IYO NINKALA mwilaboni mudhaalile owali, ofwanya murenddele elobo yorutxa vaddiddi. Nigagumela mudhidhi mung’onovi wofwasa, ofwasawa kunrutxa ogoma. Bibilia onloga eni enikamihedha ottidda murenddele webaribari? Ninawodhe dhavi wakamihedha attu eena ofwanya?

Murenddele webaribari onovaha mubuwelo ottugareya vina nibarelo. Jofuneya okaana amarho aderetu, jamakamaka vina omaga omarho na Mulugu. Ninawodhe dhavi okosawa?

Malamulo na magano a Yehova baderetu wa iyo. Akala ninowiwelela ninolagiha wi ninomuroromela Yehova vina ninofuna okaana mandano a murenddele na iyene. (Jeremiya 17:7, 8; Tiago 2:22, 23) Yehova onele onaddamela anivahe muya wa murenddele. Izaiya 32:17 ohiloga: “Yeddelo ya athu omyala murima enodhana murenddele, ofwasa wa malabo etene.” Ninele ofwanya murenddele webaribari akala ninowiwelela malamulo aye na murima wotene.​—Izaiya 48:18, 19.

Yehova onele onivaha nvaho wattima onanikamihedhe wenjedhedha murenddele. Nvahoya mulima wa muya wokoddela.—Merelo 9:31.

Murumiwi Paulo wahiloga wi murenddele epaddi ya ‘yobaala ya muya.’ (Galásia 5:22, 23) Muya wokoddela ombaala dhavi murenddele, akala ninfuna okaana murenddele nirumeele weddihiwa na yobaala ya muya wokoddela. Ninakose dhavi?

Yoroma, ninofwanyeela wengesa Nzu na Mulugu malabo otene. (Masalmo 1:2, 3) Nigatanalela mowakwana esile dhinengesa iyo, muya  wokoddela onela onikamihedha ononelamo makani ottiyana-ttiyana. Motagiha, iyo nihisunza okaana murenddele sabwani murenddeleya elobo yamaka-maka wa iyene. Nigalabihedha esile dhinsunza iyo mBibiliani, ninele okaana murenddele mwigumini mwehu.​—Gano 3:1, 2.

Yanawili, nimulobe Mulugu muya wokoddela. (Luka 11:13) Yehova ohiroromeliha wavaha murenddele abale ankumbirha nikamihedho naye: “Dhahene murenddele wa Mulugu, onpitha thontho ya muthu, onere okoya mirima na mobuwelo enyu, vowi muli mumodhani na Yezu Kristu.” (Filipi 4:6, 7) Nigamwaddamela Yehova nikuluvelaga muya waye iyene onele onivaha murenddele webaribari.​—Roma 15:13.

Bibilia ohakamihedha attu enjene osaddula mweddelo wawa, ovanene awene anojavo murenddele wa Yehova mmirimani mwawa, vina murenddele na attu eena. Aweneya awodhile dhavi okosa masadduwo?

Ahinatti osunza ebaribari, abali ena vamodha na arogoraya ali awali vaddiddi. Mohaganyedha awene ahilaba vaddiddi wi awodhe okosa matxinjo, ovano anodhowanavi mabasa awa, a okala txenjewa, ovilela, vina otamela murenddele na attu ena. * (Koona yowenjedhedha.) (Gano 29:22) Mbali dhahi onkuweliwa David na murogora Rachel ehikosa ejuwene mwa otamela mikalelo dhina.

David ahinatti osunza ebaribari, iyene wampambiha vaddiddi agalogaga na amudhaye wanoba owali kawodha okurumuwa. Mmaleliye wahiwodha okosa masadduwo. Owodhile dhavi? David mwinyene ohiloga, “Ddahiroma olabihedha gano dha Bibilia mwigumini mwaga, yopurelamoya jawi nriho naga vina na amudhaga nihunuwa.”

 Rachel wahirava mikalelo dha ntakulu nunuwiliye. Iyene ohiloga, “Masiki ovanene miyo ddinowanana ohirutxa osiliziwa waga sabwani miyo ddileliwe mmuralani wa awali.” Elobo gani emukamihedhile Rachel ofwanya murenddele? Iyene ohenjedhedha, “Nikuluvelo nddimuwa na Yehova.”

David na Rachel attu eli avahile dhotagiha dhawa dha owodha ofwanya murenddele modheela olabihedha magano a Bibilia vina nikuluvelo na muya wokoddela. Masiki nikalaga mwilaboni mudhalile owali, jowodheya okaana murenddele wa muyubuweloni. Ejo enele onikamihedha wiwanana na anamudhi ehu abali na arogora a mmulogoni. Yehova ononaddela wi “Egawodheya, mwandane na athu otene bari munwodhela nyuwo.” (Roma 12:18) Koddi ejoya elobo yowodheya? Ninawodhe dhavi ovilibihedha otamela murenddele na attu eena?

Mmalaleyoni iyo ninolaleya miselu dha murenddele wa Omwe wa Mulugu. (Izaiya 9:6, 7; Mateu 24:14) Attu enjene anoziveliwa nanda anorumeela. Ninga yopurelamo, awene awodha okaana nibarelo vina kankala osilidhiwene sabwa ya esile dhimpadduwa mwilaboni. Ovano awene ahikaana njedhelo nebaribari na musogorho, jijuwene enakosiha ‘otamela murenddele.’​—Masalmo 34:14.

Attu eena kanziveliwa na miselu dhehu makamaka dila yoroma. (Joau 3:19) Mulugu onivaha muya waye. Ejo enokamihedha okala a murenddele mmalaleyoni. Ninofwara malago a Yezu “Mugafiya takulu ji takulu, mwalejele dhahi anamuralayá. Akala anowakelani, murenddele wafunényuna, onokala nawene; akala kanuwakelani murenddeleyá onowiyelelani mwanya.” (Mateu 10:11-13) Iyo nigafwara magano aba, ninele owodha okanavi murenddele nihitanalaga esile dhinloga attu obe dhinnikoselani. Iyo ninowubuwelavi wi musogora ninele wakamihedha attu.

Iyo vina nihisakula wawirela murenddele alamuleli modheela ologa na awene na nriho, vina akala anonifwarafwara na mabasa ehu. Motagiha, Elabo ya África, alamuleli ena anonikoddiha omaga Numba dha Omwene. Abali aba ahitamela ogomiha makaniya na murenddele. Awene aharuma amisionario alabelege elaboya wi asogorele ologela wa makani a elabo ya Londres, na Inglaterra, ahifwanya mabasa aderetu akosile Anamoona a Yehova.

Mbali dhahi ohiloga: “Mwafiyedhe miyo kambirinya enakeliwa aleddo, ddahiloga na namakela aleddo mwabalelo waye bwa nlogo na elogelo yasunzile miyo. Miyo ddahimulejela na elogelo yaye. Wahitikina, nanda wahiddivuza, odhele okosa eni? Na nriho ddahiloga wi ddinfuna ddiloge na munddimuwa wa veneva. Iyene wahimuttekenyela muttitto munddimuwaya, nanda iyeneya wahiddilejela na elogelo yaye. Iyene wahiddivuruwana na ofwaseya miyo dditapulelagamo mabasa a murenddele ankosa anamoona a Yehova.”

Mmalele ovuruwana munddimuwa oddule wahinonelamo mabasa ehu vina dhilobodha dhahisadduwa battiya onitxiga. Mohigonela mulamuleli oddule wahisaddula nlamulo naye wahirumela omagiwa wa Numba dha Omwene dha Anamoona a Yehova. Abali ahiziveliwa venjene! Mohaganyedha, nigaweddiha attu eena na nriho, ninowenjedhedha murenddele.

Masaka abano, nlogo na Yehova ninojavo paraizu womuyani ninga murenddele wa mpule munkala awene. Muttu-muttu wa iyo alibihe okosa mabasa andana murenddele mwigumini. Kaninaganyedha wi Yehova onoziveliwa vaddiddi na iyo. Mwilaboni eswa onele onivaha murenddele onhingoma.​—2 Pedro 3:13, 14.