1. Elobo gani enittiyaniya na dhinama?

YEHOVA ohavaha attu elobo ya ttima vaddiddi. Ejoya mubuwelo wehu. Eji elobo enittihaniya na dhinama. Iyo ninziwa dhavi wila Adamu na Eva akaana mubuwelo? Mmalelani onvanya Mulugu, awene ahipitala. Sabwani mubuwelo wawa wananyonya.

2. Mubuwelo wehu okaleleni ninga bússola? (Koona foto eli omaromo.)

² Mubuwelo elobo eli mwari mwehu enniwodhiha ottiyaniha eli yaderetu na yabure mwigumini mwehu. Mubuwelo ohishagihiwe mowakwana mwene onkala ninga paporo wogujuwa lemi. Pevo na maneebe manddimuwa anofiyedha omutukumela paporoya wego wahafuniye odhowa. Mbwenye agakaana bússola wolaba deretu onomukamihedha nameddiya omuzugunutxa paporoya wi eeddege monyaala-mwene. Na mukalelo wakakene, akala iyo nishagiha mubuwelo wehu mowakwana-mwene, onele oneddiha deretu.

3. Txini enanipadduwele akala mubuwelo wehu kushagihiwe mowakwana-mwene?

 ³ Akala mubuwelo wehu kanishagihile mowakwana, nigafunaga okosa eli yabure kunanipange wila eloboya eji jabure. (1 Timóteo 4:1, 2) Onofiyedha oninyengetta iyo wonaga wi ‘yabure jaderetu.’ (Izaiya 5:20) Yezu wahapanga anamafwara aye: ‘Niner’ofiya nsaka ninaupegeni attu, obuwelaga wi animuttittimiha Mulugu.’ (Joau 16:2) Jijiwene yobuwela abale ampile namafwara Estêvau. (Merelo 6:8, 12; 7:54-60) Oromana mundduni, attu awinjiva a marelijiau anowapa attu ologaga wi ankosela wi amuzivelihe Mulugu. Mbwenye ejiya kiniwanana na malamulo a Mulugu. (Obudduwa 20:13) Entonyihedhaga wi mubuwelo wawa kuwaweddiha deretu!

4. Ninakaane dhavi ebaribari yawi mubuwelo wehu onolaba mofwanyela-mwene?

⁴ Txini enakose iyo wi mubuwelo wehu olabe mowakwana mwene? Malamulo na magano ali mBibiliani alebiwe wi “dhinisunziye ebaribari, wahélamo anvonya wawógola anvirigana walela athu wi eddena murima womyala.” (2 Timóteo 3:16) Ninofwanyela omusunza Bibilia malabo otene, vina nitanalelege enlogani, nivilibihedhege ovirihamo mwigumini mwehu. Nigakosa dhahene ninofiyedha wubuwela ninga munubuwela Yehova. Iyo ninele okaana ebaribari wi mubuwelo wehu onele oneddiha deretu. Ninele osekeserha mukalelo onalabihedhe iyo malamulo na magano a Mulugu wi nishagihe mubuwelo wehu.

5, 6. Malamulo a Mulugu anikamihedha dhavi?

⁵ Akala ninfuna wi malamulo a Mulugu aneeddihe, kinakwana wengesavi obe oziwa enlogani. Ninofwanyela okwela vina oriha. Bibilia ononaddela: “Txinuwaní obure, eddanina opama.” (Amós 5:15) Ninawodhe dhavi okosa ejene? Ninofwanyela osunza wona dhilobo ninga munonela Yehova. Kobuwela mukaleloya. Motagiha akala weyo kungona deretu, nanda dotoro wawo wupanga dhahi ojege dhoja dhinvaha guru, onddamurege maningo, vina okose matxinjo mwigumini mwawo. Weyo ofwara dhupangiliye, nanda weyo ovulumuwa! Weyo ogamonile dhavi dotoroya?

⁶ Na mukalelo wakakene, muttanddi wehu ohinivaha malamulo na magano annibarela mwa dhodhavo dha ottega wi needdege deretu mwigumini mwehu. Motagiha, Bibilia ononisunziha wi kanizivale, kanikale attu ahinroromeleya, kaniye, kanikale attu ankosa dhilobo dhonyakuwa attu ahinttiddeya mweddo, obe attu anlabihedha dhilobo dhodomonyo. (Kengesa Gano 6:16-19; Ovuhulela 21:8) Nigeha dhodhavo dhinda mwaha wowiwelela malamulo a Yehova, omukwela wehu Mulugu na okwela malamulo aye onowunuwa.

7. Dhopadduwa dhili mBibilia dhinnikamihedha dhavi?

⁷ Iyo kaninfwanyela otabuwa na dhodhavo dhinda mwa olupa magano a Mulugu wi nisunze eli yapama na yabure. Enowodheya osunza na dhovonya dha attu  ena. Dhotagiha esi dhili mBibiliani. Gano 1:5 enologa: “Muthu onna zelu na ononelamo, onovuruwana. N’eji onodhalihedha zelu dhaye.” Masunziho aba anda wa Yehova masunziho attima aliwo! Motagiha, kobuwela mukalelo otabuwile David muttiyeliye omwiwelela Yehova nanda akosa mararuwo na Betsabé. (2 Samuwel 12:7-14) Ogengesaga yopadduwa eji onovivuza: ‘David agawodhile dhavi orabela makani aba? Iyo ninakose eni nigafwanyiwa makani akene? Miyo ddanfuna okosa mararuwo, koddi miyo ddigali ninga David obe ninga José?’ (Wita 39:11-15) Ninele ‘ottiya okosa eli yabure’ nigobuwela mofwaseya mwene yodhavo yowopiha enda muttu agattega.

8, 9. (a) Mubuwelo wehu onikamihedha okosa eni? (b) Mubuwelo wehu ogashagihiwa na magano a Mulugu onlaba dhavi?

⁸ Iyo ninorabela dhilobo dhinidda Mulugu. Akala iyo ninokaana makattamiho, nanda nikooddaga ofwanya yowakulaya mBibiliani enloga mwaha wa makattamihoya, ninakose nni? Ninaziwe dhavi enfuna Mulugu wi nikose? Akala iyo ninottiya oshagihiwa na Bibilia ninele okosa dhosakula dhaderetu.

⁹ Vowi Yehova ononikwela ohinivaha magano aye wi eddihe mubuwelo wehu. Iyene ohiloga: “Miyo ddili Nabuya  Mulugu wawo, onuvaha magano ankaliha, onuvelela mudila dhinfwanyela weyo ovira.” (Izaiya 48:17, 18) Nigatanalela deretu mwaha wa magano a Yehova, iyo ninottiya wi addiginye murima wehu, ninele osaddeya vina otxeniha mubuwelo wehu. Okana monelo ninga obuwene ononikamihedha okosa dhosakula dhaderetu.

10. Magano txini, nanda Yezu olabihedhi dhavi magano wi anisunzihe?

¹⁰ Magano ebaribari eli mBibilia elobo eneddiha dhubuwelo dhehu, enikamihedhaga okosa dhosakula dhaderetu. Oziwa magano a Yehova ononikamihedha ononelamo mukalelo onubuwela iyene na sabwaya enivaheliye Malamulo. Yezu wahilabiyedha magano wi asunzihe anamafwara aye mikalelo na merelo agatoteli oputtuwa. Motagiha, iyene wahiloga wi owali onotatamula kani, mubuwelo wonyakuwa onottukulela olupa matelo. (Mateu 5:21, 22, 27, 28) Nigattiya wi malamulo a Mulugu aneddihe, mubuwelo wehu onokala woshagiyeya nanda ninele okosa dhosakula dhinimuttittimiha Mulugu.​—1 Korinto 10:31.

11. Mubuwelo wa muttu onttiyana dhavi na mubuwelo wa muttu mwina?

¹¹ Mukristu agashagiha mubuwelo waye alabihedhaga Bibilia, iyene onofiyedha okaana dhowakula dha makani ottiyana. Motagiha omwa dholezeliha. Bibilia kanloga wi jabure omwa dholezeliha, mbwenye yabureya olupa maddile ofiyedha olezela. (Gano 20:1; 1 Timóteo 3:8) Eji entapulela wi akala Mukristu kammwa vaddiddi, kanfwanyela wubuwela elobo agafunaga okosa yosakula? Nne. Masiki akala mubuwelo wawo onourumeliha omwa, otanaalele mubuwelo wa akwawo.

12. Mazu anfwanyeya va Roma 14:21 ankamihedha dhavi ovaha ttima mubuwelo wa attu ena?

¹² Paulo wahitonyihedha wi ninofwanyela ovaha ttima mubuwelo wa attu ena: ‘Nona japama otadha nama, vinyu, obe elobo yina endaga omukwakwatutxa mbalo onubuwela wi jokwaruliha.’ (Roma 14:21) Masiki niziwaga wi nikana ofuru womwa dholezeliha nivilibihedhege okoodda omwa vego vali attu anziwa iyo wi nigamwa ninonyonya mubuwelo wawa. Perhaps mbali wana ekarho yomwa dholezela, musunziliye ebaribari ohittiya omwa dholezeliha dhotedhene. Iyo kanigakosile elobo egamukosihile wiyelela elemelelo yaye yawale. (1 Korinto 6:9, 10) Akala ninomuwoba mbali oddu owanihu iyo nigahimudidelana omwa, masiki akoddaga? Nne kanigamudideli!

13. Timóteo ovahile dhavi ttima mubuwelo wa attu ena wi akamihedhe orumela miselu dhapama?

¹³ Timóteo mwaliye muzombwe iyene wahirumela otxetteliwa masiki ekalaga elobo yopa. Iyene wahisunza wi otxetteliwa yali elobo yattima mwa Ayuda aalaleya iyene. Timóteo na Paulo kaafuna wanyimula attu ena. (Merelo 16:3; 1 Korinto 9: 19-23) Weyo onovilibihedha ottiya okosa enuzivela wi wakamihedhe attu ena?

14, 15. (a) Ninawodhe dhavi okala attu owarala? (b) Mukristu owaralile onaweddiha dhavi attu ena?

¹⁴ Iyo notene ninofwanyela ‘ottiya masunziho oroma a Kristu’ nanda “nisogorhena masunziho owaralayá.” (Ahebreu 6:1) Kaninakale akristu owarala sabwa yokala mudhidhi mwinjene mwibaribarini. Mbwenye enofuneya ovilibihedha wi nikale owarala. Jofuneya odhowavi banigalibiha eziwelo yehu na ononelamo wehu. Wi epadduwe dhahene jofuneya omwengesa Bibilia malabo etene. (Masalmo 1:1-3) Ogamwengesaga Bibilia malabo etene, weyo onele ononelamo deretu malamulo na magano a Mulugu.

¹⁵ Nlamulo gani nili namakamaka mwa a’Kristu? Nlamulona okwela. Yezu owapanga anamafwara aye: “Mugakwelagana, athu etene anoziwa wi muli anamasuza aga.” (Joau 13:35) Okwela onittaniwa wi “nlamulo namaka-makaná” vina ‘ovirihamo nlamulo.’ (Tiago 2:8; Roma 13:10) Iyo kanintikina wila okwela kwamakamaka, sabwani Bibilia onloga wi ‘Mulugu okwela.’ (1 Joau 4:8) Mwa Mulugu okwela onopitta efunelo. Iyene ohitonyihedha na dhokosa dhaye. Joau ohileba: “Mulugu ohoniha okwela waye n’eji Mulugu omúruma Nammodha waye mwilaboni, wi n’ovilevela waye nakele egumi.” (1 Joau 4:9) Nigatonyihedha omukwela wehu Yehova, Yezu, abali na attu ena, ninele otonyihedha wi nili a’Kristu owarala.​—Mateu 22:37-39.

16. Masiki akala nili akristu owarala, ninfwanyelela ni ovahetxa ttima magano?

¹⁶ Wi nikale akristu owarala, ninofwanyela ovaha ttima magano. Nlamulo  ninlabihedhiwa elobo ettomeliwani mbwenye magano anlabihedhiwa elobo txilobo. Motagiha, mwana kanziwa yowopiha eliwo yokosa mandano na attu abure, amambali aye anofwanyela omushagiha wi ambarele. (1 Korinto 15:33) Mwanaya agawarala, onele osunza otanalela yeka ensunziha Bibilia. Magano aba anomukamihedha osakula mandano aderetu. (Kengesa 1 Korinto 13:11; 14:20.) Nigalemela otanalela magano ali mBibiliani, mubuwelo wehu onokala wororomeleya. Ninele ononelamo mowakwana-mwene enfuna Yehova wi nikose mmakanini ottiyana-ttiyana.

17. Ninlogelani wi nikaana dhipano dhinjene dhinfunihu olabihedha wi nikose dhosakula dhaderetu?

¹⁷ Nikaana dhetedhene dhinfunihu wi nikose dhosakula dhinimuttittimiha Yehova. Mbibiliani ninofwanya malamulo anikamihedha okala ‘wowakwanene, owaralela mabasa otene apama.’ (2 Timóteo 3:16, 17) Magano ali mBibiliani anonikamihedha ononelamo mukalelo onubuwela Yehova. Mbwenye wi ninonelemo ninofwanyela ovilibihedha. (Éfeso 5:17) Wi enikamihedhe nikana Índice das Publicações da Torre de Vigia, Mutonyo Wopepesa wa Anamona a Yehova, Watchtower BIBILIOTEKA ONLINE, na JW Library. Nigalabihedha dhipano esi ninopurelamo nigakosaga nsunzo nomwinya obe webedha wa ntakulu.

18. Txini enapadduwe nigalabihedha malamulo na magano a Mulugu mwigumini mwehu?

¹⁸ Egumi yehu enoweedda deretu nigalabihedha malamulo a Mulugu! Masalmo 119:97-100 onologa: “Okwela gani onna miyo na malamulo enyu, Nabuya! Mwenemo ddinofwaseyelamo wubuwela malabo etene. Nyuwo mudditxenjeriha opitha amwiddanaga, vowi ddinoweddanavi magano enyu. Ddinowarala opitha anamasuziha aga, vowi ddinotanalela dhóruma dhenyu. Ddinoweddana magano opitha makolo, vowi ddinoviriamo ofuna wenyu.” Iyo nigakaana mudhidhi wotanalela malamulo a Mulugu na maganoya, ninele okosa dhosakula neziwelo. Iyo vina nigalabihedha malamulo na magano wi nishagihe mubuwelo wehu, Ninele “ovahana na wunuwa wawakwana wa Kristu.”​—Éfeso 4:13.