1-2. Txini yalogile Anju na ayana aali vekuttani va Yezu, nanda mwinyene Yezu okokomezile eni?

MEMBESI labo 16 wa Nisã wa yaka ya 33 E.C. Ayana animulabela Mulugu anodhowa omasiye ookubanyene wi asasanyedhe maningo a Nabuya Yezu Kristu, sabwani vahivira mawora 36 iyene bamalile okwa. Mufiyelani omasiye wila eke dhonukela maningoya, anona musuwoya buli mbee mwikuttanimwa kamuli elo! Anju mmodha onowawaddela wi Yezu ovenya mukwani, owenjedhedha: “Onousogorhelani o Galileya, wenewo kunamonenyu.”—Mt. 28:1-7; Lk. 23:56; 24:10.

² Mmaleli ayanaya obudduwavo, Yezu mwinyene onowawaddamela vina onowakokomeza: “Dhowani, mwawaddele abalaga adhowe o Galileya, wenewo kunaddifwanyani.” (Mt. 28:10) Yezu onfuna aavahe anamafwara aye malago amakamaka, nona osasanyedha matugumano, masasanyedho aba elobo yoroma ekosiliye muvenyeliye mukwani!

3-4. Ninlogelani wi nikokomezo nili va Mateu 28:19, 20 kanivahiwe arumiwi bahi? (Koona foto ya kapa.)

³ Kengesa Mateu 28:16-20. Mwari mwa matugumano akosile Yezu, iyene ologa mwaha wa mabasa amakamaka afwanyela anamafwara aye wakwaniha nsaka nttile noroma—masaka abano iyo ninokosa mabasa akene. Yezu ologa: “Dhowani, mwasunzihe athu a malogo otene, . . . Mwasunzihe ovirihamo dhetene dhulamulileni miyo.”

⁴ Yezu onfuna wi anamafwara aye otene alaleyege. Nikokomezo ntti iyene kavahile arumiwi abale 11 bahi. Ninziwa  dhavi? Mbo, kuloga wi mudhidhi ovahile Yezu nikokomezo ntti bali va mwangoni o Galileya alivo barumiwi bahi? Kobuwela wi anju wahawaddela ayana abale: “Wenewo [o Galileya] kunamonenyu.” Nona ayana abale ororomeleya txino ahona matugumano abale. Mbwenye kahiyo ejuwenevi bahi. Murumiwi Paulo ologa wi Yezu “oawoneyela, mudhidhi mmodhene, anamasunza opitha mazana matanu.” (1 Kor. 15:6) Wuvi?

5. Ninlogelani wi 1 Korinto 15:6 onaddana matugumano akosiwe o Galileya anlogiwa va Mateu kapitulu 28?

⁵ Nikana mwaha dhapama dha orumela wi Paulo waddana matugumano abale o Galileya alebiwe va Mateu kapitulu 28. Mwaha gani? Woroma, anamafwara enjene a Yezu akala o Galileya. Nona, mwango w’o Galileya—wali mburo wafwanyela otugumana attu enjene—ottiya numba-numbavi o Jeruzalemi. Wanawili, mmaleliye ovenyihiwa mukwani, Yezu wahittanyuwa munumbani mwali arumiwi aye 11 o Jeruzalemi. Iyene kofuna wavaha arumiwi aye nikokomezo na olaleya vina wakosa anamafwara, agakosile o Jeruzalemi, kigakalile yofuneya wakumbirha arumiwiya, ayana abale na attu ena odhowa otugumana o Galileya.—Lk. 24:33, 36.

6. Mateu 28:20 ontonyihedha dhavi wi enofuneya wiwelela nikokomezo ntti masaka abano, nanda ninakwanihedheya dhavi ovanene?

⁶ Kang’ana mwaha waneraru wamakamaka. Nikokomezo na Yezu na wakosa anamafwara kanali na Akristu a nsaka noroma bahi. Ninziwa dhavi? Yezu ogomihile malago avahiliye anamafwara aye na mazu awi: “Miyo ddili na nyuwo masiku otene ofiyedha omagomelo wa elabo.” (Mt. 28:20) Ninoziwa wi mazu a Yezu a wakosa anamafwara anowakwanihedheya masaka abano. Kobuwela! Yaka na yaka attu ofiyedha 300.000 ambatiziwa ninga Anamoona a Yehova anokala anamafwara a Yezu Kristu!

7. Txini enasekeserhe iyo, nanda sabwaya jani?

⁷ Attu enjene animusunza Bibilia anowunuwa omuyani mpaka obatiziwa. Mbwenye, dila dhinjene attu ena animusunza Bibilia na iyo, anorutxiwa okala anamafwara. Ena anoziveliwa nsunzona, mbwenye kanunuwa wi abatiziwe. Akala weyo onomusunziha muttu Bibilia, kavali waganyedha wi onfuna omukamihedhe ovirihamo dhinsunziye wi akale namafwara wa Kristu. Mutoma obu onele woniha mukalelo onawodhihu oddiginya murima wa namasunza wehu vina omukamihedha wunuwa omuyani. Sabwaya jani enfanyeelelihu osunza makani aba? Sabwani masaka mena ninofwanyela opima akala jofuneya odhowanavi nsunzona obe nne.

8. Enkalela nni yorutxa namasunza omukwela Yehova?

⁸ Yehova onfuna wi attu amulabele iyene sabwa ya omukwela. Nona ninofwanyela wakamihedha anamasunza ehu ononelamo wi Yehova onomutanaala muttu-muttu vina iyene onowakwela vaddiddi. Ninfuna nakamihedhe awene ononelamo wi Yehova “babi w’anapawi, mukoyi w’amamukwela ayana.” (Masal. 68:6) Anamasunza awo aganonelamo wi Mulugu onowakwela, awene vina anele oroma omukwela. Anamasunza ena anorutxiwa omoona Yehova ninga Babi wokwela, sabwani kaleliwe n’okwela vina katonyihedhiwe ttagaraga na ababiwa. (2 Tim. 3:1, 3) Egali dhawene, ogeddihaga nsunzo, wanonihedhemo mikalelo dhotikiniha dha Yehova. Wakamihedhe anamasunza  awo ononelamo wi Mulugu wehu wokwela onfuna avahe egumi yohimala, vina oli womala nawale wi akamihedhe ofwanya egumiya. Elobo yina enakosihu jivi?

9-10. Manivuru gani anfwanyelihu olabihedha nigeeddihaga nsunzo na Bibilia, nanda sabwaya jani?

⁹ Olabihedhe manivuru “Txini Ennisunziha Bibilia?” vina “Kalanivi Mu Okwelani Mwa Mulugu.” Manivuru aba alebeliwe wi anikamihedhe oddiginya mirima dha anamasunza ehu. Motagiha, kapitulu 1 ya nivuru Ennisunziha Bibilia enowakula mavuzo aba: Mulugu ononitanaala obe ononidda?, Attu agatabuwaga Mulugu oniwamo dhavi? vina Enowodheya okala marho wa Yehova? Ononamo dhavi mwaha wa nivuru Kalanivi mu Okwelani wa Mulugu? Nivuru ntti ninomukamihedha namasunza ononelamo mukalelo onawodhiye ovirihamo magano a Bibilia vina okala ofiyedheya na Yehova. Masiki akala ohasunziha attu ena manivuru aba, enofuneya ovisasanyedha mowakwana omutanalelaga namasunza mmodha-mmodha.

 ¹⁰ Ovano katanaalela wi, namasunza wawo onfuna aziwe makani ali munivuruni nehu nihinkosa mpaddi wa Vipano Dhehu Dhosunzihana. Txino enofuneya omulibiha namasunzaya wengesaga nivuruna agakala yeka, dhahene weyo onelege odhowavi omusunzihaga Bibilia na manivuru alogiwe.

11. Mudhidhi gani onfwanyelihu oroma weddiha nsunzo na nlobelo, nanda niwodhe dhavi omuziwiha mwahaya onfuneyelani olobela?

¹¹ Orome nsunzo na nlobelo. Japama oroma vina ogomiha nsunzona na nlobelo, egawodheya orome dhigavirile sumana dhing’onovi omusunzihaga. Ninofwanyela omuziwiha namasunza wehu wi muya wa Mulugu buna guru ya omukamihedha ononelamo Mazu a Mulugu. Anamalaleya ena anowaziwiha anamasunza awa txini enattukulela okosa nlobelo modhela wawengesela nivuru na Tiago 1:5, ninloga: “Akala mmodhavo wenyu onotowa ononélamo, amulobe Mulugu.” Agamala anowavuza dhahi, “Niwodhe dhavi okumbirha ononelamo wa Mulugu?” Nona namasunzaya ononelamo jofuneya onfiyedha Mulugu na nlobelo.

12. Onalabihedhe dhavi nlebo na Masalmo 139:2-4 wi omukamihedhe namasunza ovilibihedha olobela na murima wotene?

¹² Kamusunzihe namasunza mukalelo wa olobela. Omutapulelemo wi Yehova onovuruwana malobelo ankosiye na murima wotene. Omwaddele wi nigakosaga malobelo ehu ninofwanyela onfugulela Yehova murima wehu—vina nimwaddelege Yehova dhilobo dhotene dhinnidhugudha. Sabwani Yehova onoziwa dhubuwelo dha mmirimani mwehu. (Kengesa Masalmo 139:2-4.) Ninofwanyela walibiha anamasunza ehu wi akumbirhege nikamihedho na Mulugu wila awodhe otxinja dhubuwelo dhabure vina okwaranya dhilemelelo dhonyakuwa. Motagiha, namasunza wawo onomala mudhidhi mwinjene asunzaga masiki dhawene onodhowavi ajaga mattanga ahinrumeeliwa na Akristu. Iyene onoziwa wi jabure oja mattanga aba, mbwenye onokalelavi ntidi. Egali dhawene omulibihe wi amwaddele Yehova makattamiho aye vina amukumbirhe nikamihedho wila awodhege okwela esile dhinkwela Mulugu.—Masal. 97:10.

13. (a) Enfuneyelani omuwobela namasunza wehu omatugumanoni egawodheya? (b) Ninamukamihedhe dhavi namasunza ohizuzuma agakala Onumbani Yomwene?

¹³ Egawodheya omuwobe namasunza wawo odhowa omatugumanoni. Dhinona vina dhiniwa namasunza agakala omatugumanoni dhinowodha oddiginya murima waye dimukamihedhaga odhowa vasongorho. Omulagihe vidiyu Txini Enkosiwa va Numbani ya Omwene? ogamala omuwobe wi mudhowe vamodha omatugumanoni. Egawodheya omukamihedhe owodha ofiya omatugumanoni. Wawobege anamalaleya othiyana-ttiyana wi mudhowege vamodha onsunzoniwa. Eji enele omukamihedha namasunza wawo walemela attu enjene a mmulogoni, dhahene kanazuzume agafiya omatugumanoni.

14. Txini enimukamihedha namasunza wunuwa mpaddi womuyani?

¹⁴ Yogana yehu ja omukamihedha namasunza wunuwa mpaddi womuyani. (Ef. 4:13) Vamaromo, muttu agamusunzaga Bibilia na iyo, txino onoziveliwa na dhopurelamo dha nsunzona. Mbwenyi agaroma wunuwiha omukwela waye Yehova, vasogorhova, onelege ofuna wakamihedha attu ena, vamodha na abaleya ankosa mpaddi wa mulogo. (Mt. 22:37-39) Egakala yofuneya omwaddele  wi gari enddimuwa okamihedha mabasa a Omwene, modhela okosa mivaho.

15. Ninawodhe dhavi omukamihedha namasunza wa Bibilia oziwa enfanyeliye okosa vagapadduwa makattamiho?

¹⁵ Omusunzihe namasunza wawo txini enfwanyeliye okosa agagumanana makattamiho. Motagiha, namasunza wawo, oli namalaleya wohibatiziwa, wuwaddela wi iyene osilidhiwa na mbali wa mmulogoni. Ottiya ologa wi ejo ehupatta, jamakamaka omutapulelamo enloga Bibilia mwaha wa makaniya. Txino iyene onele omulevelela, obe akala kanawodhe, adhowe aloge na mbaliya na mukalelo woderetu vina wokwela n’efunelo ya ‘ompura mbaliya.’ (Kaladdaniha na Mateu 18:15.) Omukamihedhe namasunza wawo wang’ananiha dhinfuniye ologa. Omulagihe mukalelo wopepesa mmanivuruni mwehu vina mu website jw.org^® wila afanyemo marhe ogomihana makattamiho. Agaroma ononelamo mukalelo w’ogomiha makattamiho ahinatti obatiziwa, onele okana mandano apama na attu ena a mmulogoni agamala obatiziwa.

16. Ekalele nni yapama wawoba anamalaleya ena wuvelela onsunzoni wawo?

¹⁶ Wawobege abali ena a mmulogoni—vina nameddelela milogo—wi mudhowe weddiha nsunzona. Sabwaya? Ottiya sabwa ya esile dhilogiwe mundduni, anamalaleya ena anele omukamihedha namasunza ononelamo dhilobo dhina na mukalelo wopureleyamo. Motagiha, kobuwela wi dila dhinjene namasunza wawo otamela ottiya okobola fola, mbwenye kawodhile. Kamuwobe mbali owanile na ekarho eji mpaka opemberha wila awuvelele onsunzoniwa. Mbali oddu txino onele onvaha marhe anfanyeeliye ovirihamo. Egawurutxa weddiha nsunzo vari va mbali oddo, kamukumbirhe iyene wi eddihe nsunzona. Kapura mudhidhi oli wotene wi omukamihedhe namasunza wawo osunza na dhotagiha dha abali ena. Kudduwale, yogana yehu ja omukamihedha namasunza wunuwa omuyani.

17-18. Txini enfwanyeliwe okosa akala onogana ottiya weddiha nsunzo?

¹⁷ Akala namasunza wawo wa Bibilia kankosa matxinjo mwigumini mwaye, na mudhidhiya onofwanyela ovivuza: ‘Ddinofwanyela ottiya weddiha nsunzona?’ Ohinatti ogana, onofwanyela wang’ananiha ewodhelo ya muttuya. Attu ena anottukula mudhidhi mwinjene wila onuwe mpaddi womuyani, oku ena nne. Ovivuze: ‘Namasunza waga onowunuwa omuyani mowiwanana na mikalelo dhaye?’ ‘Iyene ohiroma “ovirihamo,” dhinsunziye?’ (Mt. 28:20) Namasunza txino onunuwa vang’ono-vang’ono mpaddi womuyani, mbwenye onofwanyela ovirihamo dhinsunziye.

 ¹⁸ Txini enfanyeelelihu okosa akala muttu onottukula mudhidhi mwinjene asunzaga mbwenye kanvaha ttima dhinsunziye? Katanalela nipadduwo ntti: Namasunza wawo omariha osunza nivuru Ennisunziha Bibilia vina ohiroma nivuru Kalanivi Mu Okwelani Mwa Mulugu, mbwenye txipo kanadhowaga wona matugumano a mmulogoni—nne wona Muttupo wa Wubuwela Okwa wa Yezu! Vina okana elemelelo yolupiha masiku a osunza. Egali dhawene, onofwanyela ohinvubela makaniya. *

19. Txini egamwaddeliwe muttu ohivaha ttima nsunzo na Bibilia, nanda txini enfwanyeliwe otanalela?

¹⁹ Txino orome onvuza dhahi: ‘Monelo wawo, makattamiho gani anuwurutxiha okala Munamoona wa Yehova?’ Txino namasunzaya onowakula, ‘Miyo kaddizuzumela omusunza a Bibilia, vina kaddinfuna okala Munamoona wa Yehova!’ Kito akala iyene onovira mudhidhi mwinjene asunzaga, mbwenye monelo waye onkala modhene, jofuneya odhowanavi nsunzona? Mwa mpaddi mwina, txino namasunza wawo ohuwaddela dila yoroma elobo enimuzuzumiha. Motagiha, iyene txino onubuwela wi kanawodhege odhowa olaleya numba na numba. Ogamala oziwa dhinubuweliye, onele ononelamo pama mukalelo wa omukamihedha.

20. Nivuru na Merelo 13:48 ninnikamihedha dhavi otanalela akala ninofwanyela othiya weddiha nsunzo obe nne?

²⁰ Mokubanya-mwene, anamasunza ena ali ninga ana Izrayel a nsaka na Ezekiyel. Koona elogile Yehova na Ezekiyel mwaha wa awene: “Weyo onakalela ninga muthu onawibela jibo aliba ofunana, onna mmelo woyesa, onziwa woba kasasi. Dhinloga weyo anowiwa; wedda, kaneddana.” (Ezek. 33:32) Ebaribari wi enorutxa omwaddela muttu wi ninele ottiya omusunziha Bibilia. Mbwenye, “nsaka nihalilewo nili niñgonovi.” (1 Kor. 7:29) Ottiya ononga mudhidhi na masunzo ahindowa vasogorho, ninofwanyela watamela abale “athomeliwe egumi yamukalakala.”—Kengesa Merelo 13:48.

21. Nlebo nehu na yaka ya 2020 ttivi, nanda ninanikamihedhe okosa eni?

²¹ Nlebo na yaka ya 2020, ninokamihedha ozuzumela wunuwiha ewodhelo yehu mmabasani a wakosa anamafwara. Eji enowinana na mazu alogile Yezu va matugumano akosiliye vamwangoni o Galileya: ‘Dhowani, mwakose anamafwara . . . , mwabatize.’—Mt. 28:19.