Babani wali munddimuwa wa Kapela Unida o Canadá, Maddimingu otene na membesi iyene wanddiruma miyo na murogoraga odhowa oskola ya aima o kapela, nigamala wiyelawo nanvitaganyiha na iyene banidhowa wona missa wakosiwa mudhidhi wa 11. Txiguwo nandowa wona matugumano na Mmani o Nyumbani ya Omwene. Mwa veneva kiyanirutxile wona ottiyana wa kapela esi dhobili.

Mmani wahiroma wawaddela akwaye esile dhasunziye, mmodhaya wakuweliwa Bob vina Marion Hutcheson, odhile vina orumela ebaribari. Yaka ya 1958 Marion na mwadhiye ahiddittukula vamodha na anawa araru banidhowa omoona Assembleia Internacional wa malabo matanu na mararu wana mutoma A Vontande Divina o Sidadi y’o Nova Iorque. Ddigang’ana mundduni, ddinowona wi awene ahikosa guru enddimuwa ya oddittukula wi nidhowe vamodha. Assembleia oddule elobo modha mwa dhilobo dhamakamaka dhipadduwile mwigumini mwaga.

Baddina vyaka kumi nakala murudda wafuyiwa guluwe, ng’ombe, mabila vina anaku, miyo ddanziveliwa venjene osapiha dhinama. Eji ehiddittukulela wubuwela wi ddigonuwa ddinfuna ddikale veterinário. Mmani wahimwaddela yogana yaga munddimuwa mmodha wa mmulogoni. Na oderetu iyene wahiddubutxedha wi iyo ninkalawo “masaka omariha”  vina kodhowa okosa universidade mwa vyaka dhinjene eji egahipatta mandano aga na Yehova. (2 Tim. 3:1) Mwa venevo miyo ddahisakula ohikosa universidade.

Mbwenyi ddannivivuza txini egakosilemi kogomiha masunzo aga oskola. Masiki ddidhowaga mmabasani a olaleya omamalelo wa sumana dhotene, miyo kaddaziveliwa olaleya vina kaddobuwela okala pionero. Mudhidhi obo babani wahali Munamoona wa Yehova vina titiyu ahiddaddela wi ddakosege mabasa a mudhidhi wotene empresa enddimuwa o Toronto. Titiyu wahikana mabasa amakamaka wenewale, nona miyo ddahirumela mabasaya.

Ddikalaga o Toronto ddanlaba mudhidhi mwinjene vina ovitaganyiha na attu ahali Akristu ohiddittukulela dila dhinjene ojomba mmatugumanoni vina mmabasani a olaleya. Vamaromo ddakala na avo wahali Munamoona wa Yehova, mukweliye ddahubuwela omwalela mpaddi mwina.

Mbali Marion na mwadhiye ahiddittukula banidhowa omona kongresu yaka ya 1958, awene ali ninga amambali aga. Awene ahiddittukula baddiroma okala vatakulu vawa vina ahiddikamihedha wunuwa mpaddi womuyani. Ddibatiziwe yaka ya 1960 vamodha na mwaniwa Joau. Muromile Joau olaba ninga pionero wahiddilibiha ozuzumela venjene mabasa a olaleya. Abali a mmulogoni ahona wunuwa waga mpaddi womuyani vasogorhova ddahittomiwa ninga servo da Escola do Ministério Teocrático. a

Yaka ya 1966, ddihimutela Randi Berge, pionera wavingela mabasa a olaleya, waziveliwa olaleya mirudda dhajombeliwa anamalaleya. Nameddelela wehu wa mulogo ohinizuzumela venjene, ohinilibiha wi nakamihedhe mulogo w’o Orillia, Ontário. Mohigonela iyo nahimwala.

Mudhidhi mung’onovi mufiyedhihu o Orillia, miyo ddahivitaganyiha na Randi ninga pionero wa mudhidhi wotene. Ovingela waye mabasa a olaleya ohiddittukulela okosa yakene! Venevo vadhowa miyo ddivilibihedhaga okala pionero wapama,  ddahiroma oziveliwa omulabihedha Bibilia vina wawona attu amunonelagamo. Yali mareliho wakamihedha atelani dhahi akala o Orillia okosa matxinjo mwigumini mwawa vina okala Anamoona a Yehova.

Banili o Toronto, ddihimuziwa Arnold MacNamara, wali musogorheli w’o Beteli. Iyene wahiddivuza akala ddigahiziveliwa okala pionero wavawoka. Momaguva-mwene miyo ddahimwakula: “Ndde! Mburho-mburhovi ottiya o Quebeque!” Miyo ddahipattiwa na dhubuwelo dha attu akala o Canadá aloga Engelezi sabwa ya mukalelo wawonani attu akala província y’o Quebeque aloga Efransezi. Nsaka nene nttile attu ankosa maprotestu na guverno na efunelo yawi província y’o Quebeque ekane ofuru.

Arnold wahakula, “kuli mburho mwina ottiya o Quebeque onaruma filiali apionero a vawoka mudhidhene obu.” Miyo ddahirumela odhowa. Ddahimala oziwa wi Randi agahiziveliwa olabela wenewale. Vasogorhova nahidha ozinddiyela wi eji yali yosakula yamakamaka ekosilihu!

Mmalilehu okosa masunzo a Efransezi mwari mwa sumana tanu, miyo na Randi vamodha na atelani ena nahidhowa o Rimouski, oleddo wa makilometru 540 omadhelo wa nzuwa wa Montreal. Iyo nahikana dhilobo dhinjene dhosunza eji ehoneya mudhidhi wengesilemi dhovuwiha dhing’onovi mmatugumanoni. Miyo ddalogile wi kongresu onaddamela iyo ninele okana “adelegado a avestruz” ottiya “adelegado Austríacos.”

O Rimouski, iyo anai nahivitaganyiha na arogora anai aziye, vina atelani ena akuweliwa Huberdeaus na aniwa eli anayana. Atelani Huberdeaus ahalugari nyumba enddimuwa, vina apionero akala apalene ankamihedha opagari va mwerini, nyumba ejile yakuweliwa Casa Branca sabwani osogorhowa yali yotxena vina yahikana matxikwa meeli otxena. Nakalavo attu 12 obe 14. Ninga apionero a vawoka, miyo na Randi nanlaleya, na membesi, na mutana vina na mattiyu, nantamalela venjene sabwani ankalawo muttu wanivelela mmabasani a olaleya—masiki na mattiyu a nsaka na oridha.

Iyo nali ofiyedheya vaddiddi na apionero abale ororomeleya, awene akala ninga amudhihu. Dila dhina nankala vamodha-vene nottaga motto obe nansakula labo nimodha banipiya mumodhani. Mbali mmodha wanziwa pama orumiha dhipano dhowibana, omattiyu wa Masabuddu dila dhinjene nanniba vina nantxetta.

O Rimouski attu enjene ahikana efunelo ya omusunza Bibilia! Mwari mwa vyaka tanu, nahikana wagalala wowawona anamasunza a Bibilia onuwaga mpaddi womuyani, abatiziwaga. Mulogoya wahunuwa ofiyedha okana anamalaleya 35.

O Quebeque, nihakela maswagiho apama vaddiddi a olaleya miselu dhapama. Iyo nihona nikamihedho na Yehova mmabasani a olaleya vina nikamihedho ninivahiliye mpaddi womaningoni. Ottiya ejo nihisunza wakwela attu aloga Efransezi, elogelo yawa vina yeddelo yawa ehinittukulela—oziveliwana yeddelo ya attu ena.—2 Kor. 6:13.

Mohijedheleya abali o filiali ahinikumbirha wi nimwalele kwatti w’o Tracadie o Nova Brunswick. Eji kiyali yovevuwa sabwani nela oroma-wene okosa kontratu yowalugar nyumba vina ddahikosa kontratu ya olabaga oskola ninga namasunziha mawora mang’onovi va sumanani. Ottiya ejo, anamasunza ena a Bibilia eloroma-wene okala anamalaleya vina Nyumba ya Omwene yamagihu yali ehinatti ogoma.

 Omamalelo wa sumana dhotene nankosa malobelo mwaha womwala vina sabwa yawi Tracadie yali kwatti yottiyana na Rimouski. Mbwenyi nahidha wona wi Yehova wafuna wi nikale wenewale, nona nahidhowa. Mumwehilena iyo Yehova makani aba nihimona iyene aburutxaga dhozuzumiha dhali osogorho wehu. (Mal. 3:10) Sabwa ya Randi okana mandano oliba na Yehova, ovilevela waye, vina ekalelo yaye yowagalala ohivevutxa venjene omwala oku.

Munddimuwa mmodha wa mmulogoni wamwalelihu wakuweliwa Robert Ross. Iyene wahilabaga wenewale ninga pionero na mwadhiye Linda, vina vambalilani mwaniwa woroma, ahigana okalavi wenewale. Ottiya omuzuzumela mwaniwa wa nyenye bahi, awene ahinipangarhaza venjene, ahinakela vatakulu vawa vina ahinikamihedha mmabasani a olaleya.

Mmalelihu olaleya o Tracadie ninga apionero vyaka bili, mohijedheleya nihakela wili niwobo—wi nilabe ninga anameddelela milogo. Iyo nihilaba sirkuitu ya Engelezi vyaka tanabili, mmalelani nahittomeliwa sirkuitu yalogiwa Efransezi o Quebeque. Nameddelela wehu wa murudda o Quebeque, Léonce Crépeault, wantamalela diskursu dhaga. Mbwenyi vasogorhova iyene wanddivuza, “Muttu anowodhe dhavi ottiddihedha mabasa diskursu dhawo?” b Nikamihedho na mbali oddu nihiddittukulela osunziha se opottotxa makaniya vina na mukalelo wononeleyamo.

Mmabasani mwaga elobo modha enubuweletximi ba mabasa attomeliwimi va Kongresuni Internacional “Fé Vitoriosa” okosiwe o Montreal yaka ya 1978. Miyo ddattomeliwe olaba Omattuwani. Iyo nanjedhela wawakela attu 80.000, vina yanfuneya wapiyela otene dhoja dhottiyana-ttiyana dhihinattigi iyo opiya. Dhilobo dhotene dhali dhiswa: oromana dhipano dhafunehu olabihedha, menu, vina mukaleloya wa opiya. Iyo nahikana majilera 20 manddimuwa, mbwenyi dila dhina kalaba. Labo na matugumanoya nihinatti ofiya kanawodhile ovolowa mustadiyuni mpaka vari va mattiyu, sabwani mwahikala anamakosa mpira. Nona nahiroma oligari forno wi notxemo pawu dhigakosiwena matabixu. Nahilema vaddiddi, mbwenyi ddihisunza venjene olaba na guru, okala muttu wa owarala vina ddihisunza na abali ena adhowavi alabaga na wagalala. Miyo ddihikanavi omarho na abali abale  mpaka masaka abano. Oddu kongresu wamakamaka onkodda miyo omudduwala okosiwe o Quebeque, província efwarafwariwe vaddiddi Anamoona a Yehova yaka ya 1940 ofiyedha 1950!

Miyo ddihisunza venjene na abali ena ali anameddelela milogo mmatugumanoni manddimuwa a kongresu akosiwe o Montreal. Yaka modha, David Splane, ovano onkosa mpaddi wa Nikuru Nolamulela, waligi musogorheli wa kongresu. Kongresu mwina, vakumbiriwemi wi ddikale musogorheli wa matugumanoya, David Splane wahiddikamihedha venjene.

2011, mwakwanihelihu vyaka 36 nilabaga ninga anameddelela milogo, ddawobiwa wi ddikale namasunziha wa Eskola ya Anddimuwa a Mmulogoni. Miyo na Randi nihigona kama 75 dhottiyana mwari mwa vyaka bili, mbwenyi guru eji ehidhana dhopurelamo. Omamalelo wa sumana dhotedhene, anddimuwa a mmulogoni antamalela venjene sabwa ya wona mukalelo wazuzumela abali a Nikuru Nolamulela mandano awa na Yehova.

Vasogorhova, ddihisunziha Eskola ya Anamalaleya a Omwene. Anyaskolaya dila dhinjene akala olemene sabwa ya winjiveliwa dhokosa: valaboni angilati mawora matanu na meli musala, kadda labo na mattiyu annonga mawora mararu akosaga TPC vina wakwanihedha mabasa manai obe matanu attomeliwani vasumanani. Miyo na anamasunziha ena nihatapulelamo wi kagawodhile okosa elobo-ene se nikamihedho na Yehova. Ddinelege wubuwelavi mukalelo watikina anyaskolaya venevo vawodhani wona wi sabwa ya omukuluvela Yehova, anwodha okosa dhilobo dhihigawodhile awene.

Mmani ohakamihedha anamasunza aye wunuwa mpaddi womuyani, ohimukamihedha vina babani otxinja mubuwelo waye sabwa ya ebaribari. Muvirile malabo mararu mmani bamalile okwa, babani wahinitikiniha, wahidha Onyumbani ya Omwene bavuruwana diskursu, vina wahidhowa onaga matugumano ottamagela vyaka 26. Mbwenyi masiki dhawene babani txipo kafihedhile obatiziwa, anddimuwa a mmulogoni ahiddaddela wi sumana dhotedhene muttu waroma ofiya omatugumanoni wakala iyene.

Mmani vina wali yotagiha yapama mwa miyo vina arogoraga. Arogoraga oraru na amamunawa anomulabelavi Yehova nororomeleya. Eli anlaba filiali y’o Portugal oku mwina o Haiti.

Randi na miyo ovano ninlaba ninga apionero a vawoka o Hamilton, Ontário. Wenewo olabilehu ninga anamaddelela milogo, iyo nanavelela abali odhowa okosa marevizita vina weddiha masunzo a Bibilia. Ovano ninowagalala wawona anamasunza ehu onuwaga mpaddi womuyani. Nihimaga mandano na abali a mulogo ontugumana iyo, vina ninopangarhazeya wona mukalelo onakamihedha Yehova mmidhidhi dhapama vina dhorutxa.

Nigang’ana mundduni, ninotamalela vaddiddi nikamihedho ninivahile abali enjene. Iyo ninovilibihedha okosa yakene, ninowapangarhaza attu ena wi amulabele Yehova na mukalelo wamakamaka ninga muwodhelani. (2 Kor. 7:6, 7) Motagiha, ntakulu nimodha, muyanaya, mwaniwa wa mulobwana vina wamuyana ali mmabasani a mudhidhi wotene. Miyo ddahinvuza mulobwanaya akala wanubuwela okala pionero. Iyene wahakula wi wakamihedha apionero araru. Venevo miyo ddahinvuza, “Weyo onowodha wakamihedha pama ompitta Yehova?” Miyo ddahimpangaraza wi arome weha mareliho anjavo apionero. Iyene wahikala pionero myeri mitanu na mmodha.

Randi na miyo ninodhowavi nawaddelaga “abale anadhegewo” sabwa ya “dhawumiha milomo” dha Yehova, vina ninojedhela wi anele ojavo mareliho aba venjene dhahene ninga ejilevo iyo.—Masal. 71:17, 18.