1. Yehova oniwamo dhavi akala nibila naye ninomwiyelela?

NINGA musunzelihu mutoma ovirile, Yehova oli ninga mukumbuzi wapama onzuzumela nibila nimodha-nimodha. Nanda onotamela nttile ninrimela. Yehova wahawaddela dhahi ana Izrayel attiyile omulabela: “Eyelelani oli miyo; miyo ddinere owakelani.” Iyo ninoziwa wi iyene onowiwamo na mukalelo wakakene vowi ohiloga dhahi: “Miyo kaddinsadduwa.” (Mal. 3:6, 7) Yezu wahiloga wi Yehova na angelo anottaba vaddiddi akala mudhari waye mmodha onomwiyelela.​—Lk. 15:10, 32.

2. Txini enasekeserhihu mwari mwa mutoma obu?

² Ninele osekeserha misibo miraru dhilogile Yezu dhinoniha mikalelo dhowakamihedha abale attiyile omulabela Yehova. Ninele osekeserha mikalelo dhing’onovi wi niwodhe okamihedha mabila arimelile omwiyelela Yehova. Vina ninele wona wi nigakosa guru ya omukamihedha muttu ottiyile omulabela Yehova ninele wagalala.

3-4. Mowiwanana na Luka 15:8-10, Txini yamuttukulele muyana oddule ofwaseyela otamela kobiri yamurimelile?

³ Iyo ninofwanyela olaba na guru wi nafwanye abale anfuna omwiyelela Yehova. Musibo ologile Yezu olebiwe mMuttakani mwa Luka, onowoniha mukalelo watamela muyana elobo yamakamaka yamurimelile​—mujila mmodha wa kobiri. Musibo obu onowoniha ofwaseya waye wa otamela.​—Kengesa Luka 15:8-10.

⁴ Yezu ohitapulelamo muttabelo wa muyana oddule mufanyeliye kobiri yaye yamurimelile. Nsaka na Yezu Mambali wa Muyuda wanimukamihedha mwanaye siku nateliwiye, anvahaga mijila kumi dha kobiri. Enooneya ninga kobiri ejile yankosa mpaddi wa esile dhavahiwiye na maye. Muyana oddule  wahizuzumela kobiri ejile yamurimelile. Iyene wahittiddiha panti vina wahitamela-tamelá mbwenye kafanya. Omamalelowa wahisela mba mwetemwene. Mmaleliye osela wahoona ozerimela wa kobiri ejile va mbwebweni sabwa ya ottidda wa panti. Mufanyeliye wahittugareya! Iyene wahakuwela akwaye vina anamwanddamani bawaddela miselu dhapama.

5. Enkalela nni yorutxa wafwanya abale attiyile otugumana?

⁵ Musibo wa Yezu ononisunziha wi ninofwanyela olaba na guru wi nifwanye elobo erimelile. Na mukalelo wakakene, iyo ninofwanyela olaba na guru wi nafwanye abale attiyile otugumana. Masiki akala vanovira vyaka awene battiyile otugumana na iyo. Txino awene andhaga omwalela wego wina ohiziwa abali. Mbwenye masaka abano, kaninfwanyela waganyedha wi abale amuttiyile Yehova anofuna omwiyelela. Awene onofuna omulabela Yehova vamodha na abali a mmulogoni, mbwenye anofuna nikamihedho nehu.

6. Otene a mmulogoni anawodhe dhavi wakamihedha abale attiyile omulabela Yehova?

⁶ Bani onfwanyela watamela obe wakamihedha abale attiyile omulabela Yehova? Iyo notene​—anddimuwa a mulogo, apionero, amambali, vina anamalaleya a mmulogoni​—anowodha watamela wi akamihedhe. Weyo ohikana marho awo obe mwana mmudhi ottiyile omulabela Yehova? Olaleyaga numba na numba obe ovahaga onamona wa vattaddo ohimuziwa muttu ottiyile omulabela Yehova? Akala onopadduweliwa dhawene, omvuze uttuya akala onofuna wi weyo ologe na anddimuwa a mmulogoni wi adhowe aloge na iyene.

7. Txini esunzile weyo na yologa ya munddimuwa wa mulogo oniliwa Thomas?

⁷ Tharho gani dhavawoka dhinfanyeela anddimuwa a mmulogoni ofwara wi akamihedhe abale anfuna omwiyelela Yehova? Koona elogile munddimuwa mmodha onkuweliwa Thomas. * Iyene onkala elabo ya Espanha ohakamihedha anamoona akwaranya 40 wiyelela mmulogoni. Thomas ohiloga: “Vamaromo ddahavuza abali na arogora ottiyana-ttiyana akala anziwa wakala muttu mmodha-mmodha. Ddannavuza anamalaleya, akala annimubuwela muttu ottiyile otugumana. Abali enjene a mmulogoni annakula n’oziveliwa vowi anfuna watamela. Vasogorhova, ddigadhowa omweeddelela mbali obe murogora akumuwele mabasa a Mulugu, ddannavuzedha aniwa na anamudhi ena. Ena anroma odha omatugumanoni na aniwa, mwa mudhidhi mung’onovi aniwaya ahikala anamalaleya. Awene vina ahikamihedhiwa omwiyelela Yehova.”

8. Musibo wa mwana wopawula onfwanyeya va Luka 15:17-24, babe omweddihile dhavi mwanaye wamalile otxinuwa?

⁸ Mikalelo gani dhifwanyelihu okana wi nakamihedhe abale anfuna omwiyelela Yehova? Ninele opurelamo musibo walogile Yezu wa mwana wopawula wavenyile vatakulu. (Kengesa Luka 15:17-24.) Yezu ohitapulelamo mukalelo wadhile mwanaya ononelamo otolo wakosiliye vina agana wiyelela vatakulu. Mmonile babe wahimuttamagela vina wahimukubatta vowi wannimukwela. Mubuwelo wa mwanaya wannimukubanyiha vina wahifiyedha ologa wi kaddinfwanyela vina withaniwa mwaninyu. Mmalile mwanaya ologa dhali mmurimani mwaye babe wahimweddela ttagaraga. Babe wahikosa elobo yamakamaka yoniha wi mwanaye wahakeliwa vatakulu na mada meeli, ottiya ninga namalaba, mbwenye ninga mwana wokweleya. Babe wahikosiha  mattanga vina wahimvaha dhabalo dhapama mwanaye wamalile otxinuwa.

9. Mikalelo gani dhinfwanyeelihu okana wi nakamihedhe akumuwile omwiyelela Yehova? (Kang’ana kasha “ Ninawodhe Dhavi Wakamihedha Abale Anfuna Wiyela.”)

⁹ Yehova oli ninga babi oddu ologiwe mmusiboni mpu. Iyene onowakwela abali na arogora ehu attiyile otugumana vina onfuna wi amwiyelele. Nigamutagiha Yehova ninele wakamihedha ofiyedha wiyela. Wi niwodhe wakamihedha ninofwanyela walagiha okwela, ovilela vina ttagaraga. (Tia. 2:13) Ninfwanyelela eni okana mikalelo esi dhilogiwe, vina ninawodhe dhavi olagihawa?

10. Enfuneyelani ovilela nigafunaga omukamihedha muttu wiyelela wili mandano aye na Yehova?

¹⁰ Jamakamaka okala ovilela sabwani vanofuneya mudhidhi wila muttu eyelele wili mandano aye na Yehova. Attu enjene akumuwele omulabela Yehova ahiloga wi, wila eyelele mmulogoni, yahifuneya weeddeleliwa dila dhinjidhene na anddimuwa vamodha na abali ena a mmulogoni. Murogora dhahi onkala elabo ya Ásia ohiloga: “Marho dhahi wa mmulogoni wahiddikamihedha vaddiddi. Iyene wanddikwela ninga muttu wowunuwelavo. Iyene wahiddubutxedha nsaka nttile nakalihu oohagalalene vina mumodhani. Wanddivuruwana na ovilela ddigalogaga esile dhaddikubanyiha vina wanddivaha malago s’ohova elo. Iyene wahooniha okala marho watxibarene vina wali omala nawale wila addikamihedhe.”

11. Ekaleli nni yofuneya okana ttagaraga na oddule onyimuwile?

¹¹ Dhahene ninga murobwe onwodha onvulumutxa muttu, ttagaraga enomukamihedha muttu okala ofwaseyene. Enagu anottiya otugumana sabwani ahikana maguddulano na abali a mmulogoni, makattamiho abo anowatotela  okala okubanya vina onyonyeyene mwari mwa vyaka dhinjene. Okubanya oku onomuttukulela muttuya ohifuna wiyelela omulabela Yehova. Ena onowubuwela wi keddihiwa na mukalelo wofanyelela. Txino ena aninfuna muttu onziwa ovuruwana deretu vina onnonelamo dhubuwelo dhawa. (Tia. 1:19) María wattiyile omulabela Yehova, ohiloga: “Miyo ddaninveda muttu agawodhile oddivuruwana vina oddikamihedha na malago a pama.”

12. Katapulelamo mukalelo onatonyihedha Yehova okwela abale akumuwele omulabela wi amwiyelele.

¹² Bibilia onoladdaniha okwela ona Yehova na nlogo naye ninga kabala yorinta. Okwela wa Mulugu onladdanihedhiwani na kabala? Karoma wubuwela dhahi: Weyo oroma oririma munyaza, ngamala muttu wuvokela yabalo yomberuwana, wi yumberutxege. Mohaganyedha weyo ogahimutamalela sabwani iyene owukamihedha ohiririmela. Mbwenye yabalo yomberuwana kinawodhe ovuna egumi yawo. Mmanjenimwa munoridha, nona, ogahiwodhe ofiyedha mwanddiya egumi yawo enela okala vangovini. Onele ofuna nikamihedho na muttu ona kabala wi oponyedhe, agamala auwetele vali mwanddiya. Yehova wahiloga dhahi na ana Izrayel attiyile omfwara: ‘Ddannattiddela, ddannaweta na kabala na mikalelo dh’omayi, dh’owakwela.’ (Oz. 11:4) Masaka abano Yehova oniwamo na mukalelo wakakene sabwa ya abale attiyile omwebedha vina abale anririma na makattamiho anadhugudha. Iyene onfuna wi awene aziwe wakwela waye vina onofuna wakamihedha wi amwiyelele. Yehova onowodha wulabihedha wi alagihe okwela waye.

13. Katapulelamo yotagiha enoniha wi okwela wehu onowodha wakamihedha ena omwiyelela Yehova?

 ¹³ Jamakamaka walibiha abale akumuwile wi Yehova onowakwela iyo vina ninowakwela. Dhihivira okwaranya vyaka 30 Pablo onkala Ogusini wa Amerika battiyile omulabela Yehova. Iyene ohiloga: “Siku dhahi na membesi miyo ddela obudduwa vatakulu murogora wa mwanakalaba muddifwanyeliye wahiloga na mukalelo wokwela. Ddahiroma wunla ninga mwana. Miyo ddahimwaddela wi yakala ninga Yehova ddamurumile wi aloge na miyo. Mudhidhene obule ddahigana omwiyelela Yehova.”

14. Mowiwanana na musibo onfanyeya va Luka 15:4, 5, txini enkosa mukumbuzi agamala ofwanya nibila naye narimelile?

¹⁴ Dhahene ninga mwana wopawula omulogile Yezu mmusiboni abale akumuwile txino anokala mudhidhi mwinjene bali odhugudheyene. Awene anofuna nikamihedho nehu dila dhinjene. Sabwa yawi yali mwilaboni ya Satana anowobana mpaddi womwiyani. Iyo ninofwanyeela wakamihedha wi alibihe wili nroromelo nawa na Yehova. Mmusiboni wa nibila norimeela, Yezu ohiloga wi mukumbuziya agafwanya nibilana onokapatta vetturini vina onowiyihedha muttanganimwa. Mukumbuziya onononga mudhidhi na guru dhaye atamelaga nibila nimurimeelile. Iyene onoziwa wi nibilana ninofuna wiyihedhiwa muttangani vowi kanina guru dha wiyelana woka.​—Kengesa Luka 15:4, 5.

15. Iyo ninawodhe dhavi omukamihedha muttu onfuna omwiyelela Yehova? (Kang’ana kasha “ Dhipano Dhiliwo.”)

¹⁵ Iyo ninofwanyela ononga mudhidhi vina guru wila nakamihedhe abale akumuwele mabasa omuyani owodha okwaranya makattamiho awa. Na nikamihedho na muya wa Yehova,  Nzu naye, vina manivuru anakelihu mmulogoni, ninele owodha wakamihedha olibiha wili nroromelo nawa. (Rom. 15:1) Ninawodhe dhavi? Munddimuwa dhahi wa mulogo onakamihedhaga ena ohiloga: “Attu enjene akumuweli mabasa a Mulugu, anofuna okana nsunzo na Bibilia agagana wiyelela omulabela Yehova.” * Weyo ogakumbirhiwa wi omusunzihe muttu okumuweli mabasa omuyani onele wona ninga gari? Munddimuwa mwina wa mulogo ohiloga: “Namalaleya onimusunziha muttu okumuweli mabasa omuyani, enofuneya wi akale marho wapama vina wokuluveleya na oleya onimusunziheye.”

16. Iyo ninziwa dhavi wila nikana nikamihedho na wirimu?

¹⁶ Dhotagiha dhinji dhinowooniha wi anju onolabavi wi anikamihedhe wafwanya abale anfuna omwiyelela Yehova. (Ovuh. 14:6) Motagiha, Silvio onkala elabo ya Equador, anlobela wi afanye nikamihedho na wiyelela mmulogoni. Mudhidhene obo walobeliye anddimuwa a mulogo eli ahifiya vatakulu vaye. Mwari mwa waredheliwa okule, awene ahagalala mwaha wa onvaha nikamihedho nafuniye wi amwiyelele Yehova.

17. Niniwamo dhavi nigamukamihedha muttu okumuwele?

¹⁷ Iyo ninele ottaba venjene nigamukamihedha muttu okumuweli mabasa omuyani omwiyelela Yehova. Kona elogile pionero dhahi onkuweliwa Salvador wanfaseyele onvuruwana muttu okumuweli mabasa omuyani, bela: “Ddinowagalala venjene ddigawonaga abale animwiyelela Yehova.” Enoddagalaliha vaddiddi oziwa wi Yehova onovuna mabila aye amwadheyeli mwilaboni mwa Satana vina ddikana gari ya olaba vamodha na Iyene mmabasani mpu.”​—Mer. 20:35.

18. Akala weyo okumuwela mabasa omuyani, txini enfwanyeliwe oziwa?

¹⁸ Akala weyo ottiya otugumana na nlogo na Yehova kakana ebaribari yawi iyene onowukwelavi. Iyene onfuna wi omwiyelele. Weyo onofwanyela okosa guru wila omwiyelele. Ninga Babi omulogile Yezu mmusiboni, Yehova onojeedhela wila weyo omwiyelele, vina onele wagalala wuwakela vatakulu vaye.