1. Ninlogelani wila Yehova mwinya wa dhotedhene? (Koona foto eli omaromo.)

YEHOVA ddittanddile dhetene! Ddiyene oli “mwinya wa odhulu, wolapawá, mwinya wa elabo na dhetedhene dhilimo.” (Olibiha 10:14; Ovuhulela 4:11) Vowi ddiyene wattanddile attu etene, noona iyo nili aye. (Masalmo 100:3) Ovenyana mundduni, Mulugu ohasakula attu wi akale nlogo naye notxena.

2. Modhela Bibilia, nikuru gani na attu nili nihimo nosakuliwa?

² Motagiha, Masalmo 135 onologa wila alabeli a Yehova awale ororomeleya ana Izrayel nali ‘nlogo naye.’ (Masalmo 135:4) Nivuru na Ozeya nahiloga wila masiki abale ahili Ayuda anele okosa epaddi ya nlogo na Yehova. (Ozeya 2:23) Nivuhulona ntti nakwanihedheyile mudhidhi wasakulile Yehova attu ahali Ayuda wi alamulele wirimu na Kristu. (Merelo 10:45; Roma 9:23-26) ‘Nlogo ntti nokoddela’ ali Akristu  osakuliwa ankuweliwa ‘nihimo nosakuliwa.’ Awene ‘nlogo navawoka’ na Yehova. (1 Pedro 2:9, 10) Kito Akristu abale ana njedhelo nokala velaboni ya vati? Yehova onowakuwela wi tti “nlogo naga” vina ‘asakuliwi aga.’—Izaiya 65:22.

3. (a) Nsaka nttino bani onkosa epaddi ya nlogo navawoka na Yehova? (b) Elobo gani enasekeserhe iyo mwari mwa mutoma obu?

³ Ovano, ‘nikuru ning’ono’ ninadhowe okalaga wirimu vamodha na ‘mabila meena’ ana njedhelo na okala velaboni ya vati, otene aba ‘gatta modha.’ (Luka 12:32; Joau 10:16) Ninfuna nilagihe ntamalelo nehu wa Yehova sabwa yokaana mandano ofiyedhana na iyene. Mwari mwa mutoma obu, ninele osekeserha mikalelo dha otonyihedha ntamalelo sabwa ya nttittimiho ntti navawoka.

4. Ninawodhe dhavi omutamaalela Yehova modhela otamela wandana na iyene, Yezu okosile elobogani yoligana?

⁴ Mukalelo wa olagiha ntamaalelo nehu wa Yehova bwa omperekela egumi yehu nanda nibatiziwa. Nigakosa ejuwene attu otene anele oziwa wi nili a Yehova vina ninofuna okosa efunelo yaye. (Ahebreu 12:9) Yezu ohikosa yakene mudhidhi obatiziwiye, iyene wabaliwe mwari mwa nlogo naviperekile wa Yehova. Masiki egali dhawene iyene wahiperheka egumi yaye. Yali ninga waloga wi: ‘Ddihisakula okosa efunelo yenyu.’​—Masalmo 40:7, 8.

5, 6. (a) Yehova ologile elobo gani mmoneliye mwanaye Yezu abatiziwaga? (b) Yotagiha eji ennikamihedha dhavi ononelamo mukalelo oniwamo Yehova nigamperhekela egumi yehu?

⁵ Yehova wewilemo dhavi obatizu wa Yezu? Bibilia onloga wi: “Yezu vamaliliye obatiziwa, ovaddela. Venevo erimu efuguwa; iyene omona Muya wa Mulugu ammorelaga vamusorho n’ekalelo ya kangayiwa. Nihiweya nzu nadha odhulu naloga: ‘Oddu ddi mwanaga wa vamurimani vaga; mwa iyene puli odhiveliwa waga.’” (Mateu 3:16, 17) Yezu wahivittiya weddihiwa na Mulugu ninga Nabuya waye. Yehova wahagalala vaddiddi sabwa ya Yezu olabihedha egumi yaye amulabaga Iyene. Mulugu onoziveliwa akala iyo ninoperheka egumi yehu wa iyene, nanda onogana onivaha mareliho.​—Masalmo 149:4.

⁶ Yehova ohinivaha dhilobo dhotene! Kito iyo ninanvahe eni? Kobuwela mulobwana dhahi olima mundda wa marhuwa okoddela. Labo nimodha mwanaye a mwanamwiyana ohapavo maruwa okoddela onvaha. Eji enlagiha wi mwanayeya onomukwela vaddiddi. Babi oddu onele woona maruwa abale amuhapeli mwaye okala a ttima vaddiddi opitta abale meena ali mmunddani. Na mukalelo woligana, Yehova onotamaalela vaddiddi nigamperhekela egumi yehu.​—Obudduwa 34:14.

7. Malakiya onnikamihedha dhavi ononelamo mukalelo oniwamo Yehova wa abale anzivelia okosa efunelo yaye?

⁷ Kengesa Malakiya 3:16. Koddi elobo yamakamaka-wene omperhekela egumi yehu Yehova? Ebaribari yawi ovenyana labo nibaaliwe weyo, egumi yawo mwinya ddi Yehova odduwene oli muttanddi wa dhigumi dhotene. Mbwenyi ogaviperhekela Yehova, venevo onowoniha wi onomurumeela ninga Mwene vina ohisakula okosa efunelo yaye, iyene onele ohagalala  venjene! (Gano 23:15) Yehova onowaziwa abale anfuna operheka egumi yawa wa iyene nanda onowalebela attu abo ‘munivuruni na wubuweliwa.’

8, 9. Elobo gani entamela Yehova wa abale anfuna wi mazina awa alebiwe ‘munivuruni na wubuweliwa’?

⁸ Vahikala elobo enfwanyela iyo okosa akala ninofuna wi Yehova alebe mazina ehu ‘munivuruni na wubuweliwa.’ Malakiya ologa wi muttu-muttu amove Yehova vina atamele osamela nzina naye. Akala muttu onoroma webedha elobo yina, nzina naye ninofudhiwamo munivuruni na wubuweliwa!​—Obudduwa 32:33; Masalmo 69:28.

⁹ Ologavi bahi wi onofuna okosa enufenelo ya Yehova ogamala bubatiziwa kinakwana. Eji elobo enwodha iyo okosa mwari mwa mudhidhi mung’onovi, omwebedha Yehova onokosa epaddi ya egumi yehu yotene. Malabo otene mweddihedho wa egumi yehu mwari mwa yubuwelo na mabasa ankosihu enottonyihedha wi ninomwiwelela Yehova.—1 Pedro 4:1, 2.

10. Ottiyana gani onfwanyela woneya mwa abale animulabela Mulugu na abale ahinimulabela?

¹⁰ Mutoma ovirile, nihisunza dhotagiha dha Kayini, Salomau na nlogo na Izrayel, aweneya anloga wi animulabela Yehova mbwenye merelo awa katonyihedha wi anoweddeyana na iyene. Dhotagiha dhawa dhihoniha wi ologavi ddinimulabela Yehova kinakwana. Jofuneya widda eli yabure, okwela eli yaderetu. (Roma 12:9) Yehova ohiloga wi “venevo panone nyuwo othiyana ona muthu wapama na nvuti, ole onimwimelela Mulugu na ole onimukodda.”​—Malakiya 3:18.

11. Sabwaya jani ehinfwanyelela iyo okana manyazo wawaddela attu ena wi nili a nlogo na Yehova?

¹¹ Iyo nimutamalele Yehova sabwa ya onisakula okala nlogo naye! Mwa dhawene ninowodha woniha wa attu otene wi iyo nili mpaddi wa Yehova. (Mateu 5:16; 1 Timóteo 4:15) Kavivuze: ‘Attu anoziwa wi ddili munamoona wohaganyedhiwa? Ddinowawaddela attu ena wi ddili munamoona wa Yehova ddihikanaga manyazo?’ Kobuwela mukalelo onsilidhiwa iyene akala iyo ninokaana manyazo ologa na attu wi nili nlogo naye.​—Masalmo 119:46; kengesa Marko 8:38.

12, 13. Mukalelo gani onrutxiha omuzinddiyela munamoona a Yehova na muttu wa mwilaboni?

¹² Elobo yokubanyiha vaddiddi wawona Anamoona anfwara ‘muya welabo.’ Enorutxa wanzinddiyela obe wattiyaniha na attu ahinimwebedha Yehova. (1 Korinto 2:12) ‘Muya welabo’ onowakwekwettela attu otanaalaga dhifunelo dhawa bahi. (Éfeso 2:3) Motagiha, masiki na malago otene anakelani wa Yehova, ena anosakula mwabalelo wonyakuwa. Ena anowabala guwo dhottiba vina dhawoneyela masiki akala andowa omatugumanoni. Vina anosatta  nttitti obe anoluwa asazaga mukalelo wamwilaboni. (1 Timóteo 2:9, 10) Ninga yodhavoya, agavitaganyiha na attu eena enorutxa wazinddiyela bavi anamoona a Yehova vina attu elabo.​—Tiago 4:4.

¹³ Dhikalawo dhilobo dhina dhinoniha wi muttu ohikanavi mweddelo wa mwilaboni. Motagiha, mmattangani abali eena anotxetta mutxettelo ohinlemeliwa na Mukristu. Ena anopida foto dhinikani mwinternetini dhinoniha wi attu owobana mpaddi womuyani. Txino awene kanattigi okosa yottega enddimuwa nanda atxinyutxiwa, mbwenye mukalelo obu onowahobaniha abale anivilibihedha ottukula mweddelo wottiyana na attu a mwilaboni.​—Kengesa 1 Pedro 2:11, 12.

14. Elobo gani enfwanyela iyo okosa wi nikaane mandano ofiyedheyana na Yehova?

¹⁴ Dhilobo dhotene dha mwilaboni dhikaana nipakelo na “monlelo abure wa mwili, ojiwa murima na dhetene dhinona mento, ovithukulelana muhaku.” (1 Joau 2:16) Sabwa yokala nlogo na Yehova nili attu ottiyana. Iyo ‘nihinyanyala dhifunelo dhonyakuwa dhamwilaboni,’ iyo ninowedda mwilaboni mpuno na winanela, omyala murima, vina otamela wiwananeyana na Mulugu.’ (Tito 2:12) Dhotene dhinkosa iyo mwigumini mwehu, dhologa dhehu, mwabalelo, malogelo ehu anofwanyela woneya vamentoni va attu eena wi nili nlogo na Yehova.​—Kengesa 1 Korinto 10:31, 32.

15. Ekaleleni yamakamaka waweddiha attu ena na okwela vina oderetu?

¹⁵ Ninowoniha wi ninimuttittimiha Yehova modhela wakwela abali na arogora.  Sabwani awene nlogo na Yehova ninga eli iyo vina. Nigahidduwale okosa ejuwene ninele owodha waweddiha nokwela vina noderetu. (1 Tesalónika 5:15) Eji ekaleleni elobo yamakamaka? Sabwaya jawi Yezu wahiloga wi “mugakwelanaga athu otene anoziwa wi muli anamasunza aga.”​—Joau 13:35.

16. Yotagiha gani eli mu Nlamuloni na Mizé entonyihedha mukalelo onikwela Yehova?

¹⁶ Yotagiya enikamihedhile ononelamo mukalelo onfwanyela iyo waweddiha abali ehu mmulogoni eli munlamuloni na Mizé. Mumparhani mwa Yehova iyene wanloga wila dhikalemo dhobo dholabihedhiwa mwenemwale bahi. Malamulo a Mizé entapulela mukalelo wafuneya wi akadda Levi akoyege dhobo esi na nriho, muttu wakoodda ovirihamo magano aba wanfwanyela opiwa. (Olebeliwa 1:50, 51) Kobuwela akala Yehova wahiloga wi attu akoyege na nriho dhobo dhihina egumi, eji entonyihedha wi jofuneya vaddiddi waweddiha attu asakulile iyene wi akale aye! Iyo nili a ttima mwa Yehova, noona iyene ohiloga ‘onuligani nyuwo, onimuliga mwanamuyana wa vamentoni vaga.’​—Zakariya 2:8.

17. Na mukalelo gani ‘onfwaseyela Yehova vina oniwiye’?

¹⁷ Malakiya wahiloga wi Yehova ‘wanfwaseyela ovuruwana’ mudhidhi waloga adhari aye muttu na mukwaye. (Malakiya 3:16) “Nabuya oaziwa athu aye.” (2 Timóteo 2:19) Iyene onowiwa dhinlogihu vina onowona dhinkosihu. (Ahebreu 4:13) Nigalogaga makani na abali vina arogora ehu iyene onowiwa. Iyo nihikaana ebaribari yawi Yehova onziveliwa wi nikale anamakela aleddo, anamavaha, attu  anziwa olevelela.​—Ahebreu 13:16; 1 Pedro 4:8, 9.

18. Ninamutamalele dhavi Yehova sabwa yonisakula okala nlogo naye?

¹⁸ Ninfuna nimutamalele Yehova sabwa yawi iyene onirumela okala nlogo naye. Nihiziwa wi nigamperekela egumi yehu, nihikosa yosakula yapama. Nihisunza yawi ninkalawo mwilaboni mudhaalile attu ana mweddelo ‘wovirigana,’ enofuneya wi natonyihedhe attuya wi ‘kaninkosa mpaddi wawa vina kanina yosumuleliwana,’ ‘ninomoneya ninga txeza ya mwilaboni.’ (Filipi 2:15) Ninovilibihedha orabela okosa dhinimusilidha Yehova. (Tiago 4:7) Ninowakwela abalihu ninowariha sabwa yawi awene nlogo na Yehova.​—Roma 12:10.

19. Yehova onalive dhavi abale akosile epaddi yokala nlogo naye?

¹⁹ Bibilia onologa wi ‘Yehova kanapwaze nlogo naye.’ (Masalmo 94:14) Masiki nigumanena masoso orutxa, kayivo elobo enatwé nipagano ntti, Yehova kananimwale. Masiki akala ninokwa iyene kananidduwale. (Roma 8:38, 39) “Nigakalawo, ninomukalelawo Nabuya; nigakwa ninimukwela Nabuya. Dhahene apa valiwo iyo, peno nigakwa, nilivi aye.” (Roma 14:8) Ninojeedha nsaka ninadhena Yehova akwaye otene eddilena nroromelo angona mukwani. (Mateu 22:32) Ovano iyo ninojavo mareliho annivaha Baba wehu wa wirimu. Ninga enloga Bibilia, “thagari nlogo ninimusakulela Nabuya okala Mulugu wawa, nivithomeliye okala naye.”​—Masalmo 33:12.