1. Ninga munlogela 3 Joau 3, 4, elobo gani ennikosiha wagalala?

WEYO onowodha wubuwela wagalala wanna murumiwi Joau vewaliye wi attu abale akamihedhiliye oziwa ebaribari anodhowavi amulabelaga Yehova na nroromelo noliba? Awene ahifwanyiwa makattamiho menjene, mbwenye Joau wahilaba na guru dhetene wi akamihedhe olibiha nroromelo na Akristu abale awoniye ninga anaye omuyani. Na mukalelo wakakene, ninottaba venjene nigawonaga anihu obe abale anakamihedhihu oziwa ebaribari avilevelaga mwa Yehova vina odhowagavi amulabelaga iyene.—Kengesa 3 Joau 3, 4.

2. Sabwaya jani emuttukulele murumiwi Joau oleba makarta aba?

² Yaka ya 98 N.K., Joau wakala waddamela o Éfeso. Enkala ninga iyene odhowile elabo ejile mmaleliye oburutxiwa mukamburha mwaliye, o Patmos. Movira wa mudhidhi, Muya wokoddela wa Yehova wahimukamihedha wi alebe makarta mararu. Makarta aba alebeliwe Akristu wila alibihena omuroromela wawa Yezu vina eddegevi mwibaribarini.

3. Ninakule mavuzo gani?

³ Murumiwi Joau wali omariha wa arumiwi otene, iyene wali odhugudheya mwaha wa asadduweli ansunziha dhilobo dhottambi mmulogoni. * (1 Jo. 2:18, 19, 26) Asadduweliya anloga wi iyo ninomuziwa Mulugu, oku ahivirihagamo malamulo aye. Ndoweni nisekeserhe malago avudheeleliwe Joau. Mwari mwa nsunzo ntti, ninele osunza malago anivahile Joau vina ninele wakula mavuzo mararu: Wedda mwibaribarini entapulela eni? Dhoweha gani dhigadhile onitximiha weddagavi mwibaribarini?  Ninawodhe dhavi okamihedhana muttu na mukwaye wi needdege mwibaribarini?

4. Mowiwanana na 1 Joau 2:3-6 vina 2 Joau 4, 6, txini enfwanyelihu okosa wila needdege mwibaribarini?

⁴ Wedda mwibaribarini entapulela oziwa ebaribari enfanyeya mBibiliani. Ottiya oziwavi, ninofwanyela onvuruwana Yehova vina ‘ovirihagamo malamulo’ aye (Kengesa 1 Joau 2:3-6; 2 Joau 4, 6.) Yezu ottiya yotagiha yowakwana y’omwiwelela babe Yehova. Mukalelo mmodha wamakamaka wolagiha wi ninomwiwelela Yehova ku ofwara ttarho dha Yezu.—Jo. 8:29; 1 Ped. 2:21.

5. Nikuluvelo gani ninfwanyelihu okana?

⁵ Wila niwodhe weddagavi mwibaribarini, ninofwanyela okuluvela wi Yehova ddi Mulugu webaribari kawo mwina, vina dhetedhene dhinloga iyene mBibiliani s’ebaribari. Vina, ninofwanyela orumela wi Yezu ddi Muttikitteliwi. Attu enjene anowaganyedha wi Yezu ottikitteliwa ninga Mwene wa Omwene wa Mulugu. Joau wahiloga wi ahikalawo ‘anamasunziha enjene ozivala;’ anamasunziha aba antamela wapupurutxa abale ahannetxa ebaribari mwaha wa Yehova vina mwanaye Yezu. (2 Jo. 7-11) Joau wahileba: ‘Apa muthambi dduvi, kaiye ole onkodda wi Yezu ddi Muthikitheliwi?’ (1 Jo. 2:22) Mukalelo mmodha worabela onyengettiwa bwa osunza Mazu a Mulugu. Nigakosa ejuwene, ninele omuziwa Yehova vina Yezu. (Jo. 17:3) Dhahene, ninele okuluvela wi ninkaana ebaribari.

6. Yoweha gani engumanana azombwe ali Akristu?

⁶ Akristu otene anofwanyela okala txenjewa na masunziho opela malago. (1 Jo. 2:26) Ttabwa-ttabwa azombwe ali Akristu enofuneya okalela txenjewa na mirega esi. Murogora Alexia * wa elabo y’o França onna vyaka 25 ohiloga: “Valimi muzombwe ddakala ozuzumene na dhubuwelo dha mwilaboni, ninga motagiha miyo ddanrumeela masunziho opela malago awi dhilobo dhetedhene dhipadduwile woka, kawo muttanddi. Masaka mena, miyo ddanziveliwa na masunzihoya. Nona, ddanrumeela dhetedhene dhasunzihiwemi oskola, mbwenye ddanubuwela wi kahiyo elobo yapama ottiya orumela esile dhinsunziha Bibilia.” Alexia osunzile manivuru aba A Vida —Qual a Sua Origem? A Evolução ou a Criação? Movira mudhidhi mong’onovi waganyedha waniye wahidha ogoma. Alexia ohiloga: “Miyene, ddahifiyedha woona wi dhetedhene dhinloga Bibilia s’ebaribari. Miyo ddizinddiyela wi okalawo mowiwanana na magano a Mulugu, enodhana ottaba vina Murenddele.”

7. Dhoweha gani dhinfwanyeelihu orabela vina sabwaya jani?

⁷ Akristu otene, azombwe na owunuwelavo anofuniwana okala attu a murima mmodha wi egumi yawa enazuzumihiwe na dhilobo dha mwilaboni. Joau wahiloga wi kinwodheya wedda mwibaribarini vina okosaga dhilobo dhonyakuwa. (1 Jo. 1:6) Akala ninofuna orumeeliwa na Mulugu ovanene vina musogorho, ninofanyela okana merelo aderetu mwaha dhetedhene dhinkosihu vamentoni va Yehova. Nona, kayiwo yoddawa yoviteya sabwani Yehova onowona dhotedhene dhinkosihu moviteyani.—Aheb. 4:13.

8. Txini enfwanyelihu orabela?

⁸ Ninofanyela orabela dhottega dhinkosiwa mwilaboni. Murumiwi Joau wahileba: “Nigaloga wi ‘kanithegile’, ninovipela malago nanya.” (1 Jo. 1:8) Masaka akalawo Joau, asadduweli anloga wi enowodheya muttu wira yottega yebewene, agamala bakalavi worumeliwa vamentoni va Yehova. Masaka abano ankalihu ahikalawo attu anna mubuwelo wakakene. Attu enjene anorumeela wi Mulugu ohikalawo, mbwenye kanrumela wi Yehova onowoona dhoddawa dhotene, ttabwa-ttabwa abale ankosa mararuwo. Ejile enoona Yehova ninga elobo yottega, awene anowubuwela wi saderetu alogaga wi kavali makani, dhosakula dhomwinya.

9. Azombwe anapurelemo dhavi esile dhinsunzani mBibilini?

⁹ Azombwe Akristu egahikale txenjewa anodha okana dhubuwelo dhonyakuwa dha akwiwa a omabasani obe oskola. Jijuwene epadduwile na Aleksandar. Iyene ohiloga wi:  “Anamwali a oskola afuna oddikwekwetta wi ddikose mararuwo na awena. Anloga wi ddimweddelelege mulobwana mukwaga, vowi kaddana muyana wamweddelelimi.” Akala weyo onopadduweliwa yoweha ninga ejene oziwe wi, ogavirhihamo malago apama a mBibiliani onela opurelamo. Okosa dhinruma Bibilia onouvaha ttima, onokoddeliha omuttu wawo vina onowaraliha omarho wawo na Yehova. Kudduwale wi onlamulela elabo eji ddi Satana. Nona weyo agarabela dhubuwelo dhamwilaboni, ‘onowodha omuttawa Satana.—1 Jo. 2:14.

10. 1 Joau 1:9 onikamihedha dhavi omulabela Yehova na mobuwelo wotxenene?

¹⁰ Iyo ninoziwa wi Yehova ddina onddimuwa wottongana merelo ottega. Vina iyo ninkosa guru wi nihittege. Mbwenye nigattega ninombwekwela Yehova dhoddawa dhehu munlobeloni. (Kengesa 1 Joau 1:9.) Nigakosa yottega enddimuwa, ninokumbirha nikamihedho na anddimuwa a mulogo abuwene attomiwe na Yehova wi aneddihege. (Tia. 5:14-16) Mbwenye iyo kanikalege wokubanyene mwaha wa dhotega dhikosilihu wale. Sabwaya ja eni? Sabwani Babi wehu wokwela onivaha mukutto wa mwanaye wila anilevelele. Yehova ogaloga wila olevelela dhottega dhehu iyene onowira enlogiye. Nona kawo elobo enitximiha omulabela Yehova na mubuwelo wotxenene.—1 Jo. 2:1, 2, 12; 3:19, 20.

11. Ninawodhe dhavi obarela Yubuwelo yehu na masunziho agadhile wobaniha nroromelo nehu?

¹¹ Ninofwanyela orabela masunziho asadduweli. Ovenyana nsaka niromile mulogo W’okristu Ddiabo onowalabihedhaga anamanyegetta enjene wila atxeye waganyedha muyubuweloni mwa emeleli ororomeleya a Mulugu. Iyo ninofwanyela oziwa ottiyaniha ebaribari na ottambi. * Txino amwiddani  ehu anodha olabihedha interneti obe dhipano dhovavihana mazu wi agwaddena okwela onkanihu na abalihu. Kurumele dhottambi eso sabwani dhindela wa Satana!—1 Jo. 4:1, 6; Ovuh. 12:9.

12. Ekaleleni yofuneya iyo otamaalelaga venjene ebaribari esunzilihu?

¹² Wila nirabele mirega dha Satana ninofwanyela okuluvela ebaribari mwaha wa Yezu, ettomo eniye ya wakwanihedha dhifunelo dha Yehova. Ninofwanyela okuluvela nikuru ninlabihedha Yehova wila anijiye omuyanni masaka abano. (Mt. 24:45-47) Ninowoniha wi ninokuluvela ebaribari eji nigasunzaga mazu a Mulugu. Nroromelo nehu ninele okala ninga muri ontibela mitxitxi dhaye vati va mattaka. Paulo ohiloga nladdaniho nakakene alebelaga Akrisu a mulogo Wokolosi. Iyene ohiloga: “N’omwakela wenyu Kristu Nabuya, eddaganí mumodhani na iyene. Bari musunzihedhiwenyu, ororomela wenyu okale pwi mwa Kristu, ninga miri dhitxeyiwe mwa iyene, ninga numba dhitibeliwe mwa iyene. Mmutamalelagavi Mulugu.” (Kol. 2:6, 7) Kayiwo elobo enalabihedhe Satana nne abale anawang’aneliye enawodhe wobaniha nroromelo na Akristu.—2 Jo. 8, 9.

13. Txini dhinjeedhelihu opadduweliwa nanda sabwaya jani?

¹³ Iyo ninofwanyela oziwa wi ninela widdiwa na attu a mwilaboni. (1 Jo. 3:13) Joau ohiloga dhahi, “Niziwa wi nilí akadda Mulugu, oku elabo yotene ekalaga mmaddani mwa satana.” (1 Jo. 5:19) Owali wa Satana onowinjivavi sabwani ohalilena malabo mang’onovi. (Ovuh. 12:12) Iyene onobeddegela nowali vaddiddi, onolabihedha mararuwo na ottambi wa asadduweli. Iyene vina onolabana otabala wosegedha. Satana onoziwa wi ohalilena malabo mang’onovi nona iyene onokasa guru yingene wi atximihe mabasa ehu olaleya, vina obanihe nroromelo nehu. Nona iyo kanintikina, nigaziwa wi mabasa ehu anokooddihiwa mwari mwa dhilabo dhinjidhene. Masiki dhahene abali na arogora ali mwari mwa elabo esi alivi oororomeleyene. Awene anowoniha wi Satana masiki akose elobo-elobovi nlogo na Yehova ninokalavi nororomeleyene!

14. Nekalelo gani enfwanyelihu wakamihedha abali vamodha na arogoraya okalavi mwibaribarini?

¹⁴ Wila nakamihedhe abali na arogora okalavi mwibaribarini ninofwanyela olagiha ttagaraga. (1 Jo. 3:10, 11, 16-18) Ninofwanyela okwelana muttu na mukwaye, kahiyo mudhidhivi wapama, mbwenye musegedheyani vina. Ninga motagiha, weyo onomuziwa muttu okweliwe mmudhaye wokweleya odduwene onfuna nipangarazo obe nikamihedho-nikamihedhovi? Obe weyo ohiwa wi abali ena anotabuwa sabwa ya vizini dha mwilaboni vina anofuna nikamihedho na omageliwa Numbawa ya Omwene? Iyo ninolagiha wi ninowakwela vina ninowakanela supaje abali vamodha na arogoraya, kaninlagiha na mazuvi bahi, mbwenye yattimaya-ttimaya ninlagiha na merelo.

15. Ninga munlogela 1 Joau 4:7, 8, txini enfwanyelihu okosa?

¹⁵ Iyo nintagiha okwela wa babihu wa wirimu, nigatanalagana muttu na mukwaye. (Kengesa 1 Joau 4:7, 8.) Ekalelo yamakamaka entonyihedhihu okwelana ja olevelelana muttu na mukwaye. Ninga motagiha, enodha opadduwa muttu oninyimula, ngamala banikumbirha nlevelelo. Nigakala attu okwela ninomulevelela. (Kol. 3:13) Mbali Aldo opadduweliwa ejene mudhidhi wamwiwaliye mbali dhahi wamuttittimihiye, alogaga bure mwaha wa nihimo naye. Aldo ohiloga: “Miyo  ddannimulobelela Yehova mudhidhi wotene wila adikamihedhe wi ddihikane dhubuwelo dhomutxigana mbali oddule.” Ottiya olobelavi, Aldo ohikosa elobo yina vina. Iyene wahimukumbirha mbali ole wi adhowe vamodha mmabasani a olaleya. Mudhidhi walaleyani vamodha, Aldo omutapulelamo mbali ole sabwa ya onyoyeya waye mwaha wa dhologa dhaye. Iyene ohiloga, “Muziweli mbali ole wi miyo ddahiyonyeya ohiddikumbirha nlevelelo. Mulogelo waye wahoniha wi iyeneya wahitxinuwa-wene. Vasogorhova ahigana odduwala makaniya bamaga omarho.”

16-17. Txini enfwanyelihu ogana okosa?

¹⁶ Murumiwi Joau wannakwela venjene abali na arogora a mmulogoni, vina wanakokomeza wi eddegevi mwibaribarini. Okwela oku woneyile mmalagoni avahiliye, anfwanyeya mwari mwa makarta mararu avudheleliweye oleba. Iyo ninolibiheya oziwa wi alobwana vamodha na ayana ottikitteliwa abuwene anadhowe olamulela vamodha na Kristu, anolagiha okwela wakakene wonihile Joau!—1 Jo. 2:27.

¹⁷ Ninofwanyela weka mmirimani mwehu malago aba asunzilehu. Ndoweni niganeni wedda mwebaribarini, nimwiwelelaga Yehova mwigumini mwehu mwetemwene. Kasunza vina kakuluvelaga mazu aye. Kalibihavi omuroromela wawo Yezu. Karabela masunziho opela malago na masunziho asadduweli. Karabela okala mpara-wile vina txipo kurumele ofwara ddila enuttukulela muttegani vina kakalawo mowiwanana na magano oligana a Yehova. Nakamihedhe abali ehu okala oliba, nalevelelaga abale anniddawela vina nakamihedhaga abale annjobeliwa. Nigakosa dhahuwene, masiki nigumanena makattamiyo makattamihovi, ninele weddagavi mwibaribarini.