NSUNZO 4
Ninubuwelelani Okwa wa Yezu
“Ejiya eraganivi muddubuwelaga miyo.”—LK. 22:19.
JIBO 20 Munivaha Nammodha Wenyu
DHINASUNZE IYO *
1-2. (a) Mudhidhi gani wamakamaka onimubuwelihu mwanammudhi wokweleya okwile? (b) Txini yitile Yezu omattiyu womariha ahinakwa?
KINTANALA mudhidhi okwile mwanammudhi wamukwelihu, iyo ninomubuwelavi. Wubuwela labo nikwiliye enonubutxedha dhilobo dhamakamaka dhakosiye baliwo.
2 Yaka-yaka, iyo ninotugumana mumodhani wi nubuwele okwa wa muttu wamakamaka onimukwelihu—Yezu Kristu. (1 Ped. 1:8) Ninotugumana mumodhani wi nimubuwele oddule ovahile egumi yaye wi anivune mwa dhottega vina okwa. (Mt. 20:28) Pumwenemo, Yezu wafuna wi anamafwara aye obuwelege okwa waye. Omattiyu obule ahinakwa, Yezu wahita siyari ya Nabuya vina wavaha nikokomezo ntti: “Ejiya eraganivi muddubuwelaga miyo.”—Lk. 22:19.
3. Txini enasekeserhihu mwari mwa nsunzo ntti?
3 Attu ang’onovi ana njedhelo nodhowa wirimu banja pau na vinyu vamuttuponi wa Wobuwela Okwa wa Yezu. Attu matxikwi na matxikwi ana njedhelo nokala velaboni ya vati anokala vamuttuponiva vina. Mwari mwa nsunzo ntti, ninele osekeserha sabwaya enattukulela makuru aba meli okala vamuttuponi wa Wobuwela Okwa wa Yezu vyaka dhotene. Ninele osekeserha dhopurelamo dhinkanehu sabwa ya wona muttupo obu. Ovano ndoweni nisekeserhe sabwa dhing’onovi dhinattukulela attikitteliwi oja pau vina omwa vinyu vamuttuponi wa Wubuwela Okwa wa Yezu.
TXINI ENATTUKULELA ATTIKITTELIWI OJA PAU VINA OMWA VINYU
4. Attikitteliwi anjelani pau vina ammwelani vinyu vamuttuponi wa Wubuwela Okwa wa Yezu?
4 Yaka-yaka, attikitteliwi anoja pau vina anomwa vinyu vamuttuponi wa Wubuwela Okwa wa Yezu. Awene anjelani pau vina ammwelani vinyu? Wi nakule nivuzo ntti, ndoweni nitanaleleni epadduwile omattiyu womariha Yezu bali velaboni ya vati. Mumalile muttupo wa Paskwa, Yezu wahita muttupo mwina obuwene onziwiwa ninga Siyari ya Nabuya. Iyene wahittukula pau na vinyu bavirihedha arumiwi aye ororomeleya 11 vina awaddela wi aje vina amwe. Venevo Yezu wahawaddela sabwa ya mapagano meli—nipagano niswa vina nipagano na Omwene. * (Lk. 22:19, 20, 28-30) Mapagano aba meli ahifugula dila wi arumiwi a Yezu vina attikitteliwi akale amwene vina anamakutta wirimu. (Ovuh. 5:10; 14:1) Attikitteliwi ahalilewo, * ankosa mpaddi wa mapagano aba meli banja vina bammwa vinyu vamuttuponi wa Wubuwela Okwa wa Yezu.
5. Txini ennonelamo attikitteliwi sabwa ya njedhelo nawa?
5 Mwaha mwina onattukulela attikitteliwe okala va muttupo wa Wubuwela Okwa wa Yezu bubu: Awene anokalavo wi attabele njedhelo nawa. Yehova ohavaha attikitteliwi aliwo mento velaboni ya vati njedhelo ya wakela—egumi yohimala wirimu, wi alabe vamodha na Yezu Kristu vina attikitteliwi ena ankosa mpaddi wa 144.000, yamakamakaya anele okala vakuvi na Yehova Mulugu! (1 Kor. 15:51-53; 1 Jo. 3:2) Awene anononelamo wi awobeliwa okala wirimu. Mbwenye kandduwala wi anofwanyela okalavi ororomeleya mpaka okwa wawa. (2 Tim. 4:7, 8) Otanalela njedhelo nawa nokala wirimu ninowadhelana wagalala. (Tito 2:13) Kito “mabila mena”? (Jo. 10:16) Ankalelavo eni vamuttuponiva?
MABILA MENA ANKALELANI VAMUTTUPONI WA WUBUWELA OKWA WA YEZU
6. Sabwaya jani mabila mena agakalaga vamuttuponi wa Wubuwela Okwa wa Yezu vyaka dhotene?
6 Mabila mena agadhowa vamuttuponi wa Wubuwela Okwa wa Yezu, kanja pau vina kammwa vinyu, awene andhowa wona muttupoya. Yaka ya 1938, paromile owobiwa Akristu ana njedhelo nokala velaboni ya vati okala vamuttuponi wa Wubuwela Okwa wa Yezu. Mwang’aneli woroma wa Marsu wa yaka ya 1938, ohiloga dhahi: “Enokala yapama vina yofwanyelela [mabila mena] okala vamuttuponi obu wi one dhetene dhinfuna okosiwa venevo. . . . Awene anele wagalala sabwa ya okala vamuttuponi obu.” Dhahene ninga enagalala abale anwobeliwa okala vamuttuponi a matelo, mabila mena anowagalala sabwa ya okala vamuttuponi wa Wubuwela Okwa wa Yezu.
7. Txini enattukulela mabila mena okana efunelo ya ovuruwana diskursu ya muttupo wa Wubuwela Okwa wa Yezu?
7 Mabila mena vina anowagalala na njedhelo nawa. Awene anokala vamuttuponi wa Wubuwela Okwa wa Yezu wi avuruwane diskursu ya muttupoya. Anotanalela ejile enakose Kristu na attikitteliwi owakwana 144.000 analamulele na iyene vina mabasa anakoselani attu ororomeleya velaboni ya vati mwari mwa Olamulela wa Vyaka Txikwi. Attikitteliwi alamulelaga na Mwene wawa Yezu Kristu, anele okamihedha wi elabo yotene esadduliwe ekale paraizu vina akamihedhe attu owiwelela okala oligana. Jottabiha attu matxikwi na matxikwi okala vamuttuponi wa Wubuwela Okwa wa Yezu wi atanalele wakwanihedheya wa mavuhulo anfwanyeya mBibiliani, ninga aba ali va Izaiya 35:5, 6; 65:21-23; vina Ovuhulela 21:3, 4. Otanalela mukalelo onakale elabo eswa, onolibiha njedhelo nawa sabwa ya musogorho vina okanavi efunelo ya odhowavi amulabelaga Yehova.—Mt. 24:13; Gal. 6:9.
8. Sabwa gani yina enattukulela mabila mena okala vamuttuponi wa Wubuwela Okwa wa Yezu?
8 Ndoweni nitanalele sabwa yina enattukulela mabila mena okala vamuttuponi wa Wubuwela Okwa wa Yezu. Awene anofuna otonyihedha okwela wawa vina wakamihedha attikitteliwi. Nzu na Mulugu nahibaza ologa wi attikitteliwi na mabila mena agahilaba mumodhani. Na mukalelo gani? Ndoweni nisekeserhe dhotagiha dhing’onovi.
9. Nivuhulo nili va Zakariya 8:23 ninoniha dhavi ejile eniwamo mabila mena sabwa ya attikitteliwi?
9 Kengesa Zakariya 8:23. Nivuhulo ntti nokoddela ninowoniha ejile eniwamo mabila mena sabwa ya abali na arogora ali attikitteliwi. Mazu aba ‘Muyuda’ vina “nyuwo” antonya nikuru nimodhanene na—attikitteliwi aliwovi masaka abano. (Rom. 2:28, 29) Attu “kumi anabudduwe mmalogoni othiya-thiyana” anaddiwana mabila menagu. Awene “anele othiddelavi”—weddeyana wawa—avitaganyihaga na attikitteliwi, wi amulabele Yehova mumodhani. Ottiya ejo, omattiyu wa Wubula Okwa wa Yezu mabila mena anotonyihedha okala mumodhani na attikitteliwi modhela okala vamuttuponiva.
10. Yehova onakwanihedha dhavi nivuhulo ninfwanyeya va Ezekiyel 37:15-19, 24, 25?
10 Kengesa Ezekiyel 37:15-19, 24, 25. Wi nivuhulo ntti nakwanihedheye, Yehova onowataganyiha attikitteliwi na mabila mena wi akale mumodhani nowiwanana. Nivuhulona ninloga sabwa ya etxi-muri. Abale ana njedhelo nokala wirimu antonya muri wa “Judá” (nlogo mwasakuliwa amwene a Mwizrayel), mwa abale ana njedhelo nokala velaboni ya vati, antonya muri wa “Efraim.” * Yehova agahiziveliwa otaganyiha makuru aba meli wi adhe okala “muri mmodha.” Eji entapulela wi awene agahimulabela mowiwanana Mwene wawa, Yezu Kristu. Yaka-yaka, attikitteliwi vina mabila mena anokala va muttuponi wa Wubuwela Okwa wa Yezu. Kankala makuru meli ottiyana, ankala “nikuru nimodha” asogorheliwaga na “mukumbuzi mmodha.”—Jo. 10:16.
11. “Mabila” anlogiwa va Mateu 25:31-36, 40 anoniha dhavi wi anowakamihedha abali a Kristu?
11 Kengesa Mateu 25:31-36, 40. Vamusiboni obu “mabila” anatonya aligani aliwovi nsaka ntti nomariha—ana njedhelo nokala velaboni ya vati kuloga mabila mena. Awene anodhowavi akamihedhaga Akristu ottikitteliwa aliwovi wi awodhe wakwanihedha muttorho onani wokamihedha mabasa a olaleya vina wakosa—anamafwara ankosiwa elabo yotene.—Mt. 24:14; 28:19, 20.
12-13. Mikalelo gani dhina dhottiyana-ttiyana dhinlagiha mabila mena wi anowakamihedha abali a Kristu?
12 Vyaka dhotene, sumana dhing’onovi labo na Wubuwela Okwa wa Yezu nihinafiya mabila mena anotonyihedha wi anowakamihedha abali a Kristu modhela okosa muli mwetemwene wi akose mabasa ankosiwa elabo yotene ya wawoba attu ana efunelo ya wona Muttupo obu. (Koona kasha “ Onovisasanyedha wi Wone Muttupo wa Wubuwela Okwa wa Yezu?”) Awene vina anokamihedha masasanyedho ankosiwa wi muttupo obu wa Wubuwela Okwa wa Yezu okosiwe mmilogoni dhotene dha mwilaboni masiki akala vamulogoniva kavali muttikitteliwi. Mabila mena anowakamihedha abali a Kristu na mikalelo dhina dhottiyana. Awene anononelamo wi Yezu onovaha ttima mabasa anakoselani abali a Kristu sabwani onona ninga animukosela iyene.—Mt. 25:37-40.
13 Sabwa gani dhina dhinnittukulela okala vamuttuponi wa Wubuwela Okwa wa Yezu, ehitanalaga akala njedhelo nehu ttokala velaboni ya vati obe wirimu?
IYO NOTENE NINDOWELA ENI VAMUTTUPONI WA WUBUWELA OKWA WA YEZU
14. Yehova na Yezu alagihile dhavi wi anonikwela venjene?
14 Iyo ninotamalela onikwela onilagihile Yehova vina Yezu. Yehova ononilagiha onikwela waye na merelo ottiyana-ttiyana. Mbwenye mukalelo mmodha onilagihiliye onikwela waye ku onirumela Mwanaye wamakamaka wi atabuwe vina anikwele. (Jo. 3:16) Iyo ninonelamo wi Yezu ohinilagiha okwela onddimuwa sabwa ya ovilevela wi anikwele. (Jo. 15:13) Iyo txipo kaninawodhe ompitxela Yehova vina Yezu mwa ejile enikoselani. Mbwenye enowodheya olagiha watamalela wehu modhela dhokosa dhehu dha siku na siku. (Kol. 3:15) Okala vamuttuponi wa Wubuwela Okwa wa Yezu ononubutxeza okwela onilagihilani vina mukalelo onakwelihu.
15. Txini enattukulela attikitteliwi na mabila mena ovaha ttima nvaho wa yobolo?
15 Iyo ninovaha ttima nvaho wa yobolo. (Mt. 20:28) Attikitteliwi anovaha ttima venjene yobolo. Sabwani nvaho wa yobolo onowawodhiha okana njedhelo nokala wirimu. Sabwa ya orumela mukutto wa yobolo wa Yezu Kristu Yehova onowakuwela attikitteliwi ninga aligani vina onowawira anaye. (Rom. 5:1; 8:15-17, 23) Vina mabila mena anotamalela yobolo. Sabwa ya ororomela mukutto wa Yezu anokala ororomeleya vamentoni va Yehova wi amulabele mattiyu na mutana. Vina ahikana njedhelo nawi anele oviluwa ‘mmasosoni manddimuwa.’ (Ovuh. 7:13-15) Wi makuru aba omeli awodhe otonyihedha otamalela wawa vyaka dhotene anokala vamuttuponi wa Wubuwela Okwa wa Yezu.
16. Sabwa gani yina ennittukulela okala vamuttuponi wa Wubuwela Okwa wa Yezu?
16 Sabwa yina ennittukulela okala va Wubuwelani Okwa wa Yezu jowi iyo ninfuna nimwiwelele Yezu. Kintanala akala njedhelo nehu ttokala wirimu obe velaboni ya vati, muttu-muttu wa iyo onofwanyela wiwelela ejile elogile Yezu omattiyu obule ahinakwa: “Ejiya eraganivi muddubuwelaga miyo.”—1 Kor. 11:23, 24.
NIMPURELAMO DHAVI NIGAKALA VAMUTTUPONI WA WUBUWELA OKWA WA YEZU
17. Okala vamuttuponi wa Wubuwela Okwa wa Yezu onnikamihedha dhavi okala ofiyedheya na Yehova?
17 Ninokala ofiyedheya na Yehova. (Tia. 4:8) Dhahene ninga musunzilehu, okala vamuttuponi wa Wubuwela Okwa wa Yezu ononivaha gari wi nitanalele njedhelo ninnivaha Yehova vina otanalela onikwela onddimuwa onitonyihedhiliye. (Jer. 29:11; 1 Jo. 4:8-10) Otanalela sabwa ya njedhelo nehu na musogorho vina onikwela onddimuwa onilagihile Yehova ononikamihedha wunuwiha omukwela wehu vina olibiha mandano ehu na iyene.—Rom. 8:38, 39.
18. Otanalela yotagiha ya Yezu ennittukulela okosa eni?
18 Iyo ninofwara yotagiha ya Yezu. (1 Ped. 2:21) Ahalagawo Malabo mang’onovi wi nifiye siku na Wubuwela Okwa wa Yezu, iyo ninozuzumela wengesa mapadduwo anfwanyeya mBibiliani ereyile sumana dhomaria Yezu bali velaboni ya vati, okwa waye vina ovenyihiwa waye mukwani. Ottiya ejo labona nigafiya, diskursu ya muttupoya enonubutxedha okwela onilagihile Yezu. (Ef. 5:2; 1 Jo. 3:16) Wengesa mapadduwo anoniha ovilevela wa Yezu enonittukulela ‘wedda ninga yeddile iyene.’ —1 Jo. 2:6.
19. Ninawodhe dhavi okalavi mukwelani mwa Mulugu?
19 Iyo nihigana okalavi mukwelani mwa Mulugu. (Jud. 20, 21) Ninokalavi mukwelani mwa Mulugu nigakosa muli mwetemwene wi nimwiwelele, nitxenihe nzina naye vina nikose dhilobo dhinimwagalaliha. (Gano 27:11; Mt. 6:9; 1 Jo. 5:3) Okala vamuttuponi wa Wubuwela Okwa wa Yezu ononittukulela okosa muli mwetemwene wi siku na siku nikosege dhilobo dhinimwagalaliha Yehova, nikalaga ninga ninloga na iyene wi ‘miyo ddinofuna okalavi mukwelani mwenyu okala-nokala-wene!’
20. Mwaha gani dhinehu dhinnitukulela okala vamuttuponi wa Wubuwela Okwa wa Yezu?
20 Kintanala akala njedhelo nehu ttokala wirimu obe velaboni ya vati iyo nikana mwaha dhinjene dhinnittukulela okala vamuttuponi wa Wubuwela Okwa wa Yezu. Vyaka dhotene dhintugumanelehu wona muttupo obu iyo ninowubuwela okwa wa muttu onimukwelihu, Yezu Kristu. Yamakamakaya empitta dhotedhene labo ntto ninowubuwela merelo a okwela—alagihile Yehova mwa onirumela Mwanaye ninga yobolo. Yaka ejino Wubuwela Okwa wa Yezu, onakale Ishano na txuguwo labo 15 na Abril yaka ya 2022. Iyo ninomukwela venjene Yehova na Mwanaye, nona elitxi yamakamakaya labona na Wubuwela Okwa wa Yezu nigafiya kukala vamuttuponiva.
JIBO 16 Nimukokorele Yehova vina Mwanaye Yezu
^ par. 5 Kintanala akala njedhelo nehu tta odhowa wirimu obe okala mparaizu velaboni ya vati, vyaka dhotene ninowona Muttupo Wawubuwela Okwa wa Yezu. Mwari mwa nsunzo ntti, ninele osekeserha Malebo ananikamihedhe oziwa enonela iyo matugumano aba amakamaka vina empurelamo iyo mwa okosa ejuwene.
^ par. 4 Wi oziwevi miselu dhina sabwa ya nipagano niswa vina nipagano na Omwene, koona mutoma wa nsunzo “Vocês se Tornarão ‘Um Reino de Sacerdotes’” mu A Sentinela wa 15 wa Outubro wa yaka ya 2014, makuku 15-17.
^ par. 4 MAZU MENA ATAPULELIWE: Mazu aba attikitteliwi ahalilewo anaddiwana Akristu ottikitteliwa ali velaboni ya vati.
^ par. 10 Wi okane miselu dhina sabwa ya nivuhulu ninfwanyeya va Ezekiyel kapitulu 37, koona nivuru A Adoração Pura de Jeová—É Restaurada! makuku. 130-135, ddima. 3-17.