NSUNZO 5
‘Olabihedhe Pama Mudhidhi Wawo’
‘Tamelani wedda txenjewa. Muhikalege ninga ataduwa, mweddege na malago, mulabihedhe pama mudhidhi wenyu.’ —EF. 5:15, 16.
JIBO 8 Yehova Ttawela Yehu
DHINASUNZE IYO *
1. Iyo ninlabihedha dhavi mudhidhi wehu na Yehova?
IYO NINOZIVELIWA okalaga mudhidhi mwinjene na attu abale annizivela. Atelani anoziveliwa okala mudhidhi mwinjene mumodhani. Azombwe anoziveliwa okala mudhidhi mwinjene na akwawa ofiyedheya. Iyo notene ninoziveliwa venjene okala na abali vina arogora ali Akristu. Opitta dhotedhene eso, iyo ninoziveliwa okala mudhidhi mwinjene na Mulugu wehu Yehova. Ninowodha woniha ejuwene modhela olobela, wengesa Nzu naye vina otanalela mikalelo dhaye dhapama. Mudhidhi obu onkala iyo na Yehova bwattima vaddiddi!—Masal. 139:17.
2. Dhorutxa gani dhingumanana iyo?
2 Iyo ninoziveliwa olobela, omwengesa Bibilia mbwenye okosa dhilobo esi kahiyo elobo yovevuwa. Masaka abano, dhihikalawo dhilobo dhinnijela mudhidhi wozuzumela mabasa omuyani. Motagiha, odhowa omabasani, wazuzumela anamudhi, na dhilobo dhina dhofuneya dhinonijela mudhidhi wehu wa olobela, osunza vina otanalela.
3. Elobo gani yina eniya mudhidhi wehu?
3 Ehikalawo elobo yina enniyela mudhidhi. Nigahikalele txenjewa, dhilobo dhihili dhabure dhinodhaga onijela mudhidhi wafunihu olabihedha wi nikale ofiyedheya na Yehova. Motagiha, kahiye yabure oponya mpirha. Mbwenye mavego aba anodhaga onniyela mudhidhi wafwanyilihu ozuzumela dhilobo dhomuyani. Ninofwanyela wika mavego vamburoni vawa —Gano 25:27; 1 Tim. 4:8.
4. Txini enasekeserhe iyo mwari mwa nsunzo ntti?
4 Mwari mwa nsunzo ntti, ninele wona wi ninofwanyela wika kadda elobo vamburoniva. Ninele wona wi jamakamaka olabihedha mudhidhi wehu wi nikale na Yehova vina dhopurelamo dhinakanihu nigalabihedhaga na malago mudhidhi wehu.
OKOSE DHOSAKULA DHA MALAGO; VINA WIKE VAMBURONI VOROMA
5. Otanalela nlago ninfwanyeya va Éfeso 5:15-17 enamukamihedhe dhavi muzombwe okosa dhosakula dha malago mwigumini?
5 Okose dhosakula dha malago mwigumini mwawo. Dila dhinji azombwe anozuzumela ojavo egumi. Txino anamasunziha oskola obe anamudhi ahili Anamoona a Yehova anowakokomezaga azombwe okosa masunzo manddimuwa wi akane ganyo yapama wila attapattege kobiri. Ofwara yosakula eji enowajela mudhidhi mwinjene. Mwa mpaddi mwina amambali na amarho a mmulogoni anowakokomeza azombwe olabihedha mudhidhi wawa mmabasani a Yehova. Txini enamukamihedhe muzombwe onimukwela Yehova okosa dhosakula dha malago? Iyene onele okamihedheya agengesa Éfeso 5:15-17 vina atanalela nlebona. (Kengesa.) Muzombwe agamala wengesa nlebo ntti egahikala ya malago ovikosa mavuzo aba: ‘ ‘Efunelo ya Yehova’ jivi? Ddinakose yosakula gani enamwagalalihe? Ddinawodhe dhavi olabihedha deretu mudhidhi waga?’ Kudduwale wi “malabo alihu babure” elabo ya Satana enowaddamela omagomo. Egahikala ya malago olabihedha deretu egumi yehu wi nimwagalalihe Yehova.
6. Yosakula gani ekosile Maria nanda ekaleleni yapama okosa yosakula na malago?
6 Wike vamburoni voroma dhilobo dhamakamaka. Masaka mena, olabihedha pama mudhidhi wehu oniwanana na okosa dhosakula wa dhilobo bili dhihili dhabure. Ninononelamo pama ejene na ejile epadduwile mudhidhi wadhowile Yezu vatakulu va Maria na Marta. Sabwa ya Marta omwakela Yezu ninga muleddo kiyali yabure ompiyela dhoja dhattima. Oku manaye Maria, wahidhowa ogilati vakuvi va Yezu wi avuruwane masunziho aye. Ejile yakosa Marta kiyali yabure mbwenye Yezu wahiloga wi Maria “osakulile yapamayá.” (Lk. 10:38-42) Na ovira wa mudhidhi Maria agahidduwala dhajilani sikunene nttile mbwenye iyo nihikana ebaribari wi iyene txipo kagadduwalile masunziho a Yezu. Dhahene ninga yakosile Maria watamelile mudhidhi wa okala na Yezu, iyo vina ninofwanyela otamela mudhidhi wokala na Yehova. Nanda ninawodhe dhavi olabihedha pama mudhidhi obo?
OLABIHEDHE PAMA MUDHIDHI WAWO NA YEHOVA
7. Ekalelini yamakamaka olobela, osunza vina otanalela?
7 Kudduwale wi olobela, osunza na otanalela onokosa mpaddi wa webedha wehu. Iyo nigalobelaga ninologa na Babi wehu wokweleya. (Masal. 5:7) Nigamusunzaga Bibilia ninopura ‘eziwelo ya Mulugu’ vowi iyene dduli nipara na eziwelo yotene. (Gano 2:1-5) Nigatanalelaga esile dhisunzilihu mwaha wa Yehova, ninubuwela mikalelo dhaye dhapama vina ninowubuwela dhilobo dhapama dhinnikosela iyene na esile dhinakoseliye attu otene. Okosa eji mukalelo wapama wa olabihedha mudhidhi wehu. Txini enanikamihedhe okana mudhidhi wa okosa ejene?
Onele otamela mburo wofwasa wi okose nsunzo nawo? (Kang’ana ddima 8-9)
8. Txini ensunza iyo na mukalelo olabihedhile Yezu pama mudhidhi waye mwiddeddereni?
8 Egawodheya otamele mburo wofwasa. Kona yotagiha ya Yezu. Yezu ahinaroma mabasa aye olaleya velaboni ya vati, wahikala mwiddeddereni malabo 40. (Lk. 4:1, 2) Bali mburo obule wofwasa, Yezu wahiwodha olobela wa Yehova vina otanalela mukalelo ogawodhiliye okosa efunelo ya Babe. Okosa eji ehimukamihedha ovisasanyedhela makattamiho agadhile omugwela. Onapurelemo dhavi yotagiha ya Yezu? Akala onkala ntakulu ninjivile attu, enokala yorutxa ofwanya mburo wofwasa vatakulu. Bili dhawene, enowodheya ovedda mburo wofwasa mpaddi mwina. Jijene enkosaga Julie agafunaga ologa na Yehova. Iyene na mamune ankala kwartu eng’ono yalugarilani o França nanda enorutxa okala s’ohizuzumihiwa. Julie ohiloga: “Malabo otene ddinodhowa mparki, mwenemo dhinowodha okala meka, ddinofwasamo wi ddiloge na Yehova.”
9. Masiki na mabasa menjene, Yezu olagihile dhavi wi wanvaha ttima manddano aye na Yehova?
9 Yezu wahikana mabasa menjene. Mmabasani mwaye olaleya velabo ya vati, mburo-mburovi wadhowiye wanfwariwa na muttitti wa attu, vina attu otene anfuna okala na iyene. Masiki dhawene, Yezu wankana mudhidhi wa ologa na Yehova. Bali ntakulu dhahi, attu “otene ammawani athugumana vatakuluvá” wi amone. Vati vahinaya, iyene orabelavo “odhowa vaye-vene” wi afwanye mburo wofwasa ogawodhiliye ologa na Babe Yehova.—Mk. 1:32-35.
10-11. Mowiwanana na Mateu 26:40, 41, Yezu bali mmunddani wo Jetsemani wavahile malago gani anamafwara aye, nanda txini epadduwile?
10 Omattiyu womariha velaboni ya vati vina wa mabasa aye olaleya, Yezu wahitamela mburo wofwasa wila awodhe olobela vina otanalela. Iyene wafwanyile mburo obo mmunddani wo Jetsemani. (Mt. 26:36) Mudhidhi obo, Yezu wahasunziha olobela anamafwara aye.
11 Katanalela epadduwile vasogorhova. Mufiyilani mmunddani wo Jetsemani, yali mattiyu vaddiddi, enoneya ninga yahikwaranya zero-woro. Yezu wahaloba anamasunza aye wi “kakalani txenjewa,” iyene wafuna wi awene adidele olobela. (Mt. 26:37-39) Mbwenye mudhidhi wakosiye malobelo awene ela ogona. Mudhiliye afwanya agonaga, wahawaddela wili “kakalani txenjewa mudidele olobela.” (Kengesa Mateu 26:40, 41.) Iyene wahinonelamo wi awene ahidhugudheya vina ali olemene. Yezu wahinonelamo wi awene anfuna okala txenjewa, mbwenye “maningo bobanile.” Dila ttaru dhidhowile Yezu olobela, eyelaga wafwanyile vina anamafwara aye agonaga.—Mt. 26:42-45.
Onele otamela mudhidhi wa olobela ohinatti olema? (Kang’ana ddima 12)
12. Txini enfwanyelihu okosa nigakala olemene vina nigadhugudheya wi niwodhe olobela?
12 Osakule mudhidhi wofwanyelela. Midhidhi dhina ninokalaga odhugudheyene vina olemene mpaka ohiwodha olobela. Akala eji enowupadduwela, weyo kuli weka. Ovano, txini enfwanyeliwe okosa? Ena ahikana elemelelo ya omulobelela Yehova omamalelo wa siku vahinatti oriba vina ahinalema vaddiddi. Oku ena wi akose malobelo na ofwasa anogilati obe anokokora. Ki weyo ogadhugudheya vina ogojeya onawodhe dhavi olobela? Kamwaddele Yehova mukalelo oniwamo weyo. Kakana nikuluvelo wi Babihu wa ttagraga onele ononelamo.—Masal. 139:4.
Onele orabela wakula mensagem vina email buli mmatugumanoni? (Kang’ana ddima 13-14)
13. Matelefoni na dhipano dhina dhigadhile dhavi onizuzumiha nigakosaga mabasa a Yehova?
13 Ogasunzaga orabele dhilobo dhozuzumiha. Olobela dila dhinjene onele olibiha mandano ehu na Yehova. Osunza Nzu na Mulugu vina okala vamatugumanoni enokamihedha okala ofiyedheya na Mulugu. Ehikalawo elobo yamakamaka egawodhile weyo okosa mudhidhi wa osunza vina wa wona matugumano? Kavivuze: ‘Txini egaddizuzumihile mudhidhi wa matugumano vina wa nsunzo?’ Egahidha opadduwa okuweliwa mmuttittoni, wakela mensagem, obe email mutelefonini obe epano yina? Maska abano attu matxikwi na matxikwi ahikana dhipano esi dhinvaviha miselu. Anamapepesa ena anologa wi nigafwaseya na elobo nanda muttitto bukala vakukuvi onodhaga onizuzumiya. Namasunziha dhahi wa psicologia ohiloga wi: “Weyo kunazuzumele eloboya enkosiwe, yubuwelo yawo enele ozuzumeya.” Matugumano a murudda vina a ttattamwa ahinaroma iyo ninowaddeliwaga wi nisasanyedhe telefoni obe dhipano dhina wi dhinazuzumihe attu ena. Koddi iyo ninokosa yakakene nigakala noka wi dhipano esi dhinanizuzumihe mudhidhi onkalihu na Yehova?
14. Mowiwanana na Filipi 4:6, 7, Yehova onanikamihedhe dhavi wi niwodhe ofwasa?
14 Omulobe Yehova wi okale wofwasa. Ogona wi mubuwelo wawo onozuzumeya ogakosaga nsunzo nawo obe ogakala vamatugumanoni, kamulobe Yehova wi okamihedhe. Ogakala wozuzumeyene obe ogadhugudheya, enorutxa ozuzumela vina ofwaseyela dhilobo dhomuyani. Olobe murenddele wa Mulugu onwodha ofwasiha murima vina “mubuwelo” wawo.—Kengesa Filipi 4:6, 7.
OLOBELA, OSUNZA VINA OKALA VAMATUGUMANONI DHINONIPURIHA
15. Yopurelamo yoroma ya okala na Yehova jivi?
15 Ogatamela mudhidhi wa ologa na Yehova, onvuruwa vina otanalela mwaha wa Yehova onele opurelamo venjene. Dhavi? Yoroma, onele okosa dhosakula dha malago. Bibilia ononaddela “ogedda n’aziwetxi, onopura onononelamo wawa.” (Gano 13:20) Weyo ogatamela mudhidhi wa okala na Yehova oli Nipara na eziwelo onele okala muziwitxi. Venevo onele oziwa mukalelo womwagalaliha Yehova vina orabela okosa dhosakula dhinamunyimule.
16. Okala mudhidhi mwinjene na Yehova onnikamihedha dhavi mmabasani a osunziha?
16 Yanawile, weyo onele okala namasunziha wa ttotto. Iyo nigamusunzihaga muttu Bibilia, efunelo yehu ja omukamihedha wi akale ofiyedheya na Yehova. Venevo vandhowihu banigamulobelela Yehova, omukwela wehu onelege odhowavi bugonuwa vina ninele owodha wasunziha pama anamasunza ehu omukwela Yehova. Katanalela yotagiha ya Yezu. Iyene asunzihaga attu wanloga na mukalelo wapama mwaha wa Yehova eji yahakamihedha anamafwara aye omukwela Yehova.—Jo. 17:25, 26.
17. Olobela vina osunza onlibiha dhavi nroromelo nehu?
17 Yanoraru, nroromelo nawo ninele oliba. Katanalela empadduwa ogamuloba Yehova malago, nipamgarhazo vina nikamihedho. Venevo vanakula Yehova malobelo awo nroromelo nawo ninoliba. (1 Jo. 5:15) Elobo gani yina enalibihe nroromelo nawo? Nsunzo nomwinya. Kudduwale, ‘nroromelo ninda muvuruwanani.’ (Rom. 10:17) Ottiya osunzavi ekalawo elobo yina enwodha olibiha nroromelo nehu. Elobo gani yina enfwanyelihu okosa?
18. Kavaha nladdaniho ninoniha ttima ya otanalela.
18 Iyo ninofwanyelela otanalela esile dhinsunzihu. Katanalela nipadduwo na namaleba wa Masalmo 77. Iyene wahidhugudheya sabwa ya wubuwela wi iyena na ana Izrayel ahinyanyaliwa na Yehova. Mazuzumo aba kamuttiya ogona na mattiyu. (Maversu 2-8) Txini emukamihedhile? Iyene wahimwaddela Yehova dhahi: “Ddinowona na murimaga mabasinyu, ddinotanalela dhawumiha milo dhirilenyu.” (Versu 12) Munasalmo oddu wannolelamo dhavahile Yehova nlogo Naye masaka a mundduni, masiki dhawene iyene wannivivuza: “Txibare Mulugu odduwala oneddela waye thagaraga, peno owali omfuga murima?” (Versu 9) Iyene wannubuwelavi mabasa a Yehova vina kadduwalile wi Mulugu wahaweddela ttagaraga vina nttebwa. (Versu 11) Yopurelamoya? Munasalmo oddu wahidha ononelamo wi Yehova txipo kaganyanyalile nlogo Naye. (Versu 15) Na mukalelo wakakene nroromelo nawo ninele oliba, ogatanalela esile dhinkosela Yehova nlogo naye vina dhinukoseliye.
19. Elobo gani yina enapurelemo iyo nigatamela mudhidhi wokala na Yehova?
19 Yanonai, elitxi yamakamaka jowi, omukwela wawo Yehova onele wunuwa. Okwela, onopitta mikalelo dhina, onele wuttukulela omwiwelela Yehova, okosa mabasa animwagalaliha vina ovilela yoweha-yowehavi. (Mt. 22:37-39; 1 Kor. 13:4, 7; 1 Jo. 5:3) Kayiwo elobo egadhile okala yamakamaka opitta mandano ehu na Yehova!—Masal. 63:1-8.
20. Onawodhe dhavi olabihedha mudhidhi wi okale na Yehova?
20 Kudduwale, olobela, osunza vina otanalela onokosa mpaddi wa webehedha wehu. Dhahene ninga Yezu, otamelege mburo wofwasa wi ologe na Yehova. Orabele dhilobo dhigadhile wuzuzumiha. Ogakosaga mabasa omuyani omulobe Yehova wi okamihedhe ozuzumela esuwene ottiya elobo yina. Ogalabihedha pama mudhidhi wawo masaka abano, Yehova onele wuttuva na egumi yamukalakala mwilaboni eswa.—Mk. 4:24.
JIBO 28 Nikale Amarho a Yehova
^ par. 5 Yehova ddi marho wehu wamakamaka. Iyo ninovaha ttima mandano ehu na iyene, vina ninofuna omuziwa pama. Wi nimuziwe pama muttu mwina enottukula mudhidhi. Jakakene empadduwa wi nilibihe mandano ehu na Yehova. Masaka abano dhihikalawo dhilobo dhinjene dhinnijela mudhidhi, ninawodhe dhavi okana mudhidhi wokala wofiyedheya na Babi wehu wa wirimu, nanda okosa eji ennipuriha dhavi?