1-2. Txini enfwanyelihu okosa nigamala obatiziwa? Katapulela.

 WEYO onokuputta numbawo mudhidhi na mudhidhi? Txino ohinamwalelavo, wahikuputta numba yawo yotene. Txini egadhile opadduwa kohikuputtaga? Ninga munziweliwe, dhilobodha dhinele opigidheya momaguva sabwa ya mbwebwe. Wila numbawo ekale yokoddelene vina yosasanyedheya, onofwanyela okuputtaga mudhidhi na mudhidhi.

² Ninofwanyela okosa guru yakene na mubuwelo vina omuttu wehu. Txibarene, nihinatti obatiziwa nahikosa guru ya otxinja egumi yehu wi “nivikupe dhokwaruliha detene dha maningo na dha murima.” (2 Kor. 7:1) Ovano, ninofwanyela wiwelela nlago ntti na murumiwi Paulo “muhabihedhe murima na zelu.” (Ef. 4:23) Enfuneyelani okosa guru? Sabwani nindaga opattiwa momaguva na mubuwelo wa elabo eji. Wila ejo ehipadduwe vina nirumeeliwe vamentoni va Yehova, ninofwanyela opima dhubuwelo dhehu mudhidhi na mudhidhi vina omuttu wehu na dhifunelo dhehu.

3. Otxinja mubuwelo wehu entapulela eni? (Roma 12:2)

³ Txini enfwanyelihu okosa wi nitxinje mubuwelo wehu obe otxinja mukalelo onubuwelihu? (Kengesa Roma 12:2.) Mazu aba atapuleliwe na Egrego “othukulege [mubuwelo  muswa]” anodhaga otapuleliwa ninga “otxinje mubuwelo wawo.” Akala nihiwodha okosa merelo a pama, kintapulela wi nitxinja mubuwelo wehu. Nona, ninofwanyela wang’anela omuttu wehu vina nikose matxinjo anfuneya mwigumini mwehu anlagiha wi ninoweeddiha egumi yehu mowiwanana na magano a Yehova. Kaninfwanyela okosa eji dila modha bahi, ottiya ejo nivilibihedhege okosa matxinjo.

4. Ninabarele dhavi mubuwelo wehu wi ohipattiwe na mubuwelo wa elabo?

⁴ Nigakala attu oligana, ninelege owodha okosa dhilobo dhinimwagalaliha Yehova. Ejo ehinapadduwa, ninofwanyela ovilibihedhavi wi nakwanihedhe yogana eji. Koona yoladdaniha ekosile murumiwi Paulo enfwanyeya va Roma 12:2 enloga mwaha wa otxinja mubuwelo wehu mowiwanana na efunelo ya Mulugu. Kanittiye wi elabo eji enisaddule, wi nikose ejuwene, voroma-vene ninofwanyela ovipima nanya, wi dhogana na—dhosakula dhehu—dheddihiwege na mubuwelo wa Mulugu ottiya na elabo.

5. Ninawodhe dhavi wang’anela dhubuwelo dhehu nitanalelaga waddamela wa siku na Yehova? (Koona foto.)

⁵ Koona yotagiha modha. Yehova onfuna wi nijedhele siku naye. (2 Ped. 3:12) Kavivuze: ‘Mukalelo waga wokalawo onowoniha wi ddinononelamo wila omagomo wa elabo eji eli vakuvi? Dhosakula dhaga mwaha wa masunzo manddimuwa vina mabasa dhinotonya wi omulabela Yehova elobo ya makamaka mwigumini mwaga? Ddinororomela wila Yehova onele oddivaha dhinddijombela vamodha na amudhaga obe ddinzuzumela dhilobo dhomaningoni?’ Kobuwela mukalelo onagalala Yehova aganona nikalagawo mowiwanana na efunelo yaye.—Mt. 6:25-27, 33; Fil. 4:12, 13.

6. Txini enfwanyelihu odhowagavi nikosaga?

 ⁶ Ninofwanyela wang’anela dhubuwelo dhehu mudhidhi na mudhidhi vina nidhowegevi nikosaga matxinjo anfuneya. Paulo ohawaddela akadda Korinto: “Muvipime mwanya, mone akala munowedda muroromelani. Vivuzení mwanya.” (2 Kor. 13:5) Wedda “muroromelani” onopitta odhowa mmatugumanoni a Okristu vina mmabasani a olaleya mudhidhi na mudhidhi. Enolagiha vina dhinubuwelihu, dhifunelo dhehu na dhosakula dhehu. Nona ninofwanyela otxinja mubuwelo wehu modhela wengesa Nzu na Mulugu, osunza wubuwela ninga Yehova vina okosa matxinjo anfuneya mowiwanana na efunelo yaye.—1 Kor. 2:14-16.

7. Mowiwanana na Éfeso 4:31, 32, txini yina enfwanyelihu okosa vina ekaleleni yorutxa?

⁷ Kengesa Éfeso 4:31, 32. Ottiya otxinja bahi mubuwelo wehu, ninofwanyela ottukula “makalelo a muthu muswa.” (Ef. 4:24) Wi ejo epadduwe ninofwanyela okosa guru wila nittiye mweddelo wabure ninga, mazu owawa, osilidhiwa na owali. Ekaleleni yorutxa okosa ejuwene? Sabwani ottiya omuttu wa wale obe mikalelo dhabure enodhaga okala elobo yorutxa. Motagiha, Bibilia onologa wi attu ena kanrutxiwa odheliwa owali vina otota kani. (Gano 29:22) Txino enofuneya okosagavi guru mudhidhi na mudhidhi wi niwodhe wang’anela dhowobana esi masiki nigamala obatiziwa, ninga enlagiha yotagiha enfwarela.

8-9. Yotagiha ya Stephen enlagiha dhavi wi ninofwanyela ovilibihedha ottiya omuttu wa wale?

⁸ Mbali onkuweliwa Stephen wahikana makattamiho a wang’anela owali waye. Iyene ohiloga: “Masiki vamalilemi obatiziwa, ddanfwanyelavi ovilibihedha wi ddang’anele owali waga. Motagiha, mudhidhi dhahi ddilaleyaga numba na numba ddahinfwara mbava wamwiyile radiyo mukaroni mwaga. Vamwaddamelimi wila ddimuttide, iyene wahimuttiya radiyo battawa. Vawaddelimi attu ena mukalelo wafwanyilemi radiyo waga, mwimeleli wa nikuru naga na mabasa olaleya ohiddivuza: ‘Stephen, konfwanya mbavaya txini egamukosilena weyo?’ Nivuzo ntti niddittukulela wubuwela vina woona wila ddanfwanyela ovilibihedhavi okala muttu wa murenddele.” b

⁹ Yotagiha ya Stephen enolagiha wi, mikalelo dha omuttu wehu wa wale dhindaga wiyela masiki banittiyile. Akala ejo enopadduwa na weyo, kukumuwe vina kuwubuwele wila wa Mukristu wabure. Murumiwi Paulo ohiloga: “Vanfunemi wira dhapama, panddaddamela obure.” (Rom. 7:21-23) Akristu otene anowanana mikalelo dhohikala dhinladdanihiwa na mbwebwe vina dhilobo dhimpigidha numbehu. Enofuneya ovilibihedha wi nikale okoddelene. Ninakose dhavi ejuwene?

10. Ninawodhe dhavi owanana merelo abure? (1 Joau 5:14, 15)

¹⁰ Kalobela wa Yehova mwaha a merelo abure anwaniwena, okuluvelaga wi iyene onele wuvuruwana vina onele wukamihedha. (Kengesa 1 Joau 5:14, 15.) Yehova kanakose matikiniho wi agomihe merelo abure anwaniwena, mbwenye iyene onele wuvaha guru ya opemberha yowobanaya. (1 Ped. 5:10) Kavilibihedhe, okalawo mowiwanana na nlobelo nikosiliwe vina kuttiye mikalelo  dhawo dhabure dhawale wupemberha. Motagiha, okale txenjewa na mafilme anona weyo vina porogarama dha mu TV obe dhinengesa weyo dhinuttukulela ohiwodha ottiya mweddelo wawo wa wale. Kuttiye wila mubuwelo wawo opattiwe na dhubuwelo dhabure.—Fil. 4:8; Kol. 3:2.

11. Ttarho gani dhinfwanyela iyo okosa wi nittukule makalelo a muttu muswa?

¹¹ Venevo vandowa weyo ovilibihedhaga ottiya omuttu wa wale, onofwanyela ottukula ekalelo yapama. Onakose dhavi ejuwene? Kagana omutagiha Yehova venevo vandowa weyo osunzaga mikalelo dhaye. (Ef. 5:1, 2) Motagiha, weyo ogamwengesaga Bibilia ogafwanya mpaddi onloga mwaha wa olevelela wa Yehova, ovivuze: ‘Miyo ddinowalevelela attu ena?’ Ogengesaga mBibiliani makani anloga sabwa ya ttagaraga ya Yehova na attu abale anfwanyiwa makattamiho, kavivuze: ‘Miyo ddinowakanela ttagaraga attu anfuna nikamihedho vina ddinolagiha na merelo?’ Kavilibihedhe ottukula makalelo a muttu muswa, ogakosaga ejuwene kujeedhele okana momaguva-mwene makalelo a muttu muswa.

12. Yotagiha ya Stephen enoniha dhavi wi Bibilia ohikana ewodhelo y’otxinja dhigumi dha attu?

¹² Stephen, ologiwe mundduni, vang’ono-vang’ono ohiwodha ottukula makalelo a muttu muswa. Iyene ohiloga: “Oromana siku nibatiziwe miyo, ddahifwanyiwa makattamiho menjene agaddittukuleli onyanyuwa. Miyo ddahisunza ottiya wedda na attu agaddiligile vina agaddittukuleli wiyelela makalelo a omuttu wawale. Attu enjene otaganyiha na mwadhaga ahiddikamihedha okala wokurumuwa ddigaligiwa. Ddahidha otikina na ekalelo yaga eswa. Kaddiliviwe muhaku sabwa ya matxinjo akosile miyo. Mbwenye, ddihikaana ebaribari wila matxinjo akosilemi ahivaha onamoona wi Bibilia ohikana ewodhelo y’otxinja dhigumi dha attu.”

13. Txini enanikamihedhe okana mikalelo dhapama? (Galásia 5:16)

¹³ Kengesa Galásia 5:16. Wi anikamihedhe okosa dhilobo dhapama, Yehova ohinivaha muya waye wokoddela. Iyo nigengesaga Nzu na Mulugu, ninovittiya weddihiwa na muya obu wokoddela. Nigadhowa omatugumanoni ninowakela muya obu wokoddela. Nigavegaga na Akristu akwehu, ninkala mumodhani na abali vina arogora anziveliwa na iyo vina anvilibihedha okosa dhilobo dhapama, nanda eji jolibiha. (Aheb. 10:24, 25; 13:7) Niganfiyedha Yehova na nlobelo vina nimukumbirha wila anikamihedhe opemberha dhowobana dhehu iyene ononivaha muya waye wokoddela wi nilibe. Okosa dhilobo esi txino kadhingomiha dhifunelo dhabure, mbwenye dhinonikamihedha ohikosa dhilobo dhohifwanyelela. Galásia 5:16 onologa wi, onrumeela weddihiwa na muya kanfwara “dhinunlela maningo.”

14. Ekalele nni yamakamaka otamela okana dhubuwelo dhapama?

¹⁴ Akala iyo niroma okosa dhilobo dhinnikamihedha okana mandano ofiyedheya na Yehova, ninofwanyela odhowavi nikosaga vina otamela okana dhubuwelo dhapama. Sabwaya? Sabwani mwiddani wehu kanattiye owana na iyo. Iyene onele odhowavi anididelaga okosa dhilobo dhohikala. Masiki nigamala obatiziwa ninodhaga okana efunelo yokosa dhilobo dhohikala, ninga motagiha oponya mpirha dhiniwanana na muya  dhabure, attabwiha omwa obe wawona attu bali yovi. (Ef. 5:3, 4) Mbali mmodha wa muzombwe ohiloga: “Elobo modha yawanana miyo yali oziveliwana attu a yano modhene. Miyo ddobuwela wi mubuwelo obu ogahivira, mbwenye wanddizuzumiha.” Egakala yorutxa ottiya dhifunelo dhabure, txini enawukamihedhe?

15. Nimpangarhazeya dhavi oziwa wi kaninwanana nokihu dhifunelo dhohikala? (Koona foto.)

¹⁵ Akala weyo onowanana dhifunelo dhohikala kuli weka. Bibilia onologa wi: “Manyengetho etene onilenyu, kakwaranyile guru dhenyu.” (1 Kor. 10:13a) Bibilia mwina versu eji otapuleli dhahi: “Kayiwo yoweha yupattile ejuwene ehinapatta attu ena.” Mazu aba alebeliwe Akristu akala o Korinto. Ena mwa awene ali alezeli, ajeberuwi vina attu agonihana na muttu wa yano yakene. (1 Kor. 6:9-11) Weyo onubuwela wi ogamala obatiziwa kunakane dhubuwelo dhabure? Kahiye mwenemo. Akristu aba otene ali attikitteliwi, mbwenye ali attu ohiligana. Kavali waganyedha wi mudhidhi na mudhidhi awene anwanana dhubuwelo dhohifwanyelela. Eji enonilibiha. Sabwaya? Sabwani eji enowoniha wi ogawanagana dhubuwelo dhohifwanyelela, ohikalawo muttu mwina onwanana dhubuwelo dhohifwanyelela dhahene ninga weyo. Nona, oziwa wi abalihu ali mwilaboni mwetene anopadduweliwa makattamiho akene angumanihuna enele wulibiha okalavi wovikomene muroromelani.—1 Ped. 5:9.

16. Yawopiha gani enfwanyela iyo orabela nanda sabwaya jani?

¹⁶ Karabela yawopiha ya wubuwela wi kawo muttu onnonelamo makattamiho angumanana weyo. Wubuwela dhawene enele wuttukulela wubuwela wi kunawodhe opemberha dhubuwelo dhabure. Bibilia onologa elobo yottiyana. Onloga dhahi: “Mulugu onovirihamo  dhipikirheliye, kanarumele wi mufwanyiwe manyengetho ahinwodha nyuwo owanana.” (1 Kor. 10:13b) Masiki ekalaga yorutxa ottiya dhifunelo dhabure, enowodheya odhowagavi nikalaga ororomeleya na Yehova. Na nikamihedho na Yehova, weyo onele owodha okosa dhilobo dhapama.

17. Wila nirabele dhifunelo dhabure ninfwanyelela wang’anela eni?

¹⁷ Kudduwale mazu aba: Vowi iyo nili attu ohiligana, enodhaga okala yorutxa orabela mubuwelo wohifwanyelela. Mbwenye ejo egapadduwa, enowodheya weyo orabela kakamwe, dhahene ninga José omuttawile momaguva mwadhi Putifar. (Wita 39:12) Kunfwanyela okosa dhilobo mowiwanana na dhifunelo dhawo dhabure!

18-19. Mavuzo gani anfwanyelihu ovikosa oku nivilibihedhaga osaddula mubuwelo wehu?

¹⁸ Ottiya dhilobo dhabure entapulela odhowagavi nikanaga ebaribari wi dhubuwelo na dhokosa dhehu dhinomwagalaliha Yehova. Wi ejo epadduwe, ninofwanyela ovivuza: ‘Merelo aga anolagiha wi ddinononelamo wila ninkalawo masaka omariha? Ddinovilibihedha wabala makalelo a muttu muswa? Ddinottiya wi muya wa Mulugu weddiha egumi yaga wi ddiwodhe ovyang’anela vina orabela dhifunelo dha maningo?’

¹⁹ Ogavipepesaga, kutamele oligana wawo. Wang’ane wunuwa wawo. Ogona wi onofwanyela okosa matxinjo, kukumuwe. Ofware malago anfwanyeya va Filipi 3:16: “Apa vafiyilehu, ndhoweni nisogorhenavi dila eneddehuna.” Kakuluvela wi ogakosa dhawene Yehova onele oruriha guru enkosiwe ya osaddula mubuwelo wawo.