1-2. (a) Txini enona Yehova agang’ana vati ona muttitti munddimuwa ontugumanela Siyari ya Nabuya? (Koona foto eli omaromo.) (b) Nivuzo gani ninfwanyelihu okalela mento mwari mwa mutoma obu?

KOBUWELA esile dhinona Yehova agang’ana velaboni ya vati, onavo nikuru na attu matxikwi na matxikwi batugumanele Siyari ya Nabuya. Iyene kanona bahi muttitti wa attu; enkosiye ja omwang’ana muttu-muttu oli vamutugumanoniva. Kuloga, iyene onomona muttu onzuzumela otugumanela vyaka dhotedhene muttupo obu. Mwari mwa muttitti obu wetene, iyene onomona ole onivilibihedha odha masiki mwari mwa masoso menjene. Akalawo attu ana elemelelo ya ojomba matugumano mena mbwenye mutugumano wa Siyari ya Nabuya, awene anovilibihedha odha, sabwa ya ttima enddimuwa vaddiddi enani. Yehova vina onowawona abale anroma-wene odha va mutugumanoni obu.

² Mohaganyedha, Yehova onottittimiheya agawona attu enjene atugumanelaga muttupo obu. (Lk. 22:19) Mbwenye, Mulugu wehu kanzuzumeletxa muttengo wa attu anda vamattangani aba. Enzuzumeletxiye ji sabwa enimukosiha muttu odha vamutugumanoniva. Mwari mwa mutoma obu, iyo ninela origanela wakula nivuzo n’ofuna okalela mento: Txini ennikosiha otugumanela mattanga aba vyaka dhotedhene, masiki na matugumanoya a vari va sumana abuwene annivahaga Yehova masunziho manddimuwa sabwa ya okwela waye?

3, 4. (a) Txini ennikosiha iyo otugumana? (b) Matugumano ehu anoniha wi iyo nili attu a ekalelo gani? (c) Mazu aba a 1 Korinto 11:23-26 annikokomeza okosa nni, vina ekalele nni yofuneya iyo ohijomba Osiyarini wa Nabuya?

³ Ennikosiha iyo otugumana vari va sumana, jawi matugumano aba anokosa mpaddi wa webedha wehu. Yina jawi omatugumanoni  ninosunzihiwa na Yehova. Attu abale ana ekalelo ya ovittukulela akana elemelelo yawi awene kanfwanyela osunzihiwa elobwene. (3 Jo. 9) Mottiyana-mwene, iyo nili womala na wale wi nisunzihiwe na Yehova vina na nikuru ninvahiye mabasa a oneddiha.—Iza. 30:20; Jo. 6:45.

⁴ Otugumanela wehu masunziho a Mulugu onowoniha wi iyo nili attu oviyeviha—anwararela masunziho vina ankaana efunelo ya osunzihiwa. Muttupo obu wa Okwa wa Yezu ontugumanelihu omattiyu omodha bahi, kanintugumanela sabwa yawi ninomageleliwa, ennikosiha otugumanela jawi nili attu oviyeviha, oniwelela nlamulo na Yezu nawi: “Ejiyá eragani, muddubuwelaga miyo.” (Kengesa 1 Korinto 11:23-26.) Mutugumano obu onowenjedha njedhelo nehu n’esile dhipikireliwehu ovahiwa musogorho vina ononubutxedha onikwela wa Yehova. Mbwenye Yehova onoziwa wi iyo ninofuna olibihiwa murima vina owaralihiwa; kahiye bahi nsaka nimodha va yakani. Noona iyene ononivaha matugumano a vasumanani, vina ononikokomeza ohijombelaga masunziho aba. Onviyeviha ddule oniwelela dhinlogiwa. Iyo ninokala mudhidhi mwinjene nisasanyedhaga vina nitugumanelaga mutugumano obu.

5. Attu oviyeviha anrumeelela nni niwobo na Yehova?

⁵ Vyaka dhotedhene, abale ana ekalelo ya oviyeviha anorumelaga niwobo na Yehova na osunzihiwa na iyene. (Iza. 50:4) Awene anoziveliwa okala Vamuttuponi obu, eji enowattukulela odhaga wona matugumano meena. (Zak. 8:20-23) Iyo ninosanzaya sabwa ya osunzihiwa vina weddihiwa na Yehova, ‘mwameleli wehu vina mfuruli wehu.’ (Masal. 40:18) Koddi, elobo gani egattabihile murima wehu—obe eganikalele ya ttima—opitta orumela niwobo na osunzihiwa na Yehova vamodha na mwanaye Yezu, odduwene onimukwela iyene na murima waye wetene?—Mt. 17:5; 18:20; 28:20.

6. Oviyeviha onawodhiha dhavi attu odhowa omatugumanoni a wubuwela okwa wa Yezu?

⁶ Vyaka dhotedhene, iyo ninowawobela attu otene Muttupo wa Wubuwela Okwa wa Yezu. Attu ottorora murima anorumela niwobo nehu. Karoma wona yotagiha eji: Vyaka dhinjene dhivirile, wahikalawo mulobwana dhahi wavahiwe niwobo na Wubuwela Okwa wa Yezu, mbwenye avahiwaga wahimwaddela mbaliya wi kanadhowe omatugumanoniwa. Labo na mutugumanoya, mbali oddule wanvahile niwobona, wahitikina venevo vamonileyi mulobwana oddule eddaga vatakulu va Numba y’Omwene; mulobwanaya vina wahitikina vaddiddi sabwa ya ekalelo yamoyeliwiye; venevo ohiroma odha omatugumanoni otene a vari va sumana. Mwebaribari, iyene ojombile dila ttaru bahi mwari mwa yaka modha. Txini emukosihile ozugunutxa murima waye? Sabwaya jawi iyene wali muttu wa ofwewa murima, wanna efunelo ya ovisaddulela. Mbali wamuwobile mulobwana oddule, musongorhomwa ohiloga dhahi, “Iyene muttu woviyeviha vaddiddi.” Yehova ohona murima wa mulobwana oddu ofiyedha omweddiha, ddabuno iyene ohimala obatiziwa.—2 Sam. 22:28; Jo. 6:44.

7. Esile dhinsunzihu mmatugumanoni vina dhinengesihu mBibiliani dhinniwodhiha dhavi okala woviyeviha?

⁷ Esile dhinsunzihu omatugumanoni vina dhinsunzihu mBibiliani dhinoniwodhiha okala attu oviyeviha. Sumana enfwarela labo na Wubuwela Okwa wa Yezu, mmatugumanoni mwehu munologiwaga vaddiddi dhotagiha dhinoniha oviyeviha wa Yezu mwa oniperhekela egumi yaye bikala mukutto onttimiha dhottega dhehu. Vina malabo anfwarela Siyari ya Nabuya, iyo ninowubutxedhiwaga wengesa malebo a Bibilia anloga mapadduwo a okwa wa Yezu vina ovenyihiwa mukwani mwaye. Dhinsuzihiwa iyo mmatugumanoni aba vina dhinengesihu mBibiliani sabwa ya mapadduwoya, dhinowenjedha ntamalelo nehu mwaha wa mukutto onikosele  Yezu. Iyo ninottukuleleya okana merelo a oviyeviha vina ekalelo ya okosa ofuna wa Yehova, masiki ekalaga yorutxa.—Lk. 22:41, 42.

8. Yezu wonihile dhavi oliba murima?

⁸ Iyo vina ninotagiha ekalelo ya Yezu ya oliba murima. Nubuwelaga oliba murima olagihiliye ahinakwa. Iyene wanziwa wi labo na amwiddani aye ompuja, omuwasula vina omukomela vapingirhizini nela waddamela. (Mt. 20:17-19) Iyene na oliba murima wotene ohirumela okwa. Mfiyedhe mudhidhi wa Yezu okwa, ohawaddela anamafwara aye ororomeleya abuwene ali na iyene mmunddani mwa Jetsemani; ohiloga dhahi: ‘Venyani ndoweni. Onani! Ole onda oddiguliha ofiya.’ (Mt. 26:36, 46) Mfiyedhe amwiddani aye wi amuttidde, iyene kavitale, ohibudduwa vina ohiloga mazu awi, ddi miyo ddili veneva, vina ohawaddela anyakoddo adheele omuttidda wi attiye anamafwara aye adhowe. (Jo. 18:3-8) Oliba murima ninga oku onddimuwa-wene! Masaka abano ankalihuwo vina, Akristu ottikitteliwa vamodha na mabilaya meena anovilibihedha otagiha oliba murima wa Yezu. Antagiha dhavi?

9. (a) Enlogeliwa nni wi enofuneya oliba murima wi noonege matugumano otene? (b) Yotagiha yehu ya oliba murima enawaraliha dhavi abalihu afugeleliwe nroromelo nawa?

⁹ Iyo ninofuniwana oliba murima wi noonege matugumano otene, masiki mwari mwa makattamiho-makattamihovi. Abalihu na arogorehu ena anowoona matugumano masiki mokubanyani, mukumuwani vina mubulelani. Ena anodhowa omatugumanoni masiki afwara-fwariwaga na amudhawa obe anamattonga a elabo. Oliba murima wa abali aba, onowawaraliha abalihu anfugeliwa sabwa ya nroromelo nawa. (Aheb. 13:3) Agewa wi iyo ninodhowavi nimulabelaga Yehova masiki mwari mwa ofwara-fwariwa, anottukuleleya owaraliha vina wimetxavi nroromelo nawa, enjedhagavi olibiha murima wawa na nikuluvelona. Murumiwi Paulo wahipadduweliwa esene dhinlogihu veneva. Valiye elabo y’o Roma, iyene wakala wosanzayene venevo vewiye wi abali anomulaba Mulugu munroromeloni. (Fil. 1:3-5, 12-14) Enowaganyedhiwa wi bahalile malabo mang’onovi wi afuruliwe, obe bamale ofuruliwa, wahalebela Ahebreu. Mukartani eji, iyene wahatutela Akristu abale wi akalelevi “ntidi okwelana n’ekalelo y’enamudhi” vina ahitxelelege otugumana vamodha.—Aheb. 10:24, 25; 13:1.

10-11. (a) Bani anfwanyelihu wawobela omatugumanoni wa Wubuwela Okwa wa Yezu? (b) Nivuru ntti na Éfeso 1:7 ninoniha dhavi wi ejoya jofuneya okosa?

¹⁰ Iyo vina ninowoniha oliba murima nigawobelaga amudhihu, anamalaba akwihu vina amwanddani ehu wi adhe omuttuponi wa Wubuwela Okwa wa Yezu. Iyo ninawobela nni attu aba? Ennikosiha dhahene jawi iyo ninotamaalela vaddiddi okwela onilagihile Yehova na Yezu, noona ninfuna wi akwihu anonelemo okwela oku venevo va Siyarini ya Nabuya. Ninfuna wi awene vina aziwe mperhe onani wa opurelamo ‘mahala’ a Yehova abuwene onihiliye mwari mwa mukutto.—Kengesa Éfeso 1:7; Ovuh. 22:17.

 ¹¹ Nigonihaga oliba murima wehu mwa otugumanaga vamodha, ninotonyihedha ekalelo yina ya ttima vaddiddi, ekalelo eji Mulugu na Mwanaye ahilagiha vina.

12. (a) Matugumano ehu anenjedha dhavi omukwela wehu Yehova na Yezu? (b) 2 Korinto 5:14, 15 onnikokomeza okosa nni, ejuwene enoniha omutagiha wehu Yezu?

¹² Okwela onimukwelihuna Yehova na Yezu ononittukulela otugumana. Vina dhinsunzihiwehu omatugumanoni dhinowinjiviha omukwela wehu Yehova na Mwanaye. Malabo otene iyo ninowubutxedhiwa mmatugumanoni mabasa anikosele awene. (Rom. 5:8) Mwa ologa dha mutugumano wa muttupo wa Wubuwela Okwa wa Yezu, venevo iyo ninowonihiwa mvayelo wa okwela waye, masiki akalagawo ena ahinfuna woniha ntamaalelo nawa. Odhaliwa ntamaalelo ononikosiha omutagiha Yezu mwari mwa okalawo wehu wa labo na labo. (Kengesa 2 Korinto 5:14, 15.) Mwawenjedhedha, murima wehu onottukuleleya omuttittimiha Yehova sabwa ya onivaha mukutto. Ekalelo yina ya iyo otamalela ja oromola mazu anoniha ntamaalo ntti mmatugumanoni mwehu.

13. Niwodhe dhavi woniha omukwela wehu Yehova na Mwanaye? Katapulela.

¹³ Enowodheya iyo woniha omukwela wehu Yehova na Mwanaye mwa okosaga guru wi nikamihedhe mabasa-mabasavi aniwanana na ofuna waye. Masaka mena iyo ninovilibihedhaga wi noone matugumano ehu. Dhihikalawo milogo dhintugumana na matxiguwo attu otene agamala oworuwa omabasani, bali olemene. Dhina dhintugumana omamalelo wa sumana malabo anfuna attu ena ovumela mabasiwa. Yehova onovaha ttima guru esi dhotene dhinkosihu dha ozuzumela matugumano ehu masiki wolemene? Txibarene iyene onottittimiha-wene! Kuloga dhahi, oliba murima wehu ogenjivaga, pavenevo vansanzaya Yehova sabwa ya okwela onimukwelihuna.—Mk. 12:41-44.

14. Yezu onittiyedhi yeddelo gani ya wakwela attu akwihu?

¹⁴ Yezu ohinilagiha yeddelo ya wakwelana attu akwihu. Iyene wali womala-na-wale wi akwele anamafwara aye vina wanoniha labo na labo wi efunelo yaye yali ya wazuzumela awene voroma ottiya ovizuzumelavi. Iyene wahifiyedha wavuluvyiha vina watxenjerhiha anamafwara aye masiki valiye mukubanyani. (Lk. 22:39-46) Iyene kazuzumeletxa esile dhafuniye wi  akoseliwe mbwenye wazuzumeletxa esile dhafuniye wi akosele attu akwaye. (Mt. 20:28) Omukwela wehu Yehova na abalihuyá ogenjivavi, ninela okosa guru wi nitugumanele Mattanga a Siyari ya Nabuya veli-veli nikalaga vamodha malabo a matugumano ehu a vasumanani.

15. Yofuna yehu ja wakamihedha ani?

¹⁵ Iyo nili mumodhani vamodha na Akristu akwihu otene, ninoziveliwa okala vamodha na awene vina nawobelaga aswa odha ovitaganyiha na iyo. Vowi yofuna yehu ja wawirela “dhapama athu otene, makamaka amudhihu akristu;” apa ninilela nawobolele abale amuttawile Yehova. (Gal. 6:10) Nigawobelaga omatugumanoni wehu, ninowoniha wi ninowakwela, ttabwa-ttabwa nigakukuselaga omuttuponi wa Wubuwela Okwa wa Yezu. Muttu onimunyanyala Yehova, agamwiyelela iyo ninosanzaya vaddiddi, osanzaya oku kwakakene onkaana Yehova na Yezu; Yehova ddi Babihu ddi mukumbuzi wehu.—Mt. 18:14.

16. (a) Ninawodhe dhavi olibihana muttu na mukwaye, vina matugumano ehu annikamihedha dhavi? (b) Enlogeliwa nni wi obu mudhidhi waderetu wa vayakani wa wubuwela mazu a Yezu alebiwe va nivuruni na Joau 3:16?

¹⁶ Malago anvahiwehu baba, sumana eso dhindawo nawobe attu otene anwodhihu wafwanya wi akale vamuttuponi wa Wubuwela okwa wa Yezu onakosiwe labo na 19 mweri wa Abrili, 2019. (Koona kasha “Onela Wawoba?”) Yaka ejino eromile, ninfuna nilibihagane muttu na mukwaye nitugumanaga vamodha mmatugumanoni a vari va sumana annivaha Yehova. Veneva vanaddamela omagomo wa elabo, enofuneya iyo otugumanaga wi nikalege woviyevyene, w’olibene murima vina wokwela. (1 Tes. 5:8-11) Ndoweni nunuwihenivi omukwela wehu Mulugu vamodha na mwanaye, nonihaga na murima wehu wotene wi ninotamaalela mabasa anikoselani!—Kengesa Joau 3:16.