KATANALELA dhopadduwa esi ttaru dhinfwarela: Mbali wa muzombwe ohaddeliwa na dotoro wi okana eredda ehina murobwe. Mbali owunuwelavo oyelela ganyo yaye, mbwenye masiki na ovilibihedha kanwodha ofwanya yina. Murogora wororomeleya kanwodha okosa dhinji mmabasani a Yehova sabwa ya onakalaba.

1-2. Makattamiho gani angumanana attu enjene a nlogo a Yehova, nanda awene aniwamo dhavi?

² Akala weyo onogumanana makattamiho oligana na aba alogiwe, txino onubuwela wi weyo kuli elobwene. Makattamiho ninga aba anorimeliha wagalala wawo, anotolotxa nrhemezo nawo, vina anopatta mandano awo na attu ena.

3. Monelo gani onna Satana vina attu abale anawang’aneliye sabwa ya egumi ya nlogo na attu?

³ Elabo eji enolagiha monelo wa Satana mwaha wa egumi ya attu. Satana onoziveliwa weddiha nlogo na attu ninga dhilobo dhotowa ttima. Ahikaanaga thagaraga iyene wahimuzivalela Eva wi agahikaana ofuru koothiya omwiwelela Mulugu, masiki aziwaga wi Eva agahikwa. Satana ddinang’anela marhondda, politika, na marelijiau otene ottambi a mwilaboni. Nona kanintikina nigawonaga anyamarhondda, akadda politika, vina asogorheli a marelijiau afaraga merelo aye, ohilagiha nriho nne ntanaalelo na egumi ya attu.

4. Txini enasekeserhe iyo mwari mwa mutoma obu?

⁴ Mottiyana na Satana, Yehova onfuna wi iyo niziwe wila nikana ttima, vina ononikamihedha nigagumanana makattamiho annittukulela wubuwela wi kanili elobwene. (Masal. 136:23; Rom. 12:3) Mutoma obu onele woniha mukalelo  onnikamihedha Yehova na makattamiho ninga aba anfwarela: (1) Nigakala aredda, (2) nigafwanyiwa makattamiho otowa kobiri, vina (3) nigaroma wubuwela wi sabwa ya vyaka dhehu kaninawodhe omulabela Yehova mowakwana. Vamaromo, ndoweni nisekeserhe sabwaya enfwanyelihu okuluvela wi Yehova ononvaha ttima muttu-muttu wa iyo.

5. Vizinddiyelo gani dhinoniha wi attu akana ttima vamentoni va Yehova?

⁵ Yehova onittanddile modhela mbwebwe, masiki dhawene ttima ehu onokwaranya mattaka. (Wita 2:7) Koona mwaha dhing’onovi dhinnittukulela oziwa wi nikana ttima vamentoni va Yehova. Iyene ohapaddutxa attu na ewodhelo yotagiha mikalelo dhaye. (Wita 1:27) Dhahene, iyene ohinivaha nttittimiho opitta dhetene dhittanddiwe velaboni ya vati vina ohinivaha ettomo ya wang’anela elabo vamodha na dhinama.—Masal. 8:4-8.

6. Elobo gani yina enoniha wi Yehova onowavaha ttima attu ohiligana?

⁶ Mmaleli Adamu ottega, Yehova kattiyile ovaha ttima nlogo na attu. Iyo nikana ttima vamentoni vaye ofiyedha onilevela Mwanaye, Yezu, ninga yobolo ya dhotega dhehu. (1 Jo. 4:9, 10) Modhela yobolo eji, Yehova onele wavenyiha mukwani abale akwile sabwa ya yottega ya Adamu, “athu apama na abure.” (Mer. 24:15) Mazu a Mulugu anotonyihedha wi iyo nikana ttima vamentoni vaye kintanala akala ninopattiwa eredda, mayelego, obe wuluvala.—Mer. 10:34, 35.

7. Mwaha gani dhina dhinoniha wi nikana ttima vamentoni va Yehova?

⁷ Nikana mwaha dhina dhinnittukulela okuluvela wi nili attima vamentoni va Yehova. Iyene onikukusela oliye sabwa ya wona mukalelo orumeelile iyo miselu dhapama. (Jo. 6:44) Varomilihu wunuwiha mandano na Yehova, iyene ohinisusela. (Tia. 4:8) Yehova olabihedha mudhidhi na guru yaye wi anisunzihe, alagihaga wi nikana ttima vamentoni vaye. Iyene onoziwa elihu ovanene vina onowona ovilibihedha wehu. Masaka mena iyene ononisaddeya sabwa y’onikwela. (Gano 3:11, 12) Kavali waganyedha wi nikana ttima vamentoni va Yehova!

8. Mazu ali va Masalmo 18:27-29 annikamihedha dhavi nigagumanana makattamiho?

⁸ Attu ena omoona Mwene David, ninga muttu woveya, mbwenye iyene wanziwa wi Yehova wannimukwela vina wanimukamihedha. Sabwa ya David oziwa dhilobo esi, ehimuttukulela ovilela makattamiho na monelo wapama. (2 Sam. 16:5-7) Nigakubanyaga obe nigagumanana makattamiho, Yehova ononikamihedha wona dhilobodha na mukalelo wottiyana vina ninowodha okwaranya magudulanoya. (Kengesa Masalmo 18:27-29.) Vowi nikana nikamihedho na Yehova, kavo elobo enanitximihe omulabela nowagalala. (Rom. 8:31) Ovano ndoweni none makattamiho mararu ananikamihedhe ononelamo wi Yehova ononikwela vina ononivaha ttima.

9. Eredda enpatta dhavi mobuwelo wehu?

⁹ Eredda enowodha wobaniha mubuwelo wehu enittukulelaga wubuwela wi kanili elobwene. Txino ninokaanaga manyazo attu ena aganoona wi kanili deretu obe nigafunaga nikamihedho nawa. Masiki attu ena agahiziwe wi nili aredda, txino ninowana na dhubuwelo sabwani kaninwodha okosa dhilobo ninga mwakoselihu. Mbwenye masiki  na makattamiho aba, Yehova ononilibiha. Dhavi?

10. Mowiwanana na Gano 12:25, txini enanikamihedhe nigakala aredda?

¹⁰ Nigakala aredda, “mazu apama” anowodha onipangarhaza. (Kengesa Gano 12:25.) Mbibiliani, Yehova olebiha mazu apama anubutxedha wi iyo nikana ttima vamentoni vaye, masiki akala ninobulela. (Masal. 31:20; 41:4) Nigamwengesaga Bibilia, Yehova onele onikamihedha owanana dhubuwelo dhohifwanyelela dhintoteya sabwa ya eredda.

11. Mbali dhahi wakelile dhavi nikamihedho na Yehova?

¹¹ Koona yotagiha ya Jorge. Valiye muzombwe, wahipattiwa eredda yamuttiya wokubanyene, ejo yanimuttukulela wubuwela wi iyene kali elobwene. Iyene ohiloga: “Miyo kaddaziwa mukalelo wa owanana dhubuwelo dheteya sabwa ya eredda eji, vowi ddankana manyazo ddigobuwela mukalelo waddona attu ena. Vattabwa eredda yaga, miyo ddobuwela mukalelo ogatxinjile egumi yaga. Ddahidhugudheya vaddiddi vina ddahimukumbirha Yehova wi addikamihedhe.” Yehova omukamihedhile dhavi? Jorge ohakula: “Miyo ddanrutxiwa ofwaseya, nona ddahikokomeziwa wengesa dhipaddi dhing’onovi dha nivuru na Masalmo dhintonyihedha wi Yehova onowatanala emeleli aye. Miyo ddanengesa maversikulu abale siku na siku, ddahifwanya nipangarhazo vina nikamihedho. Na mudhidhiya, attu ena ahiroma wona wi ddinowagalala. Awene anddipanga wi anolibiheya sabwa ya oziveliwa waga. Ddahinonelamo wi Yehova wahakula malobelo aga! Iyene oddikamihedha otxinja mubuwelo waga. Ddihiroma ofwaseyela dhinloga Mazu aye wi, iyene onoddona masiki na oredda waga.”

12. Txini enakosiwe wi okaane nikamihedho na Yehova akala onowanana makattamiho a eredda?

 ¹² Akala weyo onowana na eredda, kakuluvela wi Yehova onoziwa makattamiho awo. Kamukumbirhe nikamihedho wila okaane monelo wapama mwaha wa makattamihoya. Ogamala kengesaga mBibiliani mazu a nipangarhazo alebihile Yehova. Kafwaseyelaga maversikulu anoniha wi Yehova onowavaha ttima emeleli aye. Dhahene, onele wona wi Yehova ddwapama na abale otene animulabela na nroromelo.—Masal. 84:12.

13. Mwazambo wa ntakulu onobuwele dhavi agayelela ganyo?

¹³ Amwazambo a ntakulu anofuna wakwanihedha dhojombeliwa dha amudhawa. Mbwenye, kamutanaalele mbali ottiyiwa ganyo masiki ahina muladdu. Iyene onovilibihedha wila afwanye ganyo yina, mbwenye enomurutxa. Makattamiho ninga aba anomuttukulela wubuwela wi iyene kahiyo elobwene. Ofwaseyela mapikirelo a Yehova anawodhe omukamihedha dhavi?

14. Mwaha gani dhinimuttukulela Yehova wakwaniha dhipikireliye?

¹⁴ Dila dhotene Yehova onowakwaniha dhipikireliye. (Jos. 21:45; 23:14) Iyene okana mwaha dhinjene dhinimuttukulela wakwaniha. Mwaha woroma bawi eji enopatta nzina vina oderetu waye. Yehova opikirhela wi onele wakoya emeleli aye aweddeyana vina iyene onofuna-wene wakwanihedha nipikirelo ntti. (Masal. 31:2-4) Ottiya ejo, kowiliwa Yehova kaganikoya iyo onkosa mpaddi wa amudhaye nigahikala ookubanyene. Nona iyene opikirhela onivaha dhojombeliwa dhehu dhomaningoni na  dhomuyani, vina kaiwo elobo enamukoddihe wakwanihedha nipikirelo ntti!—Mt. 6:30-33; 24:45.

15. (a) Magudulano gani agumanilena Akristu a nsaka zana noroma? (b) Nikuluvelo gani ninnivaha nivuru na Masalmo 37:18, 19?

¹⁵ Wubuwela wi Yehova onowakwanihedha dhipikireliye, enonikamihedha okuluvela nigagumanana makattamiho otowa kobiri. Koona yotagiha ya Akristu a nsaka zana noroma. Varomilani ofwara-fwariwa o Jerusalem, “etene abalaleyela elabo y’o Judeya, y’o Samariya. Arumiwi bahi bahalile.” (Mer. 8:1) Kobuwela yapadduwile. Mayelego! Enkala ninga awene ayelela numba na marhondda awa. Masiki dhawene, Yehova walivi na awene kattiyile; vina awene karimeliwe wagalala wanani. (Mer. 8:4; Aheb. 13:5, 6; Tia. 1:2, 3) Yehova wahakamihedha Akristu abale ororomeleya vina onele onikamihedha.—Kengesa Masalmo 37:18, 19.

16. Txini eganittukulele wubuwela wi webedha wehu kuna ttima vamentoni va Yehova?

¹⁶ Akala nili anakalaba, txino ninoroma wubuwela wi kanina dhilobo dhinjene dha onvaha Yehova. Txino Mwene David wana mubuwelo wakakene voluvaliye. (Masal. 71:9) Yehova ananikamihedhe dhavi?

17. Txini ensunzavo iyo na yotagiha ya murogora oniliwa Jheri?

¹⁷ Koona yotagiha ya murogora oniliwa Jheri. Iyene wawobiwa wi akale va matugumano a oshagihiwa mukalelo wokuputta Numba Yomwene, mbwenye iyene kafuna odhowawo. Iyene ohiloga: “Miyo ddihuluvala, ddamamukwela, vina kaddina ewodhelo yolabihedhiwa na Yehova. Miyo kaddili elobwene.” Omattiyu obule siku na  matugumano nihinatti, Jheri wahinfugulela murima waye Yehova modhela nlobelo. Mfiyeli siku na matugumanoya iyene wahifiya Onumbani Yomwene, mbwenye wannivivuza akala wanfwanyela-wene okala mwenemwale. Mwari mwa matugumano abale, namakosa diskursu mmodha ohiloga wi ninawodhe okana ewodhelo yamakamaka nigavittiya osunzihiwa na Yehova. Jheri ohiloga: “Miyo ddawubuwela, ‘miyo ddikana ewodhelo eji!’ Venevo ddahiroma wunla, sabwani ddahinonelamo wi Yehova wahakula nlobelo naga. Iyene wela oddikuluveliha wi ddikana elobo yamakamaka enfwanyelimi onvaha vina iyene wali womala nawale wi addisunzihe!” Obuwelaga siku nttile, Jheri ohiloga: “Ddafiyile omatugumanoniwa osilidhiwene, okumuwene, vina kaddavonana ttima. Mbwenye ddahiyelawo na nikuluvelo, nipangarhazo vina ttima!”

18. Bibilia ontonyihedha dhavi wi Yehova onovaha ttima mabasa ehu, masiki nigoluvala?

¹⁸ Masiki nuluvale, nikuluvele wi Yehova onelege onilabihedha mmabasani mwaye. (Masal. 92:13-16) Yezu onisunziha wi masiki akala ninowubuwela wi kanili amakamaka, Yehova onovaha ttima mabasa animukoselihu. (Lk. 21:2-4) Nona kafwaseyela enwodhiwe okosa. Motagiha, enowodheya ologa na attu ena mwaha wa Yehova, walobelela abalawo, vina walibiha attu ena okalavi ororomeleyene. Enimuttukulela Yehova wuvaha ttima kahiyo mabasa anakwanihedha weyo, mbwenye efunelo yawo ya omwiwelela.—1 Kor. 3:5-9.

19. Nikuluvelo gani ninnivaha Roma 8:38, 39?

¹⁹ Japama omwebedha Yehova, Mulugu webaribari onavaha ttima abale animulabela! Iyene onittanddile na efunelo yokosa mabasa aye, nona webedha webaribari ononittukulela wagalala mwigumini mwehu. (Ovuh. 4:11) Masiki noniwaga ninga attu ahina ttima mwilaboni, Yehova kannikanela manyazo. (Aheb. 11:16, 38) Nigakubanyaga sabwa ya eredda, otowa kobiri, obe wuluvala, nikuluvele wi kawo elobo enanimwalanihe na okwela onna Babihu wa wirimu.—Kengesa Roma 8:38, 39.