Versu esi dhinowooniha mikalelo mitanu na minayi: ‘Dhimbala muya sisi okwela, ottaba, murenddele, ovilela, ttagaraga, oderetu, nroromelo, okurumuwa na ovipimelela.’ Ottiya esenevi bahi, dhihikalawo mikalelo dhina dhapama dhinfwanyelelihu wunuwiha na nikamihedho na muya wokoddela wa Mulugu.

Ninziwa dhavi? Murumiwi Paulo ahinatti oromola esile dhimbala muya, wahileba: “Dhinthopa maningo, dhinoziweya: oraruwa, ojeberuwa, wira dha manyazo, webedha dhilobo dhihilí Mulugu, makaga, ntxiga, kani, aje, owali, widdana, otugulana, nrima, olezela, okwaranyiha oja n’omwa, na dhina dhinladdanana.” (Gal. 5:19-21) Paulo ogomihile na mazu aba “na dhina dhinladdanana,” kuloga iyene karomolelile dhilobo dhotene “dhinthopa maningo.” (Kol. 3:5) Na mukalelo wakakene, mmaleliye ologa mikalelo esile dhapama, iyene ohileba: “Kaniwo nlamulo ninimukona onvira mwenemwa.” Nona Paulo karomolile mikalelo dhotene dhapama dhinawodhihu wunuwiha na nikamihedho na muya wokoddela.

Ninanonelemo makani aba nigaladdaniha dhimbala muya wokoddela na esile dhilogile Paulo alebelaga mulogo wa Éfeso: ‘Dhawima dha warya sisi oderetu, yeddelo yoligana vina ebaribari.’ (Ef. 5: 8, 9) Ebaribari wi, ‘oderetu’ onokosa mpaddi wa “dhawima dha warya,” mbwenye vina obu mukalelo wa ‘dhimbala muya wokoddela.’

Mowenjedhedha, Paulo wahimulibiha Timóteo wunuwiha mikalelo mitanu na mmodha dhapama​—valogiliye wi ‘tamelá weddana murima womyala, womuriha Mulugu, wororomela, wokwela, wokanela ntidi vina wokurumuwa.’ (1 Tim. 6:11) Ninga munonelihu, mikalelo esi miraru bahi (nroromelo, okwela na okurumuwa) siromoliwevo ninga mpaddi wa esile ‘dhimbala muya wokoddela.’ Mwebaribari, Timóteo wanfwanyela wunuwiha murima womyala, womuriha Mulugu vina wokanela ntidi, mbwenye, wila iyene onuwihe yanfuneya okana nikamihedho na muya wokoddela.​—Kaladdaniha na Kolosi 3:12; 2 Pedro 1:5-7.

Mpaka veneva, nihona wi kahiyo mikalelo esile bahi dhiromoliwe va Galásia 5:22, 23 dhinfwanyela Akristu wunuwiha. Muya wokoddela wa Mulugu ononikamihedha wunuwiha mikalelo mitanu na minayi ‘dhimbala muya wokoddela.’ Mbwenye dhihikalawo mikalelo dhinjidhene dhinfwanyeelihu wunuwiha wila nikale Akristu oliba omuyani vina nittukule ʼmakalelo a muthu muswa, opadutxeliwe oladdana na Mulugu, neddagana oligana murima, omukoddelela Mulugu mwibaribarini.ʼ​—Ef. 4:24.