NSUNZO 29
Omukamihedhe Musogorheli Wehu Yezu
“Ddivahiwa owodha wotene, wa wirimu na elabo ya vati.” —MT. 28:18.
JIBO 13 Nimutagihe Yezu
DHINASUNZE IYO *
1. Masaka abano efunelo ya Yehova jivi?
MASAKA abano efunelo ya Mulugu jowi miselu dhapama dha Omwene dhilaleyiwe elabo yotene. (Mk. 13:10; 1 Tim. 2:3, 4) Aba mabasa a Yehova, nona iyene amusakula Mwanaye wi asogorhele mabasaya. Vowi mabasa aba onsogorhela ddi Yezu nikuluvele wi iyene onele wakwanihedha dhawene ninga munfunela Yehova, omagomo wa elabo ohinafiya.—Mt. 24:14.
2. Txini enasekeserhihu mwari mwa nsunzo ntti?
2 Mwari mwa nsunzo ntti ninele wona mukalelo onimulabihedha Yezu “mwimeleli wororomeleya vina wamalago” wi avahege oja womuyani vina aasogorhele emeleli aye wi alaleye mabasa origanela ahinattigi opadduwa. (Mt. 24:45) Omamalelowa ninele wona mukalelo onamukamihedhe muttu-muttu wa iyo, Yezu na mwimeleli wororomeleya vina wamalago.
YEZU DDINSOGORHELA MABASA A OLALEYA
3. Yezu ovahiwe owodha wa okosa eni?
3 Yezu ddi musogorheli wa mabasa a olaleya. Iyo ninziwa dhavi? Mudhidhi mung’onovi ahinatti odhowa wirimu, Yezu wahitugumana na anamafwara aye enjene ororomeleya omwangoni wo Galileya. Iyene wahawaddela dhahi: “Ddivahiwa owodha wotene, wa wirimu na elabo ya vati.” Ovano koona mazu alogiliye vasogorhova: “Nona, kadhowani mwasunzihe attu a elabo yotene.” (Mt. 28:18, 19) Mwaveneva ninononelamo wi Yezu ohivahiwa owodha wa osogorhela mabasa a olaleya.
4. Txini ennikuluveliha wi Yezu onodhowavi asogorhelaga mabasa a olaleya?
4 Yezu ohikuluveliha wi mabasa a olaleya vina owakosa anamafwara agahikosiwa ‘mwilaboni mwetemwene’ vina iyene agahikalavi na anamafwara aye “masiku otene ofiyedha omagomelo wa elabo.” (Mt. 28:20) Mazu aba anonikuluveliha wi mabasa a olaleya agahidhowavi asogorheliwaga na Yezu mpaka masiku aba ankalihu.
5. Iyo ninkamihedha dhavi wakwanihedheya wa nivuhulo wa Masalmo 110:3?
5 Yezu wanziwa wi masiku omariha agahikalawo anamalaba owakwanela. Iyene wanziwa mazu aba a nivuhulo a munasalmo anloga wi: ‘nlogo nenyu ninele ovivelela ninga nikuru na anyakoddo siku ninrabani koddo.’ (Masal. 110:3) Akala weyo onokosa mabasa aba olaleya eji enlagiha wi weyo onomukamihedha Yezu mwimeleli wororomeleya vina wamalago vina onokamihedha wakwanihedheya wa nivuhulo ntti. Mbwenye mabasa aba kahiye ovevuwa.
6. Makattamiho gani angumanana abale anlaleya miselu dhapama dha Omwene masaka abano?
6 Ninga anamalaleya a Omwene wa Mulugu, makattamiho angumanihuna kufwarafwariwa. Asadduweli, asogorheli a marelijiau vina makuru a politika anovuwiha dhottambi dhinjene sabwa ya mabasa ehu. Txino anamudhi, amarho omabasani na attu ena anaziwa iyo, agewa dhottambi esi anotamela onittiyiha omulabela Mulugu obe ottiya olaleya miselu dhapama. Dhilabo dhina abale annifwarafwara anowatxutxa abalihu anowalupela vina anowawika mukambura. Mbwenye esi kadhinnitikiniha. Sabwani Yezu wahibaza ologa dhahi: “Munele widdiwa na attu a malogo otene, sabwa ya nzina naga.” (Mt. 24:9) Widdiwa oku onowoniha wi iyo ninorumeeliwa vamentoni va Yehova. (Mt. 5:11, 12) Ddiabo ddinsogorhela ofwarafwariwa oku wetene. Vowi onisogorhela ddi Yezu, Ddiabo kahiye elo! Na nikamihedho na Yezu miselu dhapama dhinolaleyeliwa attu a malogo otene. Ndowe nisekeserhe dhinoniha ejuwene.
7. Dhizinddiyelo gani dhinona weyo dhinlagiha wi nivuhulo na Ovuhulela 14:6, 7 ninowakwanihedheya?
7 Vowi mwilaboni munlogiwa dhilogelo dhottiyana-ttiyana enokala yorutxa anamalaleya Omwene walaleya attu a dhilogelo dhotene. Yezu wahivuhulela wi nsaka nttino ninkalihu miselu dhapama dhigahilaleyiwa masiki na makattamiho abo. (Kengesa Ovuhulela 14:6, 7.) Nivuhulo ntti ninakwanihedheya dhavi? Nsaka nttino mabasa ehu olaleya anokosiwa dhilabo dhottiyana-ttiyana vina na dhilogelo dhinjene. Motagiha, mu jw attu a dhilabo dhotene anowodha wengesamo mapublikasau andela mBibiliani okwaranya dhilogelo 1.000! Nivuru Kajavo Egumi Yamukalaka!—nili epano yehu yosunzihana, nihitapuleliwa na—dhilogelo okwaranya 700! Ottiya ejo nihikana oja womuyani mavidiyu a elogelo ya mada anakamihedha abale ahiniwa vina ahinloga, manivuru a brahili anakamihedha abale ahinoona. Iyo ninowona wakwanihedheya wa mavuhulo a mBibiliani. Attu ‘a malogo otene vina dhilogelo dhotene’ anosunza ologa ‘elogelo modhene’ (a língua pura) obe ebaribari ya mBibiliani. (Zak. 8:23; Sof. 3:9) Dhotene esi dhinakwanihedheya dhinsogorheliwa na musogorheli wehu Yezu.
8. Yopurelamo gani enonihu ya mabasa ehu olaleya mpaka ovanene?
8 Masaka abano attu okwaranya 8.000.000 anfwanyeya dhilabo 240 ali mumodhani munikuruni na Yehova, yaka-yaka attu owakwana matxikwi kumi anobatiziwa ninga Anamoona a Yehova! Elitxi yamakamaka kahiye winjiva wa muttengo obu, ku wawona abalaga ‘omuttu oswa,’ obe mikalelo dha Okristu. (Kol. 3:8-10) Enji mwa awene ahittiya dhilemelelo dha ojeberuwa, owali, nsakulano vina enaya ahittiya ottittimihetxa dhilabo dhibaliwani. Nivuhulo ninfwanyeya va Izaiya 2:4 ninowakwanihedheya; ena mwa awene kansunza vina ‘oraba koddo.’ Iyo nigavilibihedha wabala mikalelo dha omuttu oswa, ninowakamihedha attu ena okala ofiyedheya na nikuru na Mulugu nanda ninowoniha wi nininfara musogorheli wehu Yezu Kristu. (Jo. 13:35; 1 Ped. 2:12) Dhilobo esi dhotene kadhinpadduwela vayovi. Yezu ddinnivaha nikamihedho ninvedihu.
YEZU OHIMUTTOMA MWIMELELI WOROROMELEYA VINA WAMALAGO
9. Mowiwanana na Mateu 24:45-47, txini yalogile Yezu wi egahipadduwa nsaka nttino nomariha?
9 Kengesa Mateu 24:45-47. Yezu wahivuhulela wi mwari mwa masaka omariha, agahimuttoma “mwimeleli wororomeleya vina wamalago” wi agawege dhoja dhomuyani. Nona jojedheleya wi alobwana aba agahilaba na guru masaka abano omariha. Jijuwene enpadduwa. Musogorheli wehu ohittoma nikuru ning’ono na alobwana ottikitteliwa wi avahege nikuru na Mulugu esile dhinajombela vina wagawela ‘yoja vansakanivá.’ Alobwana aba anoziwa wi kahiyo anya a nroromelo nehu. (2 Kor. 1:24) Ottiya ejo awene anononelamo wi Yezu Kristu ddi ‘namattonga vina musogorheli’ wa nlogo naye.—Iza. 55:4.
10. Ninga munlagihedha mafoto nivuru gani nukamihedhile osunza ebaribari?
10 Oromana nsaka na 1919, mwimeleli wororomeleya onodha asasanyedhaga manivuru anakamihedha abale ana efunelo ya osunza ebaribari ya mazu a Mulugu. Yaka ya 1921, mudhari wororomeleya opidda nivuru ninkuweliwa Arpa de Deus nakamihedhile abale ana efunelo ya oziwa masunziho oroma a Bibilia. Mwa ovira wa mudhidhi ahisasanyedhiwa manivuru mena. Mwa manivuru aba ttivi nukamihedhili omuziwa vina omukwela Babi wehu wa wirimu? Tti nivuru “Seja Deus Verdadeiro,” A Verdade que Conduz à Vida Eterna, Poderá Viver para Sempre no Paraíso na Terra, Conhecimento que Conduz à Vida Eterna, Txini Ensunziha Bibilia Txibarene?, Txini Ennisunziha Bibilia?, obe nivuru ntti niswa, Kajavo Egumi Yamukalakala! Manivuru aba otene ahakamihedha attu osunza ebaribari mwari mwa nsaka nipakiwani.
11. Ekalele nni yapama osunza venjene sabwa ya Yehova vina Bibilia?
11 Kahiye bahi anamasunza a Bibilia anfuna oja womuyani. Iyo notene ninofuna. Murumiwi Paulo ohileba dhahi: “Yoja yovadda, j’anddimuwa.” Paulo ohitapulelamo wi ovirihamo esile dhinsunzihu mBibiliani enonikamihedha “othiyaniha dhapama na dhabure.” (Aheb. 5:14) Okosa efunelo ya Mulugu ovanene elobo yorutxa vaddiddi sabwani attu enjene ovanene anodhowavi akosaga dhilobo dhonyakuwa. Mbwenye Yezu onodhowavi anitanalaga, anivahaga yoja yomuyani ennikamihedha odhowavi ovaddene mpaddi womuyani. Vina iyene onomulabihedha mwimeleli wororomeleya vina wamalago wi apide vina agawe oja womuyani ondela mBibiliani.
12. Dhahene ninga Yezu iyo ninttittimiha dhavi nzina na Mulugu?
12 Iyo ninfara yotagiha ya Yezu, nona ninonvaha Yehova nttittimiho notene nininfwanyelela. (Jo. 17:6, 26) Motagiha, yaka ya 1931 mowiwanana na Malebo paromilihu olabihedha nzina na Yehova, nikosile ejuwene sabwani ninomukwela vina ninfuna niziwiwe ninga Anamoona a Yehova. (Iza. 43:10-12) Oromana mweri wa Otuburu wa yakene ejile, nzina na Mulugu ninobudduwa va revistani na Mwang’aneli. Oku makapela mena aburutxagamo nzina na Mulugu mmaBibiliani mwawa iyo nihikamo nzina na Mulugu mu Tradução do Novo Mundo mmimburoni mwetemwene mwafwanyeya omaromo-wene.
YEZU ONOWASASANYEDHA ANAMAFWARA AYE
13. Txini enukuluveliha wi Yezu onimulabihedha “mwimeleli wororomeleya vina wamalago” masaka abano? (Joau 6:68)
13 Yezu ohimuttoma “mwimeleli wororomeleya vina wamalago,” wi nimetxe nikuru velaboni ya vati ninunuwiha webedha watxibarene. Oniwamo dhavi sabwa ya okosa mpaddi wa nikuru ntti? Txino weyo, onowubuwela mazu a murumiwi Pedro alogiliye na Yezu: “Nabuya, ninaye wa ani? Onna mazu andhana egumi yohimala, ddi nyuwo bahi.” (Jo. 6:68) Yezu onlabihedha nikuru na Yehova wi anivahe yoja yomuyani vina asogorhele mabasa olaleya. Ottiya ejo iyene ononikamihedha wabala ‘omuttu oswa’ obe okana mikalelo dha Okristu. Weyo onowodha wubuwela ogali weyo kohiziwa ebaribari?—Ef. 4:24.
14. Malago anakelihu munikuruni na Yehova mwari mwa eredda eji ya COVID-19 annikamihedha dhavi?
14 Yezu ononivaha malago anfunihu nigakala mmidhidhini dhorutxa. Eji ewoneya nsaka niromile eredda ya COVID-19. Oku attu enjene a mwilaboni ahiziwaga yokosa. Yezu ohinivaha malago ononeleyamo vina ohirutxa. Nihikokomeziwa wabala maskara nigakala mimburo muli attu owinjiva vina okalaga olapelana muttu na mukwaye. Anddimuwa a mmulogoni ahikokomeziwa wi aziwege enapadduwela anamalaleya a mmulogoni wi akwanihedhe dhojombeliwa dhawa mpaddi womaningoni vina womuyani. (Iza. 32:1, 2) Ninowakelavi miselu dhina vina ninopangarhaziwa na miselu dhiswa dha abali a Nikuru Nolamulela.
15. Malago gani anakelihu mwari mwa eredda eji ya COVID-19 a odhowavi nitugumanaga vina nizuzumelaga mabasa a olaleya nanda ninkaana dhopurelamo gani?
15 Mwari mwa eredda eji ya COVID-19 iyo vina nihakela malago anikamihedhile odhowavi nitugumanaga vina nidhowaga mmabasani a olaleya. Saddu, nihiroma wona matugumano a mmulogoni, a ttattamwa vina a murudda nilabihedhaga vidiyu-konferensia. Nihiroma vina olaleya nilabihedhaga makarta vina matelefoni. Nanda Yehova onodhowavi arurihaga mabasa aba a olaleya. Filiali dhina dhihiloga wi muttengo wa anamalaleya onodhowavi wunuwaga. Abali ena anokaana dhotagiha dhowagalaliha vaddiddi mwari mwa mudhidhi obu wa COVID-19.—Koona kasha “ Yehova Onoruriha Mabasa Ehu a Olaleya.”
16. Iyo ninfwanyela okana ebaribari gani?
16 Txino ena anowubuwela wi nikuru na Yehova ninottabwiya malago. Mbwenye ninodhowa nonaga wi malago anvaha nikuru nehu balitxi amakamaka. (Mt. 11:19) Nigobuwela mukalelo wokwela onsogorhela Yezu ninokana ebaribari wi masiki epadduwe elobo-elobovi musogorho, Yehova na Mwanaye anele okalavi na iyo.—Kengesa Ahebreu 13:5, 6.
17. Oniwamo dhavi sabwa ya olaba oku osogorheliwaga na Yezu?
17 Iyo ninowagalala sabwa ya okana Yezu ninga musogorheli wehu! Iyo ninokosa mpaddi wa nikuru nihina ogawana mpaddi wa yeddelo, elogelo vina dhilemelelo dhina. Iyo ninowakela oja womuyani vina ninowakela maswagiho annikamihedha ozuzumela mabasa a olaleya. Muttu-muttu wa iyo onosunzihiwa wabala mukalelo wa omuttu oswa vina ninosunza okwelana muttu na mukwaye. Kaninaganyedha wi ninowagalala sabwa ya okana Yezu ninga musogorheli wehu!
JIBO 16 Nimukokorele Yehova vina Mwanaye Yezu
^ Matxikwi na matxikwi a alobwana, ayana vina ayima anovingela mabasa a olaleya miselu dhapama. Weyo oli mmodha wa awene? Akala pumwenemo, weyo onlaba osogorheliwaga na Nabuya wehu Yezu Kristu. Mwari mwa nsunzo ntti, ninele osekeserha vizinddiyelo dhinoniha wi Yezu onosogorhela mabasa a olaleya masaka abano. Otanalela muselu obo onele onikamihedha odidelavi omulabela Yehova nisogorheliwaga na Kristu.
