1. Matxinjo gani ampadduwa ovanene mwilaboni na attu otene?

 MWARI mwa vyaka matxikwi na matxikwi, attu awinjiva a mwilaboni ahikaana relijiau. Mbwenye ovanene vahipadduwa matxinjo. Attu enjiya kana monelo wapama mwaha wa relijiau. Txibarene, dhilabo dhina attu enjene anloga wi kana relijiau. *—Mt. 24:12.

2. Totela gani dhinattukulela attu ohikaana relijiau?

² Mwahaya bwani onttukulela wunuwa muttengo wa attu ahina relijiau? * Mwahaya bwawi ena txino ahijiwa murima na muhaku obe dhozuzuma dha mwilaboni. (Lk. 8:14) Ena kanrumela wi Mulugu okalawo. Akalawo ena anrumeela okalawo wa Mulugu mbwenye anubuwela wi relijiau jawale, ehikwela vina kinvahana na siensia nne na eziwelo ya attu. Txino aniwa na akwawa, anamasunziha obe attu ambudduwa mu televizauni wi dhilobo kadhina mpaddutxi, nona kanoona mwahaya orumeelela wi Mulugu okalawo. Ena txino asilidhiwe na anddimuwa a makapela abuwene antamela kobiri na dhofuma. Dhilabo dhina alamuleli anowita malamulo ankooddiha mabasa a marelijiau.

3. Txini enfunihu osunza mwari mwa mutoma obu?

³ Yezu ohikokomeza wi “dhowani mwasunzihe athu a malogo otene.” (Mt. 28:19) Ninawodhe dhavi wakamihedha attu ahina relijiau omukwela Mulugu vina okala anamafwara  a Kristu? Ninofwanyela ononelamo wi mukalelo oleliwiye onopatta monelo waye na miselu dhehu. Motagiha, akala muttuya oleliwe w’Europa etanalelo yaye onottiyana na muttu ondela o Ásia. Sabwaya? Sabwani, w’Europa attu ena anoziwa dhilobo dhina mwaha wa Bibilia vina ahiwa wi Mulugu ddittanddile dhilobo dhotene. Mbwenye o Ásia, attu enjene anziwa vang’onovi obe kanziwa elo mwaha wa Bibilia txino kanrumeela wi Mulugu okalawo. Mutoma obu onele onikamihedha oddiginya mirima dha attu otene analaleyihu, nihang’anaga ondela nni obe dhinrumeelani.

4. Ninfunela nni okala okuluvela?

⁴ Okale okuluvela. Vyaka dhotene, attu ahina relijiau anokala Anamoona a Yehova. Enjiya ahikaana mweddelo wapama mbwenye anosilidhiwa sabwa ya osarhapitta wa marelijiau ottambi. Ena ahikaana mweddelo wonyakuwa wafanyeelelani ottiya. Na nikamihedho na Yehova, ninele owodha wafwanya “abale athomeliwe wakela egumi yamukalakala.”—Mer. 13:48; 1 Tim. 2:3, 4.

5. Txini enattukulela attu orumela miselu dhehu?

⁵ Watonyihedhe oderetu na nriho. Dila dhina, attu anovuruwana miselu dhehu, kahiyo sabwa ya esile dhinlogihu, mbwenye mwaha wa mukalelo onlogihu. Awene anoziveliwa nigatonyihedha nriho na oderetu vina mukalelo onazuzumelihu. Iyo kaninadidela awene orumela monelo wehu. Ottiya ejuwene, ninotamela ononelamo monelo wawa mwaha wa relijiau. Motagiha, attu ena kanziveliwa ologa dha relijiau na muttu ohinimuziwani. Ena anubuwela wi jabure ovuziwa enubuweliye mwaha wa Mulugu. Oku ena anokaana manyazo woniwa amwengesaga Bibilia ttabwa-ttabwa akala oli na Anamoona a Yehova. Masiki akala mwahaya ohittiyana, ninfuna nirihe dhubuwelo dha attu.—2 Tim. 2:24.

6. Murumiwi Paulo otonyihedhi dhavi osakula mukalelo mwina wologa, nanda ninawodhe omutagiha dhavi?

⁶ Txini enfunihu okosa akala muttuya kanziveliwa nigalabihedha mazu ninga aba “Bibilia,” “dhottanddiwa,” “Mulugu” obe “relijiau”? Ninfuna nimutagihe murumiwi Paulo nitamelaga osakula mukalelo mwina wologa. Paulo valogiye na Ayuda, walabihedha Malebo wila atanaalelege nawene. Mbwenye valogiye na Agrego o Areópago iyene katonyihedhile wi walabihedha malebo a mBibiliani. (Mer. 17:2, 3, 22-31) Ninawodhe dhavi omutagiha Paulo? Akala onologa na muttu ohinimurumela Bibilia, txino enokala ohilabihedha malebo ogatanalelaga na iyene. Ogoona wi muttuya kanfuna woniwa amwengesaga Bibilia, katamela omutonyihedha malebo, na mukalelo mwina, motagiha mmuttittoni.

7. Mowiwanana na nivuru na 1 Korinto 9:20-23, wila nimutagihe Paulo, txini enfwanyelihu okosa?

⁷ Otamelege ononelamo vina wavuruwana. Ninofwanyela ononelamo enattukulela attu analaleyihu wubuwela na mukalelo wottiyana. (Gano 20:5) Koona wili yotagiha ya Paulo. Iyene wunuwile na Ayuda. Masiki dhawene, iyene osakula mukalelo mwina wila awodhe walaleya Amalabo ahaziwa elobwene mwaha wa Yehova nne mwaha wa Bibilia. Na mukalelo wakakene, wila ninonelamo mukalelo onubuwela attu mmuruddani mwehu, ninofwanyela opepesa obe wavuza abali anziwa deretu muruddaya.—Kengesa 1 Korinto 9:20-23.

8. Mukalelo mwina woromana makani a mBibiliani buvi?

⁸ Yogana yehu ja omutamela “muthu woriheya.” (Mt. 10:11) Nona, ninofwanyela  okumbirha wiwa monelo wa attuya vina wavuruwana nofwaseya. Mbali dhahi wa Inglaterra onvuzaga monelo wa attuya mwaha wa wagalala vamuralani, mukalelo wa walela aima obe anwodha dhavi ovilela obure. Agamala ovuruwana, iyene onowavuza: “Ononamo dhavi mwaha wa malago aba alebiwe wale vyaka 2.000 mundduni?” Nomala, onowatonyihedha malebo asakuliliye mmuttittoni mwaye, ahiromolaga nzu ntti “Bibilia.”

9. Ninawodhe wakamihedha dhavi attu ankoodda ologa mwaha wa Mulugu?

⁹ Enowodheya oddiginya mirima dha attu ankoodda ologa mwaha wa Mulugu, nigatamela ologana elobo-elobovi enapatta. Motagiha, ena anotikina Agang’anaga dhottanddiwa. Nona nitamele ologa makani ninga aba: “Weyo txino onoziwa wi aziwitxi anwodha wita dhitagano dhawa sabwa ya wang’ana dhottanddiwa dhili mwilaboni. Motagiha, attu awodhile osasanya microfone musunzilani maru vina makamera sabwa ya osunza mento ehu. Weyo onubuwela wi dhottanddiwa dhipadduwile na mukalelo gani? Onubuwela wi guru dhotikiniha, muttu obe elobo yina?” Nigamala onvuruwana nofwaseya, nenjedhedhe dhahi: “Akala aziwitxi ahisunza modhela mento na maru, txino ninovivuza awene animutagiha ani? Miyo dhinoziveliwa mazu a namaleba dhahi wa nsaka na wale ologile: ‘Munona ninga ole othanddile maru kaniwa? Othanddile mento kanona? . . . Onavaha athu zelu, kanziwa dhinirani?’ Aziwitxi ena anorumeela wi ebaribari.” (Masal. 94:9, 10) Egawodheya nimulagihe vidiyu mu jw.org^® mpaddi wa “Entrevistas e Casos Reais” vina série ya “A Origem da Vida: Teorias e Fatos.” (Kadhowa PUBLICAÇÕES > VÍDEOS.) Obe egawodheya ninvahedhe brochura A Vida Teve um Criador? obe brochura A Origem da Vida—Cinco Perguntas Que Merecem Resposta.

10. Ninawodhe dhavi wita makani na attu ahinfuna ologa mwaha wa Mulugu?

¹⁰ Attu enjene ahikaana njedhelo na pama na musogorho. Masiki dhawene, awene anowova sabwani anubuwela wi elabo enele otolotxiwa obe kamunakaliwege. Nameddelela milogo dhahi wa Noruega ohiloga wi attu kanfuna ologa mwaha wa Mulugu, mbwenyi ologa mwaha wa dhopadduwa dha mwilaboni. Agamala walejela attuya, iyene onloga  dhahi: “Ononamo dhavi, bani onwodha onivaha njedhelo na pama na musogorho? Onubuwela wi anakale alamuleli, aziwitxi obe muttu mwina?” Agamala wavuruwana nofwaseya, iyene onowengesa malebo anloga mwaha wa njedhelo na musogorho. Attu ena anoziveliwa wiwa mapikirelo a mBibiliani anloga wi elabo kinatolotxiwe vina attu apama anelege okalawo na mukalakala.—Masal. 37:29; Koh. 1:4.

11. Mowiwanana na nivuru na Roma 1:14-16, ninawodhe dhavi omutagiha Paulo olabihedhi makani ottiyana-ttiyana?

¹¹ Ninofwanyela olabihedha makani otti- yana-ttiyana nigalaleyaga. Sabwaya? Sabwani attu ahittiyana. Enimuzivela muttu txino enomusilidha muttu mwina. Attu ena kanziveliwa ologa dha Mulugu obe dha Bibilia, oku ena anrumeela deretu agaromiwa makani mena. Masiki dhawene, ninofwanyela opura gari ya ologa na attu otene. (Kengesa Roma 1:14-16.) Pumwenemo, mbwenye kanidduwale wi ddi Yehova onunuwiha efunelo ya mirima dha abale antamela wira dhapama.—1 Kor. 3:6, 7.

12. Txini enattukulela attu a elabo ya Ásia okana monelo wawi kawo Muttanddi?

¹² Orugunuwa elabo yotene anamalaleya enjene anogumana na attu a elabo ya Ásia, vamodha na abale ankala mimburo dhinimetxiwa mabasa a marelijiau. Dhilabo dhinji dha Ásia, attu enjene kantamela oziwa akala ohikalawo Muttanddi obe nne. Ena agewa anotikina vina anorumeela omusunza Bibilia, mbwenye ena kanfuna wiwa miselu dhiswa. Ninawodhe wakamihedha dhavi? Anamalaleya ena anroma makani, atonyihedhaga efunelo yawa na muttuya, vina anowatapulelamo yopurelamo yawa mwaha wa ovirihamo magano a Bibilia.

13. Txini enakamihedhe attu okana efunelo na mBibiliani? (Koona foto ya kapa.)

¹³ Attu enjene ankwekwetteyela na eziwelo yolabihedheya endana magano a Bibilia. (Koh. 7:12) Murogora dhahi onziveliwa walaleya attu a elogelo ya Mandarin elabo ya Nova York, ohiloga: “Miyo ddinowazuzumela attu vina ddinovuruwana dhinlogani. Ddigaziwa wila attuya anawedda, ddinowavuza: ‘Munoziveliwa na okunowa? Muwodha ofwanya ganyo? Attuya okuno anoweddihani pama?’” Dila dhina mukalelo obu onomukamihedha murogora oroma masunziho a Bibilia. Egakala yofwanyelela, murogora onologaga dhahi: “Ononamo dhavi, txini enanikamihedhe wiwananeyana na attu ena? Ogahiziveliwa miyo wutonyihedha gano ya mBibiliani? Ninloga dhahi: ‘Otota kani oli ninga ofumburha manje abareliwe; enokala obaza orabela mutanene.’ Weyo onubuwela wi malago aba anonikamihedha okala owiwananeyana na attu ena?” (Gano 17:14) Makani ninga aba anonikamihedha oziwa akala muttuya agahiziveliwa wiyeleliwa wili.

14. Mbali wa Extremo Oriente onwodha dhavi wakamihedha attu anloga wi Mulugu kawo?

¹⁴ Txini enfunihu ologa na abale anrumeela wi Mulugu kawo? Mbali dhahi onna dhotagiha dha walaleya attu ahina relijiau o Extremo Oriente onotapulela: “Dila dhinjene, attu anologa wi ‘miyo kaddinrumela wila Mulugu okalawo,’ kuloga, kanrumela dha amilugu abale anewebedhiwa na attu a mmuruddani. Miyo ddinowarumelana, ddilogaga wi amilugu enjene anebedhiwa ba ottambi. Ddigamala ddinengesa Jeremiya 16:20: ‘Ki, muthu onowodha ovyubela amulugu aye?’ Nomala ddinonvuza: ‘Ninwodha ozinddiyela  dhavi akala mulugu webaribari obe witiwe na attu?’ Ddinovuruwana nofwaseya yowakulaya, ngamala ddinengesa Izaiya 41:23: ‘Nilaleyelení dhinfuna opadduwa osogorho; panaziwe iyo wi nyuwo muli amulugu.’ Ddigamala ddinowalagiha yotagiha ya mavuhulo a Yehova akwanihedheyile.”

15. Txini ensunzavo iyo na yotagiha ya mbali wa Leste da Ásia?

¹⁵ Mbali dhahi wa Leste da Ásia onolabihedha mikalelo dhina agakosaga oleddo wa wiyelelawo. Iyene ohiloga: “Miyo ddinowatonyihedha dhotagiha dha eziwelo ya Bibilia, mavuhulo a mBibiliani akwanihedhe vina malamulo anang’anela elabo yotene. Ngamala, ddinologa wi dhotene dhiliwo dhinolagiha wi dhihikaana Muttanddi wa eziwelo. Akala enowodheya muttuya onorumeela wi Mulugu okalawo, ddinomulagiha enloga Bibilia mwaha wa Yehova.”

16. Mowiwanana na Ahebreu 11:6, anamasunza anfanyeelela nni okana nroromelo na Mulugu vina Bibilia, nanda ninawodhe dhavi wakamihedha wunuwiha?

¹⁶ Akala ninoweeddiha nsunzo na Bibilia na attu ahina relijiau, ninofwanyela odhowavi nimukamihedhaga iyene orumela wi Mulugu okalawo. (Kengesa Ahebreu 11:6.) Ninofwanyela wakamihedha awene wunuwiha nroromelo nawa na Bibilia. Enfuneya ja wiyelelavi osekeserha masunzo akakene dila dhinjene. Mugasunzaga txino enofanyeelela otonyihedha ezinddiyelo yawi Bibilia txibarene Mazu a Mulugu. Nimulagihe mavuhulo a mBibiliani akwanihedhe, magano a egumi, na dhopadduwa dhapama vina mukalelo onikamihedha malago a Bibilia siku-siku.

17. Okwela wehu onwodha wapatta dhavi attu ena?

¹⁷ Ninakamihedhe attu okala anamafwara a Kristu nigalagihaga okwela, masiki akala akana relijiau obe nne. (1 Kor. 13:1) Nigasunzihaga, yogana yehu ja watonyihedha wi Mulugu ononikwela vina iyene onfuna wila iyo nimukwelege. Vyaka dhotene matxikwi na matxikwi menjene a attu anna obe ahina relijiau, anosunza omukwela Mulugu ofiyedha obatiziwa. Nona, kakuluvela vina kakana efunelo ya wakwela attu. Ovuruwanege monelo wawa. Katamelaga wanonelamo. Yotagiha yawo yapama enele wakamihedha awene okala anamafwara a Kristu.