1-2. (a) Wubuwela mazu a Izaiya 41:10 amukamihedhi dhavi Murogora Yoshiko? (b) Yehova ottiyedhe nni mazu aba mpaka masaka abano?

MUROGARA wa Mukristu onkuweliwa Yoshiko, wahakela miselu dhokubanyiha. Dotoro wahimwaddela wi mwari mwa myeri dhing’onovi agahikwa. Elobo gani ekosiliye? Momaguva wahubuwela nlebo namuziveletxa, Izaiya 41:10. (Kengesa.) Wofwaseyene iyene wahimwaddela dotoro wi miyo kaddinova vowi Yehova ohiddittiddela na nlada naye. * Versu eji ehimukamihedha murogora oddu omukuluvela kakamwe Yehova. Versu yokokene enonikamihedha iyo vina okaana ofwasa nigagumanana masoso manddimuwa. Voroma, ndoweni nitamele ononelamo elogele Yehova mazu aba.

² Yehova wahimwaddela Izaiya oleba Mazu aba wi a’pangarhaze Ayuda afuna otxedheliwa elabo ya Babilónia. Elobo yina jawi Yehova wafuna wi miselu esi dhiwodhe wapangarhaza alabeli aye oromana nsaka nttile ofiyedha ovanene. (Iza. 40:8; Rom. 15:4) Ovano ninkalawo ‘nsaka norutxa’ ninotamela-wene nipangarhazo ntti.—2 Tim. 3:1.

3. (a) Mavuhulo gani anfwanyeya va Izaiya 41:10, ankosa epaddi ya nlebo na yaka ya 2019? (b) Iyo nintamelela nni nikuluvelo ntti?

³ Mwari mwa mutoma obu ninele osekesera mavuhulo mararu alogile Yehova va Izaiya 41:10: (1) Yehova onakale na iyo, (2) iyene ddi Mulugu wehu, vina (3) iyene onele onikamihedha.  Iyo ninotamela venjene nikuluvelo ntti * sabwa yawi, moligana na murogora Yoshiko, masaka abano iyo ninogumanana makattamiho manddimuwa mwigumini mwehu. Ninovilela obure wa mwilaboni. Enaya wa iyo anogumanana otxigiwa na alamuleli a elabo. Noona ndoweni nifwaseyele ononelamo mavuhulo aba.

4. (a) Nikuluvelo noroma ninasunze iyo ttivi? (Koona yowenjedhedha.) (b) Mazu a Yehova anooniha wi ononikwela bavi? (c) Oniwamo dhavi ogewaga mazu aba alogile Yehova?

⁴ Nikuluvelo noroma na Yehova ttintti: “Kuwove, vowi miyo ddili na weyo.” * Yehova onotonyihedha wi oli na iyo sabwani iyene ononizuzumela. Koona okwela onddimuwa onnivaha Yehova. “Weyo oddikoddelela vamentoni vaga.” “Ddinouriha, ddinoukwela.” (Iza. 43:4) Mwilaboni mwetemwene kayiwo elobo enamuzuzumihe Yehova otonyihedha okwela nlogo naye vina iyene kanattiye weddeyana waye na iyo. (Iza. 54:10) Okwela wa Mulugu vamodha na wandaneyana waye onolibiha nroromelo nehu. Iyene kanattiye otonyihedha nibarelo naye ninga mwakoseliye na mukwaye Abramu (Abrahamu). Yehova wahimwaddela: “Kuhove elo Abramu! Miyo dddinoubarela.”—Wita 15:1.

5-6. (a) Ninziwa dhavi wi Yehova ohikana efunelo ya onikamihedha mudhidhi ongumanana iyo masoso? (b) Ninsunzavo nni na yotagiha ya Yoshiko?

⁵ Nigafwanyiwa masoso a mwigumini Yehova onotamela onikamihedha, iyo ninoziwa sabwani iyene ohiniroromeliha: “Vanabuwegewe minje dhovaya, miyo ddinakalege na weyo; manjeyá kanauririmihe. Ogadha ovira va mothoni, kunavyevo; wavuwa wa motho kunautototxe.” (Iza. 43:2) Mazu aba antapulela nni?

⁶ Yehova kalogile wi onele ogomiha masoso ehu, mbwenye iyene ologile wi kaddinauttiye oririmela na “minje” obe ogwela “vamothoni” onautoteleni masoso  okala-nokala-wene. Yehova ononivaha nikuluvelo nawi onele onikamihedha ‘wabuwa’ obe okwaranya makattamiho aba. Koddi iyene onakose dhavi? Mwa onivaha okurumuwa ninele owodha okalavi waweddeyana masiki nifunaga okwa. (Iza. 41:13) Yoshiko ologiwe ddima dhivirile, ohiwodha wona ejuwene. Mwanaye ohiloga wi: “Yali elobo yotikiniha woona ofwaseya wa mmani. Nihona wi Yehova wahinvaha murenddela wa mmirimani. Ofiyedha labo nikwiliye, iyene wanloga nlibelo na miselu dha Yehova na attu amujiha murobwe vina aredda ena.” Yotagiha ya Yoshiko ennisunziha nni? Jofuneya okuluvela malibelo a Yehova, “Miyo ddili na weyo,” eji elobo enwodha onilibiha okana guru dha owanana masoso ehu.

7-8. (a) Nlibelo nanewili nilogile Izaiya ttivi, nanda nintapulela nni? (b) Yamuttukulele Yehova ologa mazu aba: ‘Kamugurumele’ na Ayuda atxedheliwe o Babilóbia txini? (c) Mazu ali va Izaiya 46:3, 4 anwodha wafwasiya adhari aye bavi?

⁷ Koona nikuluvelo nanewili nilebile Izaiya: “Kugurumele, vowi miyo ddili Mulugu wawo.” Mazu aba ogurumela antapulela eni? Mazu oroma a versu eji, ‘ogurumela’ entapulela “okala ovyang’anela ojedhela yotxutxa ehinziwiwe enfuna oupadduwela” obe “wang’ana okotti moligana na muttu ottiddiwe wova.”

⁸ Yehova wavahele nni nikuluvelo ntti nawi ‘kamugurimele’ Ayuda adhowa otxedhiwa o Babilóniya? Iyene wanziwa wi abale adhowa elabo ejile angurumela na wova. Elobo gani yatotela wova? Ayuda komala vyaka 70 wutxedhiwani o Babilóniya, Yehova agahalabihedha anyakoddo a akadda Medo-Pérsia. Awene agamulupela Babilóniyá vina afurule ayuda. (Iza. 41:2-4) Mugawonele akadda Babilóniyá vamodha na attu ena amwiddani afiyaga, awene agahilibihana mukalelani elogaga wi: ‘Mulibe murima.’ Agahasasanya amilugu onyengetta, na njedhelo nawi agahakamihedha. (Iza. 41:5-7) Mwejuwene, Yehova wowakurumutxa ayuda atxedhiwe o Babilóniya wi atonyihedhe ottiyana wa ana Izrayel na malogo meena, Yehova wahiloga: “Kewa weyo Izrayel, nlogo na Jakob, mwimeleli waga . . . Kugurumele, miyo ddili Mulugu wawo.” (Iza. 41:8-10) Koona eji elogile Yehova: “Miyo ddili Mulugu wawo.” Apa Mulugu wela walibiha Ayuda ororomeleya wi k’adduwalile. Yehova wahikalavi—Mulugu wawa, awene vina ahikalavi nlogo naye. Yehova wahenjedhavo: “Miyo ddinoukalihani . . . ddinouvunani.” Mohaganyedha, mazu aba ahalibiha vaddiddi abale atxedheliwe o Babilónia.—Kengesa Izaiya 46:3, 4.

9-10. Iyo ninkoddela nni ogurumela? Kavaha yotagiha.

⁹ Masaka abano attu a mmuruddani anogurumela vaddiddi na makattamiho a mwilaboni. Joziweya wi iyo vina ninogumanana makattamiho akokene. Mbwenye iyo kaningurumela. Yehova ononiwaraliha mwa ologa wi: “Miyo ddili Mulugu wawo.” Oziwa ejiwene ennikamihedha dhavi okala wofwaseya?

¹⁰ Karoma otanaalela yotagiha eji: Attu eli ankosa oleddo na balawu, anittaniwa Joau na Bruno. Mwavenevo eroma woba pevo yowali engulugudha balawuya, attu alimo anowiwa mazu anloga wi: “Mwabale sinto yovibarelana. Ninele ofwanyiwa pevo yawopiha mwa mudhidhi mung’onovi.”  Joau oroma wova vaddiddi. Venevo ohiwa wili dhologa dha namattekenya balawuya eraga: “Kamugurumele. Ninele ofiya deretu onloga ddimiyo mwinya onttekenya.” Joau onovuruwana mazuya mbwenye onogurumelavi, onologa “Txini enanikuluvelihe?” Agamwang’ana Bruno, oli wofwaseyene kanova. Ononvuza: “Onwodha dhavi okala wofwaseyene dhawene, kunova?” Bruno onomwag’ana bagateya nanda onologa: Oddo oliwo omakinaniwa ddi papayaga! Bruno omwaddela vina wi: “Ddinfuna dduwaddele enkosaga iyene. Weyo ogamala oziwa dhilobo dhinkosaga iyene, kunove vina.”

11. Ninsunza eni na yotagiha ya anamakosa oleddo eli?

¹¹ Nisunzavo nni na yotagiha eji? Moligana na Bruno, iyo kaningurumela sabwani nihimuziwa deretu Babihu, Yehova. Ninoziwa vina wi makattamiho ehu agatatamuwa ninga pevo yowali, Yehova onele onikamihedha owodha okwaranya. (Iza. 35:4) Sabwa ya omukuluvela iyene, ninowodha okala wofwaseyene oku attu a mwilaboni agurumelaga na wova. (Iza. 30:15) Ninomutagiha Bruno mwawi iyo vina ninowawaddela attu ena sabwa enimukuluvela iyo Mulugu wehu. Awene vina anele owodha wona wi Yehova onowodha wakamihedha na makattamiho awa.

12. (a) Nikuluvelo na n’eraru ninfunihu otanalela ttivi? (b) Mazu aba onere olamulela na ‘mono waye,’ annubutxedha eni?

¹² Nikuluvelo na n’eraru na Yehova ttintti: “Miyo ddinoulibiha, ddinoukamyedha.” Izaiya wahimala ologa kapitulu ya mundduni mukalelo ogalibihile Yehova nlogo naye mologa wi: ‘Nabuya Mulugu onofiya  na guru dhaye dhotene, Iyene onele olamulela na mono waye.’ (Iza. 40:10) Mbibiliani mazu aba ‘mono’ dila dhinjene entapulela ewodhelo. Noona mazu aba ‘onele ottonga na mono waye’ anonubutxedha wi Yehova mulamuleli wa ewodhelo. Dila dhinjene nsaka na mundduni, iyene ohilabihedha ewodhelo yaye wi abarelena nlogo naye, Yehova kasadduwile onowabarela abale animuroromela.—Olib. 1:30, 31; Iza. 43:10.

13. (a) Yehova onakwaniha nlibelo naye eganipadduwela eni? (b) Nlibelo gani ninkosa Yehova ninivaha guru na nroromelo?

¹³ Nigafwanyiwa ofwara-fwariwa Yehova onowakwanihedha mazu aba: “Miyo ddinoulibiha.” Dhilabo dhina masaka abano attu annifwara-fwara anokosa muli mwetemwene wila emetxe mabasa ehu a olaleya obe ogomiha nikuru nehu. Mbwenye iyo kaninzuzumetxa na esene. Yehova ohiloga elobo enivaha guru na nroromelo. Iyene ohilibela: ‘Nona kaiwo futti enawodhe ounonga.’ (Iza. 54:17) Nlibelo ntti ninonubutxa mapadduwo mararu.

14. Ninkoddelani otikina nigafwara-fwariwaga?

¹⁴ Yoroma, sabwa yokala anamafwara a Kristu, ninoziwa wi nili attu aniddiwa. (Mt. 10:22) Yezu wahimala ologa wi anamafwara aye agahifwara-fwariwa ttabwattabwa masiku abano omariha. (Mt. 24:9; Jo. 15:20) Sabwa yanawili, ottiya ofwara-fwariwa, amwiddani ehu anonisasanyedha futti wi anitolotxe. Awene anowodha opupurutxa dhilobo ninga, ologa ottambi obe onobela owali. (Mt. 5:11) Yehova onottiya wi amwiddani ehu anifwara-fware. (Ef. 6:12; Ovuh. 12:17) Mbwenye kaninfwanyela wova. Sabwaya?

15-16. (a) Elobo yan’eraru enfwanyela iyo wubuwela txini vina Izaiya 25:4, 5 ononiha dhavi wi ejiya ebaribari? (b) Izaiya 41:11, 12 onloga vilobo gani dhinapadduwele abale aniviyettekela owana na iyo?

¹⁵ Karoma wubuwela elobo yan’eraru  enfwanyelela iyo otanaalela. Yehova ohiloga wi ‘Kayiwo futti’ enettekeliwenyu ‘enawodhe ounongani.’ Moligana na rhinga enwodha onibarela ekupekupe ya pevo, Yehova ononibarela na ‘ekupekupe ya amwiddani ehu.’ (Kengesa Izaiya 25:4, 5.) Amwiddani ehu txipo kananipemberhe, sabwa yawi Yehova onowodha osaddula obure onkoseliwa iyo.—Iza. 65:17.

¹⁶ Elobo yina ennivaha nikuluvelo na Yehova jawi iyene onottaga onaddela esile dhinfuna wapadduwela ‘amwiddani ehu.’ (Kengesa Izaiya 41:11, 12.) Amwiddani ehu anodha ottiddiha motto wi anitolotxe, mbwenye omagomelowa: Otene ‘anere otolotxiwa, arimele.’

17-18. (a) Omwengesa Bibilia enikamihedha dhavi omukuluvela Yehova? Kavaha yotagiha. (b) Otanaalela nlebo na Yaka ya 2019 onwodha dhavi onikamihedha?

¹⁷ Ninofuniwana omukuluvela Yehova; mwawi dhawo, jofuneya omuziwa pama. Mukalelo mmodha wa omuziwa Yehova omwengesa Bibilia. Bibilia ohikaana dhologa dhebaribari dhinoniha mukalelo obarelile Yehova nlogo naye nsaka na mundduni. Wengesa miselu esi dhinolibiha nikuluvelo nehu niziwaga wi iyene onele onibarela.

¹⁸ Karoma otanaalela nladdaniho nokoddela nilogile Izaiya nintonyihedha wi Yehova ononibarela. Iyene onomwittana Yehova ninga mukumbuzi, alabeli aye ninga mabila. Izaiya ohiloga: ‘Na mono waye onowakukusa vamodhavene anamabila vina onowayala odduni.’ (Iza. 40:11) Nigaziwa wila Yehova ononikubarela, ninokala wofwaseyene. Wi anikamihedhe okala wokurumuwa mudhidhi ongumanana iyo makattamiho, mwimeleli wororomeleya wa malago ohisakula mazu aba a Izaiya 42:10 wi akale nlebo na yaka ejino, “Kugurumele, vowi miyo ddili Mulugu wawo.” Katanaalela nikuluvelo ntti na Yehova. Iyene onele oukamihedha owodha okwaranya makattamiho a musogorho.