1. Iyo notene nina efunelo gani?

OGEWILEMO dhavi muttu onimuriha weyo nanda adduwala nzina nawo, yottabwaya, akoodda wuziwa? Mwebaribari egahunyimula. Mwahaya? Sabwani iyo notene ninofuna woniwa vina oziwiwa na attu ena. Kahiyo wi ninfunetxa attu anubuwelege. Mbwenye iyo ninfuna wi attu aziwe mikalelo dha dhilobo dhinkosihu.—Olebeliwa 11:16; Job 31:6.

2, 3. Txini endaga opadduwa mofunetxetxa otamaliwa na attu ena? (Koona foto eli omaromo.)

² Mbwenye ninofwanyela okala pasope, na efunelo eji yoziwiwa sabwani endaga ozuzumiha mubuwelo wehu. Elabo eji ya Satana enodha wika muyubuweloni mwehu wi oziwiwetxa elobo yamakamakaya. Ejo egapadduwa iyo kaninanvahe Yehova Mulugu, oziwiwa na webedhiwa oninfwanyelela.​—Ovuhulela 4:11.

 ³ Masaka a Yezu, anddimuwa a marelijiau ahikana mubuwelo wa bure mwaha woziwiwa. Yezu wahiloga na anamafwara aye: “Porhe-porhe na anamasunziha a Magano! Awene anoziveliwa wabala dhovapeya, olejeliwa vathaddo. Mumparhani mwa Mulugu anothamagela mipaddo dhathima; mmithuponi, mipaddo dhoroma.” (Luka 20:46, 47) Mottiyana na awene Yezu wahimusiba mamukela dhahi woyelega operekile nvaho waye wa korowa bili dhamujila dha muttengo mung’onovi wahonile muttu iyene avahaga. (Luka 21:1-4) Mukalelo wamuziwa Yezu muttu wattiyana na wa attu ena. Ddima eji enonikamihedha wona mukalelo ononamo, Yehova oveda oziwiwa.

4. Oziwiwa wamakamakaya kuvi, okalelini wamakamaka?

⁴ Oziwiwa wamakamakaya kuvi? Kahiyo okosa masunziho maddimuwa, ozuzumela okosa mpinddu obe ovuwa na mmavego amwilaboni. Paulo wahitapulela alogaga wi: “Ddabuno munomuziwa Mulugu, yopithayá, iyene onohuziwani. Enwodheya dhavi nyuwo wiyelela okala adhari a dhilobo dhokwana-wale, dhihinvuna?” (Galásia 4:9) Elobo yaderetu vaddiddi ‘oziwiwa na Mulugu,’ muttu wamakamakaya wamwilaboni! Yehova onoziwa eli iyo, ononikwela, vina onfuna wi nikale amarho aye. Eji yali efunelo yaye munittanddiliye wi nandane na iyene.​—Kohelét 12:13, 14.

5. Ninfwanyelela okosa nni wi niziwiwe ninga amarho a Yehova?

⁵ Iyo ninoziwa wi Mizé wali marho wa Yehova. Mmulobeleliye: “Ddiziwihení mubuwelo enyu,” Yehova omwakuwa: “Ddinowira eddilobilewe: Weyo oddikoddelela-wene, miyo ddimala ouziwa.” (Obudduwa 33:12-17) Yehova ononiziwa iyo kakamwe. Mbwenyi ninakose nni wi nikale amarho aye? Nimukwele vina nimperhekele egumi yehu.​—Kengesa 1 Korinto 8:3.

6, 7. Elobo gani egarimelihile wandana wehu na Yehova?

⁶ Omarho wehu na Yehova kwattima vaddiddi, ninofwanyela oriha. Ninga Akristu a elabo yo Galileya, ninofwanyela ottiya okala adhari a dhilobo “dhokwana-wale, dhihinvuna” dha mwilaboni, dhintaganyiheya na oziwiwetxa na osibiwa. (Galásia 4:9) Akristu aba o’Galásia ahimuziwa Yehova, nanda iyene wahaziwa vina. Mbwenyi Paulo wahiloga wi awene ahiroma wiyelela okala adhari a dhilobo “dhokwana-wale” dhihina ttima. Masaka mena, anivivuza: ‘Yakosiha wiyelela mundduni ofiyedha okosa dhilobo dhohifwanyelela yali nni?’

⁷ Elobo ninga eji enonipadduwela? Ndde, enonipadduwela. Enjene mwa iyo musunzelihu ebaribari nihikosa ninga ekosile Paulo, nittiya dhilobo dhigadhile onivuwiha mwilaboni ya Satana. (Kengesa Filipi 3:7, 8.) Txino iyo nihittiya masunzo manddimuwa, mabasa attima aganittambirha  kobiri gwè. Obe nigahikala attu ovuwa na oyesa wa wiba jibo obe wa oponya mpirha. Mbwenye nihikodda dhilobo esi dhinoniwa ninga gari. (Ahebreu 11:24-27) Egali otolo wubuwela wi yosakula ekosilihu kikalile! Sabwani wubuweletxa dhilobo esi ondaga onikwekwettela okosa dhilobo dhamwilaboni ejino “dhokwana-wale.” *​—Koona yowenjedhedha.

8. Elobo gani enlibiha efunelo yehu ya ononiwa na Yehova?

⁸ Ninalibihe dhavi efunelo yehu ya oziwiwa na Yehova nirabelaga efunelo ya oziwiwa na elabo? Jofuneya ozuzumela dhilobo bili dhamakamaka. Yoroma, Yehova kanadduwala abale animulabela na nroromelo. (Kengesa Ahebreu 6:10; 11:6) Yehova onowavaha ttima adhari aye, mwa mpaddi wa Yehova, wapwaza egali elobo ‘yohiligana.’ “Nabuya ohaziwa athu aye.” (2 Timóteo 2:19) “Nabuya onowañganela dila envira athu omyala mirima” nanda onowavuna mmasosoni mwawa.​—Masalmo 1:6; 2 Pedro 2:9.

9. Kavaha yotagiha enoniha wi Yehova onorumela nlogo naye.

⁹ Nsaka dhahi, Yehova wahaliva attu aye na mukalelo wawumiha milomo. (2 Mapadduwo 20:20, 29) Motagiha, kobuwela mukalelo wavunile Yehova nlogo naye Mwinje Wofila mudhidhi wafwarafwariwani na anyakoddo a Faraó. (Obudduwa 14:21-30; Masalmo 106:9-11) Nipadduwo ntti nali notikiniha vaddiddi, sabwani vahivira vyaka 40 attu a elabo ejile adhowagavi bagaloga makaniya. (Josuwé 2:9-11) Ejo enonilibiha vaddiddi wubuwela nvunelo wavunile Yehova nlogo nttile nsaka na mundduni, sabwani mohigonela Gog na Magóg onele onilupela. (Ezekiyel 38:8-12) Nsaka ntto, iyo ninele ottaba sabwa ya otamela orumeliwa na Yehova ottiya otamela oziwiwa na elabo.

10. Ebaribari yina enfwanyela iyo ozuzumela jivi?

¹⁰ Mpaddi wanawili onfwanyela iyo wubuwela bwawi Yehova ononiziwa na mukalelo ohinubuwela iyo nanyene. Abale anira dhapama atamelaga oziwiwa na attu kanattambirhe mareliho a Yehova. Sabwaya? Sabwani ahimala wakela nlivo nawa, oziwiwa na attu. (Kengesa Mateu 6:1-5.) Mwa mpaddi mwina, Yehova ‘onona dhoviteya’ onowawona abale anawirela dhilobo dhapama attu eena. Yehova onowona merelo awa vina onowattuva. Ottuviwawa kunda ninga mwajeedhela iyo. Ndoweni noone mapadduwo meena.

11. Yehova wamuziwile dhavi Maria?

¹¹ Yehova ohimusakula muzombwe woviyeviha wakuweliwa Maria bakala mambali wa mwanaye, Yezu. Maria wakala muttette mung’ono wettaniwa Nazareti, wali wolapelana na mparha wokoddela wa Jeruzalemi. (Kengesa Luka 1:26-33.) Yehova wamusakulele eni Maria? Anju Gabriyel wahimwaddela wi ‘muhirumeliwa na Mulugu.’ Mwaveneva ninowodha wona wi iyene wahikaana omarho wofiyedhana na Yehova, ejoya yahifiyedha ononeya mulogeliye na Ezabeti. (Luka 1:46-55) Yehova wanimoona Maria, nanda sabwa ya nroromelo naye noliba, iyene wahimuttuva na elobo yahajedheliye.

12, 13. Yezu wattittimihiwe dhavi mudhidhi obaliwiye vina mwavireli malabo 40 mumparani mwadhowiliye na maye Maria?

¹² Mubaaleliwe Yezu, elobo gani elogile Yehova sabwa ya obaliwa waye? Iyene kaapangile anddimuwa amwilaboni nne alamuleli a Jeruzalemi na Belemi. Yehova waharuma angelo wi apange akumbuzi oviyeviha asapiha mabila muddabo olapelana na Belemi. (Luka 2:8-14) Akumbuzi muziwelani obaliwa wa mwanaya ahidhowa omoona. (Luka 2:15-17) Maria na José ahuma milomo na nttittimiho navahiwe Yezu. Merelo a Yehova ahittiyana na merelo a Ddiabo. Mwarumele Satana anamasunza neneri odhowa omoona Yezu na amambali aye, attu otene Mujeruzalemi ahinonelamo obaliwa wa Yezu, aba ali makani atotile ozuzuma wa attu. (Mateu 2:3) Yodhavoya, ayima ahana muladdu ahipiwa.​—Mateu 2:16.

¹³ Mvirele malabo 40 Yezu babaliwe, Maria wahidhowa o Jeruzalemi wi amperekele Yehova mukutto. Maria na José ahedda makilometru 9 adhowaga o Belemi. (Luka 2:22-24) Maria na mamune José mwakosani oleddo, Maria wanvuza, koddi namakutta oddule onele ologa elobo mowiwanana na esile  dhinakose Yezu musogorho? Yezu wahittittimihiwa mbwenye kahiye ninga mwajedhela Maria. Yehova omusakula Simeau mulobwana “womyala murima” na namavuhulela wa mamukwela Ana, wana vyaka 84, wanonihedhemo wi mwanaya oddule ali Mesiya obe Kristu waddiwana.​—Luka 2:25-38.

14. Maria wakelile mareliho gani mwa mpaddi wa Yehova?

¹⁴ Kito Maria wahiziwiwa na Yehova sabwa ya omulela Yezu? Ndde. Yehova ohittiya wi merelo na dhologa dha Maria dhilebiwe mBibiliani. Enkala ninga mwari mwa mabasa a Yezu vyaka ttaru Maria kawodhile onfwara mwaviriye alaleyaga. Sabwani iyene wali mamukwela wahihala o Jeruzalemi. Ebaribari wi iyene kawodhile woona dhilobo dhotikiniha dhakosa Yezu. Mbwenye mudhidhi wa okwa waye iyene wahikalavo. (Joau 19:26) Musogorhomwa, Maria wali Mujeruzalemi na arumiwi venevale vattikitteliwani na muya wokoddela. (Merelo 1:13, 14) Txino wahimala ottikitteliwa vamodha na anamafwara ena. Iyene ohivahiwa gari ya okalawo na mukalakala odhulu vamodha na Yezu. Mohaganyedha Yehova wahubuwela mabasa aye ororomeleya!

15. Yehova wamurumelile dhavi mwanaye valiye velaboni ya vati?

¹⁵ Yezu wankodda ovahiwa nttittimiho na asogoreli a marelegiau vamodha na alamuleli a nsaka nttile. Iyene wahagalala vaddiddi, mudhidhi walogile Yehova ovenyena odhulo dila ttaru dhottiyana alogaga wi oddu ddimwanaga wokweleya. Yezu txibarene wahilibiheya! Mwamaleliye obatiziwa Mwinje Jordau Yehova wahiloga: “Oddu ddi mwanaga wa vamurimani vaga; mwa iyene pulí oziveliwa waga.” (Mateu 3:17) Enkala ninga wewale mazu aba wali Joau Baptista yeka. Musogorhomwa sivirile vyaka ttaru Yezu ahinatti okwa,  anamafwara aye araru ahimwiwa vina Yehova alogaga sabwa ya Yezu: “Oddu ddi mwanaga wa vamurimani vaga, mumvuruwanege.” (Mateu 17:5) Bahalilewo malabo mang’onovi waddamelaga okwa waye, Yehova wirimu waliye ohiloga vina ttangwi ya mwanaye.​—Joau 12:28.

16, 17. Yehova omuttittimihile dhavi Yezu na esile dhahajedhiye?

¹⁶ Yezu wanziwa wi agahikuweliwa nvuti, agahitabutxiwa ofiyedha opiwa. Masiki dhawene iyene wahilobela wa Yehova wi yireye ofuna wenyu ottiya ofuna waga. (Mateu 26:39, 42) ‘Iyene orumela okwa vapingirizini ahitanalaga manyazo a mukweloya,’ iyene wafuna wi aziwiwe na babe ottiya oziwiwa na elabo. (Ahebreu 12:2) Yehova omuziwile dhavi mwanaye?

¹⁷ Yezu valiye velaboni ya vati, wahilobela wi afwanye nttittimiho naniye wale agali na Babe wirimu. (Joau 17:5) Bibilia kanloga wi iyene wanunlela ovahiwa dhina opitta yaliye wale. Iyene katamelile owelihiwa vowi wahakwaniha efunelo ya Babe velaboni ya vati. Kito Yehova odhile okosavo eni? Iyene wahimuttittimiha na esile dhahajedhiye. Yehova munvenyihedhiye Yezu mukwani, iyene ohimuttomela ‘mpaddo wottukuwa’ wirimu. Ohinvaha vina egumi yomuyani yokala-nokala-wene, ejo yali ehinavahiwaga muttu! * (Koona yowenjedhedha.) (Filipi 2:9; 1 Timóteo 6:16) Sabwa ya ororomeleya waye Yehova ohimuttuva na mukalelo wotikiniha!

18. Elobo gani enanikamihedhe orumeliwa na Yehova nikooddaga oziwiwa na elabo?

¹⁸ Elobo gani enanikamihedhe orumeliwa na Yehova nirabelaga oziwiwa na elabo? Kanidduwale wi Yehova kanadduwala adhari aye ororomeleya, dila dhinji iyene onowareliha na mukalelo ohinjedhelani. Nitanalelege mukalelo onanirelihe Yehova musogorho. Mbwenye enofuneya wi nivilelege makattamiho annigwela mwilaboni mpuno mudhalile obure. Mbwenye oziwiwa wotene onvaha elabo ejino onele ogoma. (1 Joau 2:17) Babihu wa wirimu, Yehova, txipo kanadduwale mabasa a mada ehu erile iyo na okwela nzina naye, sabwani iyene ‘ddoligana.’ (Ahebreu 6:10) Kakana nikuluvelo nawi ninele oziwiwa na mukalelo wahajedhihu!