1, 2. Omwang’ana Yehova entapulela nni?

NINKALAWO ‘masaka abure vina orutxa okalawowá.’ (2 Timóteo 3:1) Apa vanaddamela iyo elabo eswa, okalawo onodhowavi na makattamiho menjene. Noona elobo yamakamaka ovivuza, ‘Ddinang’anela wuvi wi ddifwanye malago?’ Mohaganyedha ninakula wi ‘Wa Yehova,’ eji yowakula yofwanyelela.

² Omwang’ana Yehova entapulela nni? Ninakose eni wi nidhowevi nimwang’anaga masike nigakana makattamiho? Vyaka dhinjene mundduni Munasamo wahiloga wi iyo nimwang’anege Yehova nigafunaga nikamihedho. (Kengesa Masalmo 123:1-4.) Iyene wahiloga wi ninofwanyela omwang’ana Yehova ninga munimwang’anela mudhari nabuyaye. Ejiya entapulela eni? Entapulela wi  mudhari kanimwang’ana nabuyaye agafunaga yoja na okoyiwa. Mbwenye iyene onokala txenjewa wi aziwe enfuna nabuyaye wi akose. Na mukalelo wakakene, ninofwanyela wengesa malabo otene Mazu a Mulugu wi niziwe ennifunana Yehova wi nikose. Nigakosa dhawene ninele okana ebaribari yawi Yehova onele onikamihedha nigafwanyiwa makattamiho.​—Éfeso 5:17.

3. Elobo gani eganizuzumihile nittiya omwang’ana Yehova?

³ Iyo ninoziwa wi jamakamaka odhowavi banigamwang’ana Yehova, mbwenye masaka mena ninozuzumaga. Jakakene yampadduweli Marta marho wa Yezu. Iyene “wazuzumetxana mabasa a vatakulu.” (Luka 10:40-42) Akala ejo epadduwa na muttu wanroromelo wamoona Yezu vamentoni vaye, nigahikale mento enonipadduwela iyo vina. Txini eganitoteli ozuzuma nanda nihimwang’ana vina Yehova? Mmutomani mpu ninele wona wi enowodheya dhothega dha attu ena onizuzumiha. Vina ninele osunzamo wi txipo kanittiye omwang’ana Yehova.

4. Ninkoddelani otikina wi Mizé wahiyelela mperhe waye wovolowa elabo yolibeliwa?

⁴ Mizé wali mulobwana wamwang’anetxa Yehova wi amukumbirhe nikamihedho vina marhe meena. Iyene “ohumihavi murima akalaga ninga onimona Ole ohinoneya.” (Kengesa Ahebreu 11:24-27.) Bibilia onloga wi “Mu Izrayeli kamudhile vina woneya namavuhulela ninga Mizé.” (Olibiha 34:10) Masiki na omarho wofiyedhana wana Mizé na Yehova, iyene wahiyelela mperhe wa ovolowa elabo yolibeliwa. (Olebeliwa 20:12) Ejiya yapadduwele nni?

5-7. Makattamiho gani agumanilena ana Izrayel vabudduwilani mwigipitu, nanda Mizé wakosile eni?

⁵ Sivirile myeri minli ana Izrayel mwabudduwilani Mwijipitu, ahinatti ofiya Mwango Sinai, yahipadduwa elobo yohivegana. Nlogo nttile nahiroma ofoya sabwa ya manje. Awene ahimusadduwela Mizé vina ahiroma omuloga bure “Venevo Mizé omuloba Nabuya: ‘Ddirege nni na nlogo nthi? Anfuna-wene oddipa na malugu!’” (Obudduwa 17:4) Yehova wahinvaha Mizé malago ohirutxa. Kattukula fibo yawo, kadhowa oli malugu a Horeb. Bibilia onloga wi “Mizé ohira dhawene vamentoni va anddimuwa a Izrayel.” Manje ahifukuwa, ana Izrayel ahimwa ahakwanana, yonlelani ehigoma.​—Obudduwa 17:5, 6.

⁶ Bibilia onloga wi Mizé ohikuwela mburoya Massa, etapulelaga ‘Weha’ vina Meriba, mazina aba antapulela ‘Opambihana.’ Sabwaya? “Sabwani ohiwanana wa nlogo na Izrayel vina sabwa ya omweha Yehova, valogani: ‘Yehova oli na iyo obe kali na iyo?’”​—Obudduwa 17:7.

⁷ Yehova wiwalemo dhavi na dhetedhene esile dhipadduwile o Meriba? Ottiya omusadduwela Mizé, vamentoni va Mulugu wali omusadduwela iyene vamodha na olamulela waye. (Kengesa Masalmo  95:8, 9.) Ana Izrayel ahikosa dhilobo dhabure. Mbwenye Mizé wahikosa elobo yaderetu. Iyene wahimwang’anavi Yehova amukumbirhaga nikamihedho vina wahifwara mashagiho avahiwiye.

8. Txini epadduwile ana Izrayel afunaga wene ovolowa elabo yapikireliwani?

⁸ Elobo gani yapadduwile mvirelani vyaka 40 musogoromwa? Ana Izrayel ali mwiddeddereni waddamela omagomelo wa oleddo wawa. Vafiyedhilani mburo wakuweliwa Kades, vakuvi novolowa mwilabo yalibeliwani. Wahikalawo vina mburo wakuweliwa Meriba. * (Koona yowenjedhedha.) Sabwaya? Sabwani ana Izrayel afoya wili ttangwi yotowa manje. (Olebeliwa 20:1-5) Mbwenye apa Mizé wahittega venjene.

9. Elobo gani yamwaddelile Yehova Mizé wi akose, nanda Mizéya odhile okosa nni? (Koona foto eli omaromo.)

⁹ Mizé wakosile nni na nlogo ntti namusadduwele? Iyene wahimwang’ana Yehova wi anvahe malago. Mbwenye mudhidhi mwina iyene kamwaddelile Mizé wi avade nlugu. Wamwaddelile wi attukule fibo yaye, adhowe vamodha na nlogo aloge na nlugu. (Olebeliwa 20:6-8) Mizé ohivirihamo dhaddeliwiye? Nne. Mizé wahisilidhiwa vaddiddi na nlogo ofiyedha wooba owali eraga: ‘Kewani nyuwo athu ovuru-vuru! Apa iyo ninere owodha obuddutxa manje vanluguni apa.’ Mizé ohitxatxa nlugu dila bili.​—Olebeliwa 20:10, 11.

10. Yehova wewilemo dhavi na esile dhakosile Mizé?

¹⁰ Yehova wasilidhiwa vaddiddi na Mizé. (Olibiha 1:37; 3:26) Yehova osilidheliwe nne dhahene? Mwa mpaddi mwina Mizé wahittiya ovirihamo dhamwaddeli Yehova.

11. Elobo gani egatoteli ohirumeela ana Izrayel wi manje abale kabudduwile na matikiniho a Yehova?

¹¹ Txino vahikala ttangwi yina yatotile owali wa Yehova. Malugu ali mburo woroma o Meriba ali malugu ovadda anittaniwa granito. Masiki muttu atxatxe na guru dhotene kambudduwa manje. Mbwenye malugu ali mburo wanawili o Meriba malugu ottiyana. Munamalugu aba anittaniwa calcário, b’ofewa. Ahikaana gurugudha dhili ninga mikaatte munkoyeya manje mwari-mwa. Muttu agatorola obe agavere-vera munobudduwa manje menjene. Noona mutxatxele Mizé malugu aba ottiya ologana ninga mwarumeliwiye, manje abudduwile ana Izrayel txino onile ninga kayali matikiniho akosile Yehova na guru dhaye, onile ninga bumukalelo wa  maluguya woburutxaga manje. * (Koona yowenjedhedha.) Iyo kaninfiyedha onomelamo mowakwa makaniya.

12. Muladdu gani mwina wamutoteli Yehova osilidhiwa na Mizé na Aroni?

¹² Vahikala elobo yina emutoteli Yehova osilidhiwa na Mizé vina na Aroni. Koona elogile Mizé na nlogo: ‘Munofuna wi iyo niburutxe manje va nluguni apa?’ Mwa ologa “iyo” walogana iyene na Aroni. Yalogile Mizé ehoniha wi wahitowa nriho na Yehova vowi ddi Yehova wakosile matikiniho. Masalmo 106:32, 33 onologa: “Amuliga o Meriba wafukuwile manje, amutotelaga muladdu Mizé. Awawiha murima waye, ofiyedha omulogiha mazu ahiromileye opima.” * (Koona yowenjedhedha.) (Olebeliwa 27:14) Makaniya bawi Mizé na Aroni kanvahile Yehova nttittimiho naye. Noona Yehova wahiloga na Mizé vina Aroni: “Nyuwo muvanya malamulo aga.” (Olebeliwa 20:24) Obu wali muladdu munddimuwa!

13. Musosotto wavahiwe Mizé na Yehova wakalile dhavi woligana?

¹³ Mizé na Aroni ali asogoreli a nlogo noona Yehova wi wakuluvela awene. (Luka 12:48) Munddunimwa esi dhihinapadduwa, Yehova wahikoddiha nlogo nantero ovolowa mwilaboni yolibeliwa sabwa ya ovuru-vuru wokoodda omwiwelela. (Olebeliwa 14:26-30, 34) Mukoddile wiwelela Mizé Yehova okosile yakokone. Ninga mwakoddihedhiye nlogo nttile ovolowa mwilaboni yolibeliwa, Mizé vina wahikoddihiwa ovolowa Mwilaboni Yolibeliwa.

14, 15. Elobo yina yamutotele Mizé ovanya txini?

¹⁴ Txini yamutotele Mizé okala vuru-vuru vamentoni va Yehova? Koona enloga Masalmo 106:32, 33: “Amuliga o Meriba wafukuwile manje, amutotelaga muladdu Mizé; awawiha murima waye, ofiyedha omulogiha mazu ahiromiliye opima.” Nlogo na Izrayel nahimuliga Mulugu, mbwenye odhile osilidhiwa ddi Mizé. Iyene kawodhile opimelela dhubuwelo dhaye noona ohiloga dhohifwanyelela.

¹⁵ Mizé wahizuzumela wona dhovirigana dha nlogo attiyaga omwang’ana Yehova. Dila yoroma yalogile nlogo ttogorogo, iyene wahira elobo yofwanyelela. (Obudduwa 7:6) Mbwenye mwavirile  dila dhinjene avilelaga ovuru-vuru wa nlogo iyene wahilema. Txino iyene watanaalela dhubuwelo dhaye bahi attiyaga omuttittimiha Yehova.

16. Ekalele nni yaderetu wubuwela yampadduweli mizé?

¹⁶ Akala namavuhulela wa Yehova, wahifiyedha okosa muladdu munddimuwa, iyo vina ninodhaga wehiwa wi nikose muladdu woligana. Mizé wali vakuvi wi avolowe mwilabo yolibeliwa, iyo vina nili vakuvi wi nivolowe mwilaboni eswa. (2 Pedro 3:13) Iyo kaninfuna oyelela gari yovolowa, kahiye mwenemo? Noona nidhowegevi nimwang’anaga Mulugu vina nimwiwelelaga. (1 Joau 2:17) Ovirigana wa Mizé onnisunziha nni?

17. Elobo gani enanikamidhe nigadhugudheya?

¹⁷ Kuttiye wi elobo-txilobo ozuzumiha ovipimelela wawo. Dila dhina ninogumanana masoso o’gonelana. Bibilia onologa: “Nihilemena wira dhapama; nigahitxelela, niner’osinanga vansakanivá.” (Galásia 6:9; 2 Tesalónika 3:13) Akala okalawo muttu oniligaga  mudhidhi wotene niniwamo dhavi? Ninowodha ohimwakula? (Gano 10:19; 17:27; Mateu 5:22) Akala muttu ononiliga, niziwege ‘omuttiyedha Mulugu ntxiganá.’ (Kengesa Roma 12:17-21.) Ejiya empadduwela nni? Nikale attu anziwa ovilela nimwang’anaga Yehova na nikamihedho naye egakala yofuneya. Otamela ogomiha makani na osilidhiwa enlagiha otowa nriho na Yehova.

18. Nigattambirha malago a Yehova ninfwanyela wubuwela eni?

¹⁸ Kafwara malago maswa nofwaseya. Koddi ninofwara malago maswa annivaha Yehova? Nittiye okosa ninga mulemelele iyo. Nifware malago maswa anvaha Yehova na nikuru naye. (Ahebreu 13:17) Mbwenye, okalege txenjewa wi onalupe maddile ‘okwaranyaga esile dhilebiwe.’ (1 Korinto 4:6) Ozuzumela malago annivaha Yehova entapulela omwang’ana iyene.

19. Elobo gani enakose iyo wi dhovirigana dha attu ena dhinazuzumihe mandano ehu na Yehova?

¹⁹ Kuttiye wi dhovirigana dha attu ena dhizuzumihe mandano awo na Yehova. Nigadhowagavi banigamwang’ana iyene, kaninattiye wi dhovirigana dha attu eena dhizuzumihe mandano ehu na iyene. Eji elobo yamakama wa iyo, moligana na Mizé iyo nihikaana ettomo mwari mwa nikuru na Yehova. Muttu-muttu wa iyo onofwanyela olaba wi atamele ovuneya waye. (Filipi 2:12) Iyo nihivahiwa muttorho munddimuwa, Yehova ononang’ana. (Luka 12:48) Akala txibarene ninomukwela Yehova kayivo elobo enanikwakwattutxe vina kayiwo elobo enawodhe ottimiha okwela wehu wa Yehova.​—Masalmo 119:165; Roma 8:37-39.

20. Elobo gani eganile iyo okosa?

²⁰ Iyo ninkalawo nsaka norutxa vadiddi. Jamakamaka omwang’anaga Yehova ‘wirimu oliye,’ nitamelega oziwa ejile ennifunaniye wi nikose. Txipo kanittiye wi mubuwelo wa attu ena ozuzumihe mandano ehu na Yehova. Ejile empadduwele Mizé ehinisunziha elobo yamakamaka. Noona akala onodhugudheya na dha attu ena, kuttiye ovyang’anela, okale womala-nawale wi ‘mento awo azuzumelege omwang’ana Mulugu mpaka vananeddeliye ttagaraga.’​—Masalmo 123:1, 2.