NSUNZO 3
JIBO 124 Nikalevi Oweddeyana
Yehova Onele Wukamihedha Mmidhidhini Dhorutxa
“[Yehova] onere wakalela othukuthedheya wawa.”—IZA. 33:6.
DHINASUNZE IYO
Enfwanyelihu okosa wi niwodhe wakela nikamihedho na Yehova mmidhidhini dhorutxa.
1-2. Makattamiho gani agadhile wapatta alabeli ororomeleya a Yehova?
NIGAPADDUWELIWA elobo yorutxa egumi yehu enodhaga otxinja moma guva-mwene. Motagiha, mbali wororomeleya onkuweliwa Luis a ohombeziwa biwoneya wi iyene okana eredda yawopiha ya kanseri. Medikuya wahimwaddela wi iyene agakalilewo myeri dhing’onovi. Monika na mamune anzuzumela mabasa omuyani, venevo labo nimodha Monika wahidha oziwa wi mamunaye wali munddimuwa wa mmulogoni wankosa dhilobo dhabure moviteyani mwa vyaka dhinjidhene. Olivia, murogora wa muziye omwala vatakulu vaye ahifunaga sabwa ya pevo yamutokora yafuna ovira. Mwiyeleliye vatakulu wahizinddiyela wi pevoya yahigujula nyumba yaye. Egumi ya attu aba alogiwe yahidha otxinja mwari mwa mudhidhi mung’onovi. Weyo ohipattiwa makattamiho oladdana na abene? Ohipadduweliwa elobo yorutxa edhile otxinja egumi yawo mohijedheleya?
2 Ninga adhari ororomeleya a Yehova, ninopattiwa makattamiho vina dhiredda dhinapatta attu otene. Ninopadduweliwa ofwarafwariwa vina osadduweliwa na abale anidda nlogo na Mulugu. Masiki Yehova ahinibarelaga mmakattamihoni aba, iyene opikirhela onikamihedha. (Iza. 41:10) Na nikamihedho naye, ninowodha okanavi wagalala, okosa dhosakula dhapama, vina okalavi oweddeyana na iyene masiki midhidhi dhorutxa dha mwigumini mwehu. Mwari mwa nsunzo ntti ninele wona mikalelo minai, dhinnikamihedhana Yehova mmidhidhini dhorutxa mwigumini mwehu. Vina ninele wona enfwanyelihu okosa wi nipurelemo nikamihedhona.
YEHOVA ONELE WUKOYA
3. Txini egadhile onirutxa okosa nigapattiwa makattamiho?
3 Yorutxaya. Nigapattiwa makattamiho enodhaga okala yorutxa wubuwela mowakwana-mwene vina okosa dhogana dhapama. Sabwaya jani? Sabwani murima wehu onkala wokubanyene. Vina dhubuwelo dhehu dhinozuzumiheya. Ninodhaga ovyona ninga ninedda mukuguni nihiziwaga epaddi gani enfwanyelihu odhowa. Karoma wona mukalelo oviwilemo arogora eli alogiwe mundduni mudhidhi wapattiwani dhoweha. Olivia ohiloga: “Mmalele pevo ejile ogujula nyumbaga ddali wozuzumene vina kaddana yokosa, musoro waga wanddilemela.” Monika ologa mukalelo oviwilemo iyene sabwa ya mamunaye olupa matelo: “Miyo kaddakalile otxinuwavi bahi, murima waga wahisuveya vaddiddi vina wanddipa, kaddawodha wubuwela mowakwana-mwene, ejile y’obuwela miyo wi kinapadduwe yahidha oddipadduwela.” Yehova onnikamihedha dhavi nigagumanana makattamiho orutxa nanda nihonaga yokosa?
4. Mowiwanana na Filipi 4:6, 7, txini ennipikirhela Yehova?
4 Enkosa Yehova. Yehova opikirhela onivaha ejile enkuwela Bibilia “murenddele wa Mulugu.” (Kengesa Filipi 4:6, 7.) Murenddele obu onaddiwana ofwasa wa muyubuweloni vina wa mmurimani onda sabwa ya okana mandano ofiyedheya na iyene. Murenddeleya obu onopitta “thontho ya muthu”; elobo yapama vaddiddi ehinwodhihu wubuwela. Wahiromaga omulobelela Yehova na murima wotene omamalelowa bukala wofwaseyene obe wottugareya? Eji “murenddele wa Mulugu.”
5. Murenddele wa Mulugu onkoya dhavi mubuwelo na murima wehu?
5 Nlebo nakakene ninloga wi murenddele wa Mulugu “onere okoya,” obe onele obarela, “mirima na mobuwelo enyu.” Nzu noroma nitapuleliwe ninga “okoya” nali nzu nalabihedhiwa mukoddoni naddiwana anyakoddo akoya muttette ang’anelaga wila onalupeliwe. Anyaya a muttette yang’aneliwa angona na murenddele aziwaga wi anyakoddo ali vamusuwo ang’anelaga. N’ekalelo yakakene murenddele wa Mulugu ogakoya mirima na dhubuwelo dhehu, ninokala wofwaseyene niziwaga wi nili obareleya-wene. (Masal. 4:8) Dhahene ninga epadduwile na Ana, masiki akala makattamihoya kangoma momaguva, ninokanavi murenddele (1 Sam. 1:16-18) vina nigakala wofwaseyene, ninowodha otanalela vina okosa dhogana dh’eziwelo.
Kalobela mpaka okana “murenddele wa Mulugu” onkoya murima na mubuwelo wawo (Kang’ana ddima 4-6)
6. Txini enfwanyelihu okosa wi nikane murenddele wa Mulugu? (Koona vina foto.)
6 Enfanyeliwe okosa. Ogapattiwaga na makathamiho, kakala ninga onimukuwela mwang’aneli. Dhavi? Modhela olobela ofiyedha okana murenddele wa Mulugu. (Lk. 11:9; 1 Tes. 5:) Luis, ologiwe mundduni, ohitapulelamo ekosile iyene vamodha na mwadhiye, Ana, muziwelani wi wana myeri dhing’onovi dha okalawo. Iyene ohiloga: “Nigapattiwa makattamiho ninga aba enokala yorutxa okosa yogana eniwanana na egumi vina makani mena. Vano nlobelo ninonikamihedha vina ninonivaha murenddele onfunehu.” Luis na mwadhiye ahiloga wi ahilobela venjene vina dila dhinjene akumbiraga wi Yehova àvahe murenddele wa muyubuweloni, murima wofwasa vina eziwelo ya okosa dhogana dhapama. Dhahene awodha wakela nikamihedho ntti. Akala weyo onogumanana makattamiho, kadidela olobela, onele okana murenddele wa Yehova oku okoyaga murima na mubuwelo wawo.— 17Rom. 12:12.
YEHOVA ONELE ODHOWAVI OLIBIHAGA
7. Nigapattiwa makattamiho orutxa, dhubuwelo gani dhinkana iyo?
7 Yorutxaya. Nigapattiwa na dhoweha dhorutxa, dhubuwelo dhehu vina mukalelo oniviwamo iyo dhinodhaga ohikala na mukalelo walemelile iyo. Ninodhaga oviwamo ninga paporo oli mbara atukumeliwaga oku noku na manebe. Ana, ologiwe mundduni, ohiloga wila ohipattiwa dhubuwelo dhohifwanyelela mmalile Luis okwa. Iyene ohiloga: “Venevo vaviwona miyo meka, ddahiroma oveddela ttagaraga ddamwinya. Miyo vina ddansilidhiwa sabwa ya iyene okwa.” Ottiya ejo, Ana wanviwamo yeka vina wodhugudheya sabwa yokosa dhogana esuwene dhazuzumela Luis mowakwana-mwene. Dila dhina ddaniviwamo ninga ddili mbara dditukumeliwaga oku-noku na manebe. Yehova onnikamihedha dhavi nigaviwagamo dhahene?
8. Mowiwanana na Izaiya 33:6, txini ennipikirhela Yehova?
8 Enkosa Yehova. Yehova ononikuluveliha wi onele onilibiha. (Kengesa Izaiya 33:6.) Paporo agapattiwa na otagala wa manebe, onoroma ottekenyeya oku-noku. Wi abarele ottekenyeya oku, mapaporo enjene ahikana epano dhahi enkuweliwa estabilizador onttiyiwa epaddi modha-modha ya paporoya. Epano eji enokamihedha wi paporoya ahittekenyeye vaddiddi, àkamihedhaga attuya oviwona obareleyene. Epano ejo enolaba pama akala paporoya onodhowavi eddaga. Na mukalelo wakakene, Yehova onnilibiha venevo vandowihu nikalaga ororomeleya nigagumanagana dhoweha.
Kalabihedha nikamihedho ninfwanyeya mu dhipanoni dhopepesana wi okalevi wolibene mpaddi womuyani vina wa muyubuweloni (Kang’ana ddima 8-9)
9. Dhipano dhehu dhopepesana dhinanikamihedhe dhavi okalavi wolibene? (Koona vina foto.)
9 Enfwanyelihu okosa. Ogaviwona vari va pevo yowali mpaddi wa muyubuweloni, kakosa muli mwetemwene wila ozuzumele mabasa omuyani. Ebaribari wi kunawodhe okosa dhetedhene dhawodhiwe okosa wale, mbwenyi kudduwale wi Yehova kanjedhela wi okose ehinwodhiwe okosa. (Kaladdaniha na Lk. 21:1-4.) Kuttiye otamela mudhidhi wi okose nsunzo nawo nomwinya vina otanalela. Sabwaya? Sabwani alabihedhaga nikuru naye, Yehova ononivaha mitoma vina mavidiyu anikamihedha venjene wang’anela dhubuwelo dhehu nigagumanagana dhorutxa. Enowodheya ofwanya miselu dhinawukamihedhe, ogalabihedha dhipano dhopepesana dhiliwo na elogelo yawo, ninga aplikativo JW Library®, Indice das Publicações da Torre de Vigia, vina Guia de Pesquisa para Testemunhas de Jeová. Monika, ologiwe mundduni, ohitapulelamo wi dila dhotene dhinzinddiyeliye wi kanwodha wang’anela dhubuwelo dhohifwanyelela, onolabihedha dhipano dhopepesana. Ninga motagiha, dila dhina wampepesa mazu aba “osilidhiwa.” Dila dhina, wampepesa mazu “opeliwa malago” obe “weddeyana.” Venevo iyene wandowavi engesaga mpaka oviwamo pama. Iyene vina onologa: “Mudhidhi waroma miyo opepesa ddakala wokumuwene ddilebaga mazu-mazuvi ewanana na makattamiho addipatta. Vasogorhova ddanengesa mitoma dhapepesa miyo. Vang’ono-vang’ono miyo ddeloviwamo ninga Yehova wela oddikubatta. Mudhidhi wengesa miyo, ddanzinddiyela wila Yehova onononelamo dhubuwelo dhaga vina wela oddikamihedha.” Ozinddiyela nikamihedho ntti na Yehova jinawukamihedhe odhowavi okalaga woliba masiki ogumanagana makattamiho enladdanihiwa na pevo yowali.—Masal. 119:143, 144.
YEHOVA ONELE WUKAMIHEDHA
10. Niniviwamo dhavi nigapattiwa makattamiho orutxa?
10 Yorutxaya. Akala wahiromaga opattiwa makattamiho orutxa vaddiddi mwigumini mwawo txino malabo mena weyo wanviwona wowobana mpaddi womaningoni vina wa muyubuweloni. Txino onoviwona ninga namattamaga oporeyile, txino wale wanwodha ottamaga momaguva, mbwenyi ovano onowedda otopinyaga, txino onorutxiwa okosa dhilobo dhaharutxiwa weyo okosa wale, obe orimeliwa efunelo ya okosa dhilobo dhaziveliwa weyo okosa. Dhawene ninga Eliya, txino weyo onorutxiwa ovenya. Enfuniwe ogona bahi. (1 Amwe. 19:5-7) Mbwenyi nigaviwagamo dhawene txini empikirhela Yehova onikosela?
11. Na mukalelo gani mwina onnikamihedhana Yehova? (Masalmo 94:18)
11 Enkosa Yehova. Iyene opikirhela wukamihedha. (Kengesa Masalmo 94:18.) Dhawene ninga munfunela nikamihedho namattamaga oporeyile wi awodhe wiyelela wedda, iyo vina ninofuna nikamihedho wila nidhowegevi nizuzumelaga mabasa a Yehova. Mudhidhene obo Yehova ononipikirhela: “Jowi miyo, [Yehova] Mulugu wawo, ddinouthiddela nlada [nawo noja], ddinowaddela dhahi: Kuwove [elo], miyo ddinoukamyedha.” (Iza. 41:13) Mwene Davidi ohona nikamihedho ntti na Yehova. Midhidhi wagumaniyena dhorutxa vina afwara-fwariwaga na amwiddani aye, iyene wahimwaddela Yehova: “Muddithiddela na nlada nenyu [noja].” (Masal. 18:35) Kito Yehova onnivaha nikamihedho ntti namukalelo gani?
Karumela nikamihedho na amudhawo, akwawo vina anddimuwa a mmulogoni (Kang’ana ddima 11-13)
12. Yehova agadhile omulabihedha ani wi anikamihedhe nigakumuwa?
12 Dila dhinji Yehova onalabihedha attu wi awodhe onivaha nikamihedho ninfunihu. Ninga motagiha, mudhidhi wattiddiwe Davidi okubanya vaddiddi, wadhowile omona wi ampangarhaze vina amulibihe ddi mukwaye Jónata. (1 Sam. 23:16, 17) Namukalelo wakene, Yehova wahimulabihedha Elizeu wila amukamihedhe Eliya. (1 Amwe. 19:16, 21; 2 Amwe. 2:2) Masaka abano vina, Yehova onodhaga omulabihedha munammudhi, amarho obe anddimuwa a mmulogoni wila anikamihedhe. Mbwenyi, nigagumanagana makattamiho orutxa dila dhinji efunelo yehu enkalaga yokala nokihu. Iyo ninfuna bahi nikale nokihu. Kahiyo yabure. Mbwenyi ninawodhe dhavi wakela nikamihedho na Yehova?
13. Txini enfwanyelihu okosa wi nakele nikamihedho na Yehova? (Koona vina foto.)
13 Enfwanyelihu okosa. Kavilibihedhe wila opemberhe efunelo yokala weka. Nigàtxatxamaga attu ena nitamelaga okala noka, iyo ninzuzumela wubuwela makattamiho annipatta vina dhinnipadduwela. Okalela wubuwela esuwene bahi enodhaga onittukulela okosa dhogana dhabure. (Gano 18:1) Ebaribari wi dila dhina, iyo ninofuna otamelaga mudhidhi wa okala nokihu makamaka nigagumanagana dhorutxa. Mbwenyi nigaroma ovira mudhidhi mwinjene nokihu ninele okala wolapelana na attu abale agalabihedhile Yehova wi anikamihedhe. Nona masiki dila dhina ekalaga yorutxa, karumela nikamihedho na amudhawo, na amarho awo vina na anddimuwa a mmulogoni. Wawone awene ninga marhe anlabihedha Yehova wi awukamihedhe.—Gano 17:17; Iza. 32:1, 2.
YEHOVA ONELE WUPANGARHAZA
14. Dhorutxa gani dhinnittukulela wova?
14 Yorutxaya. Dila dhina ninodhaga opattiwa makattamiho ananittukulele wova. Bibilia onowaloga adhari ororomeleya a Yehova apattiwe odhugudheya vina wova sabwa ya amwiddani awa vina sabwa ya makattamiho mena. (Masal. 18:4; 55:1, 5) Na mukalelo wakene, ninodhaga ofwarafwariwa oskola, omabasani vina na anamudhi obe na alamuleli. Txino ninodhaga wova okwa sabwa ya makattamiho a egumi anihu. Ejoya egapadduwa ninodhaga ovyona ninga mwana ohina nibarelo. Ovano Yehova onnikamihedha dhavi nigafwanyiwa makattamiho ninga aba?
15. Nikuluvelo gani ninfwanyeya va Masalmo 94:19?
15 Enkosa Yehova. Iyene ononipangarhaza vina ononifwasiha. (Kengesa Masalmo 94:19.) Nlebo nti txino ninowuttukulela omubuwela mwana oli wotxutxeyene vina ohinwodha ogona sabwa ya ong’animela vina oruma wa jayi. Ndoweni nimubuweleni babi wa mwana oddu adhowaga o kwartu waye vina bamuttukulile mmadani mpaka iyene owodha ogona. Masiki iyene avuruwanaga oruma wa jayi, babe onompangarhaza mwanaya vina onomuttukulela iyene oviwamo wobareleya. Nigagumanagana dhorutxa dhinittukulela okala wowovene ninofuna nikamihedho na Babihu wa wirimu wila aniyale odduni mpaka dhubuwelo esi dhohifwanyelela ovira. Kito ninawodhe dhavi opangarhaziwa na Yehova?
Kattiya wi Babi wawo wa wirimu awupangarhaze modhela Bibilia (Kang’ana ddima 15-16)
16. Txini enfwanyelihu okosa wi nakele nipangarhazo na Yehova? (Koona vina foto.)
16 Enfwanyelihu okosa. Kuttiye otamela mudhidhi wa okala na Yehova modhela ologa na iyene vina wengesa Nzu naye. (Masal. 77:1, 12-14) Ogakosa ejuwene mudhidhi wetene onagumaniwena makattamiho, elobo yoroma enakose weyo ja otamela nikamihedho na Babi wawo wa wirimu. Kamwaddele Yehova dhilobo dhotene dhinuzuzumiha vina dhinuttukulela wova. Venevo ovuruwane enuwaddela Yehova modhela omwengesa Bibilia. Ogakosa dhawene onele owodha wona nipangarhazo naye. (Masal. 119:28) Ogapattiwa wova enowodheya ofwanya nipangarhazo modhela wengesa malebo a mBibiliani. Motagiha, txino munivuruni na Job, Masalmo, Gano vina mazu a Yezu anfwanyeya va Mateu kapitulu 6 anele wulibiha. Ogalobela vina ogamwengesa Bibilia onele wakela nipangarhazo ninda wa Yehova.
17. Nikuluvelo gani ninehu?
17 Enowodheya omukuluvela Yehova sabwani mudhidhi wotene iyene oli womala-nawale wila anikamihedhe mmidhidhini dhorutxa dha mwigumini mwehu. Iyo txipo kaninakale noka. (Masal. 23:4; 94:14) Yehova ohipikirela onibarela, onilibiha vina onipangarhaza. Izaiya 26:3 ononivaha nikuluvelo ntti mwaha wa Yehova: Onele wabarela anuroromelani, munele wavaha murenddele, sabwani anukuluvelani nyuwo. Nona kamukuluvele Yehova vina kapurelamo dhetene dhinkosiye wila awukamihedhe. Ogakosa ejuwene, onele okalavi woliba masiki mmidhidhini dhorutxa.
OGAKULILE DHAVI?
-
Midhidhi gani dhintameletxihu nikamihedho na Yehova?
-
Mikalelo gani minayi dhinikamihedhana Yehova mmidhidhini dhorutxa?
-
Txini enfwanyelihu okosa wi nakele nikamihedho na Yehova?
JIBO 12 Yehova, Mulugu Wowodha-wodha
a Mazina mena ahitxinjiwa.