1-2. (a) Txini eniwamo iyo nigobuwela egumi ya Yezu vina mabasa aye a olaleya? (b) Txini enasunzehu mwari mwa nsunzo ntti?

 NIGAKWELIWA muttu ninonukeliwa omoona! Vamaromo nigobuwela siku nikwiliye ninokubanya venjene, ttabwa-ttabwa akala marafulaya ahinatti okwa wahitabuwa vaddiddi. Mbwenye mwa ovira wa mudhidhi nigaroma wubuwela dhilobo dhinisunzihile iyene, dhilobo dhakosiye, nipangarhazo nanivahiye vina dhalogiye wi anitehiye ninoroma okana wagalala.

² Na mukalelo wakene, iyo ninokubwanya nigengesa matabuwo a Yezu vina okwa waye. Sumana dha Wubuwela Okwa wa Yezu, iyo ninotamela mudhidhi wi nitanaalele ttima ena yobolo. (1 Kor. 11:24, 25) Nigaroma otanalela dhilobo dhotene dhilogile Yezu vina dhikosiliye bali velaboni ya vati dhinonittukulela okana wagalala onddimuwa. Ninopangarhazeya nigobuwela dhinkosiye ovanene vina dhinakosiye musogorho. Otanalela dhilobo esi vina onikwela waye ononittukulela okosa dhilobo dhinlagiha otamalela wehu, ninga munonelihu mwari mwa nsunzo ntti.

3. Dhilobo gani dhinnittukulela otamalela yobolo?

³ Wubuwela egumi ya Yezu vina okwa waye, ononittukulela omutamaalela. Yezu alaleyaga velaboni ya vati, ohasunziha attu sabwa ya mareliho anadhena Omwene wa Mulugu. Ninotamaalela vaddiddi ebaribari eji ensunziha Bibilia sabwa  ya Omwene. Iyo ninotamaalela yobolo, sabwani jifugulile dila wi nikane mandano ofiyedheya na Yehova vina Yezu. Abale animuroromela Yezu anojedhela okalawo namukalakala vina wawona wili amudhawa akwile. (Jo. 5:28, 29; Rom. 6:23) Kinwodheya okosa elobo-txilobo wi nifwanyelele wakela mareliho aba; vina kaninawodhe ompitxela Mulugu vina Kristu esile dhinikoselani. (Rom. 5:8, 20, 21) Mbwenye enowodheya woniha watamaalela wehu na merelo. Dhavi?

4. Maria Madalena omutamaaleli dhavi Yezu sabwa ya ejile emukoseliye? (Koona foto.)

⁴ Katanalela yotagiha ya muyana wa Muyuda wakuweliwa Maria Madalena. Iyene wahigweliwa makattamiho orutxa, wantabutxiwa na adomonyo atanu na eli. Iyene wobuwela wi kawo agawodhile omukamihedha. Ovano karoma otanalela mukalelo otamaleliye venevo vadhile Yezu wattamagiha adomonyo amutabutxa! Otamalela ohimuttukulela okala namafwara waye vina olabihedha mudhidhi, guru na dhokaana dhaye wi amukamihedhe Yezu mmabasani a olaleya. (Lk. 8:1-3) Masiki Maria vatamaleliye venjene mwa esile dhamukoseli Yezu, iyene kaziwa wi Yezu agahimukosela dhinjene musogorho. Yezu ohalevela egumi yaye nlogo na attu, “wi animuroromela” akele egumi yohimala. (Jo. 3:16) Masiki Maria ahiziwaga esodha, ohoniha omutamaalela Yezu sabwa ya weddeyana waye. Mudhidhi watabuwa Yezu vapingirhizini, Maria wali wowimelene vakuvi, wi anvahe nipangarhazo na ena alivo. (Jo. 19:25) Mukwile Yezu, Maria na ayana ena eli ahigula makura onukela adhowana omasiye wi attikittelena muruttu wa Yezu. (Mk. 16:1, 2) Yehova wahimuttuva venjene Maria sabwa ya weddeyena waye na Yezu. Iyene wahagalala vaddiddi sabwa ya ogumana na Yezu vavenyihiwiye mukwani—eji yali gari, vowi anamafwara ang’onovi bonile nipadduwo ntti.—Jo. 20:11-18.

5. Ninatamalele dhavi dhilobo dhotene dhinnikosela Yehova na Yezu?

 ⁵ Enowodheya iyo vina otamalela dhilobo dhotene dhinnikosela Yehova na Yezu nigalabihedha mudhidhi, guru na dhokaana dhehu wi nikamihedhe mabasa a Omwene. Motagiha, enowodheya ovivelela wi nikamihedhe mabasa a omaga vina ovenyihedha mimburo dha webedha.

6. Ninlogelani wi yobolo nvaho wa muttu-muttu wa iyo?

⁶ Iyo nigatanaalela mukalelo onikwelile Yehova vina Yezu ninottukuleleya wakwela awene. (1 Jo. 4:10, 19) Niganonelamo wi Yezu omukwele muttu-muttu wa iyo, omukwela wehu Yehova na Yezu onele wunuwa. Murumiwi Paulo ohilagiha otamalela valebiliye akadda Galásia dhahi: “Mwana-Mulugu Onddikwela, ovilevele miyo.” (Gal. 2:20) Na mukutto wa yobolo, Yehova ohiwodhiha wi weyo okale ofiyedheya na Iyene vina okale marho waye. (Jo. 6:44) Oziwa wi Yehova ohona elobo yapama mmurimani mwawo vina ohupitxela muttengo munddimuwa wi okale marho waye, kinddiginya murima wawo? Eji kinunuwiha omukwela wawo Yehova na Yezu? Karoma ovivuza, ‘Okwela oku onddittukulela okosa eni?’

7. Dhahene ninga munoniha foto, ninalagihe dhavi omukwela wehu Yehova vina Yezu? (2 Korinto 5:14, 15; 6:1, 2)

⁷ Omukwela Yehova vina Kristu ononittukulela wakwela attu ena. (Kengesa 2 Korinto 5:14, 15; 6:1, 2.) Iyo ninakose ejuwene nigavingela mabasa a olaleya. Iyo ninomulaleya muttu-muttuvi oninfwanyihu. Kanninutanya muttu sabwa ya ttebe yaye, nlogo naye, akala ohisunza obe kasunzile, peno akale mureli obe muyelegi. Nigakosa ejuwene ninowoniha wi ninlaba mowiwanana na efunelo ya Yehova “Iyene onfuna wi etene avuneye, afiyedhe oziwa ebaribari.”—1 Tim. 2:4.

8. Iyo ninoniha dhavi wakwela abalihu na arogora?

 ⁸ Iyo ninowoniha wi ninomukwela Mulugu vina Kristu nigakwelaga abalihu na arogora. (1 Jo. 4:21) Ninowazuzumela vina ninowakamihedha mudhidhi ongumananina makattamiho. Ninowapangarhaza agakweliwa munammudhi, ninodhowa wawoona akagakala aredda vina agadhudhudheya ninokosa muli mwetemwene wi napangarhaze. (2 Kor. 1:3-7; 1 Tes. 5:11, 14) Ninowalobelela niziwaga wi “nlobelo na muthu womyala murima, niniriwa na ntidi, nikana guru enddimuwa.”—Tia. 5:16.

9. Mukalelo mwina wa woniha wi ninowakwela abalihu na arogora buvi?

⁹ Ninolagiha vina wakwela abalihu na arogora nigatamela okana murenddele na awene. Ninfuna nifware yotagiha ya Yehova oli namalevelela. Iyene ohimuruma Mwanaye wi akwele dhotega dhehu, akala Iyene ohikosa dhahene iyo kaninfwanyela walevelela abalihu na arogora annittegela? Iyo kaninfuna okala ninga namalaba ole wotakala murima omulogile Yezu mmusiboni mwaye. Mmalile iyene oleveleliwa mangawu manddimuwa aniye na nabuyaye kafunile omulevelela namalaba mukwaye wambolehile kobiri eng’onovi. (Mt. 18:23-35) Akala weyo ohikana magudulano na mbali obe na murogora wa mmulogoni, onele ofwara ttarho ya otamela murenddele na iyene labo na Wubuwela Okwa wa Yezu nihinafiya? (Mt. 5:23, 24) Ogakosa dhawene onele woniha wi onomukwela venjene Yehova vina Yezu.

10-11. Anddimuwa a mmulogoni anonihe dhavi wi anomukwela Yehova vina Yezu? (1 Pedro 5:1, 2)

¹⁰ Anddimuwa a mmulogoni anonihe dhavi omukwela Yehova vina Yezu? Elobo yamakamaka enfwanyelani okosa ja ozuzumela mabila a Yezu. (Kengesa 1 Pedro 5:1, 2.) Jijuwene emwaddeli Yezu Pedro wi akose. Mumaleliye omukoodda Yezu dila ttaru, Pedro wahikana efunelo enddimuwa ya woniha wi wanimukwela Yezu. Muvenyile Yezu mukwani wahinvuza Pedro: “Simoni, mwana Joau, onoddikwela-wene?” Iyo kaninaganyedha wi Pedro wahikosa muli mwetemwene wi onihe omukwela waye Nabuyaye. Yezu wahimwaddela: “Sapihagá mabilaga.” (Jo. 21:15-17) Oromana apalene mpaka egumi yaye yotene, Pedro ohidhowavi azuzumelaga mabila a Nabuya, onihaga wi wanimukwela Yezu.

¹¹ Anddimuwa a mmulogoni, sumana dhing’onovi labo na Wubuwela Okwa wa Yezu nihinafiya vina nigavira, munonihe dhavi wi mazu amwaddele Yezu Pedro bamakamaka mwa nyuwo? Munele woniha omukwela wenyu Yehova vina Yezu mugazuzumela wawaredhela abali na arogora vina mugakosa guru ya wakamihedha abale attiyile omulabela Yehova wiyelela mmulogoni. (Ezek. 34:11, 12) Enowodheya vina nyuwo wazuzumela anamasunza otene a Bibilia vina abale anadhe wona muttupo obu. Iyo ninfuna nikose muli mwetemwene wi abale akonvidariwe akale ottugareya sabwani efunelo yehu jowi awene vina akale anamafwara a Yezu.

12. Otanalela mazu alogile Yezu omattiyu womariha ahinatti okwa ennikamihedha dhavi oliba murima? (Joau 16:32, 33)

¹² Omattiyu womariha Yezu ahinakwa, wahawaddela anamafwara aye: “Mwilaboni mpuno munere wona makathamiho menjene. Magani murima, miyo ddipuranya elabo.” (Kengesa Joau 16:32, 33.) Txini emukamihedhile Yezu waweddiha amwiddani aye na oliba murima vina okalavi ororomeleya mpaka okwa waye? Iyene wannimukuluvela  Yehova. Wanziwa wi anamafwara aye agahigumanana makattamiho oladdana, nona Yezu wahimukumbirha Yehova wi awang’anele. (Jo. 17:11) Oziwa ejuwene ennikamihedha dhavi oliba murima? Sabwani Yehova dda guru opitta amwiddani ehu. (1 Jo. 4:4) Ottiya ejo iyene onowodha wona dhotene dhimpadduwa. Nona nigamukuluvela Yehova, ninele owodha opemberha wova vina ninele oliba murima.

13. José w’o Arimateya wonihile dhavi oliba murima?

¹³ Kobuwela yotagiha ya José w’o Arimateya. Iyene wanrihiwa na Ayuda vowi wali munddimuwa mmodha wa mmuttegoni wo Juda. Joau ohileba wi iyene “wali namasunza wa Yezu moviteyani mwaha w’owawova ayuda.” (Jo. 19:38) Mwari mwa mabasa a olaleya a Yezu velaboni ya vati, José kalagihile oliba murima. Masiki dhawene José wanvaha ttima muselu wa Omwene wa Mulugu mbwenye kalagiha attu ena wi wanimuroromela Yezu. Enoneya ninga yamuttukulele okosa ejuwene yali wawova attu sabwani koziwa wi iyene wali namafwara wa Yezu agahittiya omuriha. Kintanala sabwaya, Bibilia ononaddela wi mukwile Yezu, José “ohumiha murima, odhowa wa Pilato oloba muruthu wa Yezu.” (Mk. 15:42, 43) Ekosile José ehawoniha attu otene wi iyene wali namafwara wa Yezu.

14. Txini enfwanyela weyo okosa akala onowanana dhubuwelo dha wawova attu?

¹⁴ Weyo onowawovaga attu dhahene ninga José? Ogakala oskola vina omabasani onokanaga manyazo ya attu oziwa wi weyo oli Munamoona wa Yehova? Weyo onowovaga okala namalaleya obe onolupihedha obatizo sabwa ya wova enobuwele attu ena? Kuttiye dhubuwelo esi wutximiha okosa ejile enziwiwe wi japama. Kamulobelele Yehova. Kamukumbirhe wi ahuvahe guru ya okosa efunelo yaye. Ogoona Yehova akulaga malobelo awo, weyo onele owarala vina onele oliba murima.—Iza. 41:10, 13.

15. Mwattanyuweli Yezu anamafwara aye, wagalala wanani wattukuleli okosa eni? (Luka 24:52, 53)

¹⁵ Mukweli Yezu anamafwara aye ahikubanya vaddiddi. Kobuwela weyo bugweliwe makattamiho aba. Ottiya omuyelelavi marho wawa wokweleya ahiyeleliwa vina njedhelo. (Lk. 24:17-21) Mbwenye vattanyuweli Yezu wahitamela mudhidhi wi akamihedhe ononelamo wakwanihedheya wa mavuhulo a mBibiliani. Iyene vina wahattomela mabasa amakamaka. (Lk. 24:26, 27, 45-48)  Na mudhidhiya vavirile malabo 40 Yezu wahidhowa wirimu, okubanya wa anamafwara aye wahidha osadduwa bikala wagalala. Muziwilani wi Nabuyawá wahikalawo wili vina wali womala-nawale wi akamihedhe wakwanihedha mabasa attomeliye, eji yahattukulela okana wagalala. Wagalala ohattukulela odhowavi amuttittimihaga Yehova se olemana.—Kengesa Luka 24:52, 53; Mer. 5:42.

16. Ninawodhe dhavi watagiha anamafwara a Yezu?

¹⁶ Ninawodhe dhavi watagiha anamafwara a Yezu? Ninele ofwanya wagalala ya omulabela Yehova mwari mwa yaka eji yotene ottiya bahi mudhidhi wa Wubuwela Okwa wa Yezu. Mbwenye wi eji ewodheye ninofwanyela wika Omwene wa Mulugu vamburoni voroma mwigumi mwehu. Motagiha, abali na arogora enjene anopimelela mabasa anttiddani, wi akaane mudhidhi wa odhowa mmabasani a olaleya, woona matugumano vina okosa webedha wa ntakulu sumana dhotene. Ena anosakula ovevutxa egumi yawa wi awodhe okamihedha venjene mmulogoni obe omwalela onjombeliwa anamalaleya a Omwene. Yehova ohipikirhela wi nigeeka mabasa a Omwene vamburoni voroma iyene onele oniruriha. Nona nidhowegevi nimulabelaga Yehova na ovilela.—Gano 10:22; Mt. 6:32, 33.

17. Txini eganiliwe okosa sumana dha Wubuwela Okwa wa Yezu? (Koona foto.)

¹⁷ Ninojeedhela okala va muttuponi wa Wubuwela Okwa wa Yezu onakosiwe Txipirhi labo 4 ya Abrili. Mbwenye kujeedhele ofiya wa labo ntto wi otanaalele dhipadduwile mwigumini mwa Yezu, okwa waye vina okwela onilagihile Yehova. Sumana dhing’onovi muttupo wa Wubuwela Okwa wa Yezu ohinafiya vina ogavira katamela mudhidhi wa wubuwela esile dhotedhene dhinikoselani. Motagiha, katamela mudhidhi wa wengesa vina otanalela mapadduwo anfwanyeya va Apêndice B12 “A Última Semana de Jesus na Terra” mu Traduçao do Novo Mundo. Ogengesaga, katamela maversu a mBibiliani analibihe okwela, otamalela, oliba murima vina wagalala wawo. Ottiya ejuwenevi, katamela marhe mena a otonyihedha otamalela wawo na murima wotene. Kakana nikuluvelo wi Yezu onele otamalela guru enakosiwe ya okala vamuttuponi wa Wubuwela Okwa waye.—Ovuh. 2:19.