NSUNZO 27
Ovisasanyedhe Ovanene Ohinatti Ofwara-Fwariwa
“Etene anfuna wiwananeyana na Mulugu, aluwelana na Yezu Kristu, anofwanya widdiwa.”—2 TIM. 3:12.
JIBO 51 Nikalevi na Yehova
DINASUNZE IYO *
1. Ninfunela nni ovisasanyedha?
OMATTIYU obule Nabuya Yezu ahinakwa, wahiloga wi anamafwara aye agahiddiwa. (Jo. 17:14) Oromana nsaka nttile mpaka ovanene, Anamoona ororomeleya a Yehova anofwara-fwariwa na abale anidda webedha webaribari. (2 Tim. 3:12) Omagomelo oku w’elabo onaddamela, ninofwanyela ovisasanyedha sabwani amwiddani ehu anodhowavi anifwara-fwaraga.—Mt. 24:9.
2-3. (a) Txini enfwanyelihu oziwa sabwa ya wova? (b) Txini enasunzehu mwari mwa mutoma obu?
2 Ninawodhe dhavi ovisasanyedha ovanene? Kaninfwanyela wubuwela dhilobo dhotene dhabure dhinanipadduwele musogorho. Sabwani nigobuwela dhawene, ninele ojeya murima na wova vina odhugudheya. Dhahene ninele ottiya omulabela Yehova nihinatti ofwara-fwariwa. (Gano 12:25; 17:22) Kanidduwale wi wova murega wawopiha onlabihedha ‘mwiddani wehu Satana.’ (1 Ped. 5:8, 9) Ovano, txini enakosihu wila nivisasanyedhe nihinatti ofwara-fwariwa?
3 Mwari mwa mutoma obu, ninele wona enfunihu okosa wila niwodhe olibiha mandano ehu na Yehova. Ninele oziwa enfunihu okosa wi murima wehu okale wolibene. Omamalelowa, ninele osekeserha marhe ananiwodhihe ovilela nigafwara-fwariwaga.
KALIBIHAVI OMARHO WAWO NA YEHOVA
4. Mowiwanana na Ahebreu 13:5, 6, ninfwanyela okana nikuluvelo gani, nanda sabwaya jani?
4 Kakuluvela wi Yehova onowukwela vina kanawuttiye weka. (Kengesa Ahebreu 13:5, 6.) Vyaka dhinjene mundduni, Mwang’aneli wahiloga: “Muttu onimukwela Mulugu onele omukuluvela nsaka na dhoweha nigafiya.” Ebaribari! Wila nipemberhe ofwara-fwariwa, ninofwanyela omukwela Yehova vina omukuluvela mowakwana-mwene, txipo kanaganyedhe wi Yehova ononitanaala.—Mt. 22:36-38; Tia. 5:11.
5. Txini enawukamihedhe ononelamo wi Yehova onowukwela?
5 Omwengesege Bibilia malabo otene na efunelo ya omususela Yehova. (Tia. 4:8) Ogengesaga, ofwaseyelege wona mikalelo dha Yehova. Kobuwela okwela na ttagaraga mwa dhotene dhilogiliye vina dhikosiliye. (Obud. 34:6) Sabwa yohileliwa nokwela, attu enjene anorutxiwa orumela wila anokweliwa na Mulugu. Akala weyo oli mmodhaya, kalebela dhilobo dhinukosela Yehova masiku otene awutonyihedhaga ttagaraga na olevelela. (Masal. 78:38, 39; Rom. 8:32) Kobuwela dhilobo dhinupatta vina katanalela dhinengesiwe mBibiliani, dhawene onele owodha ononelamo vina olebela dhotene dhinuwirela Yehova. Omukwela Yehova, onele wukamihedha olibiha mandano awo na iyene.—Masal. 116:1, 2.
6. Mowiwanana na Masalmo 94:17-19, olobela na murima wotene onawukamihedhe dhavi?
6 Olobelege mudhidhi wotene. Kamubuwele muzombwe onkweliwetxa, dila dhotene onkala mmadani mwa babe. Muzombwe oddule onomukuluvela babe nona onomwaddela dhotene dhinimpadduwela siku-siku. Yakakene enoupadduwela, akala weyo ononfiyedha Yehova na murima wotene, omulobelelaga mudhidhi wotene. (Kengesa Masalmo 94:17-19.) Ogalobelaga onfugulele Yehova, “murima wawo dhilimo dhifukuwe ninga manje” vina omwaddele Babihu wokwela dhotene dhinutxutxa na dhinudhugudha. (Ent. 2:19) Onakaane yopurelamo gani? Onele okuluvela enloga Bibilia wi “murenddele wa Mulugu, onpitha thontho ya muthu, onere okoya mirima na mobuwelo enyu.” (Fil. 4:6, 7) Nlobelo ninele wukamihedha okala ofiyedheya na Yehova.—Rom. 8:38, 39.
Va webedhani wa ntakulu amambali anolabihedha kartau enlagiha malebo a mBibiliani wila ashagihena anawa
Okuluvela eziwelo ya Omwene wa Mulugu ehimulibiha Stanley Jones (Koona ddima 7)
7. Onfunelani okuluvela wi dhopikirela dha Mulugu modhela Omwene waye dhinele wakwanihedheya?
7 Okuluvele wi mareliho a omwene wa Mulugu anele wakwanihedheya. (Oleb. 23:19) Ogahikuluvele mapikirelo a Mulugu, nroromelo nawo ninele wobana, dhahene Satana na nikuru naye anele wupupurutxa. (Gano 24:10; Aheb. 2:15) Onawodhe dhavi wunuwiha nroromelo nawo modhela Omwene wa Mulugu? Kapepesa dhopikirela dha Mulugu modhela Omwene waye vina katamela ononelemo mwahaya onottukulela orumeela wi dhopikireladha dhinele wakwanihedheya. Esidha dhinawukamihedhe dhavi? Koona yotagiha ya Stanley Jones wafugeliwe vyaka tanu na bili sabwa ya nroromelo naye. * Txini emukamihedhile ovilela? Iyene ohiloga: “Nroromelo naga nahiliba vowi ddahikaana eziwelo ya omwene wa Mulugu, ddankuluvela, kaddana yowaganyedha, kavo yafuna wobaniha nikuluvelo naga.” Ogaroromela dhopikirela dha Mulugu, onele okala wofiyedheya na Yehova vina kunovege.—Gano 3:25, 26.
8. Wona matugumano ovanene ekalele nni elobo ya makamaka? Katapulela.
8 Odhowegevi omatugumanoni. Matugumano anonikamihedha wunuwiha mandano ehu na Yehova. Ovaha ttima matugumano elobo yamakamaka, enotonyihedha wila ninele owodha opemberha nigafara-fwariwaga musogorho. (Aheb. 10:24, 25) Ninlogelani dhahene? Nigattiya elobo-txilobo onizuzumiha ovanene mpaka oyelela matugumano, txini enapadduwe musogorho akala ninowika ofuru wehu vangovini wi nitugumane na abali? Mwa mpaddi mwina, nigagana wona matugumano ovanene, amwiddani ehu kanawodhe onitxutxa ofiyedha iyo ottiya otugumana vamodha na abalihu. Nona obu bu mudhidhiya onfwanyelihu ovilibihedha wona matugumano. Akala ninovilibihedha wona matugumano, nne amwiddani ehu peno alamuleli kanawodhe onikooddiha, nne kaninattiye omwiwelela Mulugu.—Mer. 5:29.
Okoya malebo a Bibilia na wiba jibo dha Omwene dhinele onikamihedha nsaka nofwara-fwariwa (Koona ddima 9-10) *
9. Okoya malebo ekalele nni elobo yamakamaka enanikamihedhe ovisasanyedha?
9 Okoye malebo anuzivela. (Mt. 13:52) Yubuwelo yawo kahiyo yowakwana, mbwenye Yehova onolabihedha muya waye wokoddela wila owodhege wubuwela malebo. (Jo. 14:26) Koona elogile mbali wafugeliwe elabo ya Alemanha: “Ddahagalala vaddiddi sabwa ya owodha okoya malebo mmirimani mwaga vyaka dhinjene! Valimi meka ddatanalela miselu dhili mBibiliani.” Malebo ahimukamihedha mbalihu okala ofiyedheya na Yehova—vina wunuwihavi nroromelo naye.
(Koona ddima 10) *
10. Ninfwanyelela nni okoya jibo?
10 Okoye vina wibege jibo dhinimuttittimiha Yehova. Paulo na Sila vafugeliwani o Filipi ahiba jibo dhakoyilani wila amuttittimihena Yehova. (Mer. 16:25) Abalihu aali elabo ya antiga União Soviética vatxedheliwani elabo ya Sibéria ahiwodha olibiheya na mukalelo wakakene, awodhile dhavi? Murogora Mariya Fedun onowubuwela: “Nela wiba jibo dhotene dhobuwela iyo, dha munivuruni na jibo.” Owenjedhedha wi jibo esile dhihilibiha murima wawa vina dhahakamihedha okala ofiyedheya na Yehova. Wiba jibo dha omwene dhinwodha wulibiha dhavi? Ovano kakoya jibo eji!—Koona kasha “ Muddilibihe.”
KALIBIHAGAVI MURIMA WAWO
11-12. (a) Mowiwanana na 1 Samuwel 17:37, 45-47, txini emukamihedhile David oliba murima? (b) Ninsunzavo eni na yotagiha ya David?
11 Wila nivilele ofwara-fwariwa, ninofwanyela okala oliba murima. Akala kunwodha oliba murima, txini enakosiwe? Kudduwale wi oliba murima kahiyo okana guru, okana ewodhelo obe okala muttu wa yumo. Koona yotagiha ya muzombwe David vawaniliye na Goliya. Nigaladdaniha, David wali mwana, wawobana vina kanna vipano dhowanana koddo. David kanna supadda. Mbwenye iyene wali muttu woliba murima. Koova owana na mukango oddule.
12 Txini emukamihedhile David oliba murima? Emukamihedhile nikuluvelo naniye na Yehova. (Kengesa 1 Samuwel 17:37, 45-47.) David kaazuzumele oladdaniha guru dhaye na dha Goliya. Iyene oladdanihile guru dhoyeva dha Goliya na guru dha Yehova. Ninsunzavo eni na yopadduwa eji? Enowodheya iyo oliba murima nigamukuluvela Yehova vina nigaladdaniha guru dha Mulugu Namawodha-wodha na guru dhoyeva dha amwiddani ehu. (2 Map. 20:15; Masal. 16:8) Ninawodhe dhavi olibiha murima wehu—nihinatti ofwara-fwariwa?
13. Ninawodhe dhavi olibiha murima wehu? Katapulela.
13 Ninawodhe oliba murima nigadhowaga olaleya miselu dhapama dha Omwene wa Mulugu. Sabwaya? Sabwani olaleya ononisunziha omukuluvela Yehova vina ohawovaga attu. (Gano 29:25) Maningo ehu anvadda nigavishagihaga, yakakene, wila nunuwihe oliba murima ninofwanyela olaleya numba na numba, vattaddo, vina vego-vegovi vankala attu. Olibiha murima mmabasani a olaleya ovanene onele onikamihedha ovisasanyedha wi nidhowegevi banigalaleya masiki nikooddihiwege.—1 Tes. 2:1, 2.
Nancy Yuen Txipo kattiyile olaleya miselu dhapama dha Mulugu (Koona ddima 14)
14-15. Ninsunzavo eni na yotagiha ya Nancy Yuen na Valentina Garnovskaya?
14 Ninfuna nisunze na dhotagiha dha arogora eeli ororomeleya alagihile oliba murima. Nancy Yuen masiki valiye wokiva na metru owakwana (1.5 m) wahilagiha oliba murima. * Iyene wahikoodda ottiya olaleya miselu dhapama dha Omwene wa Mulugu. Yodhelavoya jawi, wahifugeliwa o China okwaranya vyaka 20. Anamafugela amukosile mavuzo ahiloga wi iyene wali “muttu wannetxa ntidi” mwilaboni mpule mwetemwene.
Valentina Garnovskaya wanziwa wi Yehova oli na iyene (Koona ddima 15)
15 Moligana, Valentina Garnovskaya wafugeliwe o antiga União Soviética dila ttaru dhottiyana, nigengesela dhinowakwana vyaka 21. * Sabwaya? Iyene wahigana odhowagavi bagalaleya mpaka anamafugela ologa wi iyene “panga wawopiha vaddiddi.” Txini yattukuleli arogora aba ororomeleya olibiha murima wawa? Awene anziwa vina ankuluvela wi Yehova wannabarela.
16. Bani oli nipara n’ebaribari na oliba murima?
16 Ninga moonelihu, olibiha murima kahiyo okana guru nne vina okana ewodhelo. Ottiya ejo, ninofwanyela okuluvela wi Yehova oli na iyo vina ddiyene onnisogorhela. (Olib. 1:29, 30; Zak. 4:6) Iyene nipara n’ebaribari na oliba murima.
NINAWODHE DHAVI OVILELA NIGEDDIWAGA NA AMWIDDANI
17-18. Mowiwanana na nivuru na Joau 15:18-21, Yezu onivahile malago gani? Katapulela.
17 Notene ninofuna orihiwa na attu ena, masiki dhawene kaninfwanyela okubanya akala ninopwaziwa. Yezu wahiloga: “Agari ddi nyuwo, athu agawiddani, agawigarani, agoruwanani, agautanyani elaga muli abure thangwi ya Mwana-Muthu.” (Lk. 6:22) Mazu aba alogile Yezu antapulela nni?
18 Yezu kaloga wi Akristu anfwanyela ottaba ageddiwaga. Ottiya ejo, iyene wavahile malago. Iyo ninoziwa wi kaninkosa mpaddi wa elabo ejino. Mbwenye ninfwara masunziho a Yezu vina ninolaleya muselu wakene olaleyile iyene. Yodhelavoya jawi, elabo enonidda. (Kengesa Joau 15:18-21.) Yogana yehu ja orumeliwa na Yehova. Akala attu anonidda sabwa ya omukwela wehu Yehova, abo makani awa.
19. Ninawodhe dhavi osanza yotagiha ya arumiwi?
19 Kuttiye wi merelo obe dhologa dha attu dhuttulele okana manyazo okala Munamoona wa Yehova. (Mik. 4:5) Enowodheya opemberha wova nigasunza yotagiha ya arumiwi valani o Jeruzalemi, Yezu bamalile okwa. Awene anziwa mukalelo wawidda anddimuwa a makapela a Ayuda. (Mer. 5:17, 18, 27, 28) Masiki dhawene, anlaleyavi masiku otene mumparhani na vattaddo onihaga wi ali anamafwara a Yezu. (Mer. 5:42) Awene koovile elobo. Enowodheya iyo obwanyula wova onihu na attu, nigalagihaga wi nili Anamoona a Yehova—nigakala oskola, omabasani vina na anamwanddamani ehu.—Mer. 4:29; Rom. 1:16.
20. Sabwaya jani yattukuleli arumiwi ottaba masiki veddiwani?
20 Sabwaya jani yattukuleli arumiwi ottaba? Sabwani awene ela widdiwa nona oona wi yali gari otabuwela okosa efunelo ya Yehova. (Lk. 6:23; Mer. 5:41) Osogorhowa murumiwi Pedro ohileba: “Mugatabutxeliwa enufunanina Mulugu, muli anyagari!” (1 Ped. 2:19-21; 3:14) Iyo kaninattiye omulabela Yehova masiki nitxutxiwaga na amwiddani ehu.
YOPURELAMO YA OVISASANYEDHA
21-22. (a) Weyo oganile okosa eni wila ovisasanyedhe ovanene? (b) Txini enfunihu wona mwari mwa mutoma ondawo?
21 Iyo kaninziwa mudhidhi gani onfunihu ofwara-fwariwa obe okooddihiwa omwebedha Yehova. Masiki dhawene, ninoziwa wi ninofwanyela olibiha mandano ehu na Yehova, okala oliba murima vina ovilela widdiwa na amwiddani. Ovisasanyedha ovanene enele onikamihedha okala ovikomene musogorho.
22 Txini enakosihu akala mabasa ehu anokooddihiwa? Mwari mwa mutoma ondawo ninele wona magano a mBibiliani ananikamihedhe omulabela Yehova masiki mabasa ehu akooddihiwege.
JIBO 54 “Nilibihe Nroromelo Nehu”
^ Iyo txipo kaninfuna widdiwa. Mbwenye ovanene obe musogorho, notene ninele ofwara-fwariwa. Mutoma obu onele onikamihedha okala oliba murima nigafwara-fwariwaga.
^ Koona A Sentinela wa 1.° ya Maio wa 1966, makuku 275-286.
^ Koona A Sentinela wa 1.° ya Março wa 1980, makuku 4-7. Koona vina vidiyu Todos saberão quem é Jeová mu JW Broadcasting®. Kadhowa ENTREVISTAS E EXPERIÊNCIAS.
^ Koona Anuário das Testemunhas de Jeová de 2008, makuku 191-192.
