1, 2. Ninlogela eni makani otamelana wapangarhaza abale ankubanya? (Koona foto eli omaromo.)

SUZI belaga: “Oromana labo nikwile mwanihu mpaka ovanene, dhivira vyaka dhinjene, mbwenye okubanyawa kummala.” Mbali dhahi okweliwe mwadhiye na rurumutxa ologa wila “maningo aga anoddipa sabwa yokubanya.” Mokubanya-mwene, attu enjene anopattiwa na dhilobo dhopa dhahene. Mmilogoni dha Akristu nsaka nttino, abali enjene na arogoraya, kajeedhela wawona amudhawa bagakwa Armageddo ahinatti ofiya. Txino ninowayelela attu okweleya mu okwani, obe ninowawona attu bagonla sabwa y’okweliwa mmudhawa. Akala pumwenemo, kavivuze, ‘Muttu onunla ofwanya dhavi nipangarhazo?’

² Attu eena anloga wila mudhidhi onowodha ovoliha makwadda. Koddi eji ebaribari? Mamukwela dhahi ologa, “Ddinoziveliwaga ologa wi dhinkosihu mwari mwa  mudhidhi dhinonikamihedha ovoliha makwaddaya.” Nikwadda nili va nningoni, ninofuna mudhidhi mwinjene wila nivole. Mwakakene, ninofuna mudhidhi wila niwodhe ovoliha makwadda opa vaddiddi a muyubuweloni. Txini enawodhe wakamihedha abale anunla sabwa ya makattamiho a muyubuweloni?

3, 4. Ninrumelela nni wila Yehova onononelamo okubanya wehu?

³ Babi wehu wa ttagaraga, Yehova, ddi muttu onwodha onivaha nipangarhazo ninfunihu. (Kengesa 2 Korinto 1:3, 4.) Iyene yotagiha enddimuwa ya muttu wa ttagaraga, vina ologa dhahi na nlogo naye: “Ddi miyo-wene onupangarhaza weyo.”—Izaiya 51:12; Masalmo 119:50, 52, 76.

⁴ Babi wehu wokwela ohona opa sabwa ya wayelela mu okwani emeleli aye ororomeleya, Abramu, Izaki, Jakobi, Mizé, na Mwene Davidi. (Olebeliwa 12:6-8; Mateu 22:31, 32; Merelo 13:22) Bibilia onolagiha wi Yehova onojeedhela nosanzaya labo ninfuniye wavenyiha mu okwani attuya abo. (Job 14:14, 15) Nsaka nene-ntto awene anele ojavo egumi ya mukalakala. Yehova ohiwa opa sabwa ya okwa wa mwanaye muttajiya. Bibilia onloga wila Yezu wali oddule “watota oziveliwa waye.” (Gano 8:22, 30) Kaninwodha wubuwela opa wana Yehova vamoniye mwanaye bagakwa na goyi.—Joau 5:20; 10:17.

5, 6. Yehova onnipangarhaza dhavi?

⁵ Nikana ebaribari yawi Yehova onele onikamihedha. Nimulobege Yehova malabo otene vina nimpange goi dhehu. Johagalaliha oziwa wi Yehova onowona okubanya wehu vina onele onivaha nipangarhazo ninfunihu! Iyene onkosa dhavi esodha?

⁶ Yehova onolabihedha muya waye wokoddela wi anipangarhaze. (Merelo 9:31) Yezu wahiloga wi Babi wehu agahavaha muya wokoddela abale etene ankumbirha. (Luka 11:13) Suzi ologiwe omaromo ohenjedhedha eraga: “Dila dhinjene nankokora nimukumbirhaga Yehova wi anipangarhaze. Dila dhotene murenddele wa Mulugu wankoya mirima na mobuwelo ehu.”—Kengesa Filipi 4:6, 7.

7, 8. Ninkaana dhavi ebaribari yawi Yezu onele onipangarhaza?

⁷ Yezu bali velaboni ya vati, otagiha kakamwe mikalelo dha Babe, odheela merelo na malogelo aye. (Joau 5:19) Yehova omuruma mwanaye velaboni ya vati wila avolihe “mirima dhosuveya” vina  abale “anunla.” (Izaiya 61:1, 2; Luka 4:17-21) Attu anziwa wi Yezu wantanala goyi dhawa vina wanfuna-wene wakamihedha.—Ahebreu 2:17.

⁸ Yezu valiye muzombwe, mohaganyedha ohayelela akwaye obe amudhaye mu okwani. José babi wa Yezu womaningoni okwile Yezuya bali muzombwe. * (Koona yowenjedha.) Kobuwela opa wooniye vina wafuniye ovilela, goyi yaye, okubanya wa mamayaye vina abali aye.

9. Yezu olagihile dhavi ttagaraga mukwele Lázaro?

⁹ Mudhidhi waye wolaleya, Yezu walagiha wila wannonelamo goyi dha attu, nanda wanakanela ttagaraga. Motagiha, mukweli Lázaro, Yezu wahoona wi Maria na Marta antabuwa sabwa ya okubanya. Iyene wahikubanya vaddiddi ofiyedha wunla, masiki vaziwiye wila agahinvenyiha Lázaro mu okwani.—Joau 11:33-36.

10. Ninrumelela nni wila Yezu onononelamo goyi dhehu ovanene?

¹⁰ Opangarhaza okosile Yezu masaka a wale onnilibiha dhavi ovanene? Bibilia onolagiha wi Yezu kasadduwile. Iyene belaga: “Yezu Kristu kansadduwa: ddwakene wa nzilo, wa ddabuno, wa masaka otene.” (Ahebreu 13:8) Iyene ddili “mwinya wa egumi” sabwa ddi iyene onivahile gari yokalawo na mukalakala. Yezu onoziwa opa wa goyi noona “onowodha wakamyedha anehiwa, vowi iyene vina ovira muwehiwani, mutabuwani.” (Merelo 3:15; Ahebreu 2:10, 18) N’eji ninowodha ologa wila Yezu onowona opa agawoona attu akubanyaga. Onononelamo goyi dhawa vina okana ewodhelo ya wavaha nipangarhazo “mudhidhi wa segedho.”—Kengesa Ahebreu 4:15, 16.

11. Epaddi gani ya malebo enupangarhaza?

¹¹ Muselu onloga okubanya wakubanyile Yezu sabwa ya okwa wa Lázaro, epaddi ya malebo ennipangarhaza vaddiddi eli Mmazuni a Mulugu. Muselu obo kayo rurumutxa sabwa “dhetene dhilebiwe m’Bibiliani, dhilebeliwé onisunziha, olibiha nroromelo nehu na guru, na ntidi, dhindhamo.” (Roma 15:4) Akala weyo onokubanya podi ofwanya nipangarhazo mmaleboni ninga aba:

• “Nabuya onoawaddamela ansuveya murima, onowalibiha anojeya.”—Masalmo 34:18, 19.

• “Vanthabwa miyo odhugudheya, opangaraza wenyu oddiridhiha murima.”—Masalmo 94:19.

• “Nabuyehu Yezu Kristu okala waye, Mulugu Babihu, onikwele na nthebwa naye, onivahile nipangarhazo nindhowavi na ororomela onddimuwa, alibihe mirima dhenyu, awakwanihedheni wira, ologa dhetedhene dhili dhapama.”—2 Tesalónika 2:16, 17. *—Koona yowenjedha.

12. Ninawodhe dhavi wapangarhaza attu eena?

¹² Dila dhina muttu onunla onofwanyaga nipangarhazo mmulogoni mwa Okristu. (Kengesa 1 Tesalónika 5:11.) Onawodhe dhavi omulibiha vina ompangarhaza muttu onunla sabwa ya “oribiwa murima”? (Gano 17:22) Kudduwale wila nikalawo “nsaka n’omala, nsaka n’ologa.” (Kohelét 3:7) Mamukwela dhahi oniliwa Dalene ologa wi abale ankubanya, anofwanyela ologa dhubuwelo dhawa na etanaalelo enakubanyiha. Mbwenye elobo yamakamakaya yokosa ku wavuruwana n’ofwasa, s’owagwaddela makani. Junia, mbalaye ovihogile bakwa, ologa, “Masiki ohiziwaga mowakwana opa onoona amamukwelaya, yaderetuya jofuna oziwa monelo wawa.”

13. Txini enfanyeelihu wubuwela sabwa ya okubanya?

¹³ Japama ononelamo yawi mukubanyelo na mobuwelo a muttu-muttu anottiyana. Dila dhina enorutxa ologa opa onoonihu. Nzu na Mulugu ninloga: “Murima onoziwa goyi dhaye, mwina kan’ya muthabani mwaye.” (Gano 14:10) Mudhidhi mwina, masiki muttu aloge mukubanyelo onkubanyiye, anorutxa attu eena ononelamo goyidhá.

14. Ninaloge eni wila napangarhaze anunla?

¹⁴ Masaka meena ninorutxiwaga ologa mazu ompangarhazana muttu onkubanya. Mbwenye Bibilia onologa wi “mazu a aziwetxi anodha ovoliha makwaddayá.” (Gano 12:18) Attu enjene afwanya mazu ompangarhazana muttu onkubanya mbrochurani Agakwa Oddule Onimukweliwe. * (Koona yowenjedha.) Elobo yina txino enakosiwe, ku ovirihamo mazu anloga “onlaní na abale anunla.” (Roma 12:15) Gabriela okweliwe mamunaye ologa wi mudhidhi mwila elobo yaderetu y’okosa, wunla bahi. Ohenjedhedha viina “Akwaga agonlaga na miyo, ddinopangarhazeya. Mudhidhene-obo ddinowoona wila kaddili meka mmasosoni mwaga.”

15. Nigarutxiwa ologa nanya ninawodhe dhavi wapangaraza atu eena? (Koona kaxa enloga “ Mazu Meena opangarhaza.”)

¹⁵ Akala onowubuwela wila enowurutxa ologa mazu opangarhaza, weyo podi omulebela muttuya muselu obe onvahedha karta na mazu olibiha. Osakule nlebo nimodha nolibiha, ologa yamuziveletxa okosa marafulaya obe elobo yina yohagalaliha. Junia ologiwe belaga “ottambirha muselu wolibiha, obe owobiwa wila ddaredhe n’akwaga o Kristu, onoddagalaliha.” Ologa vina wila “Dhilobo ninga esuwene, dhinolibiha vina  opangarhaza, sabwa ddinowoona wila akwagayá anoddikwela vina oddilibiha.”

16. Mukalelo wapamaya wowapangarhazana attu buvi?

¹⁶ Malobelo ehu, anowakamihedha abali na arogora enjene anunla. Iyo podi walobelela awene obe olobela vamodha na awene. Txino mudhidhi mwina muttu onowoona wila kanwodha ologa mowakwana, mbwenye kobuwela wi malobelo awo akaana guru dholibiha. Dalene ologa “dila dhina arogora agadha wila addipangarhaze ddinowavuzaga akala anofuna olobela na miyo. Awene anoroma olobela mudhidhi mwina asisimedhaga, mbwenye na Mazu mang’onovi anoliba agamala okosa nlobelo nopangarhaza-wene. Nroromelo nawa, okwela vina oddizuzumela wawa onolibiha nroromelo naga.”

17-19. Ekalelini yaderetu wapangarhazavi attu?

¹⁷ Enorutxa oziwa mudhidhi ommala muttu bagakubanyavi. Agakwa mmudhehu, voroma amarho enjene anodhaga wila anipangarhaze. Mbwenye attuya agamala wiyelela mmawani mwawa, muttu onkubanya onohala afunagavi nikamihedho na nipangarhazo. Nona japama okala womala na wale wi nakamihedhe. “Mukwawo-mukwawo, ddule oniwanana na weyo midhidhi dhetedhene; nsaka n’osegedheya akalá mmudhawo.” (Gano 17:17) Ninofuna-wene wapangarhaza anunla mwari mwa mudhidhi onakale  awene na iyo.—Kengesa 1 Tesalónika 3:7.

¹⁸ Kobuwela wila muttu-muttu podi oroma okubanya mudhidhi-mudhidhivi. Ejo dila dhina entoteya sabwa ya otanalela dhilobo dhamuzivela marafulaya ninga muzika, mafoto, mabasa, lizu obe nsaka na vayakani. Akala mamukwelaya onoroma okosa elobo yahalemeliye okosa yeka ninga wona matugumano, txino podi ohiwodha ovilela. Mbali dhahi ologa: Vowi mwadhaga ohikwa, “ddahoona wila labo nafunimi wakwaniha yaka ya matelo nigaali siku noridhela vaddiddi.” “Mbwenye wila ddihikale meka, abali na arogora enjene, ahilaganela odhowa weedda na miyo oku addipangarhazaga.”

¹⁹ Kobuwela yawi enfunetxa muttu onkubanya kahiyo ovira mudhidhivi na iyene obe omuwobela omattangani, mbwenye nipangarhazo. Junia ologa wili: “Omarho na nikamihedho ninakela muttuya s’ohikala labo na wakwaniha vyaka obe labo namakamaka elobo yapama.” “Mudhidhi ninga obuwene, bwa deretu vina onovaha nipangarhazo nofwanyela wa amamukwelaya.” Ebaribariya jawi kaninawodhe wadduwaliha kakamwe okubanya wawa, mbwenye ninele owodha wavaha nikamihedho na nipangarhazo ninfunani. (1 Joau 3:18) Gabriela ologa vina: “Ddinomutamaalela Yehova, oddivahile anddimuwa a mulogo, addikamihedhile okwaranya makattamiho aga na mikalelo dhottiyana-ttiyana. Addilibiha woona wila ddi Yehova waddikubatta na myono dhaye.”

20. Dholibela dha Yehova dhikaleli dhavi niparha na nipangarhazo?

²⁰ Johagalaliha oziwa wi Yehova, Mulugu wa nipangarhazo, onele ogomiha makattamiho etene nsaka na ovenyihiwa mu okwani. (Joau 5:28, 29) Mulugu olibela eraga “onele ogomiha mugomihedho okwa, Nabuya Mulugu onere okuputha mintori mmentoni mwa athu otene.” (Izaiya 25:8) Mudhidhi obu, ottiya ologa “onlaní na abale anunla” ninaloge “thabaní na abale anthaba.”—Roma 12:15.