1. Wova wapama txini nanda okaleleni wofuneya mwa abale animukwela Yehova?

AKRISTU anomukwela Mulugu; okwela oku onowattukulela omova iyene. Mbwenye attu ena kanubuwela dhawene. Wova oku onlogihu kahiyo wova wogurumeliha. Ovanene ninfuna nisunze mukalelo wapama wa wova. Attu anna mukalelo obu wa wova anomuriha venjene Mulugu vina anomwiwelela iyene bahi. Awene kanfuna omunyimula Babawa wa wirimu sabwani okosa ejo egaheka omarho wawa na Mulugu vangovini.​—Masal. 111:10; Gano 8:13.

2. Mowiwanana na Mazu a Mwene David anfanyeya va Masalmo 86:11, dhilobo gani bili dhinasunzehu?

² Kengesa Masalmo 86:11. Ogatanaalela mazu aba, onele wona wila Mwene David wannonelamo txini entapulela wova wapama. Ninfuna none mukalelo onalabihedhihu mazu avudheeleliwe David oleba. Voroma, ninfuna none sabwa enittukulela okana nriho nddimuwa na nzina na Mulugu. Yanawili, ninele osekeserha mukalelo onalagiyehu mwigumini mwehu wila nihikaana nriho nddimuwa na nzina na Mulugu.

3. Nipadduwo gani nimukamihedhile Mizé okanavi ekalelo ya oriha nzina na Mulugu?

³ Katanalela ekalelo yali Mizé mudhidhi waliye mugurugudhani mwa nlugu onaga ovira wa nttittimiho na Yehova.  Nivuru Estudo Perspicaz das Escrituras ninloga wi “eji yali yawireya yawumiha milomo empadduweliwe muttu, ejuwene yali ehinatti opadduwa Yezu Kristu ahinabaliwa”. Txino enoneya ninga Mizé ohiwa mazu alogiwa na anju, awi: ‘Yehova, Yehova, Mulugu wanthebwa, wathagaraga, wovilela, wapama-pama, wawiwananeyana. Onavaha dhapama athu, na anawa, na adhulawa anadhegewo okala n’okala-wene; onnlevelela ovanya wawa, na dhoddawa dhawa.’ (Obud. 33:17-23; 34:5-7) Wubuwela nipadduwo ntti nahimukamihedha Mizé olabihedhaga nzina na Yehova mudhidhi wotene. Nona kaninaganyedha wila Mizé musogorhomwa wahapanga attu a nlogo na Mulugu, wila anofwanyela oriha “nzina nothithimiheya nawopiha na Nabuya.”​—Olib. 28:58.

4. Txini enanikamihedhe omurihagavi Yehova?

⁴ Nigobuwelaga nzina ntti, Yehova, ninofwanyela wubuwele vina ekalelo ya mwinyaya wa nzinana. Ninofwanyeela wubuwela mikalelo dhaye ninga: owodha, eziwelo, oligana vina okwela waye. Otanalela mikalelo esi na dhina dhinela onikamihedha omurihagavi Yehova.​—Masal. 77:11-15.

5-6. (a) Txini entapulela nzina na Mulugu? (b) Mowiwanana na Obudduwa 3:13, 14, vina Izaiya 64:8, Yehova onakwaniha efunelo yaye na mukalelo gani?

⁵ Txini entapulela nzina na Mulugu? Anamasunza enjene anorumeela wila nzina ntti, Yehova, nintapulela “Iyene Onowakwaniha Ejile Enganiye.” Ejo enoninonihedhamo wila Yehova bahi ddinwodha wakwaniha ejile enfuniye s’ohikalawo elobo yomutximiha. Na mukalelo gani?

⁶ Yehova onokosa elobo txilobo enfuniye wila akwanihedhe nlibelo naye. (Kengesa Obudduwa 3:13, 14.) Iyo ninokokomeziwa otanalela mukalelo obu wottittimiheya wa Mulugu. Yehova onowodha walabihedha adhari aye ohakwana wila akwanihedhe ejile enfuniye. (Kengesa Izaiya 64:8.) Na mukalelo obu, Yehova onokosiha efunelo yaye wakwanihedheya. Kayiwo elobo enimukosiha iyene ohiwodha wakwanihedha efunelo yaye.​—Iza. 46:10, 11.

7. Ninawodhe dhavi wunuwiha omutamaalela Babihu wa wirimu?

 ⁷ Iyo ninowodha wunuwiha omutamaalela wehu Babihu wawirimu nigatanalela esile dhinkosiye vina dhiniwodhihiye okosa. Motagiha, nigatanaalela dhottanddiwa dhowumiha milomo dhikosiliye, iyo ninotikina vaddiddi na esile dhiwodhile Yehova wakwaniha, kuloga esile dhinttanddileye. (Masal. 8:3, 4) Iyo nigatanaalela esile dhinniwodhiha Yehova okosa wila nakwanihedhe efunelo yaye, ninele owodha omuriha vaddiddi. Txibarene nzina ntti, Yehova, ninofwanyela orihiwa-wene! Ejo eniwanana na dhetene dhili Babi wehu, dhotene dhiwodhiliye wakwaniha, vina dhotene dhinakwanihe iyene.​—Masal. 89:7, 8.

8. Nlebo na Olibiha 32:2, 3 Yehova onvaha monelo gani mwaha wa nzina naye?

⁸ Ana Izrayel, ahinatti ovolowa Elabo Yopikireliwa, Yehova wahimusunziha Mizé mazu a jibo. (Olib. 31:19) Mmalelani Mizé wahisunziha jiboya nlogo notene. (Kengesa Olibiha 32:2, 3.) Nigatanalela versu esi 2 na 3 ninottittimiha nzina naye, ninowona-wene wi Yehova kanfuna wi nzina naye nipipirihiwege. Yehova onfuna wi dhottanddiwa dhotene dha eziwelo dhiziwe nzina naye! Yali gari enddimuwa vaddiddi wa attu abale ewa masunziho a Mizé aloga mwaha wa Yehova vina mwaha wa nzina Naye nottittimiheya! Masunziho avahiwani na Mizé analibiha vina anapangarhaza, ninga muzogwe onrubwela milima. Ninawodhe dhavi oziwa wi dhinsunziha iyo dhinowalibiha attu?

9. Ninakamihedhe dhavi ottittimihiwa wa nzina na Yehova?

⁹ Nigalaleyaga vattaddo obe numba na numba, ninomulabihedha Bibilia wila naziwihena attu wi Mulugu nzina naye ddi Yehova. Egawodheya ninowavaha nivuru, walagiha vidiyu enddiginya murima, na wattonhiyedha vipano dhili mu site esuwene dhinimuttittimiha Yehova. Nigakala omabasani, oskola, peno ningakosaga oleddo, ninofwanyela olabihedha gari yotene wila nawaddele attu mwaha wa esile dhinimuzivela Mulugu wehu wokwela. Iyo ninanonihedhamo attu okwela wa Yehova nigawaddelaga mwaha wa supaje yaye, vina n’ejileya enfuniye wakosela attu a malogo otene. Nigawaddelaga attu ebaribari ya Babihu wokwela, ninokamihedha ottittimihiwa wa nzina na Mulugu. Nigakosa dhawene ninela wakamihedha attu ononelamo wi dhilobo dhinsuzihiwani mwaha wa Yehova s’ottambi. Dhahene iyo ninowavaha masunziho aliwo olibiha vina opamgarhaza.​—Iza. 65:13, 14.

10. Nigeeddihaga nsunzo na Bibilia enfuneyelani okosavo venjene ottiya okalela omusunzihavi magano na malamulo oligana a Mulugu?

¹⁰ Nigeeddihaga nsunzo na Bibilia ninofwanyela omukamihedha namasunzaya oziwa vina olabihedha nzina na Yehova. Ninofwanyeela vina omukamihedha ononelamo esile dhiniwanana na nzinana. Ejo enowodheya na omusunziha bahi magano, malamulo na mweddelo onfuna Mulugu? Namasunza wapama onofwanyela ovaha ttima malamulo a Mulugu. Ebaribariya jawi namasunza agahimukwele Yehova enele okala yorutxa wiwelela malamuloya. Kobuwela, Eva wanziwa malamulo a Mulugu, mbwenye kaana okwela webaribari na Mulamuleliya; Adamu vina kanna. (Wita 3:1-6) Ninofanyela ovilibihedha ottiya wasunzihavi attu magano na malamulo a Mulugu.

11. Nigasunzihaga magano na malamulo a Mulugu ninawodhe dhavi wakamihedha anamasunza omukwela Mulamuleliya?

¹¹ Malamulo a Yehova na magano aye ba pama vina ninopurelamo. (Masal. 119:97, 111, 112) Mbwenye anamasunzaya  kananonelemo dhawene agahone okwela wa Yehova mwari wa malamuloya. Ninofwanyela onvuza namasunza wehu: “Ninga munubuwelela weyo Mulugu onakumbirela eni adhari aye wi eji akose eji arabele? Iyo ninfwanyelela eni wawaddela attu ena sabwa ya ekalelo ya Mulugu?” Iyo nigamukamihedha namasunza otanalela vina wunuwiha okwela webaribari mwaha wa nzina nottittimiheya na Yehova ninele owodha oddiginya murima waye. Ottiya okwelavi malamuloya anamasunza ehu anelege omukwela Mulamuleliya. (Masal. 119:68) Awene anele wunuwiha nroromelo vina anele owodha okamihedheya agagumanana makattamiho musongorho.​—1 Kor. 3:12-15.

12. David wattiyile dhavi murimaye ogaweya, nanda txini edhile opadduwa?

¹² Mwene David wahivudheleliwa oleba mazu aba amakamaka anfwanyeya va Masalmo 86:11 anloga “eddihani murima waga.” Mwigumi mwaye wahoona na mento aye wi murima wa muttu kunrutxa ogaweya. Motagiha, nsaka dhahi bali onsittoni wa nyumba yaye wahimoona mwadhi mwinya ahabaga. Mudhidhene obule, David wana murima mmodha obe wahigaweya? Iyene wanziwa malamulo a Yehova aloga: “Kumunlele mwadhi mwinya.” (Obud. 20:17) Enkala ninga iyene wela okalela ntidi omwag’ana. Murima waye wahimala ogaweya, mpaddi mmodha wamusirhirha, Betsabé, mpaddi mwina wanfuna omwagalaliha Yehova. Masiki David vamukweliye vina vamoviye Yehova, iyene wahifwara yonlela murimaye. Mwadhawene dhubuwelo dhaye dhahimuttukulela okosa dhilobo dhonyakuwa. Ejo ehipigidha nzina na Yehova. Iyene wahatotela makattamiho attu ahana muladdu vina na amudhaye.​—2 Sam. 11:1-5, 14-17; 12:7-12.

13. Iyo ninziwa dhavi wi David wahidha okana murima mmodha?

¹³ Yehova wahimusaddeya David vina iyene wahiyelela wili, mandano aye na Yehova. (2 Sam. 12:13; Masal. 51:2-4, 17) David wannubuwela makattamiho agumaniliyena vina odhugudheya weteyile sabwa ya ottiya murima waye ogaweya. Iyene ohiloga mazu aba ali va Masalmo 86:11: ‘Muddivahe murima mmodha.’ Yehova wahimukamihedha David okana murima mmodha? Ndde, sabwani Mazu a Yehova anologa wi David wali mulobwana ‘wana murima waweddeyana na Yehova Mulugu waye.’​—1 Amwe. 11:4; 15:3.

14. Txini enfwanyelihu ovivuza, nanda sabwaya jani?

¹⁴ Dhotagiha dha David dhinonilibiha vina  dhinonivaha malago. Dhovonya dhaye dhimutotele ottega dhinowalibiha adhari a Yehova masaka abano. Masiki akala niromile omulabela Yehova ovanene obe mwa vyaka dhinjidhene, iyo notene ninofwanyela ovivuza, ‘Ddinorabela mirega dha Satana wi murimaga ohigaweye?’

15. Omova Mulugu oninbarela dhavi wona mafoto anlagiha mararuwo?

¹⁵ Motagiha, akala weyo onowona TV obe internetini nanda vadha mafoto antatamula dhifunelo dhogonihana, ogakosile dhavi? Kinrutxa otanalela wi mafotoya obe vidiyu eji kahiye ya wawona attu bali yovi. Mbwenye ejoya egahikala murega onlabihedha Satana wi agawe murima wawo? (2 Kor. 2:11) Mafoto antatamula dhifunelo dhogonihana, anoladdanihiwa na txili enlabana muttu wi aparulena kuni. Namaparulaya onokomela txili mukuninimwa mumparuliye. Agakomagavi txiliya, kuniya enoparuleya. Yakakene jimpadduwa na mafoto anonihu. Nigang’anaga ankala ninga kanopiha vina kananitotele ngovi, dhayene ninga enpadduwa na toga ya txili. Esile dhinubuwelihu wi dhilobo dhing’ono, dhinogawa murimehu dhinittukulelaga okosa yottega. Ninofwanyela orabela elobo elobovi egadhile ogawa murimehu!

16. Nigafwanyiwa dhoweha, ninfwanyela ovikosa mavuzo gani?

¹⁶ Ottiya mafoto onyakuwa Satana onolabihedha marhe menji wi anikwekwette. Ninawodhe dhavi orabela? Kinrutxa muttu oroma otanalela wi eji kahiyo elobo yabure. Motagiha, iyo nigahidha wubuwela: ‘Miyo kaddinburutxiwa mmulogoni sabwa ya ejene, vowi ejiya kahiye yabure.’ Wubuwelaga dhawene elobo yabure vaddiddi. Enokala yamalago ovikosa mavuzo aba: ‘Obu murega wa Satana onfuniye olabihedha wi agawe murimaga? Akala ddinofwara dhifunelo dhaga dhinele ottittimiha nzina Yehova? Yosakula eji enele oddikamihedha  okala vakuvi na Mulugu, obe enele oddittukulela okala wolapela na iyene?’ Otanalelege mavuzo aba. Orome olobela, okumbirhaga ononelamo wi wakule na ororomeleya, s’ohivipela malago. (Tia. 1:5) Okosa dhahene enokala nibarelo napama. Eji enele wukamihedha orabela dhoweha okalaga pwi, ninga mwakosile Yezu walogile dhahi: “Kadduwonevo, Satana wé!”​—Mt. 4:10.

17. Ekaleleni elobo yabure okana murima wogaweya? Kavaha yotagiha.

¹⁷ Kinkala okana murima wogaweya. Kobuwela nikuru na anamaponya mpirha, munkala ena ahiniwanana na akwawa. Ena otamelaga ovittittimiha, ena ohifwaraga malamulo oponyana mpirhaya, oku ena ahimurihaga namaswagihaya. Nikuru ninga ntti txipo kanigawodhile opemberha. Mottiyana, nikuru nowiwanana ninodha opemberha. Murima wawo onele okala ninga nikuru ninpemberha ogeka dhubuwelo, dhitanaalelo, na dhifunelo dhawo mumulabelani Yehova bahi. Kudduwale wi Satana agahiziveliwa wuwoona buna murima wogaweya. Iyene onfuna wila dhubuwelo, dhitanaalelo na dhifunelo dhawo dhihiwananege na Yehova. Mbwenye weyo onofwanyela ogana omulabela Yehova na murima wawo wotene. (Mt. 22:36-38) Txipo kumuttiye Satana ogawa murima wawo!

18. Mowiwanana na mazu a Mikeya 4:5, txini eganiliwe okosa?

¹⁸ Kamulobelele Yehova dhahene ninga David: ‘Eddihaní murima waga, wi ddovege nzina nenyu.’ Kakosa guru wila wakwanihe nlobelo ntti okalawo wawo wotene. Kavilibihedhe ovirihamo yogana yawo siku-na siku, mwa dhilobo dhing’ono peno dhinddimuwa, kalagiha wila okana nriho nddimuwa na nzina na Yehova. Ninga Munamoona wa Yehova, ogakosa dhawene onele olagiha wi onottittimiha nzina naye. (Gano 27:11) Yamakamakaya jawi notene ninele ologa ninga namavuhulela Mikeya wile: ‘Iyo ninere weddagavi na nzina na Yehova Mulugu wehu’.​—Mik. 4:5.