1. Txini ekosile alabeli a Yehova masaka a mundduni?

 WEYO onovaha ttima mandano awo na Yehova? Kavali waganyedha! Vina weyo kuli weka. Oromana masaka awale attu enjene, ahiviwamo dhahene ninga weyo. (Masal. 104:​33, 34) Attu enjene ahivilibihedha vaddiddi wi amulabele Yehova. Jijene yakosa Anazireu a nsaka na ana Izrayel. Anazireu ali ani, vina iyo ninsunza nni na yotagiha yawa?

2. (a) Anazireu ali ani? (Olebeliwa 6:​1, 2) (b) Ana Izrayel asakulele nni okala Anazireu?

² Nzu ntti “Nazireu” na elogelo ya Ebrayiko nintapulela “Ottiyiwa Vawa-vene,” “Osakuliwa,” obe “Oviperheka.” Anazireu ali ana Izrayel avilibihedha omuttiddela Yehova mabasa na mukalelo wavawoka. Nlamulo na Mizé nanrumeliha mulobwana obe muyana ompikirhela Yehova elobo yamakamaka asakulaga okala Munazireu mwari mwa mudhidhi mung’onovi obe mwinjene. a (Kengesa Olebeliwa 6:​1, 2.) Mukadda Izrayel wapikirhela okala Munazireu, akale mulobwana obe muyana, yanfuneya ovirihamo magano abuwene ahavirihamo ana Izrayel ena. Txini yamuttukulela mukadda Izrayel okosa nipikirhelo ntti? Enkala ninga ji sabwa ya omukwela Yehova vina omutamalela sabwa ya mareliho Aye.—Olib. 6:5; 16:17.

3. Nlogo na Mulugu masaka abano, ninlagiha dhavi mikalelo dhakakene dha Anazireu?

³ Vatxinjiwe Nlamulo na Mizé na “magano a Kristu” kiyali yofuneya wi muttu wa nlogo na Mulugu akale Munazireu. (Gal. 6:2; Rom. 10:4) Dhahene ninga Anazireu, alabeli a Yehova masaka abano anovilibihedha omulabela na murima wawa  wotene, na omuttu wawa wotene vina na mobuwelo wawa wotene. (Mk. 12:30) Nigaviperheka wa Yehova ninompikirhela omulabela na murima wehu wotene. Wi niwodhe ovirihamo epikirhelihu enofuneya odhowavi nikosaga efunelo ya Yehova vina ovilibihedha wi nimulabele. Ovano ninfuna none mukalelo wawodha Anazireu ovirihamo nipikirhelo nawa, vina osunza nipadduwo nawa enele onikamihedha ovirihamo ejile empikirhelihu Yehova. b (Mt. 16:24) Ndowe none dhotagiha dhing’onovi.

KAVILIBIHEDHEGE

4. Mowiwanana na Olebeliwa 6:​3, 4, Anazireu ali omala-nawale wi akose nni?

⁴ Kengesa Olebeliwa 6:​3, 4. Anazireu kafwanyela omwa dhomwa dholezeliha, nne oja mulima ninga uva vina milima dha nvidera. Oku ana Izrayel ena ahikana ofuru wa omwa dhomwa dholezeliha vina oja milima dha nvidera, vowi kiyali elobo yabure omwa na oja dhilobo esi. Bibilia onologa wi “vinyu [enothabiha] murima” vina nvaho wa Mulugu. (Masal. 104:​14, 15) Masiki dhawene Anazireu ankosa guru ya orabela omwa vinyu. c

5. Madián na Marcela aganile okosa eni, nanda sabwaya jani?

⁵ Dhahene vina ninga Anazireu iyo vina ninovilibihedha wi nimulabele venjene Yehova. Koona yotagiha ya Madián na Marcela. d Atelani aba ahikana egumi yottugareya. Madián wahikaana ganyo ya deretu vina nyumba yawa yali yokoddela vaddiddi. Mbwenyi awene ahikana efunelo ya okosa venjene mmabasani a Yehova. Wi akwanihedhe yogana ejo, ahigana okosa matxinjo. Awene ahiloga dhahi: “Iyo nahiroma ovugula dhogula dhehu.” “Nahimwalela nyumba yina eng’ono vina nahiguliha karo yehu.” Kiyali yofuneya Madián na Marcela okosa guru eji—akosile ejuwene sabwani anfuna okosa venjene mmabasani a Yehova. Ovano awene ahikana wagalala vina ahiziveliwa venjene na yosakula ekosilani.

6. Txini enattukulela Akristu masaka abano ovilibihedha? (Koona vina foto.)

⁶ Alabeli a Yehova masaka abano anofwanya wagalala sabwa ya ovilibihedha wi akane mudhidhi wila attidde mabasa a omwene. (1 Kor. 9:​3-6) Yehova kannimagelela iyo okosa dhilobo esi wi niwodhe omulabela;  nanda dhilobo dhittiyile abali ena wi akane mudhidhi wa omulabela, kahiye dhabure. Motagiha, ena anottiya ganyo enazivela vaddiddi, ena anottiya nyumba oku ena anottiya dhifuwo dhawa. Enji ahigana okala aziye mwari mwa mudhidhi mwinji, mwa abale atelanile ahisakula ojedhela mudhidhi mwinji wi akane aima. Ena ahisakula odhowa okamihedha mburo onjombeliwa anamalaleya, masiki ejo etapulelaga okala olapela na amudhawa vina amarho awa. Enji mwa iyo ninovilibihedha venjene sabwani ninfuna nimulabele Yehova mpaka vanwodhelihu. Kakana ebaribari wi Yehova onottittimiha venjene guru enkosiwe, peno eng’ono peno enddimuwa wila owodhe okana mudhidhi wa omulabela.—Aheb. 6:10.

KAGANA OKALA WOTTIYANA

7. Yakalela nni yorutxa Anazireu wakwaniha nipikirhelo nawa? (Olebeliwa 6:5) (Koona vina foto.)

⁷ Kengesa Olebeliwa 6:5. Anazireu kafwanyela ogwadda nttitti nawa. Obu wali mukalelo modha wa woniha omwiwelela wawa Yehova mowakwana-mwene. Akala mwana Izrayel wali Munazireu mwari mwa mudhidhi mwinjene, nttitti naye nannunuwa vaddiddi vina ejo yannakamihedha attu ena omuzinddiyela kakamwene. Akala ena anriha yogana yaye ya okala Munazireu vina annimukamihedha odhowanavi nipikirhelo naye, kigamurutxiletxe okala wottiyana. Mbwenyi mokubanyiha-mwene, nahifiya nsaka naharihiwa Anazireu mw’Izrayel, nne vina kakela nikamihedho na ana Izrayel ena. Nsaka na namavuhulela Amós ana Izrayel adhile okala asadduweli anamagelela Anazireu omwa vinyu, txino atamelaga wattukulela olupa magano vina nikokomezo na ohimwa vinyu. (Am. 2:12) Anazireu anfwanyela oliba murima, wila awodhe wakwaniha nipikirhelo nawa vina okala ottiyana na attu ena.

8. Yotagiha ya Benjamin ehulibihile dhavi?

⁸ Na nikamihedho na Yehova enowodheya iyo vina oliba murima vina okala attu ottiyana masiki nikalaga attu a manyazo. Koona yotagiha ya Benjamin, ona vyaka kumi onkala o Noruega. Sabwa ya koddo o Ucrânia eskola ensunziye yahikosa matugumano wila awonihe okamihedha wawa elabo ejile. Anamasunzaya anfuniwana wiba jibo vina wabala dhabalo dhina kori dhottiyana-ttiyana dha bandera y’o Ucrânia. Wila arabele okala mmatugumanoni ninga aba a mwilaboni Benjamin wahitamela okala olapelana vang’onovi na attu ena ali vari va matugumanoya. Mbwenyi namasunziha waye mmodha wahimona vina bakuwa: “Kadhawuno  okuno ovanene. Iyo notene ninujedhela weyene!” Benjamin wahimususela namasunziha waye, noliba murima baloga: “Miyo kaddinkosa mpaddi ya politika vina kaddinkosa manifestasau. Mwebaribari Anamoona a Yehova enjene ahifugeliwa mukamburha sabwa ya okodda oraba koddo.” Namasunziha waye wahirumela mazu aye vina wahimwaddela wi iyene kafwanyela ovitaganyiha mmatugumanoni abale. Mbwenyi anyaskola akwaye ahiroma onvuza sabwaya yakoddeliye ovitaganyiha mmakanini abale. Benjamin wahidhugudheya vaddiddi vina bakala neena na wunla; mbwenyi masiki dhahene iyene ohawakula na mazu akene amwaddeliliye namasunziha waye. Vasogorhova, Benjamin wahawaddela amambali aye wi iyene wahizinddiyela wi Yehova wahimukamihedha obarela nroromelo naye.

9. Ninawodhe dhavi omwagalaliha Yehova?

⁹ Attu anozinddiyela wi iyo nili ottiyana sabwani ninomwiwelela Yehova. Iyo ninofuna oliba murima wi nawaddele attu ena wi nili Anamoona a Yehova, masiki mmabasani vina oskola. Apa vanonihu dhilobo dhittabwaga mwilaboni mpuno, enele okala yorutxa olaleya vina okalawo mowiwanana na magano a mBibiliani. (2 Tim. 1:8; 3:13) Kudduwale wi Yehova onowagalala aganonaga iyo nilibaga murima wi nikale ottiyana na attu ahinimulabela iyene.—Gano 27:11; Mal. 3:18.

OMWIKE YEHOVA VAMBURONI VOROMA MWIGUMINI MWAWO

10. Yakalelani elobo yorutxa Anazireu ovirihamo nikokomezo ninfwanyeya va Olebeliwa 6:​6, 7?

¹⁰ Kengesa Olebeliwa 6:​6, 7. Anazireu kafwanyela waddamela maningo a muttu okwile. Txino ninodhaga wubuwela wi okosa ejo kiyali elobo yorutxa, mbwenyi ejo yali elobo yorutxa vaddiddi mwa Anazireu, kokweliwa mmudhawa. Sabwani elemelelo ya nsaka nttile nali nawi muttu kookwa, attuya akale vakuvi na muruttu. (Jo. 19:​39, 40; Mer. 9:​36-40) Mbwenyi Anazireu kafwanyela ovirihamo dhilemelelo esi. Masiki agumanagana makattamiho aba a okweliwa, Munazireu wanfuniwanavi wakwaniha nipikirhelo naye, eji yanlagiha wi iyene wankana nroromelo noliba vaddiddi. Kaninaganyedha, Yehova wannavaha guru Anazireu wi awodhe ovilela makattamiho aba.

11. Elobo gani enfwanyelihu otanalela nigafunaga okosa yogana va muralani? (Koona vina foto.)

¹¹ Iyo ninoriha venjene nipikirhelo nimukoselihu Yehova. Eji enopatta dhogana dhehu  mwaha wa makani a murala. Iyo ninovilibihedha venjene wi nisapele murala wehu, mbwenyi txipo kaninttiya dhifunelo dha murala wehu osogorho wa efunelo ya Yehova. (Mt. 10:​35-37; 1 Tim. 5:8) Dila dhina iyo ninele okosa dhogana dhihinawagalalihe amudhehu, mbwenyi dhinamwagalalihe Yehova.

12. Mudhidhi wagumanana Alexandru makattamiho, elobo gani ekosiliye vina elobo gani ehikosiliye?

¹² Koona yotagiha ya Alexandru na mwadhiye, Dorina. Awene ahiroma omusunza Bibilia, mvirile yaka modha, Dorina wahigana otximiha masunzoya, iyene vina wanfuna wi mamune Alexandru attiye osunza vina. Na nriho vina na mukalelo woleleya, mamuneya wahimwaddela wi iyene kagattiyile omusunza Bibilia. Dorina kaziveliwe na monelo obo vina wahikosa muli-mwetemwene wila atximihe masunziho a Bibilia a mamunaye. Alexandru ohiloga wi iyene wantamela ononelamo sabwaya yakosela mwadhiye esilene, mbwenyi kiyali yovevuwa mwa iyene. Dila dhina, vamulogela Dorina mazu owali, owawa, iyene wandheliwa efunelo ya ottiya omusunza Bibilia. Masiki dhawene, Alexandru wahidhowavi amwekaga Yehova vamburhoni voroma mwigumini mwaye, mudhidhi wakene iyene wandhowavi amweddihaga mwadhiye nokwela, vina nriho. Sabwa ya yotagiha yapama ya Alexandru, Dorina wahigana wiyelela omusunza Bibilia, vasogorhova babatiziwa.—Koona mu jw.org vidiyu Alexandru na Dorina Văcar: “Onkwela onovilela, onowakoddelela murima attu” mu seriye “Ebaribari Enosaddula Egumi ya Attu.”

13. Iyo ninonihe dhavi wi ninomukwela Yehova vina ninowakwela anamudhi ehu?

¹³ Yehova muttanddi wa murala, iyene onfuna wi murala wehu wagalale. (Ef. 3:​14, 15) Akala iyo ninfuna wi nikane wagalala webaribari, ninofwanyela okosa dhilobo mowiwanana na efunelo ya Yehova. Txipo kuwaganyedhe wila Yehova onowagalala venjene agonaga guru yotene enkosiwe wila omulabele, modhela wazuzumela amudhawo vina watonyihedha okwela na nriho.—Rom. 12:10.

WALIBIHE ENA WI ÀTAGIHE ANAZIREU

14. Bani onfwanyelihu omulibiha na mazu ehu?

¹⁴ Otene ansakula omulabela Yehova anofwanyela okala omala-nawale wi atonyihedhe omukwela wawa modhela ovilibihedha wi awodhe omulabela. Dila dhina okosa ejuwene kahiye elobo yovevuwa. Ninawodhe dhavi wakamihedha ena ovilibihedha wi awodhe omulabela Yehova? Enowodheya wakamihedha modhela mazu ehu. (Job 16:5) Koddi  ahikalamo abali enagu mmulogoni mwawo anivilibihedha wila avevutxe egumi yawa wila awodhe omulabela Yehova? Weyo onowaziwa azombwe anlagiha oliba murima wila akale ottiyana na azombwe ena oskola masiki ejo ekalaga elobo yorutxa? Onowodha omubuwela mbali obe namasunza wa Bibilia onvilibihedha venjene wila awodhe okala ororomeleya, masiki agumanagana ofwarafwariwa na anamudhi? Kavilibihedhe okosa muli-mwetemwene wila wapangarhaze vina wawaddele mukalelo ontikina weyo na oliba wawa murima vina sabwa ya dhetene dhinimukoselani Yehova.—Filé. 4, 5, 7.

15. Ena anakamihedha dhavi abale ali mmabasani a mudhidhi wotene?

¹⁵ Dila dhina, enowodheya iyo wavaha nikamihedho abali ali mmabasani a mudhidhi wotene. (Gano 19:17; Aheb. 13:16) Jijuwene ekosile murogora dhahi owunuwelavo onkala o Sri Lanka. Iyene wahenjedhedhiwa kobiri na mparha wamuttambirhiha, nona wahigana wakamihedha arogora eli ali apionera wila awodhe okalavi mmabasani a mudhidhi wotene vowi angumanana makattamiho a ojombeliwa kobiri. Iyene wahigana wakamihedha opitxa myeri dhotedhene kobiri yanongani na kereditu. Mukalelo gani wokoddela otonyihedhile murogora oddu!

16. Elobo gani ensunzehu na Anazireu?

¹⁶ Kaninaganyedha, iyo ninosunza venjene na yotagiha ya Anazireu! Mbwenyi nipikirhelo na Anazireu, ninonisunziha elobo yattima mwaha wa Babi wehu wa wirimu, Yehova. Iyene onoziwa wi iyo ninofuna omwagalaliha, nona nivilibihedhe wila niwodhe wakwaniha nipikirhelo nimukoselihu mudhidhi wavipirheka iyo. Iyene ononiriha modhela onivaha gari ya omutonyihedha omukwela wehu. (Gano 23:​15, 16; Mk. 10:​28-30; 1 Jo. 4:19) Nipikirhelo na Anazireu, ninowoniha wi Yehova onowona guru enkosihu vina ononikwela mwaha wa dhotedhene dhinimukosela iyo. Ndoweni nikoseni muli-mwetemwene wi nimulabele Yehova, vina nikale omala-nawale wi nimulabele mpaka munwodhela iyo.