1. Txini yanonelamo murumiwi Paulo?

MURUMIWI Paulo wannonelamo wi wankana mudhidhi wakaliye wokumuwene. Iyene ohifiyedha ologa mazu awi, “maningo ehu anlalavi siku-siku”; kuloga iyene wankosa guru wi akose dhili dhomyala, wannimukumbirha Yehova nikamihedho, mbwenye kahiye masaka otene arumeliwiye. (2 Kor. 4:16; 12:7-9; Rom. 7:21-23) Paulo vina wanziwa wi amwiddani aye amona ninga muttu wawobana. * Mbwenye iyene kakumuwile nne vina kobanile sabwa ya ekalelo yoniweyi na attu ena.— 2 Kor. 10:10-12, 17, 18.

2. Ninga munlogela 2 Korinto 12:9, 10, Paulo ononelemo masunziho gani a ttima?

² Paulo ohinonelamo masunziho a ttima vaddiddi—enowodheya muttu okala woliba, masiki muwobanani. (Kengesa 2 Korinto 12:9, 10.) Yehova wahimwaddela Paulo wi “owodha [waye] ononeyetxa vanobana muthu”; kuloga guru dha Yehova dhigahimuttukulela Paulo okana ewodhelo yamujombela. Voroma, ndoweni none enkoddela iyo wobana amwiddani ehu aganiruwanaga.

3. Iyo ninfwanyelela nni ottabela oruwaniwa?

³ Kawo muttu wa iyo onziveliwa oruwaniwa. Nona akala amwiddani ehu anoniruwana vina dhologadha dhikala dhonimagedhana, iyo ninokumuwa vaddiddi. (Gano 24:10) Txini  enfwanyelihu okosa ejuwoya egapadduwa? Moligana na Paulo, iyo ninofwanyela ‘ottabela . . . oruwaniwa.’ (2 Kor. 12:10) Ninttabela nni? Sabwani nigaruwaniwaga vina nigafwara-fwariwaga, pavenevo vanziwehu wi nili anamafwara ebaribari a Yezu. (1 Ped. 4:14) Yezu ohiloga wi anamafwara aye agahifwara-fwariwa. (Jo. 15:18-20) Ebaribari ya mazu aba yoneyile masaka zana oroma. Vasogorhova, abale aravihiwa yeddelo ya Agregu, ahikana esangu ya wawona Akristu ninga attu ahasunzile elo, vina owobana. Vari va Ayuda, Akristu oniwa ninga “athu a mmawani” ninga yoniwa murumiwi Pedro vamodha na Joau. (Mer. 4:13) Akristu anoniwa ninga attu awobana, sabwani awene kanivitaganyiha na politika nne na anyakoddo a mwilaboni; attu anawona awene ninga ogaweya mwari mwa malogo.

4. Txini ekosile Akristu oroma afwarafwariwaga?

⁴ Akristu a vyaka zana dhoroma ahikumuwa sabwa ya dhologa dha amwiddani awa? Nne. Ninga motagiha, Pedro na Joau ona ninga ttima ofwafwareliwa Yezu vina weddana masunziho aye. (Mer. 4:18-21; 5:27-29, 40-42) Kavali sabwa ya anamafwara abale okaana manyazo, masiki eziweyaga wi attu a masaka abale kariha Akristu, anamafwara a Yezu ahikosa venjene wi akamihedhe attu akwawa. Ninga motagiha, manivuru ovudheleliwa alebile Akristu anodhowavi akamihedhaga vina avahaga njedhelo attu matxikwi na matxikwi. Veli-veli, Omwene onlaleyani ohiroma olamulela wirimu, vina ovanene onele walamulela attu a malago otene. (Mt. 24:14) Nigaladdaniha, ninowona wi alamuleli abale a Roma afwarafwara Akristu a vyaka zana dhoroma alamulele mudhidhi mung’onovi. Mottiyana-mwene Akristu abale afwarafwara awene masaka abale, ddabuno anolamulela wirimu. Amwiddani awa ahimala okwa, vina akala anele ovenyihiwa anelege olamuleleliwa na Omwene wavuwihiwa na Akristu awiddani.—Ovuh. 5:10.

5. Ninga munlogela Joau 15:19, nlogo na Yehova nintanyeliwani?

⁵ Masaka abano attu a nlogo na Yehova anotanyiwa, anoruwaniwa, anowoniwa ninga attu ahisunzile vina awobana. Sabwaya jani? Sabwani awene kanfwara yeddelo ya attu a mwilaboni. Iyo ninotamela okala oviyeviha, okurumuwa, vina owiwelela. Mottiya-mwene mwene attu a mwilaboni, anovitukulkela, anovigwarula vina adiyamaru. Mwawenjedhedha, iyo kannivittaganyiha mmabasani a politika nne vina kaninvolowa mmabasani a onyakoddo a elabo-elabovi. Iyo nihittiyana vaddiddi na attu a mwilaboni, nona awene aganona ninga attu ohikana ttima.—Kengesa Joau 15:19; Rom. 12:2.

6. Mabasa gani ankosa Yehova na Nikuru naye?

⁶ Mottiyana na attu a mwilaboni anoona ninga nili awobana, Yehova ononlabihedha wi nikose dhilobo dhinjene. Iyene ononlabihedha wila nikose mabasa manddimuwa vaddiddi a olaleya, abuwene ahinatti okosiwaga velaboni ya vati. Alabeli aye anotapulela vina anopaka maninvuru a ttima enddimuwa vaddiddi velaboni ya vati, awene anolabana Bibilia wi akamihedhena attu amiliau enjene wogolela egumi yawa. Nttittimiho notene onfwanyela ovahiwa ddi Yehova, odduwene onlaba na attu anoniwa ninga awobana oku akosaga mabasa manddimuwa vaddiddi. Kito mwa ologa dha muttu-muttu wa iyo? Yehova ononikamihedha okana guru? Txini enfwanyelihu okosa wi nikamihedhiwe na iyene? Ninfuna none dhilobo tharu dhamakamaka dhinfwanyeelihu osunza na yotagiha ettiyile murumiwi Paulo.

7. Elobo gani yoroma ensunzihu mwari mwa yotagiha ya Paulo?

⁷ Elobo yoroma ensunzihu na yotagiha ya Paulo jiji: kukuluvele guru na ewodhelo yawo mumulabelani mwawo Yehova. Mwari mwa monelo wa attu Paulo wahikana mwaha wovittukulela. Iyene wunuwile o Tarsi muttette wa kwathi ya Roma. Tarsi wali muttette worela vina wavuwile vaddiddi na masunzo. Paulo wali muttu wasunzile vaddiddi, iyene wasunzihiwe na mulobwana wattittimihiwa vaddiddi na Ayuda wetaniwa Gamaliyeli. (Mer. 5:34; 22:3) Mwa mpaddi mwina Paulo wahirava yeddelo ya Agrego. Iyene ohiloga: “Ddanfuna magano ayuda opitha akwaga ena etene a nlogo naga.” (Gal. 1:13, 14; Mer. 26:4) Mbwenye Paulo kavikuluvela mwinya.

8. Mowiwanana na Filipi 3:8, Paulo wona dhavi dhilobo dha Mwilaboni dhattiliye, vina iyene ‘wattabela dhavi wobana waye’?

⁸ Paulo na murima wetene wahagalala sabwa yottiya mweddelo wa mwilaboni. Txibarene, iyene wona dhotedhene dha mwilaboni, ninga “dhotakala dhinguddeliwa vazunguni.” (Kengesa Filipi 3:8.) Paulo wahitabuwa-wene mwaha wokala namafwara wa Kristu. Iyene wahibubuddiwa na attu a muttette waye w’o Roma ofiyedha odhowa ofugeliwa mukambura. (Mer. 16:19-24, 37) Masiki dhawene Paulo wahikaana ewodhelo yapitta wobana waye. (Rom. 7:21-25) Ottiya okumuwa obe wobana sabwa ya amwiddani aye anfwarafwara, iyene ‘wanttabela wobana waye.’ Sabwaya jani? Sabwani venevo vobaniye poniye guru dha Mulugu emukamiyedhaga.—2 Kor. 4:7; 12:10.

9. Txini enfwanyelihu wubuwela nigafwanyiwa makattamiho makattamihovi?

⁹ Akala iyo ninfuna nakele ewodhelo ya Yehova, kanubuweleni wi guru dhehu, masunziho, elemelelo ya elabo ebaliwehu obe dhokana dhehu dhinowoniha ttima enihu. Kahiyo dhilobodhene esi dhinittukulela olabihedhiwa na Yehova. Txibarene vari va attu a nlogo na Mulugu “kavali aziwetxi enjene anlogiwa mwilaboni, kavali anamawodha enjene, nne athu enjene ethomo.” Ottiya ejo, Yehova “oasakula anoniwana wobana vamentoni  akwawa.” (1 Kor. 1:26, 27) Nona makattamiho makattamihovi anufwanya kakale mwaha wawuttiha omulabela Yehova. Ottiya ejo wonege ninga gari yowakelana nikamihedho na Yehova mwigumini mwawo. Ninga motagiha akala weyo onokana manyazo a wattapulelamo attu ena dhorumela dhawo, kamulobelele Yehova wi ovahe murima woliba wi owodhe wamelela nroromelo nawo. (Ef. 6:19, 20) Akala weyo onowanana eradda ehiniwa murobwe, kamukumbirhe Yehova wi awuvahe guru wi okane ewodhelo ya ozuzumela mabasa aye. Mudhidhi ononege weyo nikamihedho na Yehova, nroromelo nawo niganwarala vaddiddi vina oganliba venjene.

10. Ninfwanyelelani osunza dhotagiha dha attu a nroromelo dhili mmbibiliani, ninga esi dhilogiwe mukartani ya Ahebreu 11:32-34?

¹⁰ Paulo wali muttu wakanela ntidi osunza malebo. Iyene ohisunza dhilobo dhinjene dhohiruneya, vina ohisunza dhotagiha dha nlogo na Mulugu dhilebiwe Munzuni naye. Paulo alebelaga Akrisu Ahebreu, iyene wahaloba wi awene obuwelege dhotagiha dha adhari ororomeleya a Yehova a masaka a wale. (Kengesa Ahebreu 11:32-34.) Karoma osunza yotagiha ya mulabeli mmodhayavo, Mwene David. Iyene kafwarafwariwa na amwiddanayevi bahi, masaka mena wanfwra-fwariwa vina na abale aligi amarho aye. Nigatanalela yotagiha ya Davidi ninele wona Guru yadheliwa murumiwi Paulo venevo vatameliye otanalela dhopadduwa dha mwigumini mwa David. Nigamala ninofwanyela otagiha yeddelo ya Paulo.

11. David woneliwani ninga muttu wawobana? (Kang’ana foto ya kapa.)

¹¹ Goliya wamona David ninga muttu wawobana. Goliya mmoneliye David ‘Ohimpepula, obe ohimunyaparhiha.’ Ninga munziwelihu Goliya wali munyakoddo woliba vaddiddi wanna vipano dhofwanyelela orabana koddo, vina wana ewodhelo ya oraba koddo. David wali mozombwe wahanna ewodhelo yorabana koddo vina enkala ninga kana vipano dhowanana koddoya. Mwenye David ohikosiha ejile yoniwa ninga yawobana, bikala yoliba. Iyene ohikuluvela guru dha Yehova bafiyedha wagonjiha amwiddani aye.—1 Sam. 17:41-45, 50.

12. Makattamiho gani agumanilena David?

¹² David wahifwanya makattamiho menjene agamuttukulele wobana obe okumuwa. David wahimulabela nororomeleya Mulobwana wattomiwe na Yehova wi akale mwene wa Israyel wakuweliwa Saul. Vamaromovene, Mwene Saul wanimuriha David. Vasogorhova, ovittukulela ohimukosiha Saul omukanela ntxiga David. Neji ohiroma onfwara-fwara David, atamelaga ompa.—1 Sam. 18:6-9, 29; 19:9-11.

13. Txini ekosile David mudhidhi wamweddiha Mwene Saul N’obure?

¹³ Masiki n’opujiwa wetene weddihiweyi na Mwene Saul, David wandowavi amweddihaga na nriho mwene wasakuliwe na Yehova. (1 Sam. 24:6) David kanvahile Muladdu Yehova sabwa ya dhilobo dhabure dhamukosela Saul. Ottiya ejo, David wannonelamo wi Yehova dduninvaha guru wi awanena makattamiho otene.—Masal. 18:1.

14. Makattamiho gani agumanilena murumiwi Paulo abuwene aligana na a David?

¹⁴ Murumiwi Paulo opadduweliwa makattamiho akakene afwanyiwe David. Amwiddani a murumiwi Paulo aali attu a ewodhelo vaddiddi. Anddimuwa a nlogo a masaka aye aninpuja, awene anibubuddiha vina aninfugeliha. Dayene ninga David, Paulo waneddihiwa nobure na attu ali amarho aye. Akristu ena a mmulogoni animwidda. (2 Kor. 12:11; Fil. 3:18) Mbwenye Paulo wahiwodha owanana  makattamiho abale etene. Owodhile dhavi? Iyene odhowavi alaleyaga masiki nofwara-fwariwa. Iyene waneddeyanavi na abali vamodha na arogoraya masiki vamunyimulani. Yamakamakaya jawi iyene wahikalavi wororomeleya ofiyedha omagomo wokalawo waye. (2 Tim. 4:8) Iyene wahiwanana widdiwa onddimuwa vaddiddi, mbwenye kawanilena na guru dhaye, owodhile opemberha sabwa ya omukuluvela Yehova.

15. Txini enfwanyelihu ogana okosa vina ninawodhe dhavi?

¹⁵ Weyo wahiromaga oruwaniwa obe ofwara-fwariwa, oskola, omabasani obe namwana-mmudhi ohili munamoona wa Yehova? Wahiromaga weddihiwa bure na muttu wa mmulogoni? Akala ejo ehupadduwela, wubuwele yotagiha ya David na Paulo. Enowodheya weyo ‘opemberha mubureni wiraga dhapama.’ (Rom. 12:21) Mottiyana na David, efunelo yehu kahiyo ya ottukula mwarha wi nitwena misorho dha attu annidda, yofuna yehu ja watamela attu aniwelela wi nike muyubuweloni na mmurimani mwawa mazu a Mulugu. Enowodheya weyo okosa merelo ninga aba, ogakuluvela wi Bibilia ohikana dhowakula dha mavuzo a attu; mwa wariha, wavilela abale anukosela dhabure, vina mwa waweddiha pama amwiddani awo.—Mt. 5:44; 1 Ped. 3:15-17.

16-17. Txini yahadduwala Paulo?

¹⁶ Paulo ahinatti okala murumiwi wa Kristu, iyene wali muzombwe wawidda anamafwara. (Mer. 7:58; 1 Tim. 1:13) Yezu mwinyene wahimutximiha Paulo, odduwene waziwiwa ninga Saul, mwaha wa watxutxaga Akristu a mmutugumanoni. Yezu wahiloga na Paulo ovenyana wirimu vina wahinfuga mento. Paulo wahimageleleya watamela attu afwara-fwariye wi amukamihedhe wiyelela wona. Iyene na oviyeviha ohirumela nikamihedho na murumiwi wakuweliwa Ananiya odduwene omuwodhihile ofugula mento aye.—Mer. 9:3-9, 17, 18.

¹⁷ Vasogorhova Paulo wahivuwa vaddiddi Mmulogoni, mbwenye iyene txipo kadduwale nsunzo namusunzihile Yezu bali mudila Yodamasko.  Paulo wahikanavi ekalelo yoviyeviha vina na murima wotene wahirumela nikamihedho na abali vamodha na arogoraya. Iyene wahinonelamo wi awene ali abale ‘amulibihile’.—Kol. 4:10, 11.

18. Masaka mena enrutxelagani wakela nikamihedho na attu ena?

¹⁸ Yotagiha ya Paulo ennisunziha eni? Muromole iyo ovitaganyiha na attu a nlogo na Yehova, iyo nanrumela nikamihedho na attu ena, ninonelagamo wi nanfuna okamihedhiwa venjene mpaddi womuyani. (1 Kor. 3:1, 2) Kito ovanene? Akala iyo niromile omulabela Yehova mwari mwa vyaka dhinjene, enodha opadduwa iyo ohikana murima wa orumelana nikamihedho ninvahiwehu; ttabwa-ttabwa akala onnivaha mbali oli muswa mwibaribarini. Mbwenye masaka mena Yehova onalabihedha abali na arogora wi anilibihe. (Rom. 1:11, 12) Akala iyo ninfuna nakele guru dha Yehova, ninofwanyela orumela nikamihedho na abali vamodha na arogoraya.

19. Txini emuttukulele Paulo okana mperhe?

¹⁹ Paulo ohikosa mabasa manddimuwa vaddiddi mukaleliye Mukristu. Owodhile dhavi? Sabwani iyene wile ononelamo wi muttu onkana mperhe kaiyo ole onkuluvela guru dhaye, masunzo, obe yeddelo ya elabo yaye, mbwenye ddule onviyeviha vina onimukuluvela Yehova. Notene ninofwanyela omutagiha Paulo mwa (1) omukuluvela Yehova, (2) osunzaga dhotagiha dha Mbibiliani, vina (3) orumelaga nikamihedho na alabeli akwehu. Nigakosa dhawene kinattanale mukumuwelo onakumuwihu, Yehova onela onilibiha!