1. Mwaha gani waderetu ona iyo wi naagalale?

IYO NINOWAGALALA wiwa wi attu a nlogo na Mulugu anottiya txeza yawa omoneya! Yaka yomariha, nlogo na Mulugu nahasunziha attu owakwana 10.000.000. Attu owinjiva ahidha wona muttupo wa wubuwela okwa wa Yezu vina ahisunza mwaha wa nvaho wa yobolo onivahile Yehova wi atonyihedhe okwela waye.​—1 Joau 4:9.

2, 3. (a) Txini ehinwodha onibarela ‘ozerimela ninga txeza’? (b) Ninasekeserhe eni munsunzoni ntti?

² Anamoona a Yehova, ozugunuwa elabo yotene anologa dhilogelo dhottiyana. Masiki dhawene awene anomuriha Yehova ninga murala wowiwanana. (Ovuhulela 7:9) Masiki akala ninloga elogelo yina obe ninkala epaddi yina ya elabo ninele ozerimelaga ninga ‘txeza ya mwilaboni.’​—Filipi 2:15.

³ Olaleya wehu, okala mumodhani ninga Akristu, na omaguva wehu dhetene esi dhinomuttittimiha Yehova. Ninattiye  dhavi txeza yehu ozerimela mwa mpaddi esi miraru?​—Kengesa Mateu 5:14-16.

4, 5. (a) Nigalaleyaga ninattiye dhavi txeza yehu omweneya? (b) Nigakala attu aderetu yodhavoya jivi? (Koona foto eli omaromo.)

⁴ Olaleya na wakosa anamafwara elobo yamaka-maka mwa iyo wi nittiye txeza yehu emoneye. (Mateu 28:19, 20) Yaka ya 1925, munsunzo “Luz na Escuridão” yahiloga wi mmasakani omariha kawo muttu agawodhile okala ororomeleya kohikana “mperhe wottiya txeza yaye omoneya.” Yahiloga vina: “Awene anofwanyela wapangaga attu miselu dhapama mwilaboni mwetemwene wi afware dila ya txeza.” (A Sentinela, 1 Junho, 1925) Ottiya olaleyavi dhokosa dhehu dhinomuttittimiha Yehova. Ninowoniwa na attu enjene nigalaleyaga. Nigaalejela vina wateyela, enowakamihedha wubuwela dhilobo dhaderetu mwa iyo vina wa Mulugu onimulabihu.

⁵ Yezu wahiloga na anamafwara aye: “Mugafiya takulu ji takulu, mwalejele.” (Mateu 10:12) Murudda walaleya Yezu, yakalawo elemelelo yowatxatxama anamedda vafiyani vatakulo vawa. Mmatakulo menjene ovanene, eso kadhinkoseyamo. Attu anonyonyeya obe anosilidhiwa agamoona muttu ohinimuziwani vamulago vawa. Akala iyo nili owiwananeyana vina aderetu awene kanazuzume iyo nigafiyaga. Ogalaleyaga mudila olabihedhaga karinya, akala weyo onowateyela attuya anvira vina onowalejela awene anokala ofuruleya wi adhe attukule nivuru-nivuruvi? Awene anofiyedha orumela ologa na weyo!

6. Txini yakamihedhile atelani dhahi ohuluvalelavo odhohavi bagalaleya?

⁶ Atelani dhahi a anamakalaba ankala elabo ya Inglaterra, ddabuno kanwodha olaleya numba na numba ninga mwakoselani wale sabwani egumi yawa kili deretu. Awene anttukula banko wikavo manivuru ottiya osogorho wa nyumba yawa. Awene ankala waddamela oskola, ahikavo manivuru anddiginya mirima dha amambali anadhela anawa oskola. Amambali ena ahittukulavo manivuru, ninga motagiha, Os Jovens Perguntam—Respostas Práticas, Volume 1 e 2. Pionera dhahi onokala vamodha na anakalaba aba wi alaleye vamodha. Amambali aba anowona wi abali aba bowiwananeyana vina badereto akana efunelo yawakamihedha attu ena. Mambali mmodha ohirumela omusunza Bibilia.

7. Onakamihedhe dhavi attu attawile koddo ankala mmuruddani mwawo?

⁷ Masaka abano, attu owinjiva ahittawa elabo yawa ahidhowa elabo yina ankalawo ninga anamattawa koddo. Txini enakose iyo wi nakamihedhe attu aba attaweli mwilaboni mwehu wi asunze mwaha wa Yehova? Voroma, kasunza mukalelo wolejela na elogelo yawa. Ogafuna ogalabiyedhaga JW Language, weyo onele osunza mazu mang’ono a elogelo enloga attuya wi ogaroma  ologa na awene anele ofuna ologa na weyo. Weyo vina ogafuna onowalagiha mavidiyu na elogelo yawa mu jw.org.​—Olibiha 10:19.

8, 9. (a) Matugumano ehu a vari va sumana anikamihedha dhavi? (b) Amambali anakamihedhe dhavi aniwa osasanyedha dhowakula dhawa wi akule omatugumanoni?

⁸ Yehova ohinivaha elobo yamaka-maka enfunihu wi nilaleyena. Motagiha, ensunza iyo mu Mabasa na Yeddelo Yehu ya Okristu enonikamihedha okala ororomela wi nakose oleddo wowiyelela wi nirome nsuzo.

⁹ Attu anda woona matugumano, anowuma milomo na dhowakula dha ahima. Enofuneya wi wasunzihe anawo ovaha yowakula na mazu awa ottiya wengesavi. Attu ena ahifiyedha orumela ebaribari mwaha womwiwa mwana avahaga yowakula yaye na mazu aye atonyihedhaga nroromelo naye.​—1 Korinto 14:25.

10. Webedha wa ntakulu onkamihedha dhavi murala okala mumodhani?

¹⁰ Nigavilibihedha washagiha attu a murala vehu nilabaga mowiwanana na murenddele, ninele omuttittimiha Yehova. Motagiha akala weyo oli musorho wa ntakulu ovilibihedhe okosa webedha wa ntakulu sumana dhetene. Mirala dhinjene anosakula wona JW Broadcasting vamodha, agamala wona anogilati otanalela mukalelo wovirihamo dhisunzilani. Ogobuwela malago anfuna mwana kahiyo akene anfuna muzombwe. Attu etene a  vamuralani anowodha wakamihedha attu a vamuralani vawa opuramo webedha wa ntakulu.​—Masalmo 148:12, 13.

11-13. Ninakose eni wi mulogo wehu okalevi Mumodhani?

¹¹ Akala wa muzombwe, jamakamaka weyo watanaalela attu otene mmulogoni wi aziwe yawi ahikaana ttima. Mukalelo mmodha wokosa ejoya wandana na abali na arogora owunuwelavo. Kaavuze txini yakamihedhile omulabela Yehova mwa vyaka dhinjene. Awene anowusunziha dhilobo dha ttima. Eji enele wakamihedha awene na weyoya! Na iyo notene, akala iyo nili azombwe obe anakalaba, jaderetu wamoyela attu anda wona matugumano onumbani yomwene. Walejela, oteya na awene, wakamihedha ofwanya mburo wogilati, waziwiha attu ena. Wi akale ninga ali vatakulu vawa.

¹² Ogeddihaga matugumano obudduwa mmalaleyoni, enofwanyela wakamihedha abali owuluvala ottiya txeza yawa omoneya. Wattiye murudda waderetu. Wagawele azombwe wi alabe vamodha. Abali na arogora owunuwelavo ali aredda masaka menjene anonyimuwa mwaha wohilaleya ninga mwalaleyani wale. Awene anowagalala agaziwa wi onowatanala vina onononelamo enapadduwela. Masiki akala mbaliya oli vyaka dhinjene mwibaribarini oderetu wawo onomulibiha odhowavi bagalaleya.​—Onamakutha 19:32.

¹³ Ana Izrayel anjavo omwebedha wawa Yehova. Munasalmo ohileba: “Mone oziva onjavo anamudhi, anedda mumodhani!” (Kengesa Masalmo 133: 1, 2.) Iyene ohiladdaniha okala mumodhani oku na makura ottikitteliwana anttiya maningo nepunepu vina onukwelene. Na mukalelo wakakene, ninowalibiha abali ehu modhela okala attu ohirutxa vina owagalala. Dhahene mulogo onokala mumodhani. Enowodheya waziwa deretu abali na arogora a mmulogoni?​—2 Korinto 6:11-13.

14. Onattiye dhavi txeza yawo omoneya mmuruddani munkaliwe?

¹⁴ Enowodheya ottiya txeza yawo omoneya wego ku wego ondowa weyo. Oderetu onkosiwe onowakosiha anamwanddamani awo ofuna osunza mwaha wa Yehova. Kavivuze: ‘Txini enubuwela anamwanddamani aga mwaha wa dhokosa dhaga? Numba yaga enokala yosasanyedheya vina yotxenene? Enokosiha murudda okala waderetu? Ddinowakamihedha anamwanddamani aga? Anamoona na oderetu wawa vina yotagiha yaderetu enanina enowapatta attu a murala wawa, anamwanddamani, anlaba na awene vina attu ansunzanina.​—Éfeso 5:9.

15. Ekaleleni yamakamaka oviyang’anela?

¹⁵ Akala ninfuna wi txeza yehu emoneyegevi ninofwanyela okalela txenjewa  mudhidhi onkalihu. Masaka menji, Yezu wahiloga na anamafwara aye: ‘Kalanivi ovyang’anela.’ (Mateu 24:42; 25:13; 26:41) Iyo nigobuwelaga wi “goi enddimuwa” kinaddamelitxi ninela oyelela mudhidhi munddimuwa ogalabihedhile iyo wi nakamihedhe attu osunza mwaha wa Yehova. (Mateu 24:21) Ottiya omoneya, vangono-vangono txezaya eganobana somoneyaga deretu ofiyedha ottima.

16, 17. Txini enakosiwe wi oziwege ozinddiyela omaguva wa masaka?

¹⁶ Ninofwanyela oviyang’aneletxa. Sabwani elabo enodhowavi bigattabwa. Iyo ninoziwa wi mudhidhi wa Yehova oli vakuvi. (Mateu 24:42-44) Mwadhawene, enofwanyela okala okurumuwa vina nizuzumelege osogorho wehu. Nimwengesege Bibilia malabo etene, kanittiye olaleya mwaha wa Yehova. (1 Pedro 4:7) Nisunze na abali vina arogora animulabela Yehova mwa vyaka dhinjene. Motagiha, ogafuna wengese mapadduwo amwigumini, ninga mutoma wa nsunzo “Setenta anos agarrando a aba da veste de um Judeu,” eli mu A Sentinela 15 Abril, 2012, nikuku 18-21.

¹⁷ Kazuzumela omulabela Yehova. Kakosele dhilobo attu ena, vina kaveda  mudhidhi wi okalege na abalawo na arogoraya. Onele wagalala, vina onowona wi mudhidhi onele ovira mowaguva mwene. (Éfeso 5:16) Ovenyana vyaka zana mundduni, emeleli a Yehova anolaba mabasa manddimuwa vaddiddi. Ovanene, ahizuzumela vaddiddi mabasa awa opitta nsaka na mundduni. Mabasa a Yehova anowunuwa vaddiddi na mukalelo wahubuwela iyo. Txeza yehu enomoneyavi!

18, 19. Anddimuwa a mulogo annikamihedha dhavi odhowavi banigamulabela Yehova na guru? Kavaha yotagiha.

¹⁸ Masiki vanvonyihu vaddiddi, Yehova ononittiya omulabela. Eji enonikamihedha, sabwani iyene ohinivaha ‘Mivaho dha attu,’ ali anddimuwa a mmulogoni. (Kengesa Éfeso 4: 8, 11, 12.) Anddimuwa a mulogo agadhowa owona vanuvawo, kapura mudhidhi obu ona weyo wokala na awene wi osunze eziwelo na enonelo yawa.

¹⁹ Motagiha, atelani dhahi ankala elabo yo Inglaterra ana makattamiyo vamateloni vawa, ahakumbira anddimuwa a mmulogoni wi akamihedhe. Muhiyanaya wahoona wila mamunaye kakosa dhilobo ninga musorho wa vatakulu makamaka mmabasa a Yehova. Mulobwanaya ononamo wi kansunziha deretu vina ohirumeela wi kankosa webedha wa ntakulu. Anddimuwa a mmulogoni ahimukamihedha otanalela yotagiha ya Yezu. Awene ahimukamihedha mulobwanaya osaza mukalelo walogana Yezu anamafwara aye. Na muyana ahiloga wi akale okurumuwa na mamune. Vina ahavaha malago okosa webedha wa antakulu awene na aniwa. (Éfeso 5:21-29) Mulubwaya ohilaba vaddiddi wi akale musorho wa ntakulu waderetu. Anddimuwa a mmulogoni ahimulibiha wi ahiyelele mundduni mbwenye alobegevi muya wa Yehova. Okwela na oderetu otonyihedhi anddimuwa aba a mulogo okamihedha wene murala obu!

20. Ogattiya txeza yawo omoneya yodhavoya enakale evi?

²⁰ ‘Wagari ddule onimuriha Yehova, onedda mudila mwaye.’ (Masalmo 128:1) Weyo onowagalala vaddiddi ogattiya txeza yawo omoneya. Wasunziye attu ena mwaha wa Yehova, okose muli mwetemwene wi okamihedhe murala wawo, okamihedhe mulogo wi mukale mumodhani, vina ovyang’anela. Attu ena agoona yotagiha yawo yaderetu anele onvaha nttittimiho Babi wehu, Yehova.​—Mateu 5:16.