YEZU asunzihaga anamafwara aye mabasa a olaleya, wanziwa wi kahiye attu otene agarumelile miselu dhapama. (Luka 10:3, 5, 6) Iyo vina mmabasani a olaleya ninowafanya attu ohileleya obe awali. Ejo enonikosiha orimeliwa thagaraga na attu ena a mmuruddani mwehu.

Muttu wa ttagaraga onowona dhinajombela attu ena onowawaddela ttagaraga vina onowakamihedha. Nigakoodda waweddela ttagaraga attu a mmurudda mwehu, ninorimeliwa guru dha olaleya miselu dhapama. Guru dhinoladdanihiwa na motto. Wi motto onattime, enofuneya okalawo pevo obe muya. Na mukalelo woligana, wi nidhowenavi guru dhehu enofuneya okaana ttagaraga!​—1 Tesalónika 5:19.

Ninawodhe dhavi odhowavi nitonyihedhaga ttagaraga, masiki ekalaga elobo yorutxa? Ninele osunza dhotagiha dha attu araru esuwene dhinfwanyela iyo otagiha: Yehova, Yezu na murumiwi Paulo.

Mwa vyaka dhinjene Yehova onovilela ozivala onkoseliwa nzina naye. Masiki egali dhawene, iyene ‘onowakoya abale annipuja.’ (Luka 6:35) Iyene onwodha dhavi otonyihedha supaje? Sabwa yawi iyene owodha wavilela attu otene. Yehova “onfuna wi etene avuneye.” (1 Timóteo 2:3, 4) Joziweya wi Yehova onowidda obure wotene mbwenye iyene onovaha ttima egumi ya attu otene noona kanfuna wi ayelele egumi yawa.​—2 Pedro 3:9.

Iyene onoziwa wi Satana ohikaana marhe a wapupurutxa attu. (2 Korinto 4:3, 4) Attu enjene onuwile ewaga miselu dhottambi nanda ahimala oravihiwa mweddelo wabure. Noona enowarutxa orumeela ebaribari. Masiki egali dhawene Yehova onowatamela abuwene. Ninziwa dhavi?

Katanaalela mukalelo wawoona Yehova akadda Nínive nsaka na mudduni. Masiki valani awali Yehova wahiloga dhahi na Jona: ‘Ki miyo kaddifwanyela weddela ttagaraga muttette munddimuwa w’o Nínive, muli attu okwaranya 120.000 ahinziwa ottiyaniha mono waga woja na wamara?’ (Jona 4:11) Yehova wahikaana supaje sabwa yawi akadda Nínive kiyaziwa ebaribari. Noona wahimurumawo Jona awaddele.

Nigawodhaga wavaha ttima attu ena nintonyihedha wi nintagiha ttagaraga dha Yehova. Ejo enonittukulela wakamihedha masiki nigawonaga ninga kanarumele.

 Akala anamurala eena kanfuna onivuruwana, jofuneya ozinddiyela eli mmirimani mwawa niziwe wi abaya anakulelani dhahene. Ena ahikana moonelo wohifwanyela na dhologa dha Bibilia obe ttangwi ya Okristu txino ahawoona attu anloga wi ali Akristu oku akosaga dhilobo dhonyakuwa. Ena anrumeela dhottambi dhinlogeliwa anamoona a Yehova. Ahikalawo ena anawova amudhawa obe anttawa oteyiwa na attu a mmuruddani.

Attu ena anafwanya iyo mmalaleyoni ahigumanana dhilobo dhawopiha dhatotele makattamiho a muyubuweloni. Missionaria dhahi onittaniwa Kim ohiloga, murudda onlaleya iyo, attuya ahittamaga koddo vina ahiyelela dhilobo dhinjene dhanani. Ajombeliwa nroromelo na musogorho. Anedda onyimuwene kanimukuluvela muttu. Attu enjene a mmuruddini mpo kanziveliwa na miselu dhehu. Siku dhahi Kim wahilupeliwa na muttu mmabasani a olaleya.

Elobo gani yakosile Kim wi anarimeliwe ttagaraga yaye masiki na dhilobo dhimpadduwele? Iyene ohiloga muttu agadinyimula, miyo ddinubuwela dhologa dha Gano 19:11: ‘Muttu wotxenjerha ddule onziwa ovugulela osilidhiwa waye.’ Ddinotanalela vina esile dhapadduweli attuya, ejo enoddikamihedha waweddela ttagaraga. Kahiyo attu otene ali dhawene. Murudda wakene ahikalamo attu enjene anawaredhela iyo.

Ninovivuza: ‘Kowiliwa kaddasunzile ebaribari ddigawonile dhavi Anamona a Yehova agadhile vanivaga wi addilaleye?’ Motagiha, kowiliwa miyo ddaddeliwe dhilobo dhottambi sabwa ya Anamoona a Yehova? Txino kugana efunelo ya ovuruwana miselu dhapama, nanda egahifuneya wi weddeliwe ttagaraga. Yezu ologile wi nawirele attu ena ejile egaziveliwe iyo wireliwa. Noona masiki dhilobo dhirutxe enofuneya olagiha ttagaraga.​—Mateu 7:12.

Murumiwi Paulo wahilagiha ttagaraga na awali, amwiddani aye. Namukalelo gani? Sabwa ya ejile yaliye wale. Iyene ohileba: “Oku miyo wale ddimwabaga, ddimusuthaga, ddimwiddaga. Dderavi dhawene Mulugu oddeddela thagaraga, vowi ddali ddihinatti wakela gari yororomela, kaddaziwa dhèrimi.” (1 Timóteo 1:13) Paulo wanziwa wi Yehova na Yezu ahimweddela ttagaraga. Iyene wanziwa dhubuwelo dha amwiddani, sabwa yawi wale wali dhawene.

Dila dhina Paulo wanafwanya attu amageyile na dhilemelelo dhottambi. Wakosa eni? Merelo  17:16 onologa, vaali miyo elabo ya Atena ‘Paulo wahisilidhiwa vaddiddi sabwani elabo yotene yahidhala dhingamuttu.’ Ottiya ejo Paulo walabihedhe dhilobo dhamusilidhile wi awodhe walaleyana attu. (Merelo 17:22, 23) Iyene wahikosa matxinjo na mukalelo waye wa olaleya, wahiloga mikalelo dhothiyana na attu ottiyana amurijile, wafuna wi akose mwawodhiye wi ‘attu enaya awodhe ovuneya.’​—1 Korinto 9:20-23.

Enofuneya wi nimutagihe murumiwi Paulo mwa otamela ononelamo dhilemelelo obe mwebedhelo ohinfwanyelela onkosa attuya. Nilabihedhe ewodhelo yehu wi nalagihe “mpaganyo wothabiha.” (Izaiya 52:7) Murogorha dhahi onkuweliwa Dorothy ohiloga: “Mmuruddani mwaga attu enjene anubuwela wi Mulugu muwali vina ddwawopiha. Miyo ddinowatapulelaga attuya sabwani anorumeela okalawo wa Mulugu, mwavenevo miyo ddinowalagiha mikalelo dha Yehova na efunelo yaye ya musogorho.”

Wubuwelege vina mukalelo wa wakamihedha anamalaleya ena. Jessica ohenjedhedha akala muttu ononinyimula mmabasani olaleya miyo kaddinsilidhiwa. Miyo ddinotamela okosa dhilobo dhinlibiha, ologa dhilobo dhaderetu dhingumanana iyo omalaleyoni, masiki akala attuya kanfuna vina kanvuruwana.

Yehova onoziwa makattamiho otene angumanana iyo mmalaleyoni. Iyene onowagalala vaddiddi nigatagiha ttagaraga dhaye! (Luka 6:36) Joziweya wi ttagaraga dha Yehova na attu a mwilaboni dhikaana vangomelani. Iyene onele odhana omagomo. Mbwenye nijeedhaga mudhidhi obo mabasa a olaleya bomaguvela. (2 Timóteo 4:2) Noona nidhowevi nilaleyaga na ntidi nawaddelaga ‘ttagaraga attu otene.’