1-2. (a) Mowiwanana na nivuru na Mateu 28:18-20, Yezu wavahile Akristu mabasa gani amakamaka? (b) Mavuzo gani anfunihu osekeserha mwari mwa mutoma obu?

 ARUMIWI txino ali ozuzumene. Sabwani, vamalile Yezu ovenyihiwa mukwani, wahakumbirha wi adhowe agumane vamwangoni. (Mt. 28:16) Txino bu mudhidhene obule wattwanyuweliye “anamasunza opitha mazana matanu.” (1 Kor. 15:6) Yezu wafunela nni otugumana na anamafwara aye? Wila aavahe nikokomezo ntti: “Dhowani mwasunzihe athu a malogo otene.”—Kengesa Mateu 28:18-20.

² Anamafwara abale ewale nikokomezo na Yezu ahidha okosa mpaddi wa mulogo woroma wa Akristu. Mabasa amakamaka a mulogo obule wali wa wakosa anamafwara a Kristu. * Ovano, dhihikalawo matxikwi menjene a milogo dha Akristu ebaribari mwilaboni mwetemwene, mabasa awa bakakene. Mwari mwa mutoma obu, ninele wona yowakula ya mavuzo manai: Wakosa anamafwara ekalele nni mabasa amakamaka? Wakosa anamafwara ontapulela eni? Akristu otene anopattiwa na mabasa aba a wakosa anamafwara? Ninfwanyelela nni ovilela na mabasa aba?

3. Mowiwanana na Joau 14:6 na 17:3, mabasa a wakosa anamafwara akalele nni amakamaka?

³ Mabasa a wakosa anamafwara akalele nni amakamaka?  Sabwani anamafwara otene a Kristu anowodha okana omarho na Mulugu. Ottiya ejuwene, abale aninfara Kristu anowodha okana egumi yapama vina njedhelo na egumi yamukalakala musogorho. (Kengesa Joau 14:6; 17:3.) Txibarene, Yezu ohinittiyedha muttorho munddimuwa, mbwenye kanili nooka. Murumiwi Paulo ohileba wi iyo notene: “Ninlaba vamodha mabasa a Mulugu.” (1 Kor. 3:9) Gari gani enivahile Yehova na Yezu!

4. Ninsunzavo eni na yotagiha elogile Ivan na Matilde?

⁴ Mabasa a wakosa anamafwara anowagalaliha. Koona yotagiha ya Ivan na mwadhiye Matilde o Colômbia. Awene ahimulaleya Davier, iyene wahawaddela atelani abale wi: “Miyo ddinofuna otxinja egumi yaga mbwenye kaddinwodha.” Davier wali namawana waja mirobwe, mulezeli vina akala na mweddaye Erika. Ivan onologa: “Iyo nahiroma omusunza Bibilia na iyene, owaniwaye nadhowa na sikaleta sabwani muruddaya wakaliye wali wolapela. Erika voniliye wi Davier onosaddula mubuwelo na merelo aye, ohiroma vina omusunza Bibilia.” Na mudhidhiya, Davier ohittiya oja mirobwe, omwa na owana. Nomala wahilebiha matelo na Erika. Matilde ohiloga: “Mubatiziwe Davier na Erika yaka ya 2016, nahubuwela yalogile Davier wi ‘miyo ddinofuna otxinja egumi yaga mbwenye kaddinwodha.’ Nahagalala ofiyedha wunla.” Kavali waganyedha, wakamihedha attu okala anamafwara a Kristu enodhana wagalala.

5. Ttarho yoroma ya wakosa anamafara jivi?

⁵ Ttarho yoroma ya wakosa anamafwara ja ‘watamela’ abale anfuna osunza mwaha wa Yehova. (Mt. 10:11) Wila attu aziwe wi nili Anamoona a Yehova ninofwanyela walaleya mwaha wa Yehova. Dhawene ninotonyihedha wila nili Akristu anfara nikokomezo na Kristu.

6. Txini enawukamihedhe opemberha mmalaleyoni?

⁶ Attu ena anoziveliwa osunza ebaribari ya mBibiliani, oku attu awinjiva kanziveliwa. Nitamele oddiginya efunelo yawa. Wi nipemberhe mmalaleyoni, ninofwanyela ovisasanyedha deretu. Katamela makani anapatta attu analaleyiwe. Ogamala, wubuwele mukalelo woromana makaniya.

7. Onawodhe dhavi oroma makani na muttu, nanda ekalele nni yamakamaka omutonyihedha nriho vina onvuruwana?

⁷ Motagiha, onvuze mwanamurala dhahi: “Ddigahiziveliwa oziwa monelo wenyu! Masaka abano, ninopattiwa makattamiho menjene orugunuwa elabo yotene. Ononamo dhavi, wila makattamihoya agome enofuneya okana omwene onalamulele elabo yotene?” Ogamala koona Daniyel 2:44. Obe onvuze dhahi: “Wonamo wenyu, txini enfuneya wila attu awodhe walela aima noderetu? Ddinele oziveliwa wiwa monelo wenyu.” Ogamala koona Olibiha 6:6, 7. Osakule makani anfuna wattukulela attuya ovuruwana. Kobuwela yopurelamo ya wakamihedha attu oziwa ensunziha Bibilia. Ogalogaga na muttu ofwaseyele ovuruwana monelo waye. Dhahene, onele owodha ononelamo deretu vina iyene onele okala wotapuwa wila avuruwane dhinlogiwe.

8. Ekalele nni yofuneya okaanela ntidi na omwiyelela mwanamurala?

⁸ Akala muttu kanatti orumela nsunzo na Bibilia, enofuneya ononga mudhidhi vina  guru ya omwiyelela. Sabwaya? Sabwani muttuya kankanetxa mudhidhi obe kanfuna onittambirha wili. Txino enofuneya wiyelelawo dila dhinjene wila omukamihedhe orumela omusunza Bibilia. Kobuwela, wila muri wunuwe enofuneya ohelela manje mudhidhi mwinjene. Yakakene, wila muttuya onuwihe efunelo ya omukwela Yehova na Yezu enofuneya omwiyelelana dila dhinjene Nzu na Mulugu.

9-10. Ninlogela nni wi Mukristu wotene onopattiwa mabasa okamihedha watamela attu anna murima wofewa?

⁹ Mukristu wotene onopattiwa na mabasa okamihedha watamela attu anna murima ofewa. Niladdanihe na mabasa a omutamela mwana orimelile. Na mukalelo gani? Koona yopadduwa eji ya mwana wa vyaka ttaru orimelile vatakulu. Attu owakwana 500 anomutamela mwanaya. Muvireli mawora 20, mwanaya wahifwanyiwa na muttu mmodha mwa abale avilevelile. Mbwenye muttu oddule kafunile wakela nttittimiho sabwa ya onfwanya mwanaya. Iyene ohiloga: “Ewodhihile onfwanya mwana oddu sabwa ya guru ya attu otene alabile vamodha.”

¹⁰ Attu enjene ali ninga mwana oddule. Awene ahirimeela. Kana njedhelo, mbwenye anofuna nikamihedho. (Ef. 2:12) Iyo nili nikuru na attu okwaranya matxikwi 8 ninlaba vamodha nitamelaga wafwanya attu oriheya. Txino weyo kunatti onfwanya muttu onna efunelo ya omusunza Bibilia. Mbwenye anamalaleya ena anlaba murudda wakakene txino ahinfanya mwanamurala onfuna osunza ebaribari ya Mazu a Mulugu. Akala mbali obe murogora ohinfwanya  muttu onakale namafwara wa Kristu, otene akamihedhile mabasaya anofwanyela wagalala.

11. Akala kuna nsunzo na Bibilia, onalabihedhe marhe gani wila okamihedhe mabasa a wakosa anamafwara?

¹¹ Akala weyo kuna nsunzo na Bibilia ovanene, enowodheya okamihedha mabasa aba na mukalelo mwina. Motagiha, enowodheya wamoyela aswa andha o Numbani ya Omwene vina wandana na awene. Mukalelo mwina bwa wakamihedha wona okwela wehu vina walagiha wi nili Akristu ebaribari. (Jo. 13:34, 35) Yowakula yawo mmatugumanoni, masiki ekale yohigoneela, enele wasunziha aswa otonyihedha nriho vina owodha olagiha nroromelo nawa. Egawodheya obudduwe vamodha na namalaleya muswa vina omukamihedhe olabihedha malebo a Bibilia. Merelo aba, anele omusunziha omutagiha Kristu.—Lk. 10:25-28.

12. Enofuneya ewodhelo yobaliwana wila nakose anamafwara? Katapulela.

¹² Kanubuwele wi enofuneya okana ewodhelo yobaliwana wila niwodhe wasunziha attu ena okala anamafwara a Kristu. Sabwaya? Koona yotagiha ya Faustina onkala o Bolivia. Aromaga-wene otugumana na Anamoona a Yehova kawodha wengesa. Ovano onowengesa mbwenye okana vangomeliye. Ovanene iyene ohibatiziwa vina onokwela wasunziha attu ena. Vasumanani, onoweeddiha masunzo matanu a Bibilia. Masiki ahiwodhaga wengesa deretu ninga anamasunzaye, iyene owakamihedha attu atanu na mmodha ofiyedha obatiziwa.—Lk. 10:21.

13. Mareliho gani anfunihu ottambirha nigavilibihedha mmabasani a wakosa anamafwara?

¹³ Akristu enjene ankala ozuzumene sabwani akana mittorho dha makamaka. Masiki dhahene, awene anowodha weddiha nsunzo na Bibilia, nona anowagalala. Koona yotagiha ya Melanie. Iyene wali muziye, wamulela mwanaye wa vyaka 8 elabo ya Alaska. Wanlaba mudhidhi mwinjene vina wanimukamihedha mambali waye wana eredda ya câncer. Murudda wakaliye, kuwali Munamoona wa Yehova mwina. Iyene wamutamela muttu wi amusunzihe Bibilia, nona wahilobela akumbirhaga guru dha ovilela eridho wila awodhe odhowa olaleya. Mohigoneela wahimulaleya Sara vina ohimusunziha nzina na Mulugu. Mwari mwa mudhidhi mung’onovi Sara ohirumeela omusunza Bibilia. Melanie ohiloga: “Ddakala olemene maishano otene na mattiyu, masiki dhawene miyo na mwanaga nandowa omusunziha Sara. Nanziveliwa  opepesa yowakula ya mavuzo akosa Sara, nihagalala wona wi iyene wahikaana mandano na Yehova.” Sara wahifara-fwariwa na attu ena, wahittiya kapela yaye vina babatiziwa.

14. (a) Ninladdanihela nni mabasa a wakosa anamafwara na ottadda? (b) Onsunzavo eni na mazu alogile murumiwi Paulo munivuruni na 2 Timóteo 4:1, 2?

¹⁴ Akala weyo kunwodha onfwanya muttu onfuna osunza, kukumuwe kakana njedhelo. Kobuwela, Yezu oladdaniha mabasa a wakosa anamafwara na ottadda. Anamattadda anononga mudhidhi mwinjene wila awodhe opa oba. Awene anlaba na mattiyu obe na membesi, dila dhina onowedda mbara mpaka odhowa mburo wolapela. (Lk. 5:5) Moligana, anamalaleya enjene anononga mudhidhi mwinjene “bagattadda” n’ovilela mmimburoni dhottiyana-ttiyana. Sabwaya? Anilela wi akaane gari ya ogumana attu enjene. Ovilibihedha oku onodhana yopurelamo sabwani anamalaleya abo anowodha wafwanya attu anrumeela miselu dhapama. Enowodheya weyo oziwa mudhidhi obe mburo onkaletxa attu wila odhowe walaleye?—Kengesa 2 Timóteo 4:1, 2.

15. Ninfunela nni ovilela nigeddihaga nsunzo na Bibilia?

¹⁵ Enfuneyela nni ovilela wila needdihe nsunzo na Bibilia? Ttangwi mmodha, jawi ninofwanyela wakamihedha anamasunza oziwa okwela magano a mBibiliani. Opitta eji, ninofwanyela wakamihedha awene oziwa omukwela Mwinya wa Bibilia, Yehova.  Ottiya wasunzihavi bahi txini enfwanyela okosa anamafwara a Yezu, ninofwanyela wasunziha mukalelo ovirihamo magano aba mwigumini mwawa. Ninofwanyela ovilela wila niwodhe omoona iyene avirihagamo magano a mBibiliani. Anamasunza ena anowodha otxinja dhilemelelo mwari mwa mweri dhing’onovi; ena anottukula mudhidhi mwinjene.

16. Ninsunzavo eni na Yotagiha ya Raúl?

¹⁶ Yotagiha ya misionario dhahi wa o Peru enonikamihedha ononelamo yopurelamo endela sabwa ya okala namavilela. Misionarioya ohiloga: “Miyo ddimusunziha Raúl manivuru meeli.” “Mbwenye iyene wakaana magudulano menjene mwigumini mwaye. Wakaana makattamiho vamuralani vaye, wanloga dhopuja vina anaye kanvaha nriho. Iyene wantugumana dila dhinjene, masiki dhawene miyo ddandowavi omukamihedha iyene na amudhaye. Muvirile vyaka ttaru nisunzaga, wahifiyedha obatiziwa.”

17. Txini enfunihu osunza mwari mwa mutoma ondawo?

¹⁷ Yezu wahinaddela dhahi “dhowani, mwasunzihe athu a malogo otene.” Wila niwelele nikokomezo ntti, iyo ninologa na attu enjene anna dhubuwelo dhottiyana na dhehu ninga abale ahina marelijiau obe abale anrumeela wi Mulugu kawo. Mwari mwa mutoma ondawo ninele wona mukalelo onawodhe iyo walaleya attu otene miselu dhapama.