1-2. Na mukalelo gani eli Mukristu ninga aranha céu? (1 Korinto 15:58)

 OMAGOMO wa dekada ya 1970, o Tóquio o Japão, wahimagiwa aranha céu wa 60 andares wakwaranyile maperediyu mena. Attu anivivuza akala aranha céu oddu kagagwile sabwa ya ottekenyeya wa mattaka wapadduwetxa elabo ejile. Txini ekamihedhile wi ejo ehipadduwe? Anamamagaya ahimaga na mukalelo wovadda vaddiddi vina na marhe a ovikoma mudhidhi ompadduwa efoyo ya ottekenyeya wa mattaka. Akristu anoladdanihiwa na aranha céu oddu. Na mukalelo gani?

² Mukristu onofwanyela okana monelo wapama wa ovikoma vina ohittekenyeya. Enofuneya ovikoma vina ohigulugudheya wi mudhidhi wotene awodhege wiwelela malamulo a Yehova vina dhoruma dhaye. (Kengesa 1 Korinto 15:58.) Mukristu ninga oddo onkala omala-nawale wi ewelele vina kampwaza magano a Yehova. Mwa mpaddi mwina, iyene onofwanyela okala muttu wofewa murima obe ohigulugudheya, akala onopattiwa makattamiho anafuneye olagiha mukalelo obu. (Tia. 3:17) Mukristu onsunza ovipimelela onorabela ottabwiha dhilobo obe wonaga dhilobo dhotene ninga sapama. Mwari mwa nsunzo ntti, ninele osunza mukalelo onawodhihu okala attu ohigulugudheya. Vina ninele ozinddiyela mirega mitanu dhinlabihedha Satana wi obanihe efunelo yehu ya okalavi ovikomene.

3. Malamulo gani a Yehova anfwanyeya va Merelo 15:28, 29?

³ Yehova ddinfwanyela wita Malamulo, vina dila dhotene iyene onovevutxa malamulo aye wi nlogo naye niwodhege  ovirihamo. (Iza. 33:22) Motagiha, nikuru nolamulela na nsaka zana noroma nahizinddiyela mikalelo miraru dhigawodhile wakamihedha Akristu okalavi ovikomene: (1) otxatxama webedha dhosemiwa, omwebedha bahi Yehova, (2) oriha ttima ya nikami vina (3) wiwelela magano oligana a Yehova. (Kengesa Merelo 15:28, 29.) Akristu masaka abano anawodhe dhavi okalavi ovikomene mpaddi esi miraru?

4. Iyo ninawodhe dhavi omwebedha bani Yehova? (Ovuhulela 4:11)

⁴ Otxatxama webedha dhosemiwa, omwebedha bahi Yehova. Yehova waharuma ana Izrayel omwebedha iyene bahi. (Olib. 5:6-10) Vehiwe Yezu na Satana, iyene ohoniha wi iyo ninofwanyela omwebedha bahi Yehova. (Mt. 4:8-10) Ottiya ejo, iyo kaninebedha dhosemiwa dhinebedhiwa mmakapela. Iyo vina kanattittimiha attu—ninga amilugu—peno akale asogorheli a politika na a makapela, anamaponya mpirha ovuwa, anameba, anamatxetta, anamakosa filimi na ena. Iyo ninkala ovikomene mpaddi wa Yehova, Mulugu mmodha bahi opaddutxile dhilobo dhetene.—Kengesa Ovuhulela 4:11.

5. Enfuneyelani iyo wiwelela nlamulo na Yehova ninloga sabwa ya oriha egumi vina nikami?

⁵ Ninowiwelela malamulo a Yehova a oriha egumi vina nikami. Sabwaya? Sabwani Yehova ologile wi egumi eli munikamini, nona obu nvaho wamakamaka ondha wa Yehova. (Onam. 17:14) Varumelihile Yehova wi nlogo na attu nirome oja dhinama, iyene wahavaha malago a oja enama se nikami. (Wita 9:4) Nsaka navahiliye ana Izrayel Nlamulo na Mizé wahoniha ttima ya nikami. (Onam. 17:10) Vina iyene wahisogorhela nikuru nolamulela na nsaka zana noroma wawaddela Akristu otene “otadha nikami.” (Mer. 15:28, 29) Iyo ninowiwelela nlamulo ntti nigasakulaga mirobwe gani dhinfwanyelihu oja. b

6. Txini enfwanyelihu okosa wi nidhowegevi neddagana magano oligana a Yehova?

⁶ Ninowiwelela magano oligana a Yehova. (Aheb. 13:4) Paulo ononaddela wi ninofwanyela opa vyano dha mwili wehu—eji entapulela wi ninofwanyela okosa muli mwetemwene wi niburutxemo mmurimani mwehu dhifunelo dhabure. (Kol. 3:5; Job 31:1) Iyo nigagumanana yoweha momaguva-mwene ninorabela mubuwelo wohifwanyelela obe okosa elobo egadhile ononga mandano ehu na Mulugu.

7. Txini eganilehu okosa, nanda sabwa jani?

⁷ Yehova onjedhela wi iyo niwelelege na “murima wetene.” (Rom. 6:17) Malamulo aye anonipuriha iyo nanya, vina kinwodheya iyo otxinja malamulo aye. (Iza. 48:17, 18; 1 Kor. 6:9, 10) Iyo nivilibihedhe venjene omwiwelela Yehova vina nikane mubuwelo wakakene wana munasalmo ologile dhahi: “Ddilemeliha murimaga ofwara dhithongilenyu, wi dhikale ottuviwa waga wa mukala-kala.” (Masal. 119:112) Mbwenyi ejo bilivi, Satana onele otamela wobaniha efunelo yehu. Iyene onlabihedha mirega gani?

8. Satana onlabihedha dhavi ofwara-fwariwa wi anobanihe?

⁸ Ofwarafwariwa. Ddiabo onolabihedha murega wa ofwarafwariwa vina otabutxiwa wi anobanihe. Yogana yaye ja onija, obe ononga mandano ehu na Yehova. (1 Ped. 5:8) Akristu a nsaka zana noroma, ahitabutxiwa venjene, ahibubuddiwa vina opiwa  sabwa ya yimelelo yawa. (Mer. 5:27, 28, 40; 7:54-60) Masaka abano Satana onodhowavi alabihedhaga murega obu w’ofwarafwariwa. Eji enowoneya na mukalelo wohifwanyelela onfwara-fwariwa abalihu o Rússia na dhipaddi dhina dha elabo. Ottiya ejo, amwiddani anowafwarafwara abalihu na mikalelo dhottiyana-ttiyana.

9. Kaloga sabwaya enfuneyelani iyo okala txenjewa akala ninokwekwetteliwa okosa elobo yabure.

⁹ Okwekwetteliwa okosa elobo yabure. Satana onolabihedha “opyaga” ninga murega wa onilupela. (Ef. 6:11) Koona yotagiha ya mbali Bob, wali osipitale ajedhelaga okosa operasau. Iyene wahimwaddela dotoro wi masiki mmakattamihoni orutxa kagarumelile wikiwa nikami. Dotoro wafuna omukosa operasau wahirumela yogana yaye. Mbwenyi, ajedhelaga operasauya wafuna akosiwe mangwana, dotoro mwina wahidha omona na mattiyu amudhaye bamalile odhowa vatakulu. Iyene wahimwaddela Bob wi kafwanyela ovahiwa, mbwenyi nikamina nigali vakuvi akala ninele ofuneya olabihedhiwa. Txino dotoro ole wobuwela wi Bob agahitxinja mubuwelo waye vowi amudhaye ahimala odhowa. Mbwenyi Bob wali ovikomene, iyene karumelile ovahiwa nikami masiki na makattamiho-makattamihovi.

10. Dhubuwelo dha attu dhikalele nni dhawopiha? (1 Korinto 3:19, 20)

¹⁰ Dhubuwelo dha attu. Iyo nigonaga dhilobo na mukalelo wakene onona attu amwilaboni, ninodhaga omuttiya Yehova vina malamulo aye. (Kengesa 1 Korinto 3:19, 20.) “Onona oku wa mwilaboni” dila dhinjidhene onowakwekwettela attu okosa dhilobo dhomaningoni. Akristu ena akala o Pérgamo vina o Tiatira ahirava mweddelo wa attu akosa mararuwo vina ebedha dhilobo dhosemiwa. Yezu wahirumela malago ovadda vaddiddi milogo esile sabwa ya okosa mararuwo. (Ovuh. 2:14, 20) Masaka abano, attu ankala vakuvi na iyo anodhaga onikwekwettela orumela dhubuwelo dhohifwanyelela. Anamudhi, attu anaziwihu anodhaga ologa wi iyo ninottabwiha weddana magano a Mulugu ninofwanyela ovugulela vang’onovi. Motagiha, awene anodhaga onaddela wi iyo ninofwanyela ofwara dhifunelo dhehu vina wi malago a Bibilia ahimala okwela.

11. Wi nikalevi ovikomene, txini enfwanyelihu orabela?

¹¹ Dila dhina, ninodhaga wubuwela wi malago annivaha Yehova kannoneleyamo mowakwana-mwene. Eji egahidha okala yoweha eganittukuleli ofwara dhilobo dhihilebiwe mBibiliani. (1 Kor. 4:6) Asogorheli a marelijiau akalilewo nsaka na Yezu ahikana muladdu wa yottega eji. Sabwa ya awene wenjedhedha monelo dhawa Mmalamuloni, akala ninga amaga mittorho dholemela wavijelihaga attu vetturini. (Mt. 23:4) Yehova ononivaha malago ononeleyamo alabihedhaga Nzu naye vina nikuru naye. Iyo kanina mwaha wa wikamo dhilobo dhina mwa malago annivahiye. (Gano 3:5-7) Ottiya ejo, kili yofuneya iyo ofwaraga dhilobo dhihilebiwe mBibiliani obe wawitela magano abalihu ahinfwanyeya mBibiliani.

12. Satana onvuwiha dhavi miselu dhopela malago?

¹² Dhopela malago. Satana onolabihedha “ópela malago” vina “mazu awota” a elabo ejino wi ànyengette vina àtotele attu ogawana. (Kol. 2:8) Nsaka zana noroma, dhilobo esi dhopela malago dhavolowelana masunziho a filozofia, masunziho Ayuda ahafwanyeya mBibiliani vina masunziho yawi Akristu anfwanyela ofwara Malamulo a Mizé. Esi dhali dhopela malago sabwani kadhakamihedha attu ofwanya eziwelo yebaribari ya Yehova.  Masaka abano, Satana onolabihedha radiyo televizau vina redes sociais wi avuwihe miselu dhihina matibelo na miselu dhopela malago dhinvuwihiwa na asogorheli a politika. Iyo nihona venjene miselu esi dhopela malago mudhidhi wa COVID-19. c Anamoona a Yehova avuruwanile malago avahile nikuru nehu ahirabela odhugudheya mottiyana na abale avuruwanile miselu dhopela malago.—Mt. 24:45.

13. Ninawodhe dhavi okala txenjewa na dhozuzumiha?

¹³ Dhozuzumiha. Ninga Akristu yofuna yehu ja ozuzumela “dhofwanyelela.” (Fil. 1:9, 10) Dhozuzumiha dhinonijela mudhidhi mwinjene vina guru. Dhilobo dhinkosihu siku na siku—ninga oja, omwa, mavego, vina mabasa—dhinodhaga onizuzumiha nigattiya esuwene okala vamburoni voroma mwigumini mwehu. (Lk. 21:34, 35) Ottiya ejo, malabo otene ninowiwa vina ninowengesa miselu dhinloga mwaha wa owana-wana wa malogo vina makani a politika. Iyo ninofwanyela ovyang’anela wi dhilobo ninga esi dhinadhe onizuzumiha. Nigahikale txenjewa, ninodhaga okamihedha mpaddi mmodha obe mpaddi mwina. Satana onolabihedha dhilobo esi dhilogile iyo omaromo na efunelo ya onobaniha wi nittiye okosa eli yapama. Ovano ninfuna none mukalelo onawodhihu okala ovikomene.

14. Elobo gani modha yukamihedhile okalavi mpaddi wa Yehova?

¹⁴ Katanalela ovivelela wawo vina obatizo. Kobuwela dhukamihedhile okana nikuluvelo wi ohifwanya ebaribari. Mufwanyeli weyo ebaribari mwaha wa Yehova omuriha wawo wahiroma wunuwa vina wahiroma omukwela ninga Babi wawo wa wirimu. Weyo owunuwiha nroromelo nawo vina ejo ehuttukulela otxinuwa. Murima wawo ohuttukulela onyanyala mweddelo wabure vina okalawo mowiwanana na efunelo ya Mulugu. Weyo ohiviwamo pama sabwa ya oziwa wi Yehova ohulevelela. (Masal. 32:1, 2) Wahiroma wona  matugumano Okristu vina wawaddela attu ena esile dhasunziwe. Weyo ohittukula ttarho esi sabwani wanfuna okala mpaddi wa Yehova. Ovano ninga Mukristu wobatiziwa, weyo onowedda mudila ya egumi, efunelo yawo ja odhowagavi weddaga dila eji.—Mt. 7:13, 14.

15. Osunza vina otanalela dhikalele nni dhopureleyamo?

¹⁵ Osunza Nzu na Mulugu vina otanalela. Dhahene ninga muri onliba mitxitxidha dhigatibeleya pama, iyo ninele okalavi ovikomene akala nroromelo nehu ninotibeleya mu Nzuni na Mulugu. Muri onunuwa, mitxitxidha dhigavapeya vina dhigatibeleya pama. Iyo nigasunza vina nitanalela, nroromelo nehu ninele oliba vina ninokana nikuluvelo noliba wi dila dha Yehova sapama. (Kol. 2:6, 7) Katanalela mukalelo onnivaha Yehova malago, onneddihiye vina mukalelo wakamihedhiliye emeleli aye a nsaka nawale. Motagiha, Ezekiyel wahifwaseyela ovuruwana vina wang’ana mpimo dha mparha dhapima anju. Yowonihiwa eji ehimulibiha Ezekiyel vina enonikamihedha iyo masaka abano sabwani enonisunziha mukalelo wapama wa omwebedha Yehova. d (Ezek. 40:1-4; 43:10-12) Iyo ninopurelamo nigatamela mudhidhi wa osunza vina otanalela venjene dhilobo dhinsunzihu mu Nzuni na Mulugu.

16. Oliba murima omukamihedhile dhavi Bob? (Masalmo 112:7)

¹⁶ Olibihe murima wawo. Mwene Davidi ohiloga wi iyene txipo kattiyile omukwela Yehova mwibeliye dhahi: “Murima waga okomeya, Nyuwo Mulugu.” (Masal. 57:8; [Masal. 57:7 TNM]) Iyo vina ninele owodha olibiha murima wehu, nigamukuluvela kakamwe Yehova. (Kengesa Masalmo 112:7.) Eji ehimukamihedha Bob, ologiwe omaromo. Mwaddeliwiye wi nikami nigattiyiwe vakuvi kofuneya wi avahiwe, iyene wahakula momaguva wi kofuneya wi iyene avahiwe nikami agahibudduwa osipitale. Vasogorhova, Bob ohiloga, “Miyo txipo kaddaganyedhile vina kaddovile.”

17. Txini esunzilihu na empadduwele Bob? (Koona vina foto.)

¹⁷ Bob wahilibiha murima waye sabwani  iyene wahikosa yosakula y’okalavi ovikomene mudhidhi mwinjene ahinatti odhowa osipitale. Vamaromo, iyene wahigana omwagalaliha Yehova. Yanawili, wahifwaseyela omusunza Bibilia vina manivuru andela mBibiliani anloga sabwa ya okoddela wa egumi vina nikami. Yaneraru, wahikana nikuluvelo nawi kofwara malago a Yehova eji egamukamihedha okana wagalala mwa mudhidhi mwinjene. Enowodheya iyo vina olibiha murima wehu kintanala makattamiho angumanihuna.

18. Yotagiha ya Barak enisunziha eni mwaha wa omukuluvela Yehova? (Koona foto ya kapa.)

¹⁸ Omukuluvela Yehova. Katanalela mukalelo opemberhile Barak sabwa ya okuluvela malago a Yehova. Masiki mwilaboni motene mwa Izrayel mwahafwanyeyanimo mwalago obe supadda, Yehova wahinvaha malago Barak wi adhowe awane na anyakoddo akadda Kanaá ana dhipano dhowakwanela asogorheliwa na Sízera. (Anam. 5:8) Namavuhulela Debora wahimwaddela Barak wi atitele o muwuloni Kison agumane na Sízera na myuva dhaye dha mijila 900. Masiki myuva dhakamihedhani venjene mukoddoni, Barak wahiwelela malago a Yehova. Anyakoddo ahitita o Mwangoni Tabor, Yehova wahimurubwiha muzogwe. Myuva dha Sízera dhahiroma orobela mmaroveni vina Yehova wahimukamihedha Barak opemberha. (Anam. 4:1-7, 10, 13-16) Na mukalelo wakakene, Yehova onele onikamihedha opemberha nigamukuluvela vina nigafwara malago annivaha nikuru naye.—Olib. 31:6.

19. Ninfunelani odhowagavi nikalaga ovikomene?

¹⁹ Iyo ninele odhowavi niwanaga wi nikale ovikomene vina ohigulugudheya mwari mwa masaka aba omariha ankalihu. (1 Tim. 6:11, 12; 2 Ped. 3:17) Nivilibihedhe okala attu ohittekenyeya masiki na ofwara-fwariwa, okwekwetteliwa okosa elobo yabure, dhubuwelo dha attu, dhopela malago vina dhozuzumiha. (Ef. 4:14) Ottiya ejo, nidhowegevi nimwebedhaga Yehova ovikomene se ogulugudheya vina niwelelaga malamulo aye. Mbwenyi mudhidhi wakene, enofuneya iyo okala attu ofewa murima. Nsunzo ninfwarela, ninele woniha mukalelo oli Yehova vina Yezu dhotagiha dhapama ya ofewa murima.