1, 2. Elabo ya ovanene edhalelini attu oyelega dhahene?

MASAKA abano, elabo edhaala marhondda abure vina ohiligana. Motagiha, enorutxa azombwe enjene ofwanya ganyo. Attu ena anowika egumi yawa vangovini sabwa ya omwalela dhilabo dhina wi atamele mukalelo w’ovisapela. Masiki dhilabo dhina bamuli areeli, mukala vina ayelegi. Orugunuwa elabo yotene, areeli anottabwa orelawa, oku ayelegi attabwaga oyelegawá. Mowiwanana na opepesa okosiwe, muttengo wa attu pursento 1 wa areeli, ovanene anele ottabwa orelawa opitta kobiri dha attu mapursento 99. Oku attu ena banavi kobiri enakamihedha okalawo vyaka dhinjene, attu eena anowunla na mayelego. Yezu wahiziwa ejuwene valogiye eraga: “Ayelegi analoginyu, anohalavi na nyuwo.” (Marko 14:7) Onkalelawo nni oyelega dhahene?

² Yezu wanziwa wila Omwene wa Mulugu bahi bunawodhe osaddula elabo ejino edhalile marhondda otakala. Bibilia onologa wila “anyampinddu” obe elabo edhalile marhondda, alamuleli na marelijiau onyengetta anokosa mpaddi wa elabo ya Satana. (Ovuhulela 18:3) Attu a nlogo na Mulugu anowodha okala wolapela na politika, vina relijiau yonyengetta. Eji  egalivi, attu enjene animulaba Mulugu kanwodhetxa ovisugula mwa marhondda aba ankosa epaddi ya elabo ya Satana.

3. Mavuzo gani anfunihu wakula ovanene?

³ Akristu anofuniwana wang’anela mweddelo wawa mowiwanana na elabo ejino ya mpinddu. Nona japama muttu-muttu ovivuza: ‘Ddinalabihedhe dhavi dhokaana dhaga wila ddilibihe omarho waga na Mulugu? Ddirabele dhavi elabo ejino ya marhondda otakala? Txini enlagiha wila nlogo na Mulugu ninomukuluvela Muluguyá?’

4, 5. (a) Txini yampadduweli mwimeleli wamulogile Yezu? (b) Yezu walogile wila arumiwi aye akose eni?

⁴ Kengesa Luka 16:1-9. Musibo walogile Yezu wa mwimeleli wopela malago, ononikosiha iyo notene wimela wi nitanaalele. Mwimeleliya wahimageedhiwa ononga muhaku, nanda fumu waye bagafuna omuttiyiha ganyo. * (Koona yowenjedha.) Mwimeleli oddu walabihedhile ‘mirugu dhapama.’ Ahinatti ottiyiwa mabasaya, iyene wahikosa mandano n’attu agadhile omukamihedha musogorho-mwa. Yezu alogaga musibo obu, kayo wila wafuna anamafwara aye akose yakakene obe akaane merelo opuja ninga akosile mwimeleli oddule. Eso ankosa attu a elabo. Ottiya eji, Yezu waloga nipadduwo ntti wila asunzihe elobo yamakamaka.

⁵ Yezu wanziwa wila dhahene ninga mwimeleli oddule wafanyiwe rurumutxa na makattamiho, anamafwara enjene a Yezu, agahikaana makattamiho a mwigumini, mwilaboni ejino yabure. Noona wahawaddela dhahi: “Na dhorela dha mwilaboni mpuno movirigana, puranina okana akwinyu, wi awakeleni, muhaku wenyu ogamala.” Sabwa yani? Sabwani muhaku ogamala amarho abo Yehova na Yezu anele ‘onakela wi anivahe okalawo wohigoma.’ Ninsunzavo nni na nlago ntti na Yezu?

6. Ninziwa dhavi wila elabo ya marondda ya nsaka nttino kinkosa epaddi ya efunelo ya Mulugu?

⁶ Masiki Yezu vakooddiliye otapulelamo sabwa yakuweliye dhorela dha elabo wila ‘sovirigana’, Bibilia onolagiha wi otameletxa vopitta kobiri kunkosa epaddi ya efunelo ya Mulugu. Motagiha, n’okwela Yehova wahavaha Adamu na Eva dhilobo dhinjene dhafunani, mmundda mwa Edeni. (Wita 2:15, 16) Musogorhomwa, Mulugu mwavaheliye muya wokoddela attikitteliwi, “kàlimo muthu wana yaye, àloga: jagene; dhana muthu dhakala dha etene.” (Merelo 4:32) Namavuhulela Izaiya wahiloga wila ninele ofiya nsaka ninajehu n’ofuru dhetene dhinbala elabo ya vati. (Izaiya 25:6-9; 65:21, 22) Mbwenye mpaka nsaka-nene ntto, anamafwara a Yezu anofuna ‘enonelo yapama.’ Awene anofuna okalawo alabihedhaga dhorela dhovirigana dha elabo, oku akosaga kukuttu wi amuhagalalihe Mulugu.

7. Malago gani anivahile Yezu va Luka 16:10-13?

⁷ Kengesa Luka 16:10-13. Mwimeli wa musibo wa Yezu, wakosile omarho n’attu agamukamihedhile musogorho. N’eji, Yezu wafuna anamafwara aye akose omarho wirimu na efunelo yakakene ya okamihedhiwa.  Wafuna anonihe wi olabihedha wehu dhorela onolagiha akala ninomukuluvela Mulugu obe nne. Koddi ninakose dhavi ejoya?

8, 9. Kaloga dhotagiha dhinlagiha wi attu eena anolabihedha mowakwana dhorela dhawa.

⁸ Marhe olagiha wila ninomukuluvela Mulugu na dhorela dhehu, ku okosa nvaho wila nikamihedhe mabasa a olaleya ankosiwa orugunuwa elabo yotene ninga mulogeli Yezu. (Mateu 24:14) Namwali dhahi w’o India wahikosa kaxa eng’ono yekiyemo kobiri dha mujila. Namwali oddu wahittiya ogula dhilobo dhamuzivela ovegana. Kashaya mudhalelani, iyene ottukula kobiri dhetene bakosa nvaho wila akamihedhe mabasa a olaleya. Mbali dhahi w’o India onna nddebe na minazi. Iyene wattukulile koko bavahedha abali anlaba mabasa otapulela o Malayalam. Sabwa yawila anamatapulelaya anofuna koko, iyene wahoona wila nvaho waye kwa ttima vaddiddi opitta ovahedha kobiri. Esi ‘mirugu dhapama.’ Moligana, abali o Grécia anowavaha anamudhi o Betel, makura a olivera, keju na dhilobo dhina dhoja.

⁹ Mbali mwina w’o Sri Lanka, ovaha nddebe naye wila nikale mburo wa matugumano vina numba dha abali ali mmabasani a mudhidhi wotene. Obu mvaho munddimuwa okosiliye, nanda anamalaleya etene atamaalela nikamihedho ntto sabwa anorameyeliwa kobiri. Mwilaboni munkoddihiwa mabasa a olaleya, abali anolabihedha numba dhawa ninga mburo wa matugumano. Eji ehakamihedha anamalaleya enjene vina apionero ahinwodha okaana kobiri okaana mburo wa matugumano.

10. Ovaha na murima wotene onnipuriha nni?

¹⁰ Dhotagiha esi dhinolagiha wila nlogo na Mulugu attu ‘anroromeleyana masiki na dhilobo dhing’ono.’ (Luka 16:10) Anolabihedha dhokaana dhawa wila akamihedhena attu ena. Amarho aba a Mulugu anoonamo dhavi agakosaga mivaho esi? Awene anohagalala oziwa wi sabwa yokala anamavaha, anowakela “muhaku-muhakuyá” wirimu. (Luka 16:11) Murogora dhahi onvahetxa kobiri wila akamihedhena mabasa a Omwene, ologa wila sabwa yokala namavaha na murima, dhinopadduwaga dhilobo dhahajedhiye. Otapulela eraga: “Mudhidhi onubuwela miyo okala namavaha na murimaga wotene, panonimi wila okwela waga onowunuwavi. Ddili wotapuwa wi ddikale wokurumuwa, vina walevelela attu eena, onyimuliwa vina wiwa mirugu dh’attu eena.” Attu enjene anopurelamo vaddiddi okala anamavaha na murima wotene.—Masalmo 112:5; Gano 22:9.

11. (a) Ovaha wehu na murima onlagiha dhavi ‘mirugu dhapama’? (b) Txini enpadduwa na attu a nlogo na Mulugu masaka abano? (Koona foto eli omaromo.)

 ¹¹ Ninolagiha ‘mirugu dhapama’ nigalabihedha dhokaana dhehu wila nakamihedhe attu mmalaleyoni. Masiki akala kaninwodha okala mmabasani a mudhidhi wotene, obe omwalela wego onjombeliwa anamalaleya, ninofunavi wakamihedha attu ena. (Gano 19:17) Motagiha, nvaho onkosihu, onokamihedha opakiwana manivuru menjene vina mabasa olaleya mu dhilaboni dhina muli oyelega, nanda mukala attu anfuna osunza ebaribari. Dhilabo ninga Congo, Madagascar na Ruanda, muttengo ongulihiwa Bibilia ohinjiva vaddiddi. Mudhidhi mwina muttengo wa kobiri y’omugulana Bibilia mmodha enofiyedha korowa anakela muttu olabile mweri wantero. Dila dhina abali anosakula akala agule yoja ya murala obe amugule Bibilia. Mbwenye sabwa ya nvaho wa attu ena na ogawiwa ‘woliganihiwa’ onkosiwa, nlogo na Yehova ninomutapulela vina ompaka Bibilia wohikaana muttengo wi anamudhi a murala otaganyiheya na anamasunza Bibilia akaane kadda muttu waye-waye. (Kengesa 2 Korinto 8:13-15.) N’eji, abale anvaha obe anakela nvahoya akaana gari y’okala amarho a Yehova.

12. Abramu olagihile dhavi wila wannimuroromela Mulugu?

¹² Ninele okala amarho a Yehova nigazuzumela vaddiddi otamela “muhaku-muhakuyá” ottiya otameletxa dhorela dh’elabo ejino ya marhondda. Jijene yakosile mulobwana wa nroromelo, Abramu. Iyene wahirumeela ottiya numba yaye mu kwatti ya Ur, badhowa okala mmusasani sabwa wanfuna okalavi marho wa Yehova. (Ahebreu 11:8-10) Ottiya okuluvela dhorela dhaniye, iyene wamukuluvela kakamwe Yehova. (Wita 14:22, 23) Yezu wahakokomeza attu okaana nroromelo noligana. Labo dhahi wahiloga na muzombwe wa mureli: “Ogafuna okala wawakwana, dhowa wagulihe dhetene dhinna weyo, kobiridhá wagawele ahawi. Dhawene onokana muhaku wirimu; ngamala, odhe, oddifware.” (Mateu 19:21) Muzombwe oddu kaana nroromelo ninga naana Abramu. Masiki dhawene wahikala attu amukuluvela Mulugu.

13. (a) Paulo wanvahile malago gani Timóteo? (b) Masaka abano ninavirihemo dhavi malago a Paulo?

¹³ Timóteo wali mulobwana wa nroromelo. Mmaleli Paulo omukuwela Timóteo ninga “munyakoddo wororomeleya wa Yezu Kristu”, wahenjedhedha eraga: “Ole oli okóddoni, agafuna omuziveliha munddimuwa waye, kanzuzumela mabasa mena.” (2 Timóteo 2:3, 4) Anamafwara a Yezu a nsaka nttino, otaganyiheya na attu matxikwi menjene ankosa mabasa a mudhidhi wotene, anokosa guru wila avirihemo malago aba alogile Paulo. Awene anorabela  okwekwetteliwa dha manyengetto a elabo ejino. Anowubuwela malago anloga: “Mureli onowaddodda ayelegi; muliba oboleyiha onomwira mukwaye mudhari.” (Gano 22:7) Satana onfuna wila nnongele vayovi mudhidhi na guru dhehu nilabelaga elabo yaye ya marhondda. Enaya anokosa mangawu a muttengo munddimuwa wila agulena numba, karo, apitxele masunzo manddimuwa obe akosena mattanga a matelo. Nigahikale pasope ninele okana mangawu ahinawodhihu opitxa mwari mwa vyaka dhinjene. Ninele olagiha mirugu nigavevutxa egumi yehu, orabela mangawu vina ohagalala na kobiri eng’onovi enkanihu. Nigakosa dhawene ninele okala womala na wale wi nimulabe Yehova ottiya ozuzumela dhorela dha elabo epibeyile na mpinddu.—1 Timóteo 6:10.

14. Txini eganile weyo okosa? Katagiha.

¹⁴ Nigafuna ovevutxa egumi yehu, japama wika Omwene wa Mulugu vamburoni voroma. Wahikala atelani dhahi akosa marhondda a kobiri gwé. Masiki dhawene anfuna vina wiyelela mabasa a mudhidhi wotene. Nona awene ahubuwela ottiya marhondda awa, paporo waana awene na dhilobo dhina. Mmalelani ahidhowa okamihedha mabasa omaga katti ya Anamoona a Yehova o Warwick, Nova Iorque. Ejo yali yohagalaliha mwa awene sabwa mudhowelani okamihedha o Betel, ahilaba na mwanawa wa muyana na mamunaye vamodha na amambali a mwasano wawa. Murogora dhahi w’o Colorado wa Amerika, walaba mbanko. Patarau waye wahiziveliwa vaddiddi na mabasa akosiye noona wahinvaha gari yina wi enjedhedhe muhaku waye. Moneliye wila mabasa abo kagamuttiyedhi mudhidhi wodhowa olaleya, iyene wahikoodda. Esi dhotagiha dhing’onovi dhinkosa emeleli a Yehova nsaka nttino. Nigagana wika Omwene wa Mulugu vamburoni voroma, ninolagiha wila ninowika ttima omarho wehu na Yehova, vina ninotamela dhorela dhomuyani dhimpitta dhilobo dhomaningoni.

15. Dhorela gani dhindana ohagalala onddimuwa?

¹⁵ Okaana dhorela dhomaningoni kintapulela orumeliwa na Mulugu. Yehova onowattuva abale anrela “na mabasa ofwanyela.” (Kengesa 1 Timóteo 6:17-19.) Motagiha murogora dhahi oniliwa Lucia wahiwa wila o Albania wanfuneya anamalaleya a Omwene. * (Koona yowenjedha.) Nona yaka ya 1993 ohimwala w’Italia badhowa o Albania. Nfiyeliye kaana ganyo, mbwenye wankuluvela wila Yehova agahimukamihedha. Iyene wahisunza elogelo y’o Albania, nanda wahakamihedha attu owakwana 60 mpaka ofiyedha obatiziwa. Txino podi ohikana dhopurelamo dhakakene nigalaleyaga mwilaboni mwehu. Mbwenye elobo-txilobo enkosa iyo wila nakamihedhe attu eena osunza ebaribari sabwa ya Yehova vina okala amarho aye, eli ninga okoya nifumo wirimu.

16. (a) Txini enapadduwe na elabo ejino ya marhondda? (b) Monelo wehu na dhorela dhomaningoni ompatteya dhavi?

¹⁶ Yezu ologa wila elabo ejino ya marhondda enele ogoma. Iyene walogile: ‘Muhaku ogamala,’ ottiya wila ‘akala onomala.’ (Luka 16:9) Masaka abano omariha, banko  dhinjene dhinofugiwa, dhilabo dhina dhikaana makattamiho na kobiri. Mbwenye musogorho-mpo dhilobo dhinele ottabwa. Asogorheli a politika vina relijiau ali epaddi ya elabo ya Satana, anele ogwa. Anamavuhulela Ezekiyel, na Sofoniya ahittaga ologa wila nddarhama na parata dhaziveletxa anyamarhondda, dhigali dhilobo dhohikaana ttima. (Ezekiyel 7:19; Sofoniya 1:18) Nigonilemo dhavi kofiya omagomo nanda niziwa wila nihinonga mudhidhi wehu mwinjene nitamelaga dhorela dha elabo ejino yotakala, ottiya otamela mafumo ebaribari? Egali ninga muttu olabile vyaka dhinjene ajeedhaga ottambirha kobiri dhinji nanda oziwa wila kobiridha kahiyo dha txibarene. (Gano 18:11) Dhorela dha elabo ejino dhinele ogoma. Noona kaniyelele mudhidhi na gari yolabihedha dhokaana dhehu wi nilibihe omarho wehu wirimu. Dhetene dhinimukosela iyo Yehova na Omwene waye ovanene, dhinele onivaha osanzaya webaribari.

17, 18. Txini enjeedhela ojavo amarho a Mulugu?

¹⁷ Omwene wa Mulugu ogadha, kawo muttu onapitxege mangawu obe ofiyari. Yoja enele okala gwé, kawo onagulihege, kaninatamele mirobwe nne vina adotoro. Amarho etene a Yehova anele ojavo kakamwe misapo dhitxeyilani. Nddarhama na parata dhinele olabihedhiwa wi nikoddelihe numba yehu, ottiya oguliha wi attu akale areeli. Myarha dhong’animela, miri dhovadda vamodha na dhilobo dhina dhaderetu kadhinagulihiwe sabwa ninele omagana numba dhehu dhokoddela. Akwehu anele onikamihedha, sabwa jijuwene enfunani, ottiya wila napitxelege muhaku. Ninele ojavo vina ogawelana dhilobo dhetene dhinakalewo.

¹⁸ Eji yottambirha eng’onoya vina yoligana ya abale ammaga omarho wirimu. Abale animwebedha Yehova velaboni ya vati anele ottaba vanamwiwani Yezu alogaga: “Dhaunoni nyuwo mukoddelihiwe na Babaga, akelaní Omwene okoyeliwenyu ovenyana omaromelo wa elabo.”—Mateu 25:34.