1. Onubuwela wi Yehova oli dhavi?

 WAHIROMAGA wubuwela mukalelo oli Yehova? Ogalobelaga weyo onubuwela wi iyene oli dhavi? Ebaribari wi iyo kanniwodha omona Yehova, mbwenyi Bibilia onomuloga Yehova na mikalelo dhinjidhene. Bibilia onloga wi Yehova “ddi nzuwa, ddi ebarelo” vina “motho ontolotxa.” (Masal. 84:11; Aheb. 12:29) Wonihiwa okanile Ezekiyel, ohimuladdaniha Yehova na malugu ozerimela, mujila wittwile vamottoni vina ekwi. (Ezek. 1:​26-28) Mukalelo onlogiwa Yehova mBibiliani onodhaga onitikiniha obe oviwoona ninga kanili elobwene.

2. Enkalela nni yorutxa onfiyedha Yehova?

² Vowi iyo kannimona Yehova, txino enokala yorutxa orumela wi iyene ononikwela. Abale agumanilena makattamiho mwigumi mwawa anodha wubuwela wi txipo Yehova kagawodhile wakwela. Txino amambali awa kalagihile okwela. Yehova onononelamo mukalelo oniviwamo iyo vina onoziwa wi enodhaga okala yorutxa omususela. Wi anikamihedhe, ononilagiha mBibiliani wi iyene Mulugu wokwela.

3. Ekalele nni yamakamaka oziwavi mwaha wa okwela wa Yehova?

³ Yehova okwela, Bibilia onloga wi Mulugu ddi okwela. (1 Jo. 4:8) Vina ku okwela okuwene oneddiha dhotene dhinkosiye. Okwela wa Mulugu ku onddimuwa-wene vina ohikana ewodhelo enddimuwa enapurihamo abale otene animukwela. (Mt. 5:​44, 45) Mwari mwa nsunzo ntti, ninele osunza ekalelo ya Yehova vina okwela waye. Venevo vandowihu nisunzaga sabwa ya Mulugu wehu, ninelege wunuwihavi omukwela wehu.

YEHOVA ONONIKWELA VADDIDDI

4. Okwela wa Yehova onuttukulela oviwamo dhavi? (Koona vina foto.)

⁴ “Nabuya ddodhala thagaraga na nthebwa.” (Tia. 5:11) Bibilia onomuladdaniha Yehova na mambali wokwela. (Iza. 66:​12, 13) Kamutanalele mambali amuzuzumelaga mwanaye mung’ono.  Na okwela onddimuwa onomwika ondduni vina onimususela na lizu n’ofwasa. Akala mwanaya onolila obe onowiwa opa, mambaliya onokosa muli-mwetemwene wila omukamihedhe. Nigatabuwaga nikane nikuluvelo wi Yehova ononikwela. Munasalmo ohileba: “Vanthabwa miyo odhugudheya, opangarhaza wenyu oddiridhiha murima.”—Masal. 94:19.

5. Okwela wa Yehova ontapulela nni mwa weyo?

⁵ Yehova ddoweddeyana. (Masal. 103:8) Iyene kanninyanyala masiki akala nihikosa yovonya. Ana Izrayel annimuttegela dila dhinjene; masiki dhawene nlogona vatxinuwani Yehova wanalevelela, iyene ohoniha wi kànyanyalile na mazu aba: “Weyo oddikoddelela vamentoni vaga; ddinouriha, ddinoukwela.” (Iza. 43:​4, 5) Okwela wa Mulugu kunsadduwa. Enowodheya iyo odhowavi nimukuluvelaga iyene. Masiki nikose yoddawa yottabwa, Yehova kanninyanyala. Nigatxinuwa vina nimwiyelela Yehova, ninele wona wi iyene onodhowavi anikwelaga. Iyene onopikirhela onilevelala kakamwe. (Iza. 55:7) Bibilia onloga wi olevelela oku wa Yehova onkala ninga nsaka ninkurumutxiye murima waye.—Mer. 3:19.

6. Zakariya 2:​13, [Zakariya 2:8 NM] ennisunziha nni mwaha wa Yehova?

⁶ Kengesa Zakariya 2:13; [Zakariya 2:8 NM]. Yehova ononiladdaniha na ttaga ya ninto naye. Ninto, yano modha yamakamaka ya maningo ehu ehinvegiwana. Nona Yehova wakala ninga waloga: ‘Ole onuwirelani obure nyuwo nlogo naga, obureya onirela elobo eli yamakamaka mwa miyo.’ Sabwa ya onikwela waye, Yehova onononelamo mukalelo onviwamo iyo vina onofuna venjene onibarela, iyo nigatabuwaga iyene vina onotabuwa. Nona enowodheya olobela na nikuluvelo: “Ddikoyení ninga enirana nyuwo thaga ya ninto nenyu.”—Masal. 17:8.

7. Ninfwanyelela nni olibiha okuluvela wehu okwela wa Yehova?

⁷ Yehova kanfuna wi weyo waganyedhe oukwela waye. Mbwenyi iyene onoziwa wi sabwa ya dhilobo dhupadduweli mundduni txino onowaganyedha akala iyene onowukwela obe nne. Obe txino onopattiwa na makattamiho anuttukulela waganyedha okwela wa Yehova. Kito onawodhe dhavi olibiha omukuluvela wawo Yehova? Wubuwela mukalelo onimukwela Yehova Yezu, attikitteliwi vina iyo notene.

 YEHOVA ONLAGIHA DHAVI OKWELA

8. Txini yamuttukulela Yezu okuluvela wi Babe wannimukwela?

⁸ Yehova na Yezu ahikala vamodha mabiliyawu menji a vyaka wirimu, ahunuwiha okwelana wawa muttu na mukwaye. Yehova ohoniha wi wanimukwela Yezu dhahene ninga enloga Mateu 17:5. Veneva Yehova kalogile bahi, ‘Oddu ddi Mwanaga onimurumelimi.’ Mbwenyi Yehova wafuna wi iyo niziwe wila iyene wanimukwela venjene Yezu, nona aloga wi “Oddu ddi Mwanaga wokweleya, onimurumelimi.” Yehova wanagalala vaddiddi na Yezu makamaka sabwa ya iyene operheka egumi yaye. (Ef. 1:7) Yezu kàganyedha okwela wa Babe, iyene wankuluvela wi Yehova wanimukwela. Sabwa ya ejuwene dila dhinjidhene iyene wahiloga wi wankweliwa na Babe.—Jo. 3:35; 10:17; 17:24.

9. Nzu gani nintapulelamo deretu okwela ona Yehova na attikitteliwi? Katapulela. (Roma 5:5)

⁹ Yehova vina onowalagiha okwela waye attikitteliwi. (Kengesa Roma 5:5.) Koona nzu ntti “okuthulela.” Disionario dhahi ya Bibilia enotapulela nzu ntti ninga “okuthuleliwa manje.” Nladdaniho ntti ninowoniha pama mukalelo onakwela Yehova attikitteliwi! Awene vina anoziwa wi anokweliwa na Mulugu. (Jud. 1) Murumiwi Joau ohiloga mukalelo waviwiyemo valebiliye dhahi: “Mone munuwelo wa okwela onikwelilena Baba, ofiyedha onithana anaye.” (1 Jo. 3:1) Kito Yehova onakweletxa bahi attikitteliwi? Nne, Yehova ohilagiha onikwela iyo notene.

10. Elobo gani enzinddiyeliha wi Yehova onowukwela?

¹⁰ Yehova olagihile dhavi okwela waye? Modhela yobolo—eli ezinddiyelo ya okwela onddimuwa onilagihile Yehova! (Jo. 3:16; Rom. 5:8) Yehova ohimperheka Mwanaye wokweleya, amuttiyaga iyene okwela nlogo notene na attu wi dhottega dhehu dhileveleliwe vina nikale amarho Aye. (1 Jo. 4:10) Venevo vandhowihu nitanalelaga muttengo opitxile Yehova na Yezu, ninele ononelamo mukalelo onnikwela awene. (Gal. 2:20) Yobolo kipitxeliwe sabwa ya oligana wa Yehova. Epitxeliwe sabwa ya okwela waye. Yehova ohilagiha onikwela waye modhela operheka egumi ya mwanaye—Yezu. Yehova ohimuttiya Mwanaye otabuwa vina okwa wi anivune.

11. Txini ensunzihu va Jeremiya 31:3?

¹¹ Ninga monilehu, Yehova onokosa muli mwetemwene wi onihe okwela waye. (Kengesa Jeremiya 31:3.) Iyene ohinikukusela mwibaribarini sabwani ononikwela. (Kaladdaniha na Olibiha 7:​7, 8.) Kiwo elobo enanimwalanihe mukwelani mwaye. (Rom. 8:​38, 39) Oniviwamo dhavi sabwa ya okwela oku wa Yehova? Ninele otanalela kapitulu 23 ya Masalmo, vina ninele wona mukalelo oviwilemo Davidi sabwa ya Yehova omukwela, omuzuzumela vina mukalelo onawodhe weyo oviwamo dhahene ninga Davidi.

ONIVIWAMO DHAVI SABWA YA OKWELA WA YEHOVA?

12. Weyo ogatapulelimo dhavi mazu ali va Masalmo 23?

¹² Kengesa Masalmo 23:​1-6. Va Masalmo 23 Davidi ohoniha okuluvela okwela wa Yehova vina wi iyene wannimuzuzumela. Davidi, ohiloga mandano ofiyedheya aniye na Yehova ofiyedha omukuwela Mukumbuzi waye. Davidi wali wobareleya amuttiyaga Yehova omweddiha, iyene wannimukuluvela kakamwe Yehova. Davidi wanziwa wi Yehova agahilagiha okwela waye masiku otene. Txini yamuttukulela Davidi okana nikuluvelo ntti?

13. Txini yamuttukulela Davidi okuluvela wi Yehova mudhidhi wetene agahimuzuzumela?

¹³ “Kaddinjombeliwa elo.” Mudhidhi wetene Davidi wankana esile dhamujombela, ottiya ejo Davidi wanziwa wi Yehova wali marho waye vina wannimurumela. Jijene yamuttukulela Davidi wona wi kiyatanala makattamiho agadhile ompatta musogorho, mudhidhi wetene Yehova  agahimuzuzumela. Nikuluvelo nana Davidi na okwela wa Yehova nali noliba vaddiddi opitta makattamiho-makattamihovi akaniye, jijene yamuttukulela Davidi okana wagalala vina wagalala na esile dhaniye.—Masal. 16:11.

14. Yehova onnizuzumela dhavi?

¹⁴ Yehova ononizuzumela na okwela onddimuwa, makamaka nigapattiwa na dhilobo dhorutxa mwigumini. Claire, a onkamihedha o Beteli okwaranya vyaka 20, wahikumuwa vapattiwe anamudhi aye na makattamiho ofwarelana. Babe wahipattiwa eredda emuttukuleli ohiwodhaga okosa elo, murogoriye mmodha wahiburutxiwa mmulogoni vina anamudhi aye ahigweliwa makattamiho a oyelega vina ahiyelela nyumba yawa. Yehova wazuzumeli dhavi? Claire ohiloga: “Dila dhotene Yehova ohikosa muli mwetemwene wi anamudhi aga akane esile dhàjombela. Dila dhinjene, Yehova wahinivaha dhilobo dhahobuwelimi! Mudhidhi na mudhidhi ddinowubuwelaga mukalelo waddizuzumela Yehova miyo na amudhaga. Miyo txipo kaddinadduwale midhidhi esi vina eji enoddikamihedha odhowagavi ddimulabelaga Yehova nowagalala ddigapattiwa makattamiho mena mwigumini.”

15. Txini emuttukuleli Davidi oliba murima? (Koona vina foto.)

¹⁵ “Onolibiha murimaga.” Dila dhina, Davidi wankumuwa sabwa ya makattamiho amugwela vina dhorutxa dhagumaniyena. (Masal. 18:​4-6) Masiki dhawene Okwela na ozuzumela wa Yehova wannimuridhiha murima. Yakala ninga Yehova wela onvelela Davidi vali “monyofu mwiti” vina “vali manje oridha.” Sabwa ya ejuwene Davidi wanwodha okanavi guru vina odhowavi amulabelaga Yehova na wagalala.—Masal. 18:​28-32.

16. Okwela wa Yehova onulibiha dhavi?

 ¹⁶ Masaka abano vina, iyo ninwodha owanana makattamiho na nikamihedho na Yehova, enkala ninga eji enloga Bibilia: Sabwa ya okwela woweddeyana wa Yehova kanitolotxiwe, nikalawovi. (Ent. 3:22; Kol. 1:11) Katanalela yotagiha ya Rakel. Iyene wakubanya vaddiddi vamuttawile mamunaye vina bamunyanyala Yehova mudhidhi wa COVID-19. Txini emukoseli Yehova? Iyene ohiloga: “Yehova ohikosa muli mwetemwene wi miyo ddiwodhe ozinddiyela okwela waye. Iyene ohalabihedha amarho akala na miyo mudhidhi wotene, anddidhelana yoja, anddilebela mensagem vina malebo addilibiha, anteya na miyo vina anddubutxedha mudhidhi wotene wi Yehova wela oddizuzumela. Miyo ddinomutamalela Yehova sabwa ya oddivaha anamudhi aba andikwela vaddiddi.”

17. Txini yamuttukulela Davidi ohova elo?

¹⁷ “Kaddinova elo, vowi nyuwo muli na miyo.” Davidi wahikana amwiddani a guru, vina dila dhinjene egumi yaye yakala vangovini. Masiki dhawene, iyene wakala wobareleya sabwa ya okwela wa Yehova. Iyene wahizinddiyela wi Yehova wali na iyene mudhidhi wotene, nanda jijene yamulibiha. Ji sabwaya yamuttukuleli wiba dhahi: “Oddivenyihamo wova waga.” (Masal. 34:4) Dila dhina Davidi wanttiddiwa wova venjene, masiki dhawene iyene wanwodha ovilela sabwani wahikana nikuluvelo nawi Yehova wannimukwela.

18. Oziwa wi Yehova ononikwela ennilibiha dhavi nigapattiwa wova?

¹⁸ Oziwa wi Yehova ononikwela ennivaha dhavi guru ya ovilela nigagumanagana makattamiho orutxa? Murogora wa pionera onkuweliwa Suzi onologa mukalelo oviwilemo iyene vina mamunaye mudhidhi ovipile mwaniwa: “Nigapadduweliwa dhilobo dhabure, dhokubanyiha, eji enonipatta venjene vina ninodhaga wova wi dhinapadduwe dhilobo dhina dhabure musogorho.” Mbwenyi okwela wa Yehova ononittukulela oviwamo wobareleya. Rakel ologiwe mundduni onowubuwela: “siku dhahi na mattiyu miyo ddahikubanya vaddiddi, miyo ddali wodhugudheyene vina na wova. Miyo ddihunla venjene vina ddimulobelela Yehova na lizu nowiweya, mudhidhene obule miyo ddahizindiyela wi Yehova wahifwasiha murima waga dhahene ninga munimukosela mambali mwanaye, venevo ddahiwodha ogona. Miyo txipo kaddinadduwale nsaka nttile.” Munddimuwa wa mulogo onkuweliwa Tasos wahifugeliwa mukambura mwari mwa vyaka nayi sabwa ya okodda oraba koddo. Iyene ozinddiyele dhavi okwela vina ozuzumela wa Yehova? Iyene ohiloga:  “Yehova oddivaha dhotene dhafunemi na dhina dhahobuwelimi. Eji eddittukulela omukuluvela venjene Yehova. Masiki mukambura mukalaga mburo wokubanyiha Yehova oddivaha wagalala modhela muya waye wokoddela. Eji yahiddikamihedha wona wi venevo vadhowa miyo ddimukuluvelaga Yehova ddanwodha ozinddiyela okwela waye. Nona ddahiroma olaba ninga pionero wa mudhidhi wotene valimi mukambura.”

KUKALE WOLAPELA NA MULUGU WAWO WOKWELA

19. (a) Oziwa wi Yehova ononikwela empatta dhavi dhinlogihu mmalobeloni mwehu? (b) Nlebo gani na mBibiliani ninloga mwaha wa okwela wa Yehova ninddiginya murima wawo? (Koona kasha “ Malebo Annikamihedha Ozinddiyela Okwela wa Yehova.”)

¹⁹ Dhotagiha dhotene dhonilehu mwari mwa nsunzo dhinolagiha wi Yehova, “Mulugu [Wokwela],” oli na iyo! (2 Kor. 13:11) Iyene onomuzuzumela muttu-muttu wa iyo. Ninofwanyela okuluvela wi nirugunuwiwa na okwela waye woweddeyana. (Masal. 32:10) Venevo vandowihu nitanalelaga mukalelo olagihile Yehova onikwela waye, ninele okala ofiyedheya na iyene vina kinarutxe ozinddiyela nikamihedho naye. Enowodheya iyo olobela wa Yehova mudhidhi mudhidhivi vina omwaddela wi ninofuna ozinddiyela onikwela waye. Enowodheya vina ologa na Yehova dhetene dhinnizuzumiha na nikuluvelo nawi iyene onononelamo dhinnipadduwela vina onofuna onikamihedha.—Masal. 145:​18, 19.

20. Okwela wa Yehova onnittukulela dhavi okala ofiyedheya na iyene?

²⁰ Dhahene ninga munziveliwa iyo waddamela motto labo ninkosa eridho, iyo ninofuna waddamela okwela wa Yehova. Masiki okwela wa Yehova okanaga guru, okwela oku vina ononifwasiha. Nona kafugula misuwo dha murima wawo wi ozinddiyele okwela wa Yehova mwigumini mwawo. Vina nigazinddiyelaga okwela oku notene ninele ologa: “Ddinomukwela Nabuya[Yehova]”!—Masal. 116:1.