1. Txini elogile Yehova mudhidhi mung’onovi mumalile Adamu na Eva ottega? (Wita 3:15)

 MUDHIDHI mung’onovi mumalile Adamu na Eva ottega, Yehova wahavaha njedhelo ziza nawa okosile ejuwene modhela nivuhulo namakamaka vaddiddi. Elogiliye enfwanyeya va Wita 3:15.—Kengesa.

2. Nivuhulo ntti nikalele nni namakamaka vaddiddi?

² Nivuhulo ntti ninfwanyeya nivuru noroma na Bibilia. Mbwenye manivuru mena a Bibilia anowiwanana na nivuhulo ntti. Dhahene ninga kola enlabihedhiwa wi egumanihe mapapeli wi nikale nivuru, mazu a ovuhulela anfwanyeya va Wita 3:15 anowiwanana na muselu onloga manivuru mena a Bibilia, wi Mulugu agahimuruma Nvuni agatolotxile mabasa a Ddiabo, vamodha na abale animukamihedha. * Mareliho gani anakele abale animukwela Yehova!

3. Mavuzo gani anakuliwe mwari mwa nsunzo ntti?

³ Mwari mwa nsunzo ntti ninele wakula mavuzo aba anfwarela sabwa ya nivuhulo ninfwanyeya va Wita 3:15: Bani ankosa mpaddi wa nivuhulo ntti? Nivuhulo ntti ninakwanihedheya dhavi? Nanda ninnipuriha dhavi?

4. “Nowa,” enimutonya ani, nanda iyo ninziwa dhavi?

⁴ Anlogiwa vanivuhuloni nili va Wita 3:14, 15 ddi “nowa,” “ziza” na nowa, “muyana,” na “ziza” na muyana. Bibilia ononikamihedha waziwa mmodha-mmodha wa awene. * Ndoweni  nirome na nowa. Kowiliwa yali nowa ya ebaribari, nowaya kiganonelilemo ejile elogile Yehova mmunddani mwa Edeni. Mukalelo ologile Yehova, enoniha wi eji yali yottanddiwa ya eziwelo. Yottanddiwaya bani? Ovuhulela 12:9 onloga dhahi: “nowa ejo enddimuwa ji nowa yawale” eji enowooniha kakamwe wi wali Satana Ddiabo. Ki ziza na nowa ninatonya ani?

5. Bani ankosa mpaddi wa ziza na nowa?

⁵ Bibilia agalogaga sabwa ya ziza na mukalelo wa nladdaniho, onatonya abale anubuwela vina ankosa dhilobo ninga babiwa wa nladdaniho. Nona ziza na nowa dhottanddiwa dh’omuyani otaganyiha na attu ali ninga Satana animukoodda Yehova Mulugu vina anfwarafwara nlogo Naye. Anotaganyihiwa vina na anju attiyile mimburo dhawa wirimu badha velaboni ya vati nsaka na Nowé, vina attu aliwo masaka abano ankosa dhilobo ninga babiwa Ddiabo.—Wita 6:1, 2; Jo. 8:44; 1 Jo. 5:19; Jud. 6.

6. Sabwaya jani “muyana” kahiyo Eva?

⁶ Ovano ndoweni nimuzinddiyeleni muyana. Muyana oddu kahiyo Eva. Ninlogela nni dhahene? Sabwani, nivuhulo naloga wi ziza na muyana ‘nigahitataka’ musoro wa nowa. Dhahene ninga moonelihu, nowa eji ddi Satana yottanddiwa y’omuyani, nona kigawodheyile muttu wohakwana wa ziza na Eva otataka musoro wa nowa. Satana onatolotxiwe dhavi?

7. Mowiwanana na Ovuhulela 12:1, 2, 5, 10, muyana onlogiwa va Wita 3:15 ontonya nni?

⁷ Nivuru nomariha na Bibilia ninonikamihedha omuziwa muyana onlogiwa va Wita 3:15. (Kengesa Ovuhulela 12:1, 2, 5, 10.) Muyana oddu kahiyo wa elabo ya vati! Iyene wemelile vadhulu va mwamweri vina wahirugunuwiwa mmusorhoni vineneri 12.  Vasogorhova ohimbala mwana wottiyana vaddiddi—Omwene wa Mulugu. Omwene oli wirimu nona muyana oddu onokosa mpaddi wa wirimu. Iyene ontonya mpaddi wa nikuru na Yehova nili wirimu, ankosa mpaddi wa nikuru ntto dhottanddiwa dha omuyani dhororomeleya.—Gal. 4:26.

8. Mutaji wa ziza na muyana bani, vina mudhidhi gani okaleliye muttaji? (Wita 22:15-18)

⁸ Nzu na Mulugu ninonikamihedha omuzinddiyela muttaji wa ziza na muyana. Iyene agadhile munihimoni na Abrahamu. (Kengesa Wita 22:15-18.) Nivuhulo ntti ttebaribari, sabwani Yezu odhile munihimoni na mulobwana oddu wororomeleya. (Lk. 3:23, 34) Mbwenye muttu oddu agadhile mu zizani na muyana agali wa guru vaddiddi opitta muttu-muttuvi, sabwani agahimutolotxa Satana Ddiabo okala-nokalawene. Vakwanihile Yezu vyaka 30 dhobaliwa, wahittikitteliwa na muya wokoddela ninga Mwana wa Mulugu. (Gal. 3:16) Na ottikitteliwa oku, Yezu wahikala muttaji wa ziza na muyana, vasogorhova mukweli Yezu vina avenyihiwa mukwani, Mulugu ‘ohimudhaliha nriho na nttittimiho’ vina ohinvaha “owodha wotene, wa wirimu na elabo ya vati,” otaganyiha na owodha wa “otolotxa mabasa a Satana.”—Aheb. 2:7; Mt. 28:18; 1 Jo. 3:8.

9-10. (a) Ena ankosa mpaddi wa ziza na muyana bani vina mudhidhi gani onkosani mpaddi? (b) Txini enasekeserhihu ovanene?

⁹ Ottiya Yezu, ogahikala attu ena agakosile mpaddi wa ziza na muyana. Murumiwi Paulo ohizinddiyela ziza na muyana, mulogeliye na Akristu Ayuda vina Amalabo ottikitteliwa wi: “Akala muneddihiwa na Kristu, mulí a nihimo na Abrahamu, munowakela dhiroromelihile Mulugu.” (Gal. 3:28, 29) Yehova agamuttikittela Mukristu na muya wokoddela, muttu oddo onokosa mpaddi wa ziza na muyana. Ankosa mpaddi wa ziza na muyana ddi Yezu Kristu na abale anattonge na iyene 144.000. (Ovuh. 14:1) Otene aba, dhinkosani vina dhinubuwelani dhinowiwanana na muya wa Babiwa, Yehova Mulugu.

¹⁰ Nihimala wazinddiyela abale anlogiwa va Wita 3:15, ovano ninfuna none mukalelo onakwanihedha Yehova mavuhulo aba vang’ono-vang’ono vina iyo nimpurelamo dhavi.

11. Olumiwa “etili” wa ziza na muyana ontapulela eni?

¹¹ Mowiwanana na nivuhulo nili va Wita 3:15, nowa egahiluma “etili” ya ziza na muyana. Nivuhulo ntti nakwanihedheyile mudhidhi walabihedhile Satana Ayuda na akadda Roma wi ampe Mwana wa Mulugu. (Lk. 23:13, 20-24) Dhahene ninga envoreheya muttu etili ahiwodha wedda mwa mudhidhi mung’onovi, jakene epadduwile na Yezu. Mudhidhi okwiliye kawodhile okosa elobwene wahekiwa mwikuttani bakala mwenemo malabo mararu.—Mt. 16:21.

12. Nowa enatatakiwe musoro mudhidhi gani, nanda dhavi?

¹² Nivuhulo nili va Wita 3:15 naloga wi Yezu kagatotowile mwikuttani. Sabwaya? Sabwani mowiwanana na nivuhulo, agahitataka musoro wa nowa. Eji yatapulela wi Yezu agahakela wili egumi. Nanda jijuwene epadduwile! Muvirile malabo mararu bamalile okwa, Yezu wahivenyihiwa mukwani ninga yottanddiwa y’omuyani ehinkwa. Mudhidhi wa Mulugu ogafiya, iyene onele omulabihedha Yezu wi atatake musoro wa Satana. (Aheb. 2:14) Abale analamulele na Yezu, anele watolotxa amwiddani otene a Mulugu ali velaboni ya  vati—kuloga ziza na nowa.—Ovuh. 17:14; 20:4, 10. *

13. Iyo nimpurelamo dhavi wakwanihedheya wa nivuhulo ntti?

¹³ Akala weyo wa Mukristu wobatiziwa onimulabela Mulugu, onopurelamo wakwanihedheya wa nivuhulo ntti. Yezu ohidha velaboni ya vati ninga muttu womaningoni. Dhakosiye dhali dhakene dhooniliye Babe akosaga wirimu. (Jo. 14:9) Modhela iyene, iyo nihimuziwa vina ninomukwela Yehova Mulugu. Ninopurelamo masunziho a Yezu vina malago ansogorheliyena mulogo w’Okristu masaka abano. Iyene ononisunziha malago aweddihana egumi yehu annikamihedha orumeliwa na Yehova. Iyo notene ninopurelamo na okwa wa Yezu—obe Olumiwa etili. Dhavi? Muvenyihiwiye Yezu mukwani, Yehova ohirumela mukutto wa Yezu ‘onttimiha dhottega dhehu dhotene.’—1 Jo. 1:7.

14. Ninziwa dhavi wi nivuhulo nilogile Yehova mmunddani mwa Edeni kanakwanihedheyile momaguva? Katapulela.

¹⁴ Mazu alogile Yehova mmunddani mwa Edeni, antonyihedha wi ogahivira mudhidhi mwinjene ahinatti wakwanihedheya. Ehittukula mudhidhi wi muyana akaane ziza naye, Satana aagumanihe anamafwara aye vina widdana wa makuru aba meeli. Iyo ninopurelamo nivuhulo ntti, sabwani ninoziwa wi elabo eji enlamuleliwa na Satana, egahawidda alabeli a Yehova. Vasogorhova Yezu ohatxenjeriha anamafwara aye na muselu wakene. (Mk. 13:13; Jo. 17:14) Ninowona wakwanihedheya wa mpaddi mmodha wa nivuhulo ntti mwari mwa vyaka 100 dhivirile. Dhavi?

15. Elabo niniddela nni venjene nlogo na Mulugu, nanda ninkoddelani omova Satana?

¹⁵ Muttomiwe Yezu ninga Mwene Wosakuliwa yaka ya 1914, Satana ovokedhiwa velaboni ya vati. Iyene kana ewodhelo yowiyelela wirimu onjeedha otolotxiwa waye. (Ovuh. 12:9, 12) Mbwenye kanjedha na ofwasa. Satana ohisilidhiwa vaddiddi, osilidhiwa waye ohimuttukulela olupela nlogo na Mulugu. Sabwa ya ejuwene elabo enowawidda venjene nlogo na Mulugu. (Ovuh. 12:13, 17) Mbwenye kaninfwanyela omova Satana na anamafwara aye. Ottiya ejo, iyo nina nikuluvelo nakene nana murumiwi Paulo olebile dhahi: “Akala Mulugu oli na iyo, onniwodha bani?” (Rom. 8:31) Iyo ninomukuluvela venjene Yehova sabwani ninowona wakwanihedheya wa nivuhulo nili va Wita 3:15.

16-18. Curtis, Ursula, na Jessica apurelemo dhavi ononelamo nlebo na Wita 3:15?

¹⁶ Nipikirelo na Yehova ninfwanyeya va Wita 3:15 ninowodha onikamihedha owanana makattamiho-makattamihovi angumanana iyo. Curtis, onlaba ninga misionario murudda onkuweliwa Guam, ohiloga: “Mudhidhi mwina ddinowanagana makattamiho aneha ororomeleya waga na Yehova. Mbwenye otanalela nivuhulo nili va Wita 3:15 ninoddikamihedha odhowavi ddimukuluvelaga Babi waga wa wirimu.” Curtis onojeedhela labo ninagomihe Yehova makattamiho ehu otene.

¹⁷ Murogora onkuweliwa Ursula onkala murudda wo Bavaria ohiloga wi ononelamo nivuhulo nili va Wita 3:15 nihimukamihedha okuluvela wi Bibilia nzu nivudheleliwe na Mulugu. Iyene ohona wi mavuhulo otene anowiwanana na nivuhulo ntti, oziwa ejuwene ehimutikiniha venjene. Iyene ohiloga dhahi: “Oziwa wi Yehova onowakwanihedha esile dhipikireliye ehiddikamihedha wona wi  nlogo na attu nihikana njedhelo, eji eddiginya venjene murima waga.”

¹⁸ Jessica, onkala o Micronesia, ohiloga dhahi: “N’apanovi ddinowubuwela yiwilemo miyo mudhidhi ofwanyilemi ebaribari! Nivuhulo nili va Wita 3:15 nela wakwanihedheya. Eji eddikamihedha oziwa wi makattamiho angumanana iyo masaka aba kahiye ejuwene yanifunana Yehova. Nivuhulo ntti nihilibiha nroromelo naga wi omulabela Yehova onoddivaha egumi yottugareya ovanene vina egumi yapama musogorho mpo.”

19. Txini ennikuluveliha wi mpaddi wanawili wa nivuhulo nili va Wita 3:15 onele wakwanihedheya?

¹⁹ Ninga monelihu, nivuhulo nili va Wita 3:15 ovano ninowakwanihedheya. Nihimala ozinddiyela mowakwana-mwene ziza na muyana vina ziza na nowa. Yezu, ddi muttaji mu zizani na muyana, iyene ohivulumuwa etili yalumiwiye, ovano Mwene wottittimihiwa ohinkwa. Oku Yehova onodhowavi asakulaga abale anattonge na Mwanaye wirimu. Sabwa ya wakwanihedheya mpaddi woroma wa nivuhulo ntti, eji enonikuluveliha wi mpaddi womariha wa nivuhulo ntti, otatakiwa musoro wa Satana onele wakwanihedheya. Murenddele gani onajevo attu ororomeleya mudhidhi onatolotxiwe Satana! Oku nijedhaga ofiya wa siku ntto, kaniyelele mundduni. Mulugu wehu ddokuluveleya. Modhela ziza na muyana iyene onele wadheelana mareliho ohelegeya attu a “malogo etene a mwilaboni.”—Wita 22:18.