1-2. (a) Yezu witele nni wubuwela wa okwa waye na mukalelo wovevuwa? (b) Mukalelo wa Yezu onfunihu osunza buvi?

ONOWODHA ologa dhimpadduwa siku na Wubuwela Okwa wa Kristu? Mohaganyedha ddabuno jamakamaka wubuwela okwa wa Yezu Kristu. Sabwaya? Sabwani wubuwela okwa wa Yezu Kristu elobo yamakamaka mwa iyo. Obu muttupo ohinrutxa okosawa. Nivivuze, ‘Siyari eji ekalelini yawireya yohirutxa?’

² Mwari mwa mabasa aye olaleya, Yezu wanloga ebaribari ya mazu a Mulugu n’ekalelo yohirutxa ononelamowa, attu annonelamo masunziho aye n’ekalelo momaguva. (Mt. 7:28, 29) Nona, iyene ohinisunziha marhe a wubuwelana * okwa waye n’ekalelo yohirutxa. Yezu otanalela okwa waye vina ohiloga dhilobo dhina ahinatti okwa. Ddabuno ninotanaalela, oviyeviya waye, oliba waye murima vina okwela webaribari, nona iyo ninofwanyela otagiha mikalelo dhaye.

3. Dhologa dha Mateu 26:26-28, dhinoniha dhavi wi Siyari yitile Yezu kinrutxa vina mukatte na vinyu dhintapulela nni?

³ Yezu ohita muttupo wa Wubuwela okwa Waye valiye na anamafwara aye ororomeleya 11. Iyene ohisaddulela mattanga a paskwa bakala siyari yohirutxa osasanyedhawa. (Kengesa Mateu 26:26-28.) Ohilabihedha mukatte wotowa emela na vinyu. Yezu wahawaddela anamafwara aye wi  dhilobo esile bili dhatapulela maningo na nikami nahana yottega yafuniye waperhekela awene. Anamafwara aye katikinile na muttupo obule muswa wohirutxa. Sabwaya?

4. Malago amulagilena Yezu Marta annikamihedha dhavi ononelamo Siyari yohirutxa ekosile Yezu?

⁴ Kobuwela dhipadduwile muvirele myeri dhing’novi, mwari mwa vyaka ttaru dha mabasa a Yezu velaboni ya vati; wahidhowa wawona akwaye—Lazaro, Marta na Maria. Masiki vadhowileyevi n’efunelo ya waredha vina wawona akwaye, iyene wahiroma wasunziha attu. Marta wali venevo, mbwenye wahizuzuma vaddiddi asasanyedhaga dhoja dha aleddo. Onaga esuwene, mofwaseya-mwene Yezu ohimusisigula Marta, wahimukamihedha okaana moonelo wawi kiyali yofuneya ozuzumela opiya dhoja. (Lk. 10:40-42) Musogoromwa, mwari mwa mudhidhi mung’onovi ohiperheka egumi yaye akwanihedhaga malago aye. Iyene wahittukulela vadhulu Siyari yohirutxa. Ninsunzavo nni na mazu a Yezu?

5. Siyari eji yohirutxa enoniha wi Yezu muttu w’ekalelo gani, vina ekalelo eji eniwanana dhavi na Filipi 2:5-8?

⁵ Mwa dhilobo dhotene dhaloga Yezu vina dhakosiye, wankosa na ovyeviha. Kavali waganyedha wi iyene txibararene ohitonyihedha oviyeviha ofiyedha siku na okwa waye velaboni ya vati. (Mt. 11:29) Iyene wanziwa wi komala operheka mukutto munddimuwa wa wobolelana nlogo na attu, Yehova agahinvenyiha mukwani vina agahinvaha mpaddo wa nttittimiho wirimu. Masiki egali dhawene iyene kavittukulele modhela okosa mattanga manddimuwa a wubuwela okwa waye. Noona iyene wahawaddela anafwara aye wi vyaka dhotene obuwelege siyari eji yohirutxa. (Jo. 13:15; 1 Kor. 11:23-25) Siyari eji yohirutxa enoniha wi Yezu kavittukulela na omuttu waye. Iyo ninohagalala vaddiddi na mikalelo esi dha oviyeviha dha Mwene wehu wawirimu.—Kengesa Filipi 2:5-8.

6. Ninawodhe dhavi otagiha oviyeviha wa Yezu masiki nigafanyiwa makattamiho?

⁶ Ninawodhe dhavi otagiha oviyeviha wa Yezu? Modhela wika dhofuna dha attu ena vasogorho va dhofuna dhehu. (Fil. 2:3, 4) Kobuwela omattiyu womariha wa Yezu velaboni ya vati. Iyene wanziwa wila agahittabuwa mpaka okwa, nona wahazuzumela anamafwara aye, vowi wanziwa wi agahitabutxiwa mwaha wottukula nzina naye. Nona omattiyu  wantero wahasunziha, wahalibiha vina wahapangarhaza anamafwara abale. (Jo. 14:25-31) Yezu na oviyeviha waye wanazuzumela attu ena ottiya ovizuzumela mwinyene. Txibarene, Yezu onivaha yotagiha yaderetu!

7. Yezu otonyihedhile dhavi okwela waye modhela wita Siyari ya Nabuya?

⁷ Mmaleli Yezu wita Siyari ya Nabuya, iyene ohitonyihedha oliba murima. Na mukalelo gani? Yezu ohirumeela okosa efunelo ya babe masiki aziwaga wi agahibeddiwa vina agahipiwa ninga timbwini. (Mt. 26:65, 66; Lk. 22:41, 42) Yezu wahikalavi wororomeleya wi akoddelihe nzina na Yehova, amelele olamulela wa Mulugu vina afugule dila ya oleveleliwa dhottega dha nlogo na attu wi afwanye egumi yamukalakala. Mudhidhene obule, Yezu wahaswagiha anamafwara aye mwaha wa esile dhafuna ogumanana awene.

8. (a) Txini yawaddele Yezu anamafwara aye ororomeleya? (b) Mmalele Yezu okwa anamafwara aye atagihile dhavi oliba murima waye?

⁸ Yezu ohitonyihedha oliba murima mwa ottiya dhifunelo dhaye azuzumelaga dhojombeliwa dha anamafwara aye ororomeleya. Mmalele Juda wanyanyala, Yezu wahita Siyari yina na anamafwara aye ahalevo, Siyari eji yali yopurelamo mwa anafwara abale attomeliwe okala amwene vamodha na iyene, vowi ahimala omuja vamodha namakwanthani wa nipagano niswa vina ahinonelamo ttima ena nikami na Yezu. (1 Kor. 10:16, 17) Wi akamihedhe ononelamo ettomo yawa yokala vamodha wirimu, Yezu wahawaddela anamafwara aye ejile enafunana Babiwa wa wirimu. (Jo. 15:12-15) Yezu wahawaddela anamafwara aye wi agahigumanana makattamiho. Iyene wahalibiha ofwara mweddelo waye, vina wahapanga wila anfwanyela ‘omaga murima!’ (Jo. 16:1-4a, 33) Vyaka  dha vasogorhova anamafwara a Yezu ahidha okaana ekalelo ya watabuwela akwawa veli-veli alibihaga nroromelo nawa. Awene kavizuzumela anyene, yofuna yawa yali ya okamihedhana muttu na mukwaye mwari mwa makattamiho awa otene.—Aheb. 10:33, 34.

9. Ninawodhe dhavi otagiha ekalelo ya Yezu ya oliba murima?

⁹ Masaka abano vina, iyo ninotagiha yeddelo ya Yezu y’oliba murima. Mwa ologa ebaribari, enorutxa vaddiddi wakamihedha abalihu anfwara-fwariwa sabwa ya nroromelo nawa. Masaka menjene abalihu anotxigiwa vina anofugeliwaga mukamburha. Masoso ninga aba agapadduwa, iyo ninokosa muli mwetemwene wi nabarele abalihu, ninowalogela mazu anoniha wi awene kana muladdo. (Fil. 1:14; Aheb. 13:19) Yina ya olagiha oliba murima wehu ku odhowagavi banigalaleya “nzu na Mulugu na murima wohova.” (Mer. 14:3) Iyo nihimala ogana wavuwihedha attu otene miselu dh’Omwene, masiki na abaleya annipambiha; ninkosela wi nimutagihe Yezu. Masaka meena murima wehu onokumuwaga. Egapadduwa dhawene, txini enfwanyelihu okosa?

10. Mwari mwa sumana ya Wubuwela Okwa wa Yezu, txini enfwanyelihu okosa, vina ninkosela nni?

¹⁰ Oliba murima wehu onenjedheya nigobuwelaga njedhelo ninehu nttuwene niwodheyile sabwa ya mukutto onikosele Kristu. (Jo. 3:16; Ef. 1:7) Mwari mwa sumana ya Wubuwela Okwa wa Yezu iyo nihikaana gari enddimuwa ya olagiha ntamaalo mwari mwa mukutto obu. Sumana eji egafiya, kuttiye wengesa Malebo a Bibilia anloga dha mukutto, kutxelele olobela, wili-wili otanaalelege dhimpadduwele Yezu ahinatti okwa. Nigakosa dhahene, ninela opurelamo venjene labo na otugumanela Siyari ya Okwa wa Nabuya, ninela ononelamo kakamwe entapulela mukatte na nikami. Iyo nigalagihaga merelo a otamalelana  mabasa anikosele Yezu na Yehova vina nigatamelaga ononelamo mpurelo onnipurihamo mabasaya, okwelana wehu na njedhelona, dhinela owaralavi; dhahene panawodhihu oliba murima ofiyedha omagomo.—Aheb. 12:3.

11-12. Ofiyedha veneva txini dhisunzilehu?

¹¹ Iyo nigasunzavi venjene sabwa ya Siyari ya Nabuya, otamalela wehu mukutto onela wenjedheyavi vina ninela ononelamo oviyeviha vina oliba murima wawumiha milomo olagihile Yezu. Iyo ninokala wohagalala vaddiddi sabwa ya oziwa wi Namakutta Wehu Munddimuwa ononibarela n’ekalelo ya oviyeviha vina oliba murima! (Aheb. 7:24, 25) Ninofuniwana okala va mattangani a wubuwelani okwa wa Yezu, venevo ninolagiha ntamalelo nehu. (Lk. 22:19, 20) Mattanga aba iyo ninkosa labo na 14 mweri wa Nisa, obu mweri wa ttima vaddiddi.

¹² Enfwanyelihu okosa ja wubuwela dhawireya dhing’onovi dhiniwanana na Siyari ya Nabuya vamodha n’ejileya emukosihile Yezu onikwela. Bali velaboni ya vati; Yezu wahilagiha mikalelo dhinji. Esodha dhali mikalelo gani?

13. Manivuru aba, Joau 15:9 na 1 Joau 4:8-10 anoniha dhavi okwela onnikwelana Yehova na Yezu, vina okwela oku onnipurhihamo dhavi?

¹³ Dhotedhene dhakosa Yezu dhadhale okwelavi wa Yehova. (Kengesa Joau 15:9; 1 Joau 4:8-10.) Okwela wa Yezu ohimuttukulela onivaha egumi yaye wi iyo notene nivuneye. Mukutto obu ohinipuriha iyo notene masiki akala nili abale asakuliwe wi alabe vamodha na Yezu mumweneni mwaye peno akala nili ‘mabila mena.’ (Jo. 10:16; 1 Jo. 2:2) Karoma wubuwela dhotene dhinsasanyedhiwa mattanga aba a Siyari ya Nabuya; dhosasanyedhiwa esi dhinolagiha wi anamafwara a Yezu anomukwela vina anovaha ttima mabasa erileyi. Okwela oku na ttimaya dhinoneya dhavi?

14. Merelo gani akosile Yezu onihile okwela wakwelaniye anamafwara aye?

¹⁴ Yezu ohitonyihedha wakwela anamafwara aye ottikitteliwa; okwela oku iyene olagihile mwari mwa wita mattanga ohirutxa. Yaka modha-modha anamafwara aba ottikitteliwa anofuniwana oja Siyarhi eji ahijombelaga-wene, masiki afwanyiwe makattamiho-makatamihovi, masiki mukamburha. (Ovuh. 2:10) Awene ali-wene omala na wale wi amwiwelele Yezu? Ndde!

15-16. Abali awodhile dhavi oja mattanga a Siyari ya Nabuya, masiki mwari mwa dhorutxa dhinji?

¹⁵ Ofiyedha masaka abano, Akristu ebaribari anovilibihedha ovirihamo dhilogile Yezu ahinatti okwa. Awene anokosa dhotedhene wi avirihemo mwawakwana-mwene esile dhitiwe va Siyarini ya Nabuya, masiki mwari mwa dhorutxa dhinjene. Karoma wona yopadduwa eji. Mbali Harold King valiye mukambura elabo y’o China, wahiveda marhe a oja Siyari ya Nabuya. Wahisasanyedha moviteya-mwene vinyu na mukatte. Vina wahelegela malabo mofwaseyani-mwene wi afwanye labo ninjiwa mattanga a Wubuwela Okwa wa Yezu. Mufiyedhi labo na mattangaya—iyene mukamburha mwaliye yeka—ohiba, ohilobela vina ohikosa Diskursu.

¹⁶ Yotagiha yina jiji. Nsaka na Koddo Yanawili, arogora dhahi atxedheliwe mpaddi onttiyiwa afugeliwi, ahija Mattanga a Wubuwela Okwa wa Yezu masiki aziwaga wi kofwanyiwa agahitabutxiwa vaddiddi. Yawodhihile oja Mattanga aba, jawi kanrutxa ojawa. Awene ahiloga: “Iyo nihimela  n’ekalelo y’orugunuwa, mukatte na vinyuya banittiya vari vehu banikunela na guwo. Mwalihu mwahikala eddima, noona nahittiddiha panti, sabwani kowiliwa nattiddihile motto wa maliju nigahifwanyiwa. . . . Iyo nihiddoddobela vaddiddi wi Babihu wa wirimu anilevelele vina alibihe efunelo yehu ya otxeniha nzina Naye.” Dhopadduwa esi dhinolibiha vaddiddi nroromelo nehu! Vina iyo nigakosa guru dhotene wi nije Mattanga a Okwa wa Yezu masiki mwari mwa masoso otene, ninolagiha wi ninomukwela mvulumutxi wehu!

17. Mavuzo gani anfwanyelihu ovikosa?

¹⁷ Nsaka na Wubuwela nigafiyaga, enokala ya malago iyo ovikosa mavuzo aba: ‘Ddiwodhe dhavi otagiha ekalelo ya Yezu y’olagiha okwela? Miyo ddinowazuzumela abali opitta miyo ddamwinya? Ddinowakokela abali oddikosela dhinjene dhinwodhimi okosa, obe ddinononelamo vangomela guru dhaga?’ Ndoweni notene nimutagihe Yezu ‘neddelelagana ttagaraga.’—1 Ped. 3:8.

18-19. (a) Ebaribari gani enfwanyelihu okaana? (b) Txini eganile weyo okosa?

¹⁸ Wubuwela Okwa wa Kristu onela ogoma ovanene. Mbwenye oganjiwa malabo otene mpaka ‘vanadhe’ Yezu; masiku aba anakale masiku a goi enddimuwa; iyene onadhele “àgumanihe asakulileye,” venevo nlamulo na oja Mattanga ninela ogomihiwa.—1 Kor. 11:26; Mt. 24:31.

¹⁹ Masiki akala Siyari yohirutxa aba anogomihiwa, iyo ninela okana ebaribari yawi nlogo na Mulugu ninela wubuwela malabo agumanelani mattanga aba ninga ezinddiyelo ya olagiha oviyeviha onddimuwa, oliba murima wawa, vina okwela olagihile awene ninga attu a velaboni ya vati. Nsaka-nene ntto, abale otene ankala va mattangani aba, anele ologa wagalala wetene wakanani vamattanganiva. Noona, akala ninfuna nipurelemo ovanene mattanga aba, ninofuniwana otagiha yeddelo ya Yezu y’okala muttu woviyeviha, woliba murima, vina wokwela. Akala iyo ninokosa dhawene, nikaneni ninkuluvelo nawi ninela wakela yopikerela ya Yehova.—2 Ped. 1:10, 11.