1-2. Elobo gani yotikiniha epadduwile siku na mattanga a Pentekoste a yaka ya 33 E.C.?

NALI DDIMINGU na membesi o Jeruzalemi. Siku na mattanga a Pentekoste a yaka ya 33 E.C. Nikuru na anamafwara 120 nitugumana vamodha numba yodhulu. (Mer. 1:13-15; 2:1) Siku nttile nihinatti, Yezu wahawaddela wi ahimaguvele obudduwamo mu Jeruzalemi sabwani awene agahakela mvaho wavawoka. (Mer. 1:4, 5) Txini epadduwile osogorhowa?

² “Venevo oruma wadha odhulu oarurumutxa; orumawá wali ninga wa pevo enoba na guru.” Evoloya yahidhala mba mwetemwene mwalani. Apo ahona dhilobo ninga “malumi a motho,” aatitelaga vina agaweleyaga vadhulu va musorho wa muttu-muttu, otene ‘adhala muya wokoddela.’ (Mer. 2:2-4) Na mukalelo obu, Yehova wahittikittela nikuru ntti na muya waye wokoddela. (Mer. 1:8) Dhahene Akristu abale baromile ottikitteliwa na muya wokoddela * vina wakela njedhelo nolamulela na Yezu wirimu.

3. Sabwaya jani abale ali o Pentekoste kaganyedha wi aahittikitteliwa na muya wokoddela?

³ Weyo kokala mmodha wa anamafwara abale atugumanile odhulu wa numba ejile, txipo kugadduwalile siku nttile. Wonaga elobo ninga malumi a motho emottelaga vadhulu va musorho vawo, nanda buroma ologa dhilogelo  dhottiyana-ttiyana! (Mer. 2:5-12) Dhawene, weyo kugaganyedhile wila ottikitteliwa na muya wokoddela. Kuloga attikitteliwi otene anttikitteliwa na mukalelo wakakene vina mudhidhi mmodhene? Nne. Ninziwa dhavi?

4. Attikitteliwi otene a nsaka zana noroma attikitteliwe mudhidhi mmodhene? Katapulela.

⁴ Voroma, ninfuna none mudhidhi onttikitteliwa muttu. Kahiyo nikuruvi na Akristu abale 120 attikitteliwe siku nttile na Pentekoste wa 33 E.C. Osogorhowa sikunene nttile, attu ena owakwana 3.000 ahakela muya wokoddela w’apikirele Yezu. Awene attikitteliwe mudhidhi obatiziwani. (Mer. 2:37, 38, 41) Mbwenye vyaka dhamusogorho, Akristu otene kattikitteliwa mudhidhi wabatiziwani. Akadda Samariya mmalelani obatiziwa vahivira mudhidhi ahinattikitteliwa. (Mer. 8:14-17) Vina elobo yottiyana yahipadduwa na Kornélio vamodha na amudhaye attikitteliwe ahinatti obatiziwa.—Mer. 10:44-48.

5. Mowiwanana na 2 Korinto 1:21, 22, txini empadduwa muttu agattikitteliwa na muya wokoddela?

⁵ Ovano ninfuna none txini empadduwa na muttu onttikitteliwa na muya wokoddela. Vamaromo, txino attikitteliwi ena anorutxiwa orumela wi ahisakuliwa na Mulugu. Awene anovivuza, ‘Mulugu oddisakulelini miyo?’ Oku ena kanubuwela dhawene. Kintanala mukalelo onubuwela muttu, murumiwi Paulo ononihedhamo txini enapadduwela abale otene attikitteliwe: ‘Vowi muhakela nzu n’ebarbari, Muthaka onuvulumutxani, onrumelinyu. Apa Mulugu oulebani na mpido * waye, oli muya wokodela wapikireliye. Muya wokoddela ddi nipathu-pathu ninnoniha wi ninere ogaweliwa dhorela.’ (Ef. 1:13, 14) Nona Yehova onolabihedha muya waye wokoddela wila awoonihe kakamwe wi Akristu aba ahisakuliwa. Egali dhawene, muya wokoddela tti “nipathu-pathu” ninavaha nikuluvelo wi awene anakalege na mukalakala wirimu ottiya velaboni ya vati.—Kengesa 2 Korinto 1:21, 22.

6. Txini enfwanyela okosa Mukristu osakuliwe wi akele njedhelo naye nodhowa wirimu?

 ⁶ Akala Mukristu onothikitheliwa, kuloga omala wakela njedhelo naye na wirimu? Nne. Iyene onna nikuluvelo nawi ohisakuliwa wi adhowe wirimu. Mbwenye onofwanyela wubuwelaga malago aba: “Nona amudhaga, tamelani ohidduwala wi Mulugu owithanani, ousakulani. Mweddelo wenyu ogakala dhahene, kamunakwakwathuwe.” (2 Ped. 1:10) Nona masiki akala Mukristu onosakuliwa, obe okuweliwa, wi adhowe wirimu, iyene onakele mareliho aye agakalavi ororomeleya.—Fil. 3:12-14; Aheb. 3:1; Ovuh. 2:10.

7. Abale attikitteliwe anziwa dhavi wi awene ahittaneliwa okala wirimu?

⁷ Kito muttu onziwa dhavi wi owobeliwa odhowa okalaga wirimu? Yowakulaya enooneya na mazu a Paulo alebeliye Akristu o Roma ‘ettaniliwe okala attikitteliwi.’ Iyene ohiloga: ‘Nyuwo kamwakelile mvaho wa muya onuwirani adhari, mweddagana wili ekalelo ya wova; mwakelile muya onukalihani ana a Mulugu, onwodhihuna ologa: Babani! Muya wakene onoziwiha murima wehu elihu: nili ana a Mulugu.’ (Rom. 1:7; 8:15, 16) Nona Mulugu onolabihedha muya waye wokoddela wila waziwihe abale attikitteliwe wi awene ahittaneliwa okala wirimu.—1 Tes. 2:12.

8. Nivuru na 1 Joau 2:20, 27 nintonyihedha dhavi wi Akristu ottikitteliwa kanfwanyela waddeliwa na attu ena wi attikitteliwi?

⁸ Yehova kanttiya yowaganyedha mmirimani obe muyubuweloni mwa abale ettaneliwe okala wirimu. (Kengesa 1 Joau 2:20, 27.) Masiki dhawene, Akristu ottikitteliwa anofwanyela osunzihiwa na Yehova modhela mulogo, dhahene ninga ensunzihiwa muttu-muttu. Mbwenye awene kanfwanyela waddeliwa na attu ena wi aahittikitteliwa. Yehova mwinyene ohilabihedha guru yamakamaka, muya waye wokoddela, wi avahe nikuluvelo wila awene attikitteliwi!

9. Mowiwanana na Éfeso 1:18 matxinjo gani ampadduwa na muttu onttikitteliwa?

⁹ Emeleli enjene a Mulugu masaka abano anorutxiwa ononelamo txini empadduwa na muttu onttikitteliwa na Mulugu. Ejo enononeleyamo sabwani awenene kattikitteliwe. Mulugu wapaddutxilé attu wi akalege velaboni ya vati na mukalakala, ottiya wirimu. (Wita 1:28; Masal. 37:29) Masiki dhawene Yehova ohasakulamo attu ena wila akalege wirimu. Nona agamuttikittela muttu, iyene onotxinja njedhelo vina mobuwelo waye, wila muttuya azuzumele egumi ya wirimu.—Kengesa Éfeso 1:18.

10. Txini entapulela ‘obaliwa wili’? (Koona yowenjedhedha.)

¹⁰ Mukristu agattikitteliwa na muya wokoddela, iyene ‘onobaliwa wili,’ obe ‘obaliwa odhulu.’ * Yezu vina wahooniha wi enorutxa omutapulelamo muttu ohittikitteliwe mukalelo onubuwela oddule ‘obaliwe wili’ obe ‘obaliwe na muya.’—Jo. 3:3-8.

11. Katapulela matxinjo ampadduwa muyubuweloni mwa muttu onttikitteliwa.

¹¹ Txini empadduwa muyubuweloni mwa Akristu anttikitteliwa? Ahinatti ottikitteliwa na Yehova, awene anna njedhelo na okala velaboni ya vati na mukalakala. Anjeedhela wona mudhidhi onfuna Yehova otolotxa  obure wotene vina osaddula elabo bikala paraizu. Txino anjeedhela wawona wili amudhawa obe akwawa akwile. Mbwenye agamala ottikitteliwa, awene anoroma wubuwela na mukalelo ottiyana. Sabwaya jani? Kahiyo sabwa yawila kaziveliwana njedhelo nokala velaboni ya vati. Nona matxinjo aba kampadduwela sabwa yawi anokubanya obe anotabuwa vaddiddi. Vina kakosile saddu bahi baroma wubuwela wi okala velaboni ya vati na mukalakala elobo y’osilidha. Ottiya ejo, Yehova olabihedhi muya waye wokoddela wila atxinje mubuwelo wawa vina njedhelo nawa.

12. Mowiwanana na 1 Pedro 1:3, 4, Akristu ottikitteliwa anubuwela dhavi mwaha wa njedhelo nawa?

¹² Txino Mukristu ottikitteliwe onowubuwela wi iyene kanfwanyela gari eji yattima. Mbwenye iyene txipo kanaganyedha wi osakuliwa na Yehova. Ottiya ejo, mmirimani Mwaye munofukuwa wagalala vina matamaalo sabwa ya njedhelo naye nodhowa okala wirimu.—Kengesa 1 Pedro 1:3, 4.

13. Attikitteliwi anoonamo dhavi egumi yawa yokala velaboni ya vati?

¹³ Eji entapulela wi attikitteliwi anofuna okwa? Murumiwi Paulo onowakula nivuzo ntti. Iyene oladdaniha maningo a attikitteliwi na musasa, ohiloga: “Apa valihu mmusasani wa vati, ali maningo ehu, ninowunla ninga muthu olemeliwe muthorho; kaninfuna oruliwa mwili wehu wavati, ninowunlela wakela w’odhulu.” (2 Kor. 5:4) Kuloga Akristu aba karimeliwe efunelo yawa yokala velaboni ya vati, otamelaga okwa momaguva. Ottiya ejo, awene anoziveliwa okalawo vina anofuna omulabela Yehova siku na siku vamodha na amudhawa vina akwawa. Masiki dhawene, kintanala dhilobo dhinkosani, dila dhotene attikitteliwi anowubuwela njedhelo nawa nottittimiheya na musogorho.—1 Kor. 15:53; 2 Ped. 1:4; 1 Jo. 3:2, 3; Ovuh. 20:6.

14. Txini ehintapulela wi muttu ottikitteliwa na muya wokoddela?

¹⁴ Txino weyo onovivuza akala ohittikitteliwa na muya wokoddela. Akala jijuwene, katanalela mavuzo aba: Weyo onofuna-wene okosa efunelo ya Yehova? Ononamo wi onokosa mabasa a olaleya na murima wotene? Onoziveliwa omusunza Bibilia nofwaseya wila ononelemo “mobuwelo oviteya a Mulugu”? (1 Kor. 2:10) Onubuwela wi Yehova onowuvaha dhopurelamo dhotikiniha mmabasani a olaleya? Onovyowona na muthorho munddimuwa wa wakamihedha attu ena omuziwa Yehova? Onowona vizinddiyelo dhawi Yehova oukamihedha na mikalelo dhottiyana-ttiyana mwigumini mwawo? Akala weyo ohakula indde mavuzo aba, entapulela wi weyo osakuliwa wi odhowe wirimu? Nne, kahiyo mwenemo. Sabwaya? Sabwani emeleli otene a Mulugu anowodha otanalela dhahene, masiki akale attikitteliwi obe nne. Vina modhela muya wokoddela, Yehova onowavaha guru dhakakene emeleli aye anivilibihedha okosa dhilobo esi, kantanaala njedhelo nawa. Ebaribariya jawi, akala onowaganyedha peno ottikitteliwa na muya wokoddela obe nne, bahito entapulela wi weyo kuli muttikitteliwi. Abale ankuweliwa na Yehova kanaganyedha akala attikitteliwi obe nne! Awene akana ebaribari!

15. Ninziwa dhavi wi otene aakelile muya wokoddela kasakuleliwe odhowa wirimu?

¹⁵ Mbibiliani, mukala dhotagiha dhinjene dha alobwana a nroromelo aakelile muya  wokoddela; mbwenye kana njedhelo na okala wirimu. Mmodhaya ddi David weddihiwa na muya wokoddela. (1 Sam. 16:13) Muya wokoddela wahimukamihedha ononelamo dhilobo dhinji dhoviteya mwaha wa Yehova vina wahimweddiha oleba dhipaddi dha Bibilia. (Mk. 12:36) Masiki dhawene, murumiwi Pedro wahiloga wi ‘David kawelile odhulu.’ (Mer. 2:34) Mwina ddi Joau Mbatizi wali muttu ‘odhala muya.’ (Lk. 1:13-16) Yezu wahiloga wi mwa attu otene kanabaliwamo mwina onimpitta Joau, masiki dhawene wahiloga wi Joau kagakosile mpaddi wa Omwene wa wirimu. (Mt. 11:10, 11) Yehova olabihedha muya waye wokoddela wi wavahe guru alobwana aba wi akose dhilobo dhotikiniha, mbwenye kasakuliwe na guru dha muya wokoddela wi adhowe wirimu. Eji entapulela wi awene kalitxi ororomeleya opitha abale asakuleliwe olamulela wirimu? Nne. Mbwenye entapulela wi Yehova onele wavenyiha mukwani wi akale mparaizu velaboni ya vati.—Jo. 5:28, 29; Mer. 24:15.

16. Mareliho gani anjeedhela emeleli enjene a Mulugu a masaka abano?

¹⁶ Muttitti mwinjene wa emeleli a Mulugu ali velaboni ya vati masaka abano kanna njedhelo nodhowa wirimu. Dhahene ninga, Abramu, Sara, David, Joau Mbatizi, na alobwana vina ayana enjene ororomeleya a masaka a Bibilia, anjeedhela wakela mareliho a okala velaboni ya vati mwari mwa olamulela wa Omwene wa Mulugu.—Aheb. 11:10.

17. Mavuzo gani anakuliwe mwari mwa mutoma ondawo?

¹⁷ Velani attikitteliwi ena alivi velaboni ya vati, txino vanobudduwa mavuzo. (Ovuh. 12:17) Motagiha, attikitteliwi anfwanyela ovyona dhavi? Akala mmulogoni mwawo mukala mbali onroma oja mukatte na omwa vinyu va Muttuponi wa Wubuwela okwa wa Yezu, onfwanyela omweddiha dhavi? Kito akala muttengo wa abale anloga wi nili attikitteliwi onowunuwa? Koddi onofwanyela ozuzuma sabwa ya ejuwene? Mavuzo aba anele wakuliwa mwari mwa mutoma ondawo.