1. Na mukalelo gani onladdanihiwa Akristu na muri? (Koona vina foto.)

 “PEVO kununda muri onogowa.” Mazu aba anowoniha mukalelo wamakamaka onkana miri dhina: wogowa. Muri ogakala wowogowa masiki pevo yobe na owali kunwodha wunda. Ninga Akristu, wi nidhowegevi nikalaga olibene mpaddi womuyani ninofwanyela okala attu ofewa murima. Dhavi? Nigakala ofewa murima ninele owodha oviparhapattela dha mwigumini mwehu dhigatxinja, oriha mubuwelo wa attu ena vina dhosakula dhawa.

2. Mikalelo gani dhinanikamihedhe okosa matxinjo nigakala mmakattamihoni vina txini enasunzehu mwari mwa nsunzo ntti?

² Ninga alabeli a Yehova, jofuneya iyo ofewa murima. Ottiya ofewavi murima nikale ovyeviha vina a ttagaraga. Mwari mwa nsunzo ntti, ninele wona wi mikalelo esi dhihakamihedha Akristu ena owanana makattamiho agumananina. Ninele wona vina mukalelo onnikamihedha mikalelo esi. Mbwenyi vamaromo, ninfuna nisunze na Yehova vina Yezu ali dhotagiha dholigana ya ofewa murima.

3. Dhilobo gani dhinnikuluveliha wi Yehova Mulugu wofewa murima?

³ Yehova onoladdanihiwa na “Mwango” sabwa ya ovikoma vina ohittekenyeya. (Olib. 32:4) Mbwenyi, masiki ejo bilivi iyene Mulugu wofewa murima. Mudhidhi ondowa dhilobo dhipadduwaga, Yehova vina onodhowavi akosaga matxinjo wi akwanihedhe efunelo yaye. Yehova ohattandda attu moligana na iyene na ewodhelo y’ovisaddulela agagumanana makattamiho. Iyene ohikiha mBibiliani malago ohirutxa ononelawamo wi anikamihedhe okosa dhosakula dha malago kintanala makattamiho-makattamihovi angumanihuna. Yotagiha ya Yehova vina magano aye anonivaha nikuluvelo nawi masiki  Yehova akalaga ninga “Mwango,” iyene vina Mulugu wofewa murima.

4. Kavaha yotagiha enoniha wi Yehova ddofewa murima. (Onamakutha 5:7, 11)

⁴ Dila dha Yehova soligana vina s’ovevuwa. Iyene kanakumbirha attu okosa dhilobo dhihinwodhani. Koona mukalelo wofewa murima waweddihile Yehova ana Izrayel. Iyene kakumbirha wi attu otene akosege nvaho wa elobo modhene, peno akale areeli obe ayelegi. Iyene wanrumela wi muttu-muttu, akosege nvaho na ejile enwodhiye.—Kengesa Onamakutha 5:7, 11.

5. Kavaha yotagiha enoniha wi Yehova ddovyeviha vina ddattagaraga.

⁵ Ovyeviha wa Yehova na ttagaraga dhaye dhinomuttukulela okala muttu wofewa murima. Motagiha, Yehova ohoniha ovyeviha waye nsaka natolotxiliye attu abure akala sidadi y’o Sodoma. Modhela anju waye, Yehova wahinvaha malago Loti a ottawela omwangoni. Mbwenyi Loti wahova ottawelawo. Wahimukumbirha Yehova wi iyene vamodha na amudhaye attawele muttette wo Sowar, waganile Yehova otolotxa. Yehova agahimukalela ntidi Loti wi afware malagoya ninga mwaddeliwiye. Ottiya ejo, iyene wahirumela yokumbirha ya Loti vina katolotxile muttetteya. (Wita 19:18-22) Vyaka dhinjene musogorhomwa, Yehova wahaweddela ttagaraga akadda Nínive. Yehova wahimuruma namavuhulela waye Jona wi avuwihe otolotxiwa wa sidadi ejile na attuyamo. Mbwenyi akadda Nínive mutxinuwilani, Yehova wahalevelela vina sidadiya kiyatolotxiwe.—Jon. 3:1, 10; 4:10, 11.

6. Kaloga mukalelo otagihile Yezu ofewa murima wa Yehova.

⁶ Yezu ohitagiha ofewa murima wa Yehova. Varumiwiye velaboni ya vati, wadhele olaleyela “mabila orimela a nlogo na Izrayel.” Mbwenyi iyene ohoniha ofewa murima modhela walaleya attu a malogo mena. Dila modha muyana wahali mukadda Izrayel wahimukumbirha wi anvulumutxe mwanaye “[watabutxiwa] na muya wabure.” Ttagaraga dha Yezu dhihimuttukulela okosa yokumbirha ya muyanaya vina ohinvulumutxa mwanaye. (Mt. 15:21-28) Koona yotagiha yina. Omaromo wa mabasa a Yezu olaleya, iyene wahiloga dhahi: “Ole onddikoodda . . . , miyo vina ddinele omukoodda.” (Mt. 10:33) Mbwenyi iyene kamukoddile Pedro masiki Pedroya vamukoddiliye dila ttaru. Yezu wahiziwa wi Pedro wahitxinuwa vina wannimuroromela. Muvenyihiwiye mukwani, Yezu wahimuttwanyuwela vina wahoniha wi wahimulevelela vina wanimukwela.—Lk. 24:33, 34.

7. Mowiwana na Filipi 4:5, iyo ninfuna wi attu anonege dhavi?

⁷ Nihona wi Yehova Mulugu vina Yezu Kristu bofewa murima. Ki iyo? Yehova onjedhela wi iyo nikale ofewa murima. (Kengesa Filipi 4:5.) Bibilia mwina etapuleli mazu a versu eji dhahi: “Oziwiwana ekalelo yofewa murima.” Nivivuze: ‘Attu anddona ninga muttu wofewa murima, wowiwelela vina onrumela  monelo wa attu ena? Obe anddona ninga muttu wa owali, wa bure vina wovadda musorho? Ddinokalela ntidi wi attu akose dhilobo dhahene ninga munfunelimi? Obe ddinowavuruwana attu ena vina ddinorumela monelo wawa egakala yofuneya?’ Nigavilibihedha okala attu ofewa murima ninele woniha wi ninimutagiha Yehova vina Yezu. Ovano ninfuna nitanalele mpaddi mili onfuniwana iyo olagiha ofewa murima—dha mwigumi mwehu dhigatxinja vina monelo dha attu ena na dhogana dhawa dhigakala dhottiyana na dhehu.

8. Txini enanikamihedhe okala ofewa murima dha mwigumi mwehu dhigatxinja? (Koona vina nota.)

⁸ Ofewa murima onowiwanana na oviparhapattela akala dhilobo dhinotxinja mwigumini mwehu. Matxinjo ampadduwa mohijedheleya, anodhaga onitotela otabuwa. Motagiha, iyo notene ninodhaga opattiwa mohijedheleya makattamiho a oredda vina oyelega. Obe owanawana wa politika ogeteya mmuruddani munkalihu onodhaga otxinja kakamwe egumi yehu. (Koh. 9:11; 1 Kor. 7:31) Ottiya ejo, nigattomeliwa mabasa mena mu nikuruni na Yehova obe odhowa olabelaga mpaddi mwina enodhaga okala yoweha. Mbwenyi kintanala yoweha gani ennipatta iyo, dhotene dhinele oneddela pama nigaviparhapattela mowiwanana na makattamiho anifwanyile vina nigafwara ttarho esi nayi: (1) orumela matxinjo anipattile, (2) wubuwela dhamusogorho vina (3) ozuzumela dhilobo dhapama vina (4) wakamihedha attu ena. b Ovano ndoweni nitanaleleni mapadduwo mang’onovi a mwigumini anoniha mukalelo onkamihedha ofwara ttarho esi.

9. Atenali dhahi amisionario awanilena dhavi makattamiho ohijedheleya?

⁹ Orumela matxinjo. Manuele na Francisca ahittomeliwa elabo yina ninga amisionario. Aromaga-wene osunza elogelo ya muruddaya vina waziwa abali na arogora kuvirile mudhidhi mwinjene, eroma eredda ya COVID-19 awene ahiroma okala vawavene s’ogumanaga na abali. Mokubanyiha-mwene mayi wa Francisca okwa. Musegedheyani mpo Francisca wafuna adhowe okala na amudhaye, mbwenyi kawodhile sabwa ya eredda ya COVID-19. Txini emukamihedhile owanana makattamiho aba? Yoroma, ninga atelani Manuele na Francisca ankosa malobelo akumbiraga eziwelo wi awodhege okalawo siku-siku. Yehova ohakula malobelo awa modhela oja womuyani wakelani mudhidhi wofwanyelela. Motagiha, awene ahipangarhaziwa na mbali ologile dhahi na awene alabihedhaga videoconferência: “Nigamaguvela orumela matxinjo anipadduweli, momaguva-mwene ninele wiyelela okana wagalala wana iyo vina odhowavi nikosaga mabasa ehu masiki na makattamiho aba.” c Yanawili, awene ahigana wunuwiha ewodhelo ya olaleya na telefoni vina ahiroma nsunzo na Bibilia. Yanoraru, awene ahitamalela nipangarhazo vina nikamihedho navahile abali. Murogora mmodha wokwela wanarumela malabo otene maversu mang’onovi a mBibiliani, iyene ohikosa ejuwene mwari mwa yaka yantero. Na mukalelo wakakene iyo nigarumela matxinjo annipatta ninele okana wagalala na dhilobo dhinakosigihu masiki mwari mwa makattamiho.

10. Murogora dhahi oviparhapattile dhavi matxinjo manddimuwa apadduwile mwigumini mwaye?

¹⁰ Wubuwele dha musogorho vina ozuzumele dhilobo dholibiha. Christina, murogora wo  Romênia onkala o Japão, wahinyimuwa vattiyiwe olabihedhiwa mulogo wa Engelezi watugumaniye. Mbwenyi iyene kakala wubuwelavi ejile yapadduwile. Ottiya ejo, iyene wahivilibihedha odhowavi atugumanaga mulogo wa elogelo y’o Japão vina ovilibihedha mmabasani olaleya. Iyene wahimukumbirha muyana walabiyena wi amusunzihe ologaga pama elogelo y’o Japão. Iyene wahirumela omulabihedha Bibilia vina brochura Kajavo Egumi Yamukalakala! wi amusunzihe Christina ologaga pama elogelo y’o Japão. Eji kimukamihedhile bahi Christina osunza elogelo y’o Japão ehimukamihedha muyana oddule okana efunelo yosunza ebaribari. Nigazuzumela wang’ana dha musogorho vina dhilobo dholibiha, matxinjo ampadduwa mohijedheleya anodhaga onittukulela ofwanya dhilobo dhapama dhahajedhelihu.

11. Txini yakamihedhile atelani ana makattamiho a oyelega?

¹¹ Wakamihedha attu ena. Atelani dhahi akala mwilaboni munkoddihiwa mabasa ehu ahikana egumi yofwasa mbwenyi awene ahidha opattiwa na makattamiho a oyelega wa mwilaboni. Awodhile dhavi oviparhapattela? Voroma, awene ahivevutxa egumi yawa. Vasogorhova, ottiya ozuzumela makattamiho awa, awene ahigana wakamihedha attu ena modhela ozuzumela mabasa olaleya. (Mer. 20:35) Mamune ohiloga dhahi, “Ozuzumela mabasa olaleya ohivugula ohubuweletxa makattamiho ehu vina ononga mudhidhi mwinjene nikosaga efunelo ya Mulugu.” Dha mwigumini mwehu dhigatxinja, japama wubuwela ttima ya odhowagavi nakamihedhaga attu ena makamaka mmabasani olaleya.

12. Yotagiha ya murumiwi Paulo ennikamihedha dhavi oviparhapattela nigakala mmabasani olaleya?

¹² Mmabasani olaleya, ninofwanyela oviparhapattela. Iyo ninowafwanya attu anrumela dhilobo dhottiyana-ttiyana, ana monelo na dhilemelelo dhottiyana vina a dhilabo dhottiyana-ttiyana. Murumiwi Paulo wanziwa oviparhapattela, enowodheya iyo osunza na yotagiha yaye. Yezu wahimuttomela Paulo mabasa a walaleya amalabo. (Rom. 11:13) Wi awodhe wakwanihedha mabasa aba, Paulo wanalaleya Ayuda, Agregu, attu asunziletxe, anamalima, attu a mmawani vina amwene. Paulo “[ohiviliganiha] na athu otene” wi awodhe oddiginya mirima dha attu aba. (1 Kor. 9:19-23) Iyene wafwaseyela wang’ana mweddelo wawa, dhilabo dhidhilani vina esile dharumela anamewa aye. Eji ehimukamihedha Paulo oviparhapattela vina ologa na muttu mmodha-mmodha wi awodhe omukamihedha orumela Nzu na Mulugu. Enowodheya iyo vina wunuwiha ttotto yehu mmabasani olaleya nigaviparhapattela vina nigatanalela pama mukalelo womukamihedha muttu-muttu oninfwanyihu mmabasani olaleya.

13. Yowopiha gani enfwanyeya va 1 Korinto 8:9 enfwanyelihu orabela akala ninofuna oriha moonelo dha attu ena?

¹³ Ofewa murima ononikamihedha oriha moonelo dha attu ena. Motagiha, arogorihu ena anoziveliwa makiyagem, oku ena kaziveliwa. Akristu ena anoziveliwa omwa dholezeliha n’ovipimelela oku ena ahitadha. Akristu otene anofuna okana egumi yapama anokosa ejuwene modhela osakula marhe ottiyana-ttiyana a ozuzumela egumi. Iyo nigobuwela wi dhokosa dhehu sapama vina banakwekwettela ena okosa yakene ninodhaga wakakattutxa ena vina banitota ogawana mmulogoni. Iyo kaninfuna okosa ejene! (Kengesa 1 Korinto 8:9; 10:23, 24) Ovano ninfuna none dhotagiha bili dhinoniha wi ovirihamo magano a mBibiliani enonikamihedha okala attu ovipimelela vina a murenddele.

14. Magano a Bibilia annisogorhela dhavi mukalelo wa wabala vina oyesa?

 ¹⁴ Dhowabala vina oyesa. Ottiya onivaha malamulo a mukalelo wowabala, Yehova onivahile magano anfwanyelihu ofwara. Iyo ninofwanyela wabala na mukalelo wapama, wovipimelela vina wofwanyelela ononiha wi nili alabeli a Mulugu. (1 Tim. 2:9, 10; 1 Ped. 3:3) Ottiya ejo, iyo kaninfwanyela wabala na mukalelo onziveliwana iyo nanya. Magano a Bibilia anele onikamihedha orabela wita malamulo mwaha wa dhowabala vina mugwaddelo wa nttitti. Motagiha, anddimuwa a mmulogoni afuna akamihedhe abali azombwe afwarile ekalelo yogwadda nttitti ya azombwe a mmuruddani mwawa, nttitti nawa nali nokiva vina kanasasanyedheyile. Anddimuwa a mmulogoni agawodhile dhavi wakamihedha se witavo malamulo? Nameddelela mulogo wahavaha malago anddimuwa a mmulogoni wi awaddele dhahi abali azombwe, “weyo ogakala otribunani nanda anamewaya afwaseyela wuwang’ana ottiya ofwaseyela esile dhinlogiwe ehikalawo elobo ehili pama na mwabalelo wawo obe oyesa wawo.” Obu mukalelo wapama wa ogwadda makani se witavo malamulo. d

15. Malamulo na magano a Bibilia anneddiha dhavi nigakosaga dhosakula dha ozuzumela egumi yehu? (Roma 14:5)

¹⁵ Ozuzumela egumi. Mukristu oli wetene onofwanyela osakula mukalelo onawodhiye ozuzumela egumi yaye. (Gal. 6:5) Mbibiliani munofwanyeya malamulo mang’onovi oziweya, ninga motagiha, nlamulo ninloga wi ninofwanyela otadha nikami webedha dhilobo dhihili Mulugu vina makaga. Mukristu onofwanyela orabela kakamwe mikalelo esi agazuzumelaga egumi yaye. (Mer. 15:20; Gal. 5:19, 20) Oku dhipaddi dhina dhosakula dhomwinya. Akristu ena agakala aredda antamela  bahi mirobwe dh’osipitale oku Akristu ena anveda mirobwe dha muttemba. Iyo nanya ninofwanyela okana nikuluvelo na wi mukalelo obu wosasanyiwa onokamihedha obe kunkamihedha, mbwenyi ejo bilivi ninofwanyela oriha dhosakula dha abali ena sabwa ya mukalelo onzuzumelani egumi yawa. Wi ejo ewodheye ninofwanyela okana muyubuweloni ttarho esi nayi: (1) Omwene wa Mulugu bunawodhe vina bunadhena egumi yamukalakala. (Iza. 33:24) (2) Mukristu oli wotene “obuwele pama” akala yosakulaya enele omukamihedha. (Kengesa Roma 14:5.) (3) Nirabele wattonga attu ena obe wakwakwattutxa. (Rom. 14:13) (4) Akristu anolagiha okwela vina anozuzumela wiwanana wa mmulogoni ottiya ozuzumeletxa dhosakula dhawa. (Rom. 14:15, 19, 20) Iyo nigakana muyubuweloni ttarho esi nayi, ninele okana mandano ofiyedheya na abali vina arogora ottiya ejo ninele wunuwiha murenddele wa mmulogoni.

16. Munddimuwa wa mmulogoni ononihe dhavi ofewa murima agalogelaga makani na anddimuwa ena? (Koona vina mafoto.)

¹⁶ Anddimuwa a mmulogoni anottiya yotagiha yapama ya ofewa murima. (1 Tim. 3:2, 3) Motagiha, munddimuwa wa mmulogoni kajedhele wi moonelo waye onelege orumeliwa dila dhotene mwaha wawi iyene ddowunuwelavo opitta anddimuwa ena a mmulogoni. Iyene onofwanyela oziwa wi muya wa Mulugu onowodha omukamihedha mbali-mbalivi oli munikuruni na anddimuwa a mmulogoni wi yologa yaye ekamihedhe okosa yosakula yamalago. Vina akala kavalupiwe nigano na Bibilia munddimuwa wa mmulogoni wofewa murima, onele orumela yosakula efwarile anddimuwa enjene a mmulogoni masiki akala yoganaya ehittiyana na mubuwelo waye.

17. Mareliho gani anjavo Akristu sabwa ya ofewa murima?

¹⁷ Akristu anowakela mareliho menjene sabwa ya okala attu ofewa murima. Iyo ninojavo mandano apama na abali vina arogora ottiya ejo ninokana murenddele mmulogoni. Iyo ninowagalala okala mumodhani na nlogo na Yehova nili otaganyiheya wa attu ottiya-ttiyana vina ana dhilemelelo dhottiyana. Ottiya ejo, jowagalaliha oziwa wi masiki nikalaga attu ottiya-ttiyana ninomwebedha Yehova mumodhani ninga anamudhi, opitta dhotene iyo ninimutagiha Yehova oli Mulugu wofewa murima.