Nzu na elogelo yoroma nitapuleliwe ninga “karo” mu Tradução do Novo Mundo ninodha waddiwana karo-karovi. (Mer. 8:​28, 29, 38) Vano enkala ninga mukadda Etiopia, wanna karo enddimuwa ottiya gareta yarabiwana koddo obe yattamagiwana. Katanalela mwaha dhing’onovi dhinnittukulela ologa dhahene.

Mukadda Etiopia wali namalaba wakosile oleddo onddimuwa. Iyene wali “munddimuwa wa varhuwani, weddiha dhetene dha mwene wamuyana, waromoliwa Kandase.” (Mer. 8:27) Etiopia wa wale wankosa epaddi ya elabo y’o Sudau, vina y’ogusuni wa Ejipitu wa masaka abano. Masiki eziweyaga wi txino mulobwana oddule kawelile karo modhene mu oleddoni mwetene okosiliye, enkala ninga iyene wahittukula muttorho muleddonimwa. Karo dhalabihedhiwa sekulu yoroma E.C. dhali gareta dhakuneliwa vina dhakana maroda manai. Nivuru dhahi ninloga mwaha wa Bibilia nilogaga mwaha wa makani aba ninloga dhahi: “Karo ninga esi dhanttukula mittorho dhinjidhene vina dhanwodhiha okosa oleddoya nofwaseya. Txino dhammaguva vina dhanwodhiha okosa oleddo wolapela.”

Mukadda Etiopia wela wengesa mudhidhi onfwanyile Filipi. Nipadduwona ninloga wi “Filipi mfiyedhiye omwiwa munddimuwa ole engesaga mazu a nivuru na Izaiya.” (Mer. 8:30) Karo eso kadhasasanyiwe wi dhikose oleddo momaguva. Nona ninga dhedda vang’ono-vang’ono dhannimuwodhiha mukadda Etiopia wengesa, vina egahiwodheya Filipi ottamagela na myeddo bafiyedha ofwanya.

Mukadda Etiopia “omuloba Filipi wi awelemo, agilati na iyene.” (Mer. 8:31) Gareta dhattamagiwana, anameddihayá akala owimelene. Oku karo dhakosiwana oleddo, dhankana mburo ogamuwodhihile mukadda Etiopia vamodha na Filipiya ogilati.

Mowiwanana na nipadduwo novudheleliwa ninfwanyeya va Merelo kapitulu 8 vina dhopepesiwa dha anamasunza dhifwanyiwe, mapublikasau ehu a ovanenevi, anloga wi mukadda Etiopia wanna karo enddimuwa, ottiya gareta dharabiwana koddo obe dhattamagiwana.