1. Txini elogile Yehova wi egapadduwile masaka abano?

YEHOVA wahipikirhela wi masaka abano ankalihuwo: “Athu kumi anabudduwe mmalogoni othiyana-thiyana, anere othidda nipiyo na yabalo ya muyuda mmodha alogaga dhahi: ‘Iyo ninfuna ndhowe vamodha na nyuwo, sabwa niziwa wi Mulugu oli na nyuwo.’” (Zak. 8:23) “Muyuda” onatonya abale attikitteliwe na Mulugu modhela muya wokoddela. Awene vina anittaniwa ‘Izrayel wa Mulugu.’ (Gal. 6:16) “Athu kumi” anatonya abale anna njedhelo na okalawo na mukalakala velaboni ya vati. Awene anoziwa wi Yehova onoruriha nikuru nthi na attikitteliwi vina anoziwa wi eji gari ya omwebedha Mulugu mumodhani.

2. “Athu kumi” anwodha dhavi ‘odhowa vamodha’ na attikitteliwi?

² Masaka abano kili yowodheya oziwa nzina na muttikitteliwi mmodha-mmodha oli velaboni ya vati, * mbwenye abale anna njedhelo nokala velaboni ya vati anowodha ‘odhowa vamodha’ na attikitteliwi. Dhavi? Bibilia onloga wi “athu kumi” agahithidda “nipiyo na yabalo ya muyuda mmodha alogaga dhahi: ‘Iyo ninfuna ndhowe vamodha na nyuwo, sabwa niziwa wi Mulugu oli na nyuwo.’” Versu eji ya Bibilia enomuloga Muyuda mmodha. Mbwenye mazu aba “nyuwo” vina “oli na nyuwo” kanaddiwana muttu mmodha. Eji entapulela wi Muyuda oddu kanaddiwana muttu mmodha bahi mbwenye ontonya nikuru notene na abale attikitteliwe. Abale ahittikitteliwe anomulabela Yehova vamodha na attikitteliwi.  Mbwenye awene kanawoona attikitteliwi ninga asogorheli awa, sabwani anoziwa wi Yezu ddili Musogorheli wawa.—Mt. 23:10.

3. Mavuzo gani anfunihu wakula mwari mwa mutoma obu?

³ Vowi akalawo Akristu ena ottikitteliwa mwari mwa nlogo na Mulugu, attu ena txino anovivuza: (1) Attikitteliwi anfwanyela ovyona dhavi? (2) Ninfwanyela waweddiha dhavi abale anja mukatte na omwa vinyu va muttuponi wa Wubuwela Okwa wa Yezu? (3) Koddi ninofwanyela ozuzuma sabwa ya wunuwa wa muttengo wa attuya? Mutoma obu onele wakula mavuzo aba.

4. Malago gani anfwanyeya va 1 Korinto 11:27-29 anfwanyela attikitteliwi otanalela, nanda sabwaya jani?

⁴ Attikitteliwi anofwanyela otanalela malago anfwanyeya va 1 Korinto 11:27-29. (Kengesa.) Muttikitteliwi agadhile dhavi oja vina omwa va muttuponi wa Wubuwela Okwa wa Yezu “ahifwanyelele”? Eji empadduwa akala onoja mukatte vina onomwa vinyu, oku mweddelo waye ohiwananaga na magano oligana a Yehova. (Aheb. 6:4-6; 10:26-29) Attikitteliwi anoziwa wi akala anfuna okana ‘mperhe onawittanela Mulugu wakela n’ovilevela wa Yezu Kristu’  anofwanyela okalavi oororomeleyene.—Fil. 3:13-16.

5. Akristu ottikitteliwa anfwanyela ovyona dhavi?

⁵ Muya wokoddela wa Yehova onowakamihedha emeleli aye okala oviyeviha, ottiya ovittukulela. (Ef. 4:1-3; Kol. 3:10, 12) Nona attikitteliwi kanivyona na ttima opitta ena. Anoziwa wi Yehova kavahile muya wokoddela awenevi bahi opitta emeleli ena. Kanubuwela wi anononelamo vaddiddi ebaribari ya mBibiliani opitta attu ena. Vina awene kanimwaddela muttu wila weyo ottikitteliwa nona oromege oja mukatte vina omwege vinyu va muttuponi wa Wubuwela Okwa wa Yezu. Ottiya ejo, n’oviyeviha awene anoziwa wi Yehova bahi ddinasakula attu andowa okala wirimu.

6. Mowiwanana na 1 Korinto 4:7, 8, Akristu ottikitteliwa anfwanyela oviweeddiha dhavi?

⁶ Attikitteliwi anononelamo wi gari enddimuwa yosakuleliwa odhowa wirimu, mbwenye awene kanjeedhela wi anofwanyela weddihiwa na nriho navawoka. (Fil. 2:2, 3) Awene anoziwa wi vattikitteliwani, Yehova kampangile muttu mwina mwaha wa ottikitteliwa wawa. Nona muttikitteliwi kantikina akala onowaganyidhiwa na muttu wi iyene kattikitteliwe. Iyene onononelamo wi Bibilia ononisunziha ohirumeela nomaguva akala muttu onologa wi ohakela gari yavawoka na Mulugu. (Ovuh. 2:2) Mukristu wottikitteliwa kanjedhela ozuzumeliwa vaddiddi, nona iyene kanawaddela attu ena wi muttikitteliwi. Vina iyene kanivittukulela obuwelaga wi munddimuwa opitta attu ena.—Kengesa 1 Korinto 4:7, 8.

7. Elobo gani enrabela okosa abale attikitteliwe, nanda sabwaya jani?

⁷ Akristu ottikitteliwa kanubuwela wi anofwanyela weeddaga vamodha attikitteliwi akwawa bahi, akalaga ninga nikuru na attu avawoka. Awene kanvedana mukalelani wi alogege mukalelo ottikitteliwani obe kanita nikuru na omusunza Bibilia vawa-vene. (Gal. 1:15-17) Attikitteliwi kokosaga dhawene mmulogoni kamugakalile wiwanana. Kokala dhahene, agasadduwela muya wokoddela, obuwene onkamihedha nlogo na Mulugu okana murenddele vina wiwanana.—Rom. 16:17, 18.

8. Ninfwanyelela nni okala pasope na mukalelo wa weddiha abale anja mukatte vina amwa vinyu va muttuponi wa Wubuwela Okwa wa Yezu? (Koona vina yowenjedha.)

⁸ Ninfwanyela waweeddiha dhavi abali na arogora attikitteliwe? Jabure omuzuzumela vaddiddi obe omusiba vaddiddi muttu, masiki akale mbali wottikitteliwa wa Kristu. (Mt. 23:8-12) Bibilia agalogaga mwaha wa anddimuwa a mmulogoni, ononilibiha wi ‘nitagihe nroromelo nawa,’ mbwenye ononilaga wi kanimoone muttu ninga musogorheli wehu. (Aheb. 13:7) Ebaribari wi Bibilia onologa wila abali ena “anofwanyela wakeliwa wilimo.” Sabwani awene ‘anoweddiha pama’ vina ‘anotabuwela mabasa a olaleya vina osunziha,’ kahiyo sabwa yokala attikitteliwi. (1 Tim. 5:17) Nigamuzuzumela vaddiddi muttikitteliwi, ninomutota manyazo. * Obe ninomukosiha okala namavittukulela. (Rom. 12:3) Txibarene kaninfuna omukwakwathutxa mbali wa Kristu!—Lk. 17:2.

9. Ninawodhe dhavi wariha Akristu ottikitteliwa?

⁹ Ninawodhe dhavi wariha abale attikitteliwe na Yehova? Modhela orabela wavuza mukalelo ottikitteliwani. Aba makani omwinya, iyo kanina mwaha wofuna oziwa. (1 Tes. 4:11; 2 Tes. 3:11) Vina kaninfwanyela wubuwela wi mamune, mwadhye, peno amambali aye obe amudhaye otene attikitteliwi vina. Muttu kana ewodhelo ya wattiyedha amudhaye njedhelo nodhowa wirimu. Njedhelo ntti ninda wa Mulugu. (1 Tes. 2:12) Ninofwanyela vina orabela okosa mavuzo agadhile wanyimula. Motagiha, kaninfwanyela onvuza mwadhi muttikitteliwi mukalelo oniwamo iyene agatanalela wi anakale yeka velaboni ya vati namukalakala. Sabwani iyo ninoziwa wi Yehova onele wavaha “aliwo dhetene dhinunlelani.”—Masal. 145:16.

10. Malago awi kaninfwanyela ‘wasiba athu’ anibarela dhavi?

¹⁰ Okodda waweddiha attikitteliwi ninga a makamakaya opitha attu ena, enonibarela. Dhavi? Bibilia ononaddela wi attikitteliwi ena txino kanakalevi attu ororomeleya. (Mt. 25:10-12; 2 Ped. 2:20, 21) Nigewelela malago orabela ‘wasiba athu,’ txipo kaninafware mweddelo wa attu ena, peno akala attikitteliwi, attu ovuwa obe anomulabela Yehova mwari mwa vyaka dhinjidhene. (Juda 16) Dhahene akala anottiya okala attu ororomeleya afiyedha wigariwa mmulogoni, kaninattiye omuroromela Yehova vina omulabela.

11. Txini enpadduwa na muttengo wa athu anja mukathe vina amwa vinyu va muttuponi wa Wubuwela Okwa wa Yezu?

¹¹ Mwari mwa vyaka dhinji muttengo wa abale anja mukathe vina amwa vinyu va muttuponi wa Wubuwela Okwa wa Yezu wela ovuguwa. Mbwenye mwa vyaka-dhene esi, muttengoya onodhowa wunuwagavi. Ninofwanyeela ozuzuma sabwa ya ejuwene? Nne. Ndoweni nisunzeni sabwaya enkooddelihu ozuzuma.

12. Ninkoddelani ozuzuma mwaha wa muttengo wa abale anja mukathe vina amwa vinyu va muttuponi wa Wubuwela Okwa wa Yezu?

¹² ‘Yehova onowaziwa attu aye.’ (2 Tim. 2:19) Abali anelegela muttengo wa abale anja mukathe na amwa vinyu va muttuponi wa Wubuwela Okwa wa Yezu ahittiyana na Yehova sabwani awene kanaziwa pama abale ali attikitteliwi ebaribari. Muthengoya ontaganyiheya na wabale anubuwela wi attikitteliwi oku ahili. Motagiha, ena wale aja mukatte na amwa vinyu ddabuno ahittiya. Txino ena ahikana makattamiho a muyubuweloni obe etanalelo nona anorumeela wi anele olamulela vamodha na Kristu wirimu. Dhahene,  iyo kaninziwa mowakwana-mwene muttengo wa attikitteliwi alivi vati apano.

13. Bibilia onolaga muttengo wa attikitteliwi anakalevi velaboni ya vati goi enddimuwa egaroma?

¹³ Anele okalawo attikitteliwi dhipaddi dhotene dha elabo Yezu agadha wagumaniha wi adhowena wirimu. (Mt. 24:31) Bibilia onologa wi mwari mwa masaka omariha, onele okalawo muttengo mung’onovi wa attikitteliwi velaboni ya vati. (Ovuh. 12:17) Mbwenye kanloga muttengo wa attikitteliwi anakalevi vati goi enddimuwa egaroma.

14. Ninga muntonyihedha Roma 9:11, 16, txini enfwanyelihu ononelamo mwaha wa mukalelo onsakuliwa attikitteliwi?

¹⁴ Yehova ddingana mudhidhi onfuniye omusakula muthu wi akale muttikitteliwi. (Rom. 8:28-30) Yehova oromile wasakula attikitteliwi mumaleli Yezu ovenya mukwani. Enkala ninga Akristu otene a ebaribari a nsaka zana noroma ali attikitteliwi. Mwari mwa vyaka dhinjidhene, athu enjene arumela okala Akristu, kafwara magano a Kristu. Masiki dhawene, mwari mwa vyaka dhene esile, Yehova wanattikittela Akristu ebaribari ang’onovi. Awene anligana na tirigu wamulogile Yezu wila agonuwile vamodha na ntaje. (Mt. 13:24-30) Masaka abano omariha, Yehova onowasakulavi attikitteliwi anakose mpaddi wa 144.000. * Dhahene akala Mulugu onogana omuttikittela muttu, kaninfwanyela waganyedha eziwelo yaye. (Kengesa Roma 9:11, 16.) * Ninofwanyelela okala  txenjewa wi ninakale ninga anamalaba alogile Yezu mmusiboni mwaye. Awene ahinyimuwa sabwa ya mwinya waliganiha na abale aromile olaba omamalelo wa siku.—Mt. 20:8-15.

15. Attikitteliwi otene anokosa mpaddi wa “Mwimeleli wororomeleya, wamalago,” ologiwe va Mateu 24:45-47? Katapulela.

¹⁵ Kahiyo otene anna njedhelo nokala wirimu ankosa mpaddi wa “Mwimeleli wororomeleya, wamalago.” (Kengesa Mateu 24:45-47.) Dhahene ninga nsaka zana noroma, Yehova na Yezu masaka abano analabihedha abali ang’onovi wila aajihe, obe asunziha attu enjene. Akristu ottikitteliwa bahi a vyaka zana dhoroma balabihedhiwe wi alebe Malebo a Egrego. Masaka abano vina Akristu ottikitteliwa battomeliwe weddiha nlogo na Mulugu wi “àgawelege poso mudhidhi ogafiya.”

16. Txini esunzile weyo mwari mwa mutoma obu?

¹⁶ Txini esunzilihu na mutoma obu? Yehova ohigana wavaha egumi yohimala velaboni ya vati muttengo munddimuwa wa emeleli aye, vina egumi wirimu mwa abale anadhowe olamulela vamodha na Yezu. Yehova onowattuva emeleli aye otene—“muyuda” vamodha na “athu kumi”—vina iyene onfuna wi otene ewelelege malamulo mamodhene vina akalevi ororomeleya. Otene anofwanyela okala oviyeviha. Otene anofwanyela omulabela Yehova mumodhani vina akalevi owiwanana. Vina otene anofuniwana ovilibihedha wi mulogo okalevi na murenddele. Nona apa vanaddamela omagomelo wa elabo, nidhowegevi nimulabelaga Yehova vina ninfwaraga Kristu ninga “nikuru nimodha.”—Jo. 10:16.