YEHOVA MULUGU onfuna wila emeleli aye ajevo morenddele. Onfuna awene akale anamatota murenddele muttu na mukwaye. Akristu agakosa ejuwene attu etene a mulogo wa Akristu anosanzaya. Bumurendele-ene obo onakukusela attu munikuruni na Yehova.

Motagiha ng’anga (namungu) dhahi w’o Madagaskar moneliye osanzaya ona nikuru na Anamoona a Yehova ologa, ‘Kowiliwa ddafuna osakula relijiau wila ddifware, ddigasakule okala mukudda Jova.’ Mudhidhi mung’onovi, wahittiya wawebedha adomonyo, wahikosa masadduwo vamuralani vaye, baroma omwebedha Yehova, Mulugu wa murenddele.

Ninga mukoseli namungu oddu, masaka abano attu enjene anovolowa mu nikuruni na Yehova nanda anojavo murenddele watameletxani. Mbwenye iyo ninowengesaga mBibiliani wi “nrima, ekalelo yowana-wana” mmulogoni, dhinotota widdana vina otxigana. (Tiago 3:14-16) Noona Bibilia wakene ononivaha malago apama anwodha onirebettiha magudulano aba wili-wili okosihaga wi murenddele onkanihu na abalihu okale wolibene. Ndowe noone malagoya vina nubuwele mulabihedhoya wa labo-labo.

“Ddahikana makani na mbali dhahi walaba na miyo. Labo dhahi nahakulana vaddiddi ofiyedha odha attu eeli wila anivunedhe.”—CARLO.

“Murogora dhahi wadhowetxa na miyo mmalaleyoni, saddu ottiya odhowa na miyo. Mmaleliye ottiya ologa na miyo. Makaniya kaddidhi oromilani.”—JANET.

“Labo dhahi naloga na muttitto attu araru. Mukwehu mmodha onipaganya, miyo wonaga ninga ofugile muttitto waye. Ddahiroma omuloga n’obure ddimwaddelaga mukwehu mwina, ddihiziwaga wila mukwehu wanipaganyile wanniwa dhetene.”—MIGUEL.

“Mmulogoni mwehu apionero eeli ela wakulana. Mmodhaya omusumela mukwaye. Dhinkosani dhinowanyimula attu eena.”—GARAY.

Dhetene esi dhilogiwe apa, dhinkalanga kahiyo makani manddimuwa. Mbwenye dhodhavodha dhinowanyimula etene ampattiwa na makaniya, ofiyedha ogawa mulogo. Mohaganyedha abali na arogora aba alogiwe, agalabihedha malago a Bibilia anele odhana murenddele mmulogoni mwawa. Malago gani a Bibilia anubuweliwe wila anele owodha okamihedha mmakanini ninga abene?

“Kamupambihane mudila.” (Wita 45:24) José wahawaddela abali aye malago aba mudhidhi weyelelani owani-wawa. Muttu wa orabwe obe wowinjiviha, onaguvela onyaguleya, onowunuwiha muladdu masiki akala wali mung’onovi. Akwaye agona dhawene txino anosilidhiwa venjene. Carlo ologiwe, wannona wila mudhidhi mwina enorutxa oviyeviha vina wiwelela malago. Vowi wanfuna  okosa masadduwo, wahidhowa okumbirha nlevelelo na mbali wakulana na iyene. Carlo okosa guru eli yotene wila ang’anele mubuwelo waye. Mbali wawaniliyena moneliye wila Carlo wakosa matxinjo, iyene vina wahikosa yakakene. Awene ddabuno anomulaba Yehova n’osanzaya.

“Ohinvuza, dhintadiye kadhinedda.” (Gano 15:22) Janete mukwaye muttiyeliye omulogana, wahitamela ottiddihedha mabasa malago aba a Bibilia. Iyene wahidhowa ologa vina onvuza mukwayeya. Janete wahinvuza akala waromaga omukosela elobo yabure. Omaromo oheeli kawodha ologa. Mmalelani mudhidhi mung’onovi alogaga aroma olibiheya. Murogora oddu wahona mwinya wila Janete kaana muladdu, w’elobo-wene. Murogoraya wahikumbirha nlevelelo, nomala ahiyelela omarho wawa, vina anomulabela Yehova na murenddele.

“Weyo ofunaga ohela mukutho, venevo ogobuwela wi mbalawo okana bima na weyo, romá othiya mivaho dhawo v’ebuwani, dhowá mwateyihane na mbalawoyá, ngamala wiyelele ohela mukutho.” (Mateu 5:23, 24) Malago aba Yezu walogile va Diskursuni yaye ya Vamwangoni. Migueli moneliye wila wahimuloga n’obure mbalaye, wahinyimuwa mwinyene. Nomala wahikosavo elo egamaalihile makaniya. Wahimutamela mbaliya nanda bamukumbirha nlevelelo. Nomala txini yapadduwile? Migueli bela, “Mbalaga oddilevelela-wene.” Awene ahiyelela omarho wanani na wale.

“Muvilelagane, mulevelelagane dila dhetene dhinthegelana nyuwo.” (Kolosi 3:12-14) Onowawubuwela apionero abale eeli akulana mmalaleyoni? Munddimuwa wa mulogo wahakamihedha woona wila dhakosani dhahasilidha abali ena vina wanyimula. Wahakamihedha woona wila anfwanyeela olevelelana, wila emetxe murenddele mmulogoni. Awene arumeela ovirihamo malagoya. Ovanene anowiwanana deretu vina anlaba vamodha mmalaleyoni.

Malago meena anfwanyeya va Kolosi 3:12-14 anowodha oukamihedha wi okale woviyeviha, wolevelela muttu mwina agottegela vina ottiya okaana dhubuwelo dhabure. Kito akala ninokosa guru wila nimulevelele muttu nanda nihiwodha? Malago ali va Mateu 18:15 anowodha onikamihedha mmakanini ninga aba. Masiki Yezu valogiye malago aba ekaga vamburoni yottega enddimuwa, iyene wahenjedheha n’ejile enfwanyelihu okosa nigakaana makani na mbali obe murogora. N’okwela, ninfiyedhe muttuya, nilogena wila niwodhe ogomiha magudulano.

Txibarene, mBibiliani mudhala malago anwodha onikmaihedha. Menjiya anloga dha okuluvela nikamihedho na muya wokoddela wa Mulugu wila niwodhe olagiha “dhimbala muya.” Mikalelodha eso sisi “okwela, othaba, murenddele,  ovilela, murima wapama, wofewa, wowiwananeyana.” (Galásia 5:22, 23) Kobuwela elobo dhahi. Makina anlaba mowakwana dhipanodha dhetene dhigakala deretu. Mwakakene omarho wehu na abali eena onoliba nigakaana mikalelo esi dhapama dhindha wa Yehova.

Muttu-muttu okaana mikalelo dhomuttu waye. Kadda muttu okaana monelo waye na mubuwelo wottiyana na wa muttu mukwaye. Ejo enodhana mandano ofiyedhana vina ohagalaliha. Mbwenye ottiyana oko mudhidhi mwina onotota ohiwanana vina widdana. Munddimuwa dhahi wa mulogo wahiloga sabwa ya ejuwene eraga: “Muttu wa manyazo podi okana magudulano sabwa yokala vakuvi va muttu wologetxa. Ottiyana ninga oku txino onkala ninga ovega, mbwenye onotota ohiwanana.” Onubuwela wila vali attu eeli ottiyana txipo kavanakale wiwanana? Ndowe noone yotagiha ya arumiwi eli a Yezu. Nigamubuwela murumiwi Pedro, ninomoona ninga muttu waloga dhetene dhobuweliye s’ohova. Mbwenye nigamubuwela Joau ninomoona ninga muttu waroma otanaalela ahinatti ologa obe okosa eloboya. Pedro na Joau ali attu ottiyana vaddiddi. Masiki dhawene, oheeli amulaba Yehova n’owiwanana. (Merelo 8:14; Galásia 2:9) Ejo enonipadduwela masaka abano. Akristu ottiyana muyubuweloni anowodha olaba otene mumodhani.

Kito akala muttu wa mmulogoni mwawo onowukosela elobo enunyonya? Kudduwale wi Kristu omukwela ninga mukwelile, nanda iyene onofuna wila weyo vina olagihe okwela. (Joau 13:34, 35; Roma 5:6-8) N’eji ninowoona wila kinkala okana muyubuweloni etanaalelo yawi kunfuna viina okosa omarho na muttuya obe onele omutxatxama.  Ottiya eji, kavivuze: ‘Mbalaga onokosa elobo engudulana na malamulo a Yehova? Iyeneya onira pudhá? Ejiya epadduweli sabwa ya ottiyana wa dhubuwelo dhehu? Mbali oddu okaana mikalelo dhaderetu dhinfuna miyo osaza?’

Motagiha akala wa muttu worutxiwa ologa vina omoona mbali wologa vaddiddi, ononamo dhavi olaba na iyene mmalaleyoni wila osunze elobo na iyene? Kito akala muttuya namavaha vaddiddi oupitta weyo? Onowodha woona ohagalala onkanihu niganvaha elobo muredda obe abale anjombeliwa? Onowodha osunza ekalelo yokala namavaha ena mbaliya? Yosunzaya jawi masiki akala weyo ohittiyana vaddiddi na mbali obe murogora, jaderetu okalela txenjewa oderetu waye. Masiki akala kunwodha kala marho waderetu, kakosa guru wila wandane na. Okosa eji enele wukamihedha osanzaya vina odhana murenddele mmulogoni.

Vyaka zana dhoroma, wahikala arogora eli, wali Evódia na Síntike. Moonelo wa arogora aba wahittiyana venjivene, mbwenye murumiwi Paulo wahakokomeza wi “ewananege ninga munfunela Nabuya.” (Filipi 4:2) Iyo vina nigakosa guru wila nikale mmurenddeleni na abali ehu, ninele omulaba Yehova mumodhani.

Ekalelini yaderetu otamela momaguva oburutxa mu yubuweloni mwehu, etanaalelo yabure enkanihu? Ninfuna niladdanihe dhubuwelo eso na minga dhimmela mmunddani mwa marhuwa okoddela. Nigahibulutxemo mingadha momaguva, dhinele odhaala mmunddani-mwa mwetene. Moladdaniha, dhubuwelo dhabure dhigonuwa mereloya anele wapatta abali enjene a mmulogoni. Mbwenye akala ninomukwela-wene Yehova  vina abali ehu, ninele okosa guru wila nibarele vina nilibihe murenddele mmulogonimwa.

Nigavilibihedha okosa murenddele na abali ehu, ninele otikina mukalelo oneddege dhilobodha. Mbali dhahi ologa elobo yampadduwela. Iyene belaga: “Murogora dhahi waddona ninga ddili mwana. Eji yanddisilidha vaddiddi. Sabwa yawila ddansilidhiwa vaddiddi, ddahiroma ogwadda mandano aga na iyene. Venevo ddihubuwela: ‘Iyene kanddona ninga elobwene, miyo vina kaddinamurihe.’”

Murogora oddu mmaleliye wahubuwela wi dhakosiye kadhakalile. “Mmalelimi ddahiroma woona wobana waga, eji eddinyimula vaddiddi. Ddahoona wila ddanfwanyela okosa masadduwo momaguva. Mulobelelimi venjivene sabwa ya makaniya, ddihigula elobo eng’onovi, miyo oleba karta ddikumbirhaga nlevelelo sabwa ya mobuwelo aga nanda ddinvaha. Nomala iyo okubattana nanda nahiloga wila nittiye mundduni makaniya abale. Oromana venevale kanaana makani meena.”

Muttu-muttu onofuna murenddele. Mbwenye ovittukulela obe waganyedha, onowakosiha attu enjene ologa obe okosa dhilobo dhintota widdana. Ejo ji yeddelo ya elabo ejino, mbwenye Yehova onfuna elobo yottiyana vaddiddi na emeleli aye. Attu a nlogo na Yehova anolagiha murenddela na wiwanana. Paulo wahivudheleliwa na Yehova walebela dhahi Akristu eraga: “mweddege n’ekalelo yithaneliwenyu” nanda murumela. Wahalibiha vina alogaga “mukale ovyeviha, ofwaseya, ovilela; mpiselagane murima mukwelani; tamelani okoya omodha ondha mwa muya wokoddela, mweddaga na murenddele onukalihani mumodhani.” (Éfeso 4:1-3) ‘Murenddele onakaliha mumodhani’ emeleli a Yehova, bwa ttima. Noona muttu-muttu wa iyo akose guru ninga munawodheliye wi alibihe murenddele vina awodhe okwaranya magudulano onkaniye na abali eena.