NSUNZO 31
Kavaha Ttima Gari ya Olobela
“Nlobelo naga niwele vali nyuwo ninga othuwela wa lubani.” —MASAL. 141:2.
JIBO 47 Nimulobelele Yehova Malabo Otene
DHINASUNZE IYO *
1. Ninfwanyelela nni wona ninga gari omulobelela Yehova?
IYO NIHIKANA gari—enddimuwa vaddiddi ya onfiyedha na nlobelo Muttanddi wa wirimu na elabo ya vati. Karoma wubuwela: Enowodheya onfugulela murima wehu Yehova mudhidhi-mudhidhivi vina na elogelo-elogelovi. Ninowodha omulobelela Yehova nigakala aredda osipitale obe nigafugeliwa mukambura, nikuluvelaga wi Babi wehu wokwela onele onivuruwana. Iyo ninotamaalela venjene gari eji ena iyo.
2. Mwene Davidi wonihile dhavi wi wanvaha ttima gari ya olobela?
2 Mwene Davidi wanvaha ttima gari ya olobela. Iyene ohimwibela dhahi Yehova: “Nlobelo naga niwele vali nyuwo ninga othuwela wa lubani.” (Masal. 141:1, 2) Nsaka na mwene Davidi, lubani yali elobo yottittimihiwa yalabihedha namakutta munddimuwa, iyene wanimusasanyedha na ofwasa vaddiddi. (Obud. 30:34, 35) Davidi agafunaga olobela wantanaalela na ofwasa ejile yafuniye ologa na Yehova munlobeloni, dhahene ninga yakosa namakutta wamusasanyedha lubani na ofwasa. Masaka abano iyo nina efunelo yakene. Ninfuna wi malobelo ehu amwagalalihe Yehova.
3. Ninfwanyelela okana elemelelo gani nigamususelaga Yehova na nlobelo, nanda sabwaya jani?
3 Nigamususelaga Yehova na nlobelo, ninofwanyela okosa na nriho ninddimuwa vaddiddi. Karoma otanalela dhowonihiwa dhotikiniha dhoonile Izaiya, Ezekiyel, Daniyel vina Joau. Dhowonihiwa esi dhali dhottiyana, masiki dhahene mwahikala dhilobo dhahatxinjile. Otene aba ahimoona Yehova ninga Mwene wottittimihiwa. Izaiya Ohimoona Yehova “wagilatile vampaddoni waye wothukuwa, wothithimiheya.” (Iza. 6:1-3) Ezekiyel ohimoona Yehova bagilatile vampaddoni vaye wa Omwene wirimu barugunuweliwe na ozerimela . . . wali “ninga mutxeka wa Mulugu.” (Ezek. 1:26-28) Daniyel ohimoona “Munddimuwa Dhahi” wabalile guwo dhotxena vampaddoni vaye vambuduwa motto. (Dan. 7:9, 10) Oku Joau ohimoona Yehova bagilatile vampaddoni barugunuwiwe na elobo yokoddela ninga mutxeka wa Mulugu. (Ovuh. 4:2-4) Dhahene ninga moonelihu nttittimiho nohiladdanihiwa na Yehova ninonubutxedha gari enddimuwa enihu yonfiyedha na nlobelo, ninkosa ejuwene na nriho ninddimuwa. Ovano ninfwanyelela olobela dhavi?
“MULOBELEGE DHAHI”
4. Txini ensunzihu na mazu alogile Yezu va Mateu 6:9, 10?
4 Kengesa Mateu 6:9, 10. Diskursu ekosile Yezu va Mwangoni, ohasunziha anamafwara aye mukalelo wolobela onimwagalaliha Mulugu. Vasogorhova ohiloga dhahi “mulobelege dhahi.” Omaromo Yezu ohiloga dhilobo dhamakamaka dhiniwanana na efunelo ya Yehova: otxenihiwa wa nzina Naye, odha wa Omwene, onatolotxe amwiddani otene a Mulugu vina mareliho anavahiye nlogo na attu ninakale velaboni ya vati. Nigalobelelaga dhilobo esi ninowoniha wi efunelo ya Mulugu jilitxi yamakamaka wa iyo.
5. Ekaleleni yapama olobelela sabwa ya esile dhinnizuzumiha?
5 Mpaddi wa nawili wa nlobelo ntti, Yezu ohoniha wi japama omulobelela Yehova sabwa ya esile dhinnizuzumiha. Enowodheya iyo omulobelela Yehova wi anivahe yoja ya siku na siku, onilevelela dhottega dhehu, onibarela sabwa yoweha na onirabeliha dhilobo dhabure. (Mt. 6:11-13) Nigalobelelaga dhilobo esi, ninowoniha wi iyo ninoveda nikamihedho Naye vina nihikana efunelo ya omwagalaliha.
Dhilobo gani dhinlobelela mwazambo na mwadhiye? (Kang’ana ddima 6) *
6. Koddi munlobeloni nehu nilogege mazu akene a nlobelo nisunzihile Yezu? Katapulela.
6 Yezu kanfuna wi anamafwara aye afware mazu akene alogiliye munlobeloni nisunzihiliye. Dila dhina Yezu ohikosa malobelo, mowiwanana na esile dhafuniye. (Mt. 26:39, 42; Jo. 17:1-26) Na mukalelo wakakene, iyo ninofwanyela olobelela dhilobo-dhilobovi dhiniwanana na efunelo yehu. (Masal. 119:33, 34) Enowodheya iyo olobela nikumbiraga eziwelo vina ononelamo nigafunaga okosa yogana, ninolobela nikumbiraga eziwelo vina malago nigafunaga oroma mabasa orutxa. (Gano 2:6) Amambali enowodheya walobelela aniwa, aima vina walobelela amambali awa oku iyo notene ninofwanyela walobelela anamasunza ehu a Bibilia vina abale analaleyihu. Iyo nigamulobelelaga Yehova, malobelo ehu kakalevi bahi omukumbirha Yehova dhilobo obe nikamihedho.
Ninfwanyelela nni omuttittimiha Yehova vina omutamaalela mmalobeloni mwehu? (Kang’ana ddima 7-9) *
7. Ekalele nni yapama omuttittimiha Yehova mmalobeloni mwehu?
7 Kanidduwale omuttittimiha Yehova mmalobeloni mwehu. Kawo muttu mwina onfwanyelela ottittimihiwa ompitta Mulugu wehu. Iyene ‘dwapama vina oli womala-nawale wi alevelele.’ Iyene Mulugu ‘wanttebwa oneddiwa ttagaraga, wovilela wodhala opama ondowanavi elinyu’ vina wororomeleya. (Masal. 86:5, 15) Txibarene iyo nikana mwaha dhinjene dhinnittukulela omuttittimiha Yehova sabwa ya ekalelo eliye vina dhinikoseliye.
8. Dhilobo gani dhina iyo dhinnittukulela omutamaalela Yehova? (Masalmo 104:12-15, 24)
8 Omuttittimiha Yehova mmalobeloni mwehu onele onittukulela omutamaalela sabwa ya dhilobo dhinjene dha pama dhinnikoseliye. Motagiha, enowodheya iyo omutamaalela sabwa ya marhuwa a kori dhottiyana-ttiyana dhinoonihu, winjiva wa dhoja dhoziva vina dhottiyana-ttiyana na okana amarho okweleya annipamgarhaza. Babihu wokwela ononivaha dhilobo esi dhowinjiva wene wi dhinagalalihe. (Kengesa Masalmo 104:12-15, 24.) Ottiya ejo, ninofuniwana omutamaalela Yehova sabwa ya dhilobo dhinjene dhomuyani dhinnivahiye na njedhelo na makamaka nina iyo na musogorho.
9. Txini enanikamihedhe ohidduwala omutamaalela Yehova? (1 Tesalónika 5:17, 18)
9 Kinrutxa odduwala omutamaalela Yehova mwa dhilobo dhotene dhinnikoseliye. Txini enanikamihedhe wubuwela? Ogawodha kalebela dhilobo dhotene dhinimukumbirhiwe Yehova ogamala mudhidhi na mudhidhi wang’anege esile dhakulile Yehova. Ottiya ejo kamutamaalele Yehova sabwa ya nikamihedho nuvahiliye. (Kengesa 1 Tesalónika 5:17, 18.) Karoma otanalela: Iyo ninowagalala vina ninotamaalela nigeddihiwa n’opama na attu ena. Na mukalelo wakakene iyo nigobuwela omutamaalela Yehova sabwa ya wakula malobelo ehu, eji enowagalaliha murima wehu. (Kol. 3:15) Elobo gani yina yamakamaka ennittukulela omutamaalela Mulugu wehu?
OMUTAMAALELE YEHOVA SABWA YA MWANAYE WOKWELEYA
10. Mowiwanana na 1 Pedro 2:21, nina sabwa gani ennittukulela omutamaalela Yehova sabwa ya omuruma Yezu velaboni ya vati?
10 Kengesa 1 Pedro 2:21. Iyo ninofwanyela omutamaalela Yehova sabwa yomuruma mwanaye wokweleya wi anisunzihe. Iyo ninosunza dhilobo dhinjene sabwa ya Yehova vina mukalelo womwagalaliha nigasunzaga egumi ya Yezu. Nigaroromela mukutto wa yobolo wa Kristu, ninokana mandano ofiyedheya na Yehova vina ninokana murenddele na iyene.—Rom. 5:1.
11. Ninlobelela nni na nzina na Yezu?
11 Ninomutamalela Yehova sabwa ya iyo ologa na iyene na nlobelo modhela Mwanaye. Yezu dila enlabihedha Yehova wila akule dhokumbirha dhehu. Yehova onovuruwana vina onowakula malobelo ehu nigalobela na nzina na Yezu. Yezu ohiloga: “Dhetene dhinloba nyuwo na nzina naga, miyo ddinouvahani, wi Baba athithimihiwe mwa Mwanaye.”—Jo. 14:13, 14.
12. Mwaha mwina buvi onnittukulela iyo omutamaalela Yehova sabwa ya onivaha Mwanaye?
12 Yehova onolevelela dhottega dhehu modhela mukutto wa yobolo wa Yezu Kristu. Malebo anloga dhahi mwaha wa Yezu “iyo nikana namakutha munddimuwa-nddimuwa owelile odhulu.” (Aheb. 8:1) Yezu ‘ddinnilogela wa Baba.’ (1 Jo. 2:1) Iyo ninotamaalela sabwa ya Yehova olevelela dhottega dhehu amulabihedhaga Namakutta Munddimuwa odduwene onnonelamo ohiligana wehu vina ‘onnilogela iyo.’ (Rom. 8:34; Aheb. 4:15) Vowi iyo nili attu ohiligana, kohikalawo mukutto wa yobolo wa Yezu Kristu iyo kanigawodhile onfiyedha Yehova na nlobelo. Iyo kaninawodhe omutamaalela Yehova mowakwana-mwene sabwa ya oderetu onikoseliye—onivaha Mwanaye wokweleya!
WALOBELELE ABALI NA AROGORA
13. Omattiyu womariha Yezu ahinakwa, wonihile dhavi wi wanakwela anamafwara aye?
13 Omattiyu womariha Yezu ahinakwa, wahalobelela anamafwara wi Yehova “abarele sabwa ya Satana.” (Jo. 17:15) Oku olagiha wa okwela onddimuwa! Yezu wanziwa wi mohigonela agahigweliwa yoweha enddimuwa, masiki dhawene iyene wanazuzumela anamafwara aye.
Dhilobo gani dhinfwanyela iyo olobelela esuwene dhinapatta abali na arogora? (Kang’ana ddima 14-16) *
14. Ninatonyihedhe dhavi wi ninowakwela abalihu na arogora?
14 Nimutagihaga Yezu, kaninfwanyela ozuzumelaga dhojombeliwa dhehu bahi. Mudhidhi na mudhidhi iyo ninofwanyela walobelelaga abali na arogora. Nigakosa dhahene, ninele wiwelela nlamulo na Yezu na omukwela muttu mukwihu vina ninomutonyihedha Yehova wila ninowakwela abalihu. (Jo. 13:34) Walobelela abali na arogora enowakamihedha. Nzu na Mulugu ninloga dhahi “nlobelo na muthu womyala murima, niniriwa na ntidi nikana guru enddimuwa.”—Tia. 5:16.
15. Abali na arogora anvedela nni malobelo ehu?
15 Abali na arogora ehu anofuna wi iyo nalobelelege sabwani anogumanana makattamiho menjene. Enowodheya iyo omukumbirha Yehova wi aakamihedhe owanana oredda, dhifoyo dha mwilaboni, koddo, ofwarafwariwa obe makattamiho mena. Enowodheya vina walobelela abali na arogora anvivelela wi akamihedhe abali abo ali musegedheyani. Weyo txino onowaziwa ena angumanana makattamiho anligana na aba. Munlobeloni mwawo onkoddela nni waloga mazina awa? Iyo ninele otonyihedha wakwela venjene abali ehu nigamukumbirhaga Yehova wi aakamihedhe ovilela.
16. Ninalobelela nni abale annisogorhela?
16 Abali ansogorhela mulogo, anotamaalela agalobeleliwaga na attu ena sabwani malobelo a abali anowakamihedha. Eji ebaribari. Murumiwi Paulo ohileba dhahi: “Ddilobeleleni miyo vina wa Mulugu, wi addivahe mazu awakwana: ddihovege vanlaleya miyo ntikiniho na Muthaka wapama.” (Ef. 6:19) Masaka ovanene vina iyo nihikana abali anlaba venjene abuwene ansogorhela mabasa annikamihedha. Iyo ninele olagiha wi ninowakwela nigamukumbirhaga Yehova wi arurihe mabasa anttiddani.
NIGAKUMBIRHIWA WI NIKOSE NLOBELO
17-18. Mudhidhi gani onfuneya walobelela ena nanda txini enfwanyelihu okana muyubuweloni?
17 Dila dhina, iyo ninokumbirhiwa wi nikose nlobelo. Motagiha, murogora oneddiha nsunzo na Bibilia onodhaga omukumbirha murogora mwina oninvelela wi akose nlobelo. Murogora oddu onkumbirhiwa akala kanimuziwa pama namasunzaya egahikala ya malago okosa nlobelo nomariha. Vowi onele ozinddiyela dhofuna dha namasunzaya wi aloge munlobeloni.
18 Txino mbali onokumbirhiwa wi akose nlobelo noroma mmatugumanoni obe a mmatugumanoni odhowa mmabasani a olaleya. Bili dhawene, abali abo ana gari yowalobelela attu ena, anofwanyela okana muyubuweloni yogana ya matugumanoya. Nlobelo ninkosiwa mmatugumanoni kaninfwanyela okosiwa ninga malago obe ninga yovuwiha. Mwa milogo dhinjene mitala mitanu dhinowakwanela wiba jibo na nlobelo, nona kili yofuneya mbaliya ologa “mazu menjene,” makamaka agakosaga nlobelo noroma na matugumano.—Mt. 6:7.
KAVAHA TTIMA MALOBELO
19. Txini enanikamihedhe okala ovisasanyedhene siku na ottonga wa Yehova?
19 Vowi ninowaddamela labo nottonga na Yehova ninofwanyela ovaha ttima malobelo. Nona Yezu baloga dhahi: “Porhe-porhe muhigone; didelaní olobela wi mukane guru dhorabelana dhawopiha dhetene dhinapadduwe.” (Lk. 21:36) Iyo nigalobelaga mudhidhi wotene nroromelo nehu ninele oliba vina ninele ovisasanyedhela siku na ottonga na Mulugu.
20. Malobelo ehu anakale dhavi ninga onukela wa lubani?
20 Txini dhisunzilihu? Iyo ninovaha ttima gari ya olobela. Mmalobeloni mwehu ninofwanyela ozuzumelaga dhilobo dhiniwanana na ofuna wa Yehova. Mwari mwa nsunzo ntti nihoona ofuneya wa otamalela mukutto wa yobolo wa Yezu, sabwa ya iyene okala Mwene wa Omwene wa Mulugu vina walobelela abali na arogora. Nihoona wi enowodheya olobela nikumbiraga dhilobo dhinnijombela mpaddi womaningoni vina womuyani. Nigaroma otanalela nofwasa esile dhinfunihu ologa munlobeloni ninowoniha wi ninovaha ttima gari eji ya olobela. Dhahene mazu ehu anele okala ninga onukela wa lubani ‘onimuzivela Yehova.’—Gano 15:8.
JIBO 45 Dhotanalela Dha Mmurimani Mwaga
^ Iyo ninotamaalela venjene gari ena iyo ya onfiyedha Yehova na nlobelo. Ninfuna wi malobelo ehu akalege onukela ninga ottuwela wa lubani, onimwagalaliha. Mwari mwa nsunzo ntti, ninele osekeserha dhilobo dhinfwanyeelihu ologa nigalobelaga. Ninele osunza vina dhilobo dhing’onovi dhinfwanyela otanalela abale ankumbirhiwa wi akosele ena nlobelo.
^ MAFOTO NIKUKU: Mwazambo na mwadhiye alobelelaga obareleya wa mwanawa olli oskola, egumi ya munammudhi wawa vina wunuwa womuyani wa namasunza.
^ MAFOTO NIKUKU: Mbali wa muzombwe amutamalelaga Yehova sabwa ya mukutto wa Yezu Kristu, elabo yehu yokoddela vina dhoja dhapama.
^ MAFOTO NIKUKU: Murogora alobelaga wi Yehova arurihe Nikuru Nolamulela na muya waye wokoddela vina aakamihedhe abali na arogora antabuwa na dhifoyo dha mwilaboni vina ofwarafwariwa.
