Vizinddiyelodha dhinoniha wi Yezu okale Namakutta Munddimuwa mudhidhi obatiziwiye yaka ya 29 N.K. Iyo niziwile dhavi ejiya? Iyene abatiziwaga, ohivileva ninga mukutto onkosiwa vebuwani va Mulugu wi ere ‘ofuna’ wa Babe. (Gal. 1:4; Aheb. 10:5-10) Eji entapulela wi mubatizeliwe Yezu, iyene wela woniha wi oli womala na wale wi akose ofuna wa Babe, obe avahe egumi yaye wi ekuttiwena mukutto. Ebuwa eji ya ezinddiyelo eromile okalawo mmalele Yezu obatiziwa—masaka a wale, ebuwa yankosa mpaddi wa ttima vaddiddi mmusanani—nona enowodheya iyo ologa wi mparha obu munddimuwa ohikalawovi oromana nsaka nibatiziwe Yezu. Ebuwa eji niparha na musana womuyani.—Mt. 3:16, 17; Aheb. 5:4-6.

Musana munddimuwa womuyani onofuniwana namakutta dhahene ninga mwafuneliwana musana munddimuwa wa masaka awale. Yehova ohimuttikittela Yezu ‘muya wokoddela’ wi awodhe wira mabasa aye. (Mer. 10:37, 38; Mk. 1:9-11) Kito ninkanela nni ebaribari wi Yezu ottomeliwe mabasa a Namakutta Munddimuwa abatiziwaga, ottiya mudhidhi waliye ahinatti okwa vina ahinatti ovenyihiwa mukwani? Yotagiha ya Aroni vamodha na anamakutta anddimuwa alabile masaka a wale, enele onikamihedha ononelamo yowakula ya nivuzo ntti.

Nlamulo navahiwe Mizé, naloga wi warumelihiwa ovolowa Mburho Wokoddela na Mburho Wokoddela-koddela wakala Namakutta Munddimuwa bahi. Mburho Wokoddela-koddela na Mburho wokoddela, wanttiyanihiwa na guwo enddimuwa. Namakutta Munddimuwa wadhowa mburho obule Wokoddela-koddela labo na mukutto bahi. (Aheb. 9:1-3, 6, 7) Aroni vamodha na aroromeli ena ahinatti “ovolowa” Mburho Wokoddela-koddela aromile ottikitteliwa muya wolabana mabasa a Anamakutta Anddimuwa. N’ekalelo yakakene, Yezu ahinatti okwa, oromile ottomeliwa mabasa a Namakutta Munddimuwa wi awodhe “ovolowa” odhulu aviraga vaguwoni enddimuwa wi awele wirimu. Maningo emuttu a Yezu kagamuwodhihile owelana wirimu. Iyene wafwanyela ottikitteliwa muya wolabana mabasa a Namakutta Munddimuwa wi awodhe owela wirimu. (Aheb. 10:20) Nona murumiwi Paulo aloga dhahi mwaha wa Yezu: “Txibarene Kristu kavolowile mmusanani omagiwe na mada a athu, wali ezinddiyelo bahi ya musana-musanayá; ovolowilé odhulu-wene, wi aviperheke vali Mulugu, anikalelewo mulogeli wehu.—Aheb. 9:11, 24.

Kavali ottiyana wa mudhidhi witiwe nipagano niswa na mudhidhi ovenyihedhiwani. Ekoddele nni okalavo yottiyana? Mudhowile Yezu wirimu, apereka egumi yaye yohikana yottega wi ekale mukutto wottimihana dhottega dhehu, iyene okale ninga wil’ovenyihedha obe wil’osasanyedha nipagano niswa. Yawireya eji ehita, obe ehikosiha nipaganona olabagavi. Ttarho gani dhikosiwe wi ejiya epadduwe?

Voroma, Yezu wahidhowa vamento va Yehova. Yanawili, iyene ohimperekela Yehova ttima ya mukutto waye. Yaneraru, Yehova ohirumela ttima ya nikami na Yezu nttuwene nikutteliwe dhottega dhehu. Ttarho esi dhihinatti wiriwa nipagano niswa nali nihinatti oroma olaba.

Bibilia kanloga mudhidhi wakele Yehova ttima ya mukutto wa Yezu. Nona, kinwodheya iyo otonya mudhidhi ovenyihedhiwe nipagano ntti niswa nne vina mudhidhi oromilani olaba. Enziwehu jawila mudhowele Yezu wirimu, ahivira malabo kumi Pentekoste ahinatti otugumaneliwa. (Mer. 1:3) Mwari mwa mudhidhi obu mung’onovi, Yezu ohimperekela Yehova ttima ya mukutto waye vina Yehova ohirumela. (Aheb. 9:12) Eberibari ya dhologa esi, jijile epadduwile nsaka na Pentekoste wa yaka ya 33. (Mer. 2:1-4, 32, 33) Mohaganyedha nipagano niswa nahiroma olaba.

Makaniya angwela apa, nipagano niswa nivenyihedhiwe vina niromile olabiwana mudhidhi wakele Yehova ttima ya mukutto wa nikami na Yezu. Nipagano niswa nihiroma olaba, Namakuttaya Munddimuwa ddi Yezu, oli ninga mwimeleli.—Aheb. 7:25; 8:1-3, 6; 9:13-15.