesa Nehemiya 9:5.) Kavali waganyedha wi oviyeviha wawa ohimwagalaliha Yehova.

7. Ninawodhe dhavi omuttittimiha Yehova mmabasani a olaleya vina siku na siku?

⁷ Enowodheya iyo vina omuttittimiha Yehova nigamuloga pama, nigamutamalela vina nigamukwela. Nigakala mmabasani a olaleya, ninowubuwela wi efunelo yehu yamakamaka ja wakamihedha attu onfiyedha Yehova vina omona ninga Babi wokwela. (Tia. 4:8) Mwa iyo gari enddimuwa vaddiddi walagiha attu mBibiliani wi Yehova, Mulugu wokwela, woligana, weziwelo, wa ewodhelo, vina ohikana mikalelo dhaderetu. Mukalelo mwina wa olagiha wi ninomuttittimiha Yehova vina ninomwagalaliha jokosa muli-mwetemwene wi nimutagihe. (Ef. 5:1) Nigakosa ejuwene ena anozinddiyela wi iyo ninottiyana na attu enji a mwilaboni. (Mt. 5:​14-16) Nigatamela mudhidhi wi nikale na attu siku na siku ninodhaga okana gari ya watapulela sabwaya ekalilehu ottiyana. Yodhelavoya, ena anodhaga okana efunelo ya osunza mwaha wa Mulugu wehu. Nigamuttittimiha Yehova na mikalelo esi, iyene onowagalala vaddiddi.—1 Tim. 2:​3, 4.

IYO NINOMWAGALALIHA YEZU NIGATTITTIMIHAGA NZINA NA YEHOVA

8. Yezu ottittimihile dhavi nzina na Yehova?

⁸ Oromana anju ali wirimu na attu ali velaboni ya vati kavo onimuziwa pama Babi opitta Mwanaye. (Mt. 11:27) Yezu onomukwela Babe, vina onosogorhela ottittimihiwa wa nzina naye. (Jo. 14:31) Omattiyu omariha ahinatti okwa, munlobeloni nimukoseliye Babe, iyene ohiloga mwaha wa mabasa aye a olaleya velaboni ya vati na mukalelo obu: “Ddiaziwiha nzina nenyu.” (Jo. 17:26) Na mazu aba iyene afuna aloge nni?

9. Musibo gani ologile Yezu onnikamihedha ononelamo pama omuttu wa Yehova?

⁹ Ottiya bahi waziwiha attu ena nzina na Mulugu, Yezu ohikosa dhilobo dhina. Ayuda aloga makani na Yezu anziwa nzina na Mulugu. Mbwenyi ddi Yezu watapulelemo. (Jo. 1:​17, 18) Motagiha, Malebo a Ebrayiko anologa wi Yehova, Mulugu wa ttagaraga vina wa nttebwa. (Obud. 34:​5-7) Yezu ohoniha ejuwene mmusiboni wa mwana wopawula. Nigengesaga mwaha wa babi amonaga mwanaye, amuttamagelaga wi anfwanye, amukubatte, vina amulevelele na murima wotene, iyo ninokana monelo wowakwana mwaha a ttagaraga vina nttebwa na Yehova. (Lk. 15:​11-32) Yezu ohoniha mowakwana-mwene omuttu wa Babe.

10. (a) Ninziwa dhavi wi Yezu wanttittimiha nzina na Babe vina wanfuna wi ena akose yakene? (Marko 5:19) (Koona vina foto.) (b) Masaka abano txini ennifunana Yezu wi iyo nikose?

¹⁰ Kito Yezu wanfuna wi attu ena attittimihege nzina na Babe? Kaninaganyedha. Asogorheli ena a marelijiau anrumela wi ologa nzina na Mulugu yali otowa nriho, mbwenyi Yezu kattiyile wi elemelelo eji yahanna matibelo a mBibiliani emutximihe ottittimiha nzina na Babe. Dila modha Yezu wahinvulumutxa  mulobwana wavolowiwe adomonyo wakala elabo y’o Jerazeno. Attuya ahidha omova Yezu, venevo ahimukumbirha wi attiye murudda obule. (Mk. 5:​16, 17) Masiki dhawene, Yezu wanfuna wi attu a murudda obule aziwe nzina na Mulugu. Nona iyene wahimwaddela mulobwana ole wavulumutxiwe awaddele attu ena wila wanvulumutxile ddi Yehova, ottiya Yezu. (Kengesa Marko 5:19.) a Mpaka ovanene Yezu onofunavi wi—nzina na Babe niziwiwe mwilaboni mwetemwene! (Mt. 24:14; 28:​19, 20) Iyo vina nigakosa ejuwene, ninomwagalaliha Mwene wehu, Yezu Kristu.

11. Yezu wasunzihile anafwara aye olobela dhavi, vina eji ekalele nni yamakamaka? (Ezekiyel 36:23)

¹¹ Yezu wanziwa wi efunelo ya Yehova ja okoddeliha nzina Naye vina olagiha wi dhilobo dhalogiwe mwaha waye s’ottambi. Ji sabwaya emuttukuleli Yezu wasunziha anamafwara aye olobela dhahi: “Baba wehu muli odhulu, nzina nenyu nikoddelihiwe.” (Mt. 6:9) Yezu wannonelamo wi aba makani ampatta dhottanddiwa dhotene. (Kengesa Ezekiyel 36:23.) Kawo anju obe muttu okosile muli-mwetemwene wi nzina na Yehova nikoddelihiwe opitta ekosile Yezu. Mbwenyi vattiddiwe Yezu, amwiddani aye ampwattelihile muladdu gani? Onveyiha Mulugu! Se waganyedha Yezu wanziwa wi olabihedha nzina na Mulugu na mukalelo wohifwanyelela obe oveyiha nzina nokoddela na Babe yali yottega yottabwa egakosile muttu. Omagedhiwa vina ottongiwa sabwa ya muladdu obu yahimukubanyiha venjene Yezu. Txino obu bu mwahaya wamakamaka ottukuleli murima waye “[othabwa] omparhuwa” iyene ahinatti ofugeliwa.—Lk. 22:​41-44.

12. Yezu otxenihile nzina na Babe na mukalelo gani?

¹² Wi akoddelihe nzina na Babe, Yezu ohivilela otabutxiwa, oruwaniwa, vina miselu dhottambi dhalogiwa mwaha waye. Iyene wanziwa wi wahiwodha omwiwelela Babe mwa dhetedhene; iyene kakosile elobo egamuttukuleli okana manyazo. (Aheb. 12:2) Iyene vina wanziwa wi Satana wela omweha midhidhi esile dhorutxa. (Lk. 22:​2-4; 23:​33, 34) Satana wanfuna okosa muli-mwetemwene wi Yezu amuttegele Babe;  mbwenyi txipo kawodhile! Yezu ohilagiha wi Satana muttambi wottabwa vina wi Yehova ohikana adhari ororomeleya ankalavi oweddeyana na iyene masiki agapattiwa makattamiho orutxa vaddiddi!

13. Onawodhe dhavi omwagalaliha Mwene wawo Yezu Kristu?

¹³ Weyo onofuna omwagalaliha Mwene wawo Yezu? Kadhowagavi ottittimihaga nzina na Yehova, wakamihedhaga ena osunza mikalelo dhapama dha Mulugu wehu. Ogakosa ejuwene onofwara ttarho dha Yezu. (1 Ped. 2:21) Dhahene ninga Yezu weyo onomwagalaliha Yehova, vina onele woniha wi mwiddani Waye, Satana, muttambi munddimuwa!

IYO NINOKAMIHEDHA OVUNA DHIGUMI NIGATTITTIMIHAGA NZINA NA YEHOVA

14-15. Nigàsunzihaga ena mwaha wa Yehova, dhilobo gani dhapama dhinapadduwe?

¹⁴ Nigattittimihaga nzina na Yehova ninokamihedha ovuna dhigumi. Ninkosa dhavi ejuwene? Satana ohipiba yubuwelo ya attu ahinimuroromela Mulugu. (2 Kor. 4:4) Awene anorumela dhottambi esi dha Satana: Mulugu kawo, oli olapelana na iyo, vina kantanala nlogo na attu, Mulugu ddwabure vina onowatabutxa attegi namukalakala. Satana onologa dhottambi esi sabwani onfuna apigidhe nzina na Yehova, àrabelihe attu onfiyedha iyene. Mbwenyi nigalaleyaga miselu dhapama ninomutximiha Satana wakwaniha yogana yaye. Iyo ninowasunziha attu ebaribari mwaha wa Babi wehu, nittittimihaga nzina naye nokoddela. Yodhelavoyá jivi?

¹⁵ Ebaribari ya Nzu na Mulugu ehikana ewodhelo enddimuwa vaddiddi. Nigàsunzihaga attu mwaha wa Yehova vina mikalelo dhaye ninowona elobo yotikiniha. Attu anottiya opibiwa na dhottambi dha Satana vina anoroma wona mikalelo dhokoddela dha Babi wehu. Awene anotikina agoona guru ehimpimeya ya Yehova. (Iza. 40:26) Awene anosunza omukuluvela iyene sabwa ya oligana waye. (Olib. 32:4) Anosunza venjene na ewodhelo yaye enddimuwa. (Iza. 55:9; Rom. 11:33) Awene vina anopangarhazeya agasunza mwaha wa okwela  wa Yehova. (1 Jo. 4:8) Venevo vandowani anfiyedhaga Yehova, njedhelo nawa na okalawo namukalakala ninokala n’ebaribari. Gari enddimuwa vaddiddi enihu wakamihedha ena onfiyedha Babi wehu! Nigakosa ejuwene, Yehova onnona ninga akamihedhi.—1 Kor. 3:​5, 9.

16. Attu aniviwamo dhavi agasunza nzina na Mulugu? Kavaha dhotagiha.

¹⁶ Txino elobo yoroma enasunziha iyo attu jawi nzina na Mulugu tti Yehova. Eji enodhaga otomola murima wa muttu onna efunelo ya omuziwa Yehova. Motagiha, muzombwe dhahi onkuweliwa Aaliyah b oleliwe na anamudhi ahili Akristu. Dhasunzihiwa iyene kadhaddiginya murima waye vina kamona Mulugu ninga muttu webaribari. Mbwenyi muromileye omusunza Bibilia na Anamoona a Yehova eji yahidha otxinja. Iyene wahiroma omona Mulugu ninga Mukwaye. Vina ohitikina vasunziliye wi nzina na Mulugu nahifudhiwa mmaBibiliani menjene banitxinjiwa na mazina mena a ettomo, ninga Nabuya. Osunza nzina na Yehova ohitxinja egumi yaye. Iyene ohiloga: “Mukwaga wa makamakaya ohikana nzina!” Txini epadduwile vasogorhova? Iyene ohiloga: “Ovano miyo ddihikana murenddele munddimuwa wa mmurimani. Vina ddinovyonana ttima.” Mulobwana dhahi onkuweliwa Steve wali nameba, oleliwe na malamulo orutxa a relijiau ya Ayuda. Iyene kafuna okosa vina mpaddi wa relijiau sabwani wahona wi attuya kavirihamo dhasunzihiwani. Mbwenyi mukwile maye, iyene ohirumela omusunza Bibilia na Anamoona a Yehova. Musunziliye nzina na Mulugu, ejo ehitomola vaddiddi murima waye. Iyene ohiloga: “Miyo ddali ddihinatti osunza nzina na Mulugu, mbwenyi musunzelimi dila yoroma ddahona wi Mulugu ohikalawo.” Iyene ohenjedhedha: “Ovano ddinomona Mulugu ninga muttu webaribari! Bu mudhidhi-ene obule wanonelemo miyo wi ddihinfwanya Marho webaribari.”

17. Onfunela nni odhowagavi bugattittimiha nzina na Yehova? (Koona vina foto.)

¹⁷ Mmabasani a olaleya, weyo onowasunziha attu ena nzina nokoddela na Yehova? Onowakamihedha awene ozinddiyela mikalelo dhapama dha Mulugu wehu? Ogakosaga ejuwene onottittimiha nzina na Mulugu. Kadhowagavi ottittimihaga nzina nokoddela na Yehova modhela wakamihedha ena omuziwa txibarene mwinya wa nzina ntti. Ogakosa ejuwene, onele ovuna dhigumi. Vina onele owodha ofwara ttarho dha Mwene wehu, Yezu Kristu. Opitta dhetedhene onele omwagalaliha Babi wehu wokwela, Yehova. Kadhowagavi ottittimihaga nzina na Yehova okala-nokala-wene!—Masal. 145:2.