Iyene Agahakela Mahala a Mulugu
IYO ONIMULABELA Yehova ninojedhela orumeeliwa na iyene vina wakela mareliho aye. Ninawodhe dhavi orumeliwa na Mulugu? Mmasakani a Bibilia, attu ena ahimuttegela Yehova mbwenye ahiwodha ofwanya orumeliwa na Mulugu. Ena ahikaana mikalelo dhaderetu mbwenye musogoromwa ayelela orumeliwa na Mulugu. Mwavenevo ninovivuza, “Mulugu ontamela elobo gani wa iyo?” Yotagiha ya Roboau mwene wa Juda, enele onikamihedha ofwanya yowakulaya.
OMAROMO WABURE
Roboau babe wali Mwene Salomau, ohilamulela mu Izrayel vyaka 40. (1 Amwene 11:42) Mukwele babe, Roboau ohidhowa o Jeruzami omuhaba mpaddo. (2 Mapadduwo 10:1) Koddi iyene wahova sabwa yokala mwene wafwarela? Salomau wali muttu wana eziwelo enddimuwa. Roboau wanfwanyeela ovombeza akala ohikana eziwelo yowakwana ya ottonga makani.
Ana Izrayel anunla sabwa ya dhilobo dhakoseliwani nanda anaruma anamukatti wa Roboau wi amwaddele dhafunani wi iyene akosele: “Babinyu wanimagelela kanga yolemela vaddiddi. Ovano nyuwo niluluvihedhení odhariyá onddimuwa, vina kanga yolemeletxa yanivijelihile babinyu; dhahene ninokala emeleli enyu.”—2 Mapadduwo 10:3, 4.
Roboau osakula ottabwiha makaniya. Iyene kokosa ejile yamukumbirile nlogo wi akose, wanova wi amudhaye nabale akala vatakulu va mwene agahiyelela ofuma wawa. Vowi okodda wirela nlogo elobo yakumbirilani, nlogo nigahimusadduwela. Kito okosile eni? Voroma ohidhowa ologa na anddimuwa amukamihedha babe. Awene ahimwaddela wi adhowe avuruwane nlogo. Mbwenye mmaleliye ohidhowa wavuza apali akwaye nanda wahiroma watabutxa attu. Ohakula nlogo eraga: “Babaga oumagelelani kanga yolemela vaddiddi, miyo ddinothabwiha. Babaga ouvadani na supilinyu, miyo ddinouvadani na thema.”—2 Mapadduwo 10:6-14.
Ohiwodha osunzavo elobo? Masaka abano nihikaana anddimuwa animulabela Yehova mwa vyaka dhinjene, mwa awene iyo ninokamihedhiwa okosa dhosakula dhapama. Ndoweni nikale aziwitxi vina niziwe ovuruwana.—Job 12:12.
‘AWENE ARUMELA DHILOGILE YEHOVA’
Ovano Roboau owasasanyedha anyakoddo aye wi awane na malogo abale amusadduwele. Yehova omuruma namavuhulela Semeiya wi apange: “Kamurabe koddo n’amudhenyu akadda Izrayel. Muthu-muthu eyelele owani waye. Dhetedhene 1 Amwene 12:21-24. *—Koona yowenjedhedha.
esi ddi miyo ofunile wi dhipadduwe.”—Yali elobo yovevuwa wi Roboau amwiwelele Yehova? Nlogo niwilemo dhavi na omwene muswa? Mwalogeliye wi ddinouvadani na “thema,” mwa iyene kagakosile elobo mwa mlogo ntti namukoddile! (Kaladdaniha na 2 Mapadduwo 13:7.) Masiki egali dhawene, mwene na anyakoddo aye ahiyelela mmudhi ninga ‘mwalogile Yehova.’
Ninsunzavo nni? Omwiwelela Mulugu, elobo yaderetu masiki akala attu anoniteya. Iyo ninafwanye mareliho ehu akala nili attu aniwelela.—Olibiha 28:2.
Roboau wahirelihiwa sabwa ya wiwelela waye? Roboau wali mulamulali wa nlogo na Juda na Benjamim, iyene wahisakula omaga sidadi dhiswa mmuruddani mpule. Iyene vina wahimetxa ‘sidadi dhinddimuwa.’ (2 Mapadduwo 11:5-12) Elobo yali yofwanyelela wa iyene yali ya odhowavi bagewelela magano a Mulugu. Omwene wa malogo kumi ahiroma wawebedha amilugu o’sema, owinjivaya ahidhowa o’Jeruzalemi omukamihedha Jeroboau na webedha webaribari. (2 Mapadduwo 11:16, 17) Sabwa ya odhowavi amwebedhaga Yehova, omwene waye wahidha okala woliba.
YOTTEGA YA ROBOAU NA OTXINYUWA
Omwene wa Roboau mudhilani okala wovadda, iyene ohidha okosa elobo yohifwanyeelela. Ohittiya omwiwelela Yehova vina malamulo aye nanda oroma wawebedha amilugu ena onyengetta! Sabwaya? Koddi wampupurutxile wali maye na amudhe akadda Amoni? (1 Amwene 14:21) Iyo kaninziwa, mbwenye nlogona nahifara yotagiha yaye yabure. Noona Yehova wahittiya wi mwene. Sesak wa Egiptu attukule sidadi dhinjene dha omwene wa akadda Yuda. Ejo epadduwile Joroboau bamalile omaga sidadi esi dhovadda!—1 Amwene 14:22-24; 2 Mapadduwo 12:1-4.
Makaniya ahidha ottabwa sabwani Sesak na anyakoddo aye adhowa owana na Jeruzalemi wenewale walamulela Roboau. Venevo namavuhulela Semeiya ohimvaha muselu dha Mulugu Roboau na anddimuwa aye: “Nyuwo muddika okothi, nona miyo ddabuno ddinougwihedhani mmadani mwa Sisak.” Koddi Roboau ohipwaza? Na moone wofwanyelela! Bibilia onowenjedhedha dhologa dhaye: “Anddimuwa a Izrayel na mweneya aziwelamo n’okurumuwa alogaga: Pumwenemo, ‘Yehova kapujile.’” Yehova wahimvuna Jeroboau, Jeruzalemi katolotxiwe.—2 Mapadduwo 12:5-7, 12.
Musogoromwa, Jeroboau wahidhowavi alamulelaga muttette wa Yuda. Ahinatti okwa, wahagawela anaye mivaho minjene. Iyene wafuna akaane ebaribari wi kagamusadduwele mbalaye Abiya, odduwene wafuna ohalana omwene. (2 Mapadduwo 11:21-23) Mwa okosa ejiwene Roboau wahikaana eziwele oppitta ozombwe waye.
ROBOAU WALI MUTTU WABURE OBE WADERETU?
Masiki Roboau varomiliye nooderetu, Bibilia ohiloga sabwa ya omwene waye: ‘Merelo a Roboau amutakalela Mulugo.’ Sabwaya? Sabwani ‘iyene, kanfarile Yehova na murima wotene.’ Yehova kaziveliwa na iyene.—2 Mapadduwo 12:14.
Roboau kaana mandano ofiyedhana na Yehova ninga mwakoseli David
Iyo ninsunzavo eni na nipaduwa na Roboau? Mudhidhi mwina iyene wahimwiwelela Yehova. Wahikosa dhilobo dhiina dhaderetu vamentoni va nlogo. Mbwenye kawodhile okaana mandano ofiyedhana na Yehova, vina kana efunelo enddimuwa ya omuziveliha. Wahittiya wira dhapama baroma wawebedha amilugu onyengetta. Txino ovivuza: ‘Mudhidhi warumeela Roboau wogoleliwa na Yehova, yali sabwa yawi wahiwa opa mmirimani mwaye mwa esile dhamukoseliye Yehova? Obe yali sabwa malago avahiwiye?’ (2 Mapadduwo 11:3, 4; 12:6) Musogoromwa wahikosa vina wahittabwiha obure waye. Iyene wahittiyana vaddiddi na bibe Mwene David! Mohaganyedha David wahira dhilobo dhohifwanyela. Mbwenye wahilagiha otxinuwa webaribari. Iyene wankwela webedha webaribari mwigumini mwaye.—1 Amwene 14:8; Masalmo 51:1, 17; 63:1.
Ninele owodha osunzavo elobo na mapadduwo aba. Orumeeliwa na attu eena vina anamudhehu elobo ya ttima, mbwenye jofuneya vina wawirela dhilobo dhapama attu ena. Mbwnye wi nikaane orumeliwa na Yehova, mebedhelo ehu anofwanyela emuzivele vina nilibihe mandano ehu na iyene.
Yogana yehu ekale ya omukwela Mulugu. Moligana na motto onttidda sabwa ya osusihedhavo kuni, ninofuniwana wunuwiha omukwela wehu Mulugu modheela osunza nzu na Mulugu Malabo etene, otanalela odidela okosa malobelo. (Masalmo 1:2; Roma 12:12) Okwela oku onele onittukulela orumeeliwa na Yehova na dhokosa dhehu dhotene. Ejo vina enele onikamihedha woona dhorigana dhehu vina okumbira nlevelelo wa Yehova. Ninele okala ottiya na Roboau nanda ninowubuwela nroromelo nehu na webedha webaribari.—Juda 20, 21.
^ par. 9 Vowi Salomau wahikoodda weddana ororomeleya, Mulugu wahiloga omwene waye ogahigaweya bukala malogo meli.—1 Amwene 11:31.