Miyo ddibaliwe yaka ya 1954, muttette w’o Saint. Paul, Minnesota, EUA, amudhaga ali Akatolika, a nlogo na Roma. Iyo nibaliwe atanu; mwa abo otanu, miyo ddili mwana wanawili. Ddihikosa masunzo a eskola ya Katolika vina ddali mukamihedhe wa apadri. Mbwenye kaddanetxa eziwelo yinjene ya Bibilia. Masiki varumelimi wi ohikalawo muttanddi, ottanddile dhotedhene dha mwilaboni. Miyo ddatowiwa nroromelo na kapela.

Ddisunzaga yaka yoroma masunzo manddimuwa a ofuru wa attu, atelani dhahi a Anamoona a Yehova ahifiya vatakulu vaga. Vowi labonene ntto miyo ddahizuzuma na mabasa a ofula guwodhaga, ddahakumbirha atelaniya wi eyele labo nina, awene n’oleleya ahirumela. Mwiyelelani, miyo ddahikana mavuzo meli afunimi wakosa: “Attu aderetu ankoddela nni ofuma mwilaboni?” Vina “Txini enfwanyela muttu okosa wi agalale?” Ddahirumela nivuru naddivahilani na mutoma: A Verdade Que Conduz á Vida Eterna vina na Bibilia wa Tradução do Novo Mundo das Escrituras Sagradas wana kori ya mataba a manddimwi. Vina ddahirumela nsunzo na Bibilia. Eji txibarene yahiddifugula mento. Ddihitikina vaddiddi vaziwelimi wi Omwene wa Mulugu bahi, buna ewodhelo ya ogomiha makattamiho anfwanyiwa  malogo a attu. Ddihinonelamo wi vyaka dhotedhene dhalamulela attu, olamulelawa wawa kattiddelena mpirha, ekosilani ja otatamula mwilaboni goi, matabuwo, opujana na ngovi.

Miyo ddimperekele egumaga Yehova omaromo wa yaka ya 1982, myeri dha vasogorhova baddibatiziwa va mutugumanoni wa ttattamwa wana mutoma “A Verdade do Reino”, akosiwe o Centro Cívico w’o Saint Paul. Sumana ya vasogorhova ddihiyelela mburho wakakene wi ddakose mabigiho a masunzo aga. Omaromole wa mweri wa Otuburu ddahimala waddeliwa wi ddahiwodha opemberha vina ddahimala okana ewodhelo ya olaba ninga namalogela.

Vamutugumanoni wa ttattamwa “A Verdade do Reino”, ddihimuziwavo Mike Richardson, iyene walaba o Betel y’o Brooklyn, wahiddadela wi obetel wahitiwa mparha wa ologela makani a nikuru na Anamoona a Yehova. Mubuwele miyo mazu a mukadda Etiópia alebiwe va Merelo 8:36, ddihivivuza: ‘Miyo ddinkoddela nni okumbirha wi ddilabege Mparha obu?’ Nona ddihileba njangarha na okumbirha okamihedha mabasa o’Betel.

Amambali aga kaziveliwe sabwa ya miyo okala Munamoona wa Yehova. Papayaga wahiddivuza wi mabasa gani andowimi okosa o katti enddimuwa, aniwanana na masunzo akosilemi. Ddahimwaddela wi mabasa anfunimi ovilevela. Ddihimwaddela vina wi ddigattambirhihiwa muttengo wa 75 kobiri dha wamerika, obuwene wali muttengo wakamihedhiwanina abetelita vamwerini.

Mmalele miyo ogomiha dharumiwemi omabasani waga, ddihiroma olaba o Betel y’o Brooklyn, yaka ya 1984. Ddattomeliwe Mparha wa Ologela Makani. Ddanziveliwa vaddiddi mabasa abale.

Niburo na Teyatru Stanley, nili mpaddi w’o Jersey City, niguliwe mweri wa Novemburu yaka ya 1983. Abali ahikumbirha wi arumelihiwe osasanyedha mpaddi wa maluz na mpaddi wa manje a mburhoya. Mugumanile abaliya na anamattonga a mmuruddanimwa, awene ahawaddela wi anfuna asasanyedhe mburho wa Stanley wi mukosiwe mutugumano wa Ttattamwa wa Anamoona a Yehova. Dhokumbirha esi dhihitota makani. Ninga munlogela malamulo a mmuttettenimwa, miborho dharumelihiwa okosiwamo mitugumano dha mukapela, dhakala mmiruddani obe mmawani. Mbwenye Teatru ya Stanley yali mpaddi wakosiwetxa marhondda. Abali ahikumbirha dila yanawili, mbwenye karumelihiwe.

Abali ahittukulela makani aba o muttegoni, ejile yali sumana yaga yoroma olaba o Betel. Makani ninga abale, miyo ddanziwa vaddiddi; vowi ddahimala olaba vyaka bili omuttegoni w’o  Saint Paul, o Minnesota. Namalogela wehu ohiloga wi mburhoya wahikosiwa matugumano menjene a muttitti, mwanlagihiwa mafilmi vina mwanibiwa jibo dha rock. Kito yalogeliwa nni wi egali olupa malamulo okosamo matugumano a kapela? Anamattonga a muttegoya ahittonga muladduya vina ahona wi anddimuwa a muttette w’o Jersey ahiviriganiha ofuru wehu wa webedha. Anamattongaya ahiruma wi asasanyedhiwe majangarhaya afuneya. Ddahiroma wona wi Yehova wela oruriha mabasa a Mparha Wologela Makani a Nikuru nehu. Ddahagalala vaddiddi sabwa ya okamihedha ottongiwa wa makani aba.

Mmalelani abali ahiroma mabasa manddimuwa vaddiddi a ovenyihedha mparhaya, vina labo na 8 mweri wa Setemburu yaka ya 1985, yahiwodheya okosiwamo Matugumano a anaskola a nikuru na 79 n’o Giliyadi. Mwa miyo, yali gari enddimuwa vaddiddi okamihedha mparha wa ologela Makani a Omwene. Wagalala wanimina, ohipitta dhotedhene dhakosimi baddili namalogela, ddihinadha o Betel. Miyo nne kaddaziwa wi Yehova onela oddivaha mabasa a ologela makani a nikuru naye.

Oromana yaka ya 1980 adotoro kana elemelelo ya oriha ofuru wakana muredda wa Munamoona wa Yehova wa osakula oja murobwe s’ewekiwa nikame. Ayana akana yari antabuwa vaddiddi sabwani adotoro ankanamo wi awene kana ofuru wa okodda wekiwa nikami. Yalogani yali yawi, kiyali yofwanyela omuttiya mwana se maye sabwa ya mambaliya okodda wekiwa nikami.

Labo na 29 mweri wa Dezemburu, yaka ya 1988, Murogora dhahi wakuweliwa Denise Nicoleau, wahikana makattamiho a obudduwa nikami, mmaleliye-wene obala. Wahijombeliwa nikami vaddiddi ofiyedha dotoro ologa wi iyene onofwanyela wekiwa nikami. Murogora Denise karumele. Mmagwananimwa, anddimuwa onumbaniwa ya egumi ahidhowa ologa na mparha wottonga makani wi arumelihiwe omweka nikami Murogora ole. Namattonga miladdo wa muttegoya ohiruma wi murogoya ekiwe nikami, murogoraya na mamune s’ohiziwa.

Ishano, labo na 30, mweri wa Dezemburu, nikuru na anamalaba onumbani ya egumi ehimwika murogorha Denise nikami. Awene ahimwika nikami, masiki na okodda wa mamune na amudheye ena amweddiha mureddaya. Omattiyu-nne obule, anamudhi enjene a murogora Denise na anddimuwa eli a mmulogoni ahifugeliwa mukamburha; awene amagedhiwena muladdu wawi ahimukoddiha murogora Denise wekiwa nikami. Sika Sabuddu labo 31 mweri wa Dezemburu, mparha dha ovuwiha miselu dhahiroma ovuwiha  ofugeliwa wa abali abale vamodha na amudhiya a murogora Denise.

Txiposi na membesi ddihiloga na Milton Mollen, namattonga miladdu munddimuwa. Ddihimwaddelelamo muladduya vina ddihimpanga wi namattonga miladdu orumelihiwe wekiwa wa nikamina nne kaavuzile anamudhi a mureddaya. Namattonga miladdu ole ohiddaddela wi ddidhowe mudhidhi mwina okambirhinyani waye wi nilogele makaniya deretu vina nombeze vamodha ofuru wa mureddaya. Miyo vamodha na mwimeleli waga, Philip Brumley, nahidhowa okambirhinyani wa Mollen na mattiyu. Namattonga miladdudha vina wahimukuweliha namalogela wa onumbani ya egumi wi akalevo vamakaniniva. Makaniya ahittidda motto. Mudhidhi-nne obule mbali Philip ohiddinong’onela mazu awi, “kafwaseya”. Ali malago a zelu vaddiddi, sabwani miyo ddahiroma onyonyeya, ddikoddaga dhologa dha namalogela wa onumbani ya egumi.

Mmalele iyo ologa mwari mwa wora modha, namattonga miladdo ole ohiloga wi ninela wiyelela makaniya mangwana. Nibudduwa okambirhinyaniwa, namattonga Mollen ohiddaddela wi: “Namalogela wa onumbani ya egumi onela ovurhaniwa vaddiddi mwangwana.” Kuloga wi namalogela agahivuziwa venjene, mwaha wa iyene orumeliha muredda ole wekiwa nikami oku mureddaya ahifunaga. Miyo ddihona wi Yehova wela onaddela wi muladdu wehu kuwali wovegana. Ddihitikina vaddiddi ddonaga wi Yehova wela onivaha mabasa a akosa efunelo yaye!

Nihilaba omattiyu wotene nilaganelaga dhafunihu ologa. Abali enjene a mparha wehu wa ologela makani ahidhowa omuladduniwa, sabwani muttegoya wali vakuvi na Betel y’o Brooklyn. Nikuru na anamattonga miladdu anayi ahiwa dhologa dhehu vina ahiloga wi anamalaba onumbani ya egumi ahimpuja murogora Denise. Awene ahiloga wi namalogela oddule wa onumbani ya egumi kafwanyela oruma wi murogora wehu ekiwe nikami ahinatti ologa na munya, vina ahiloga wi ahilupa malamulo a elaboya mwaha wa oruma wi murogora oddule ekiwe nikami, mwinyaya ahifunaga.

Vasogorhova Muttego Munddimuwa w’o Nova York ahiloga wi murogora Denise wahikana ofuru wa osasanyiwa ahekiwaga nikami. Mmalele muladdu wa murogora Denise, ddiheddiha vina miladdu dhina miraru mmittegoni dhinddimuwa,  _dhidhilehu opembera (koona kasha “ Opemberha Mmittegoni Dhinddimuwa”.) Miyo vamodha na anamalogela ena o Betel nahikamihedha ottongiwa wa makani meena a okoyiwa wa ayima, omwalana na ologela mimburho dha nikuru nehu.

Miyo ddimuziwile mwadhaga, Dawn, nsaka namaliye omwalaniwa. Iyene walela ayima araru, wanlaba, vina wali pionera. Dawn wahifwanyiwa makamiho menjene mwigumini mwaye, miyo ddahifiyedha otikina yogana yaye ya omulabela Yehova. Yaka ya 1992, nihona vamodha Mutugumano wa Ttattamwa wana mutoma, “Portadores de Luz”, pavenevo vamukumbirhilemi weddelelana. Muvirele yaka modha, nihitelana. Dawn mvaho wa Yehova. Iyene muyana woliba vaddiddi omuyani vina onoziwa ovyang’anela. Enfunemi ologa jawi, masaka otene akalewo iyo, iyene wanddittuva dhaderetuvi— Gano 31:12.

Yaka etelehuna, mwanaye woroma wana vyaka 11 wanawili 13 womariha 16. Miyo ddahikana efunelo enddimuwa vaddiddi ya okala babi wawa wapama, nona ddanivilibihedha weddana magano otene afwanyimi mmanivuruni, wi ddakalele tagiha. Mwari mwa vyaka dhavira nangumanana magudulano, mbwenye ovanene ddinohagalala, sabwani wahifiya mudhidhi waddona ayimaya ninga marho wawa vina babiwa wokwela. Iyo nahilaganela elobo modha vatakulu vehu, nattiye amarho a anihu adhege waredha na awene. Nanziveliwa vaddiddi wawona azombwe enjene ohagalalene vatakulu vehu.

Yaka ya 2013, miyo na Dawn nahimwalela o Wisconsin wi nakweye amambalihu anakalaba. Ddahitikina vaddiddi sabwa ya oziwa wi kaddigattiyile mabasa aga o Betel, ddahikumbiriwa okamihedha makani menjene a nikuru nehu.

Mweri wa Setemburu yaka ya 2018, ddihizinddiyela wi miyo ddankuputta vaddiddi mmelo waga ddihinatti ologa. Dotoro waga ohiddombeza, mbwenye kaddifwanyelena eredda. Vasogorhova dotoro mwina ohiloga wi ddidhowe ddamutamele dotoro onombeza viredda dha mugogoni. Mweri wa Janero yaka ya 2019, dotoroya ohiloga wi enoneya ninga miyo ddihikana eredda ehinziwiwetxa, enkuweliwa paralisia supranuclear progressiva (PSP).

Muvirele malabo mararu ddahidhowa olibiha maningo, mmalelani baddivoreheya nlada. Yolibiha maningo yakosimi labo nttile, ddankosa oromana muhimani mwaga. Nona ddihizinddiyela wi misipe dhaga dhahiroma wobana. Oromana mudhidhi-nne obule eredda yaga ehiddiroddowela venjene. Ddahiroma orutxiwa ologa, oja, vina wedda.

Miyo ddinotamalela vaddiddi gari yanimi ya olaba ninga namalogela wi ddikamihedhe dhofuna dha Omwene. Ddihiziveliwa vina gari yanimi ya oleba manivuru menjene anloga mwaha wa dhosunziwa dhinji, vina mwaha wa okosa madiskursu menjene a ologelana ofuru wa nikuru nehu mmanumbani dha egumi vina mmittegoni. Midhidhi-dhene eso miyo ddanwodha ologela ofuru wa nikuru na Yehova wa osakula oja murobwe se wekiwa nikami. Masiki dhawenevi ddinorumela enloga Luka 17:10: ‘Ddili mwimeleli webewene, ddikosile dhafwanyelimi wira.’