NSUNZO 1
‘Abale Animutamela Yehova Kanjombeliwa Elo Yapama’
NLEBO NA YAKA YA 2022:‘Abale animutamela Yehova kanjombeliwa elo yapama.’ —MASAL. 34:10.
JIBO 4 ‘Yehova Mukumbuzi Waga’
DHINASUNZE IYO *
Masiki Davidi afwanyiwaga dhilobo dhorutxa iyene wankuluvela wi txipo ‘kagajombeliwe elobo yapama’ (Kang’ana ddima 1-3) *
1. Makattamiho gani agumanilena Davidi?
DAVIDI welottawa wi abarele egumi yaye. Iyene wamuttawa Saul, mwene wa nlogo na Izrayel wafuna ompa. Vatameliye elobo yoja, Davidi wahifiya o kwatti y’o Nob wenewo walobiliye mikatte mitano. (1 Sam. 21:1, 3) Vasogorhova iyene na alobwana aye, ahidhowa ovitala mugurugudhani. (1 Sam. 22:1) Txini emuttukuleli Davidi okala mmakattamihoni ninga abene?
2. Saul wavekile dhavi vang’ovini? (1 Samuwel 23:16, 17)
2 Attu enjene anziveliwa na Davidi sabwani iyene wampemberha mukoddoni. Ejo yahimuttukulela Saul omukanela aje vina oroma omwidda. Saul wanziwa wi iyene kamwiweleli Yehova sabwa ya ejiwene iyene wahimunyanyala venevo bamuttoma Davidi wi akale mwene. (Kengesa 1 Samuwel 23:16, 17.) Oku balivi mwene, Saul na anyakoddo aye vina na attu enjene amukamihedha ahiroma omufwarafwara Davidi venevo Davidi wahittawa wi avune egumi yaye. Saul obuwela wi agahimuttukulela Yehova otxinja efunelo yaye ya omuttoma Davidi ninga mwene? (Iza. 55:11) Bibilia kanloga, mbwenye elobo modha enziwihu jowi: Saul wahivitatamulela makattamiho yekile egumi yaye vang’ovini. Abale anwana na Mulugu kampemberha!
3. Davidi wona dhavi makattamiho agumaniliyena?
3 Davidi wali muttu wovyeviha. Iyene kele owadela wi akale mwene wa Izrayel. Iyene wasakuliwe na Yehova. (1 Sam. 16:1, 12, 13) Ejo yahimuttukulela Saul omonaga Davidi ninga mwiddani waye. Mbwenye Davidi kampwattelihile muladdu Yehova sabwa ya makattamiho aba a otowiwa yoja vina ovitala mugurugudhani wi avune egumi yaye. Ottiya ejo, bali mugurugudhani wahipura mudhidhi woleba jibo yapama yomutamalelana Yehova. Mazu aba: ‘Abale animutamela Yehova kanjombeliwa elo yapama’ anokosa mpaddi wa jibo eso.—Masal. 34:10.
4. Mavuzo gani anasekeserhihu, nanda akalelini amakamaka?
4 Masaka abano alabeli enjene a Yehova ayelegi kana dhilobo dhinjene ena kankana oja wowakwanela. * Eji enoneyetxa makamaka nsaka ntti na corona virus. Nanda nubuwelaga ‘goyi enddimuwa’ eli vakuvi, ninojedhela wi ninele ogumanana midhidhi dhorutxa. (Mt. 24:21) Na dhetene esi muyubuweloni, ndoweni nifwanye dhowakula dha mavuzu aba: Davidi ‘kajombeliwa elo yapama’ na mukalelo gani? Ninfwanyelela eni osunza oziveliwa na dhinehuna? Ninfwanyelela eni okuluvela wi Yehova onele onikoya? Nanda ninavisasanyedhe dhavi ovanene sabwa ya musogorho?
“KADDINJOMBELIWA ELO”
5-6. Mazu a Masalmo 23:1-6 annikamihedha dhavi ononelamo mazu aba alogile Davidi wi alabeli a Yehova ‘kanjombeliwa elo yapama’?
5 Txini entapulela mazu aba alogile Davidi wi alabeli a Yehova ‘kanjombeliwa elo yapama’? Ninele ononelamo pama nigasekeserha mazu oladdana anfwanyeya va Masalmo 23. (Kengesa Masalmo 23:1-6.) Davidi oromile salmo ntti na mazu aba: “Nabuya [Yehova] ddi mukumbuzi waga. Kaddinjombeliwa elo.” Versu dhinfwarela mpaka dhomariha, Davidi ohiloga dhilobo dhinjene dhili dhofuneya—mareliho menjene akeliliye mpaddi w’omuyani anvaha Yehova. Yehova wanimusogorhela “mudila yomyala,” vina sabwa ya Yehova okala oweddeyana wanimukamihedha Davidi midhidhi dhofwasa vina dhamakattamiho. Davidi wahinonelamo wi na “munyofu mwiti” wamusapelana Yehova kigaliwo elobo yomukubanyiha. Midhidhi dhina wankukumuwa akalaga ninga onedda “mwego mwawopiha” vina wahikana amwiddani anfwarafwara. Masiki dhawene Davidi ‘kova elo’ sabwani mukumbuzi waye wali Yehova.
6 Ovano ninfuna nirome wakula mavuzo abale manai: Davidi ‘kajombeliwa elo yapama’ na mukalelo gani? Mpaddi womuyani, iyene wahikana dhilobo dhinjene dhatameliye. Wagalala waye kuwadha sabwa yokana dhilobo dhomaningoni. Davidi wanagalala na esile dhamusapelana Yehova. Mbwenye yalitxi yamakamaka mwigumini mwaye yali mareliho na nibarelo nanvaha Mulugu.
7. Ninga munlogela Luka 21:20-24, makattamiho gani agumanilena Akristu oroma akala o Judeya?
7 Mazu a Davidi anowodha onikamihedha okana monelo wapama sabwa ya dhilobo dhomaningoni. Enowodheya opurelamo dhilobo dhinehu, mbwenye kili yofuneya ozuzumeletxa esuwene. Epadduwile na Akristu oroma akala o Judeya enowoniha ebaribari ya mazu aba. (Kengesa Luka 21:20-24.) Yezu wahibaza wawaddela wi nigahifiya nsaka nigarijiwe Jeruzalemi “na anyakoddo.” Mudhidhi ogaromile eji opadduwa, awene anfwanyela “othawela omwangoni.” Ottawa oku ogahivuna dhigumi dhawa, mbwenye eji yatapulela wi agahittiya dhilobo dhina. Vyaka dhivirile, Mwang’aneli ohiloga ejuwene na mazu aba: “Awene ahittiya mindda, numba dhawa vina dhoja dhali mmatakulu mwawa. Akuluvelaga nibarelo vina nikamihedho na Yehova, awene ekile vasogorho webedha wawa ottiya elobo-txilobo egadhilani wona ninga yamakamaka.”
8. Elobo gani yamakamaka ensunzehu na ejile yapadduweli Akristu oroma akala o Judeya?
8 Elobo gani yamakamaka ensunzehu na ejile yapadduweli Akristu oroma akala o Judeya? Mwang’aneli oddule ohiloga dhahi: “Ninodhaga ogumanana dhoweha musogorho sabwa ya mukalelo ononihu dhilobo dhomaningoni. Dhilobo esi dhinehu samakamaka opitta weddeyana wehu na Yehova? Goyi enddimuwa egaroma ninodhaga ogumanana dhorutxa bifuneya wi nikose kukuttu. Enele ofuneya okala omala-nawale wi nikose elobo-txilobo, dhahene ninga yakosile Akristu oroma akala o Judeya.” *
9. Nipangarhazo gani ninkana weyo na malago avahile murumiwi Paulo Ahebreu?
9 Weyo onowodha wubuwela mukalelo warutxile Akristu abale ottiya dhotene dhana awene baroma egumi eswa mburo mwina? Awene anfwanyela okuluvela wi Yehova agahakamihedha modhela wavaha dhajombela. Mbwenye yahikalawo elobo egakamihedhile. Vyaka tanu mundduni akadda Roma ahinatti orija kwatti ya Jeruzalemi, murumiwi Paulo wahavaha malago apama Ahebreu: “Kamujiwe murima na muwaku. Ziveliwanina dhinnenyu, vowi Mulugu-wene okala waye óloga dhahi mbíbiliani: ‘Miyo kaddinauthiye weka, kaddinaunyanyale.’ Dhahene ninowodha ologa nroromelaga: ‘Nabuya ddinddikoya, kaddinova elo. Txini enawodhe athu oddírana?’” (Aheb. 13:5, 6) Yali yovevuwa mwa abale alabihedhile malago a Paulo aloga mwaha wa ovevutxa egumi. Awene anfwanyela okana ebaribari wi Yehova kagattihile okwa na dala. Mazu a Paulo anonivaha nikuluvelo wi ninofwanyela okana nroromelo nakene.
‘NIFWASENA DHINIHUNA’
10. Malago gani ‘afuna’ Paulo wi niziwe?
10 Paulo wahinvaha Timótio malago akene, malagoya anonipatta. Iyene ohileba: “Akala ninowona yoja na yowabala, nifwansena esi-wene.” (1 Tim. 6:8) Eji entapulela wi kaninfwanyela oja dhoja dhapama, okana numba yaderetu obe ogula guwo dhiswa? Kahiye ejuwene elogile Paulo. Iyene afuna aloge wi ninofwanyela ofwasa na dhilobo dhina iyo. (Fil. 4:12) Jijene ‘yafuna’ ologa Paulo. Wandana wehu na Mulugu kunda mwa dhilobo dhina iyo.—Hab. 3:17, 18.
Ana Izrayel ‘kajombeliwe elo yapama’ mwari mwa vyaka 40 bali mwiddeddereni. Iyo ninawodhe dhavi wagalala na dhinehuna? (Kang’ana ddima 11) *
11. Ninsunza eni na mazu alogile Mizé na ana Izrayel mwaha wa ottaba na dhina iyo?
11 Dhinubuwela iyo wi ninofuna txino kahiyo ennifunana Yehova. Kona yawaddelile Mizé ana Izrayel muvirilani vyaka 40 bali mwiddeddereni: “Kamudduwale: Miyo [Yehova] Nabuya Mulugu wenyu, ddiururiyani mmabasani mwenyu motene; ddiuvelelani muleddoni mwenyu muviraga mwiddeddereni mpuno yohipimeya. N’ejino vyaka makummanayi Nabuya Mulugu wenyu [Yehova] eddagavi na nyuwo, muhijombeliwaga elo.” (Olib. 2:7) Mwa vyaka esi 40, Yehova wanavaha mana ana Izrayel wi aje. Guwo dhawa—dhittukulilani abudduwaga mu—Ejipitu kadhitayile. (Olib. 8:3, 4) Masiki attu ena onaga wi esile dhavahiwani kadhakwanela, Mizé wahawubutxedha ana Izrayel wila awene agahikana elobo-elobovi yajombela. Yehova onele wagalala nigasunza—ottaba vina ovaha ttima dhilobo dhovevuwa dhinnivaha iyene vina nonaga ninga maruriho, ottiya ejo kanidduwale otamalela.
OKULUVELE WI YEHOVA ONELE WUKOYA
12. Txini enoniha wi Davidi wamukuluvela Yehova ottiya ovikuluvela?
12 Davidi wanziwa wi Yehova ddoweddeyana vina onowatanala abale animukwela. Mudhidhi wali egumi yaye vangovini iyene ohileba Masalmo owakwana 34, na nroromelo nddimuwa Davidi wahimona ‘anju wa Yehova amwamelelaga.’ (Masal. 34:7) Enkala ninga Davidi wamuladdaniha anju wa Yehova na munyakoddo onkala txenjewa na amwiddani aye. Ottiya ejo, Davidi wali munyakoddo woliba murima vina Yehova wahimpikirhela wi iyene agahikala mwene, masiki dhawene iyene kakuluvela ewodhelo ya olabihedha fisga obe supadda wi ape amwiddani aye. (1 Sam. 16:13; 24:12) Davidi wamuroromela Mulugu, akuluvelaga wi anju wa Yehova onowabarela ‘abale animuriha Iyene.’ Masaka abano kanijedhele wi Yehova onele onibarela na matikiniho. Iyo nikana ebaribari wi abale animukuluvela Yehova kuli elo enatabutxe namukalakala.
Mudhidhi wa goyi enddimuwa, Gog wa Magog onele otamela onilupela mmatakulu mwehu. Mbwenye nikane nikuluvelo wi eso dhigapadduwa, Yezu na anju anele onibarela (Kang’ana ddima 13)
13. Sabwaya jani Gog wa Magog agalupela nlogo na Mulugu anonege ninga novevuwa, nanda iyo nina nikuluvelo gani? (Kang’ana foto ya kapa.)
13 Vowi omagomo onowaddamela, omuroromela wehu Yehova wi onele onibarela onodhaga wehiwa. Gog wa Magog, agalupela nlogo na Mulugu, dhigumi dhehu dhinodhaga okala vang’ovini. Enele ofuneya omukuluvela Yehova wi iyene onowodha vina onele onivuna. Attu a malogo, ananone ninga mabila ahina nibarelo. Iyo kaninakane futti vina kanakanaga maswagiho owana koddo. (Ezek. 38:10-12) Sabwa ya ejuwene anele wona wi kinarutxe onibuddugelawa. Awene kanawodhe wona ejile enonihu na mento a nroromelo, makuru a anyakoddo ali wirimu ali omala nawale wila anibarele. Sabwaya? Sabwani awene kana nroromelo—ninawodhiha wawona anyakoddo a wirimu. Anele otikina venevo vanadhe angelu a wirimu anawane na awene wi anibarele!—Ovuh. 19:11, 14, 15.
OVISASANYEDHELE OVANENE DHAMUSOGORHO
14. Ttarho gani dhinfwanyela iyo ottukula ovanene wi nivisasanyedhele dha musogorho?
14 Ninawodhe dhavi ovisasanyedhela dhinapadduwe musogorho? Voroma, ninofwanyela okana monelo wapama sabwa ya dhilobo dhomaningoni, niziwaga wi nalabona ninele ottiya. Vina ninofwanyela wagalala na dhina iyo vowi mandano ehu na Yehova balitxi amakamaka. Nigamuziwa pama Mulugu wehu Yehova, ninele okuluvela wi iyene ohikana ewodhelo ya onibarela mudhidhi onanilupele Gog wa Magog.
15. Mapadduwo gani amusunzihile Davidi wi Yehova txipo kagamunyanyalile?
15 Otanalela dhilobo dhimukamihedhile Davidi enele onikamihedha iyo vina ovisasanyedhela dhoweha dhinagumanihuna musogorho. Davidi ohiloga: ‘Pimani mone opama wa Yehova; wagari ddule onimuroromela.’ (Masal. 34:8) Mazu aba anowoniha sabwaya yamuttukulela Davidi ororomela nikamihedho na Yehova. Davidi wanimukuluvela Yehova iyene txipo kagamunyanyalile. Davidi bali muzombwe, wahiwana na munyakoddo woliba vaddiddi wa mFilisteu wakuweliwa Goliya. Wahimwaddela dhahi: ‘Ddabunene Yehova onele wugwiyedha mmadani mwaga.’ (1 Sam. 17:46) Vasogorhova, Davidi alabaga vatakulu va mwene Saul, Saul wahitagiha dila dhinjene ompa. Mbwenye ‘Yehova wali na’ Davidi. (1 Sam. 18:12) Sabwa ya iyene wona nikamihedho nanvahile Yehova masaka a mundduni Davidi wankuluvela wi Yehova agahimukamihedha sabwa ya makattamiho agumaniyena mudhidhene obule.
16. Na mukalelo gani onawodhihu ‘weha’ opama wa Yehova?
16 Nigakuluvela venjene makalelo annisogorhela Yehova masaka abano, ninele okana nroromelo nawi iyene onele onivuna musogorho. Enofuneya okana nroromelo vina okala omala-nawale wi nimukuluvele Yehova, nigadhowaga omuloba muzugu wehu mudhidhi wa odhowa wona matugumano a ttattamwa obe a murudda vina nigamulobaga wi anivugulele mudhidhi wa olaba wi niwodhege wona matugumano otene vina okana mudhidhi mwinjene wa olaba mmabasani a olaleya. Enodhaga opadduwa muzugu wehu okodda yoloba yehu vina baniyelela ganyoya. Ejo egapadduwa ninele okana nroromelo noliba wi Yehova kananittiye obe kananinyanyale vina onele odhowavi anikamihedhaga okana dhojombeliwa dha siku na siku? (Aheb. 13:5) Abali enjene anlaba mabasa a mudhidhi wotene anologaga dhotagiha dhinoniha wi Yehova onowakamihedha na dhojombeliwa dhawa. Yehova ddororomeleya.
17. Nlebo na yaka na 2022 ttivi, nanda nikalelini nofwanyelela?
17 Na nikamihedho na Yehova iyo kanina mwaha wa wova masiki na dhorutxa dhinadhege musogorho. Nigeka vamburoni voroma dhofuna dha Mulugu wehu, iye txipo kananinyanyale. Wi anubutxedhe ofuneya ya ovisasanyedha ovanene sabwa ya masiku orutxa a musogorho vina omukuluvela Yehova wi kananinyanyale Nikuru Nolamulela nisakula mazu a Masalmo 34:10 wi nikale nlebo na yaka ya 2022: ‘Abale animutamela Yehova kanjombeliwa elo yapama.’
JIBO 38 Yehova Onele Wulibiha
^ par. 5 Nlebo nisakuliwe na yaka ya 2022 ttintti na Masalmo 34:10: ‘Abale animutamela Yehova kanjombeliwa elo yapama.’ Emeleli a Yehova enjene ororomeleya ayelegi kana dhilobo dhinjene dhovikaliyanawo. Enlogeliwa nni ‘kanjombeliwa elo yapama’? Nanda ononelamo verso ya nlebo ntti enanikamihedhe dhavi ovisasanyedha ovanene mwa makattamiho anafwanyihu musogorho?
^ par. 4 Koona “Mavuzo Ankosa Anamengesa” Mmwang’anelini wa 15 wa Semteburu wa 2014.