NSUNZO 23
“Nzina Nenyu Nithithimihiwe”
“Nabuya, nzina nenyu ninokalawovi.”—ASAL. 135:13.
JIBO 9 Nimvuwihe Yehova Mulugu Wehu!
DHINASUNZE IYO *
1-2. Makani gani anapatta Anamoona a Yehova otene?
IYO NOTENE nihikaana makani anfwanyelehu wakulela—ottonga na wamelela Onddimuwa wa Yehova. Iyo ninoziveliwa vaddiddi ologa mwaha wa makani aba, sabwani nili Anamoona a Yehova. Mbwenye kahiye wi ninottiyaniha onddimuwa wa Yehova—ninga makani ovapeya.
2 Iyo notene ninoziwa wi nzina na Mulugu ninotakalihiwa, noona ninofwanyela okoddeliha. Nihisunza wi jofwanyela olagiha wi onddimuwa wa Yehova na olalamulela waye onofwanyela wonihiwa wi bulitxi wamakamaka. Dhetedhene esi ninofwanyela ozuzumela vina okalela txenjewa.
3. Nzina ntti Yehova nintaganyiheya na eni?
3 Mwebaribari, nzina ntti Yehova nintaganyiheya na dhilobo dhetene dhili dha Mulugu wehu, vina niniwanana na muttongelo waye. Noona, akala ninloga wi ottittimihiwa wa nzina na Yehova kulitxi wamakamaka, ninowikamo vina yubuwelo yawi, ninofwanyela woniha wi muttongelo wa Yehova bwa ttimaya-ttimaya. Nzina na Yehova nineedda mumodhani na muttongelo waye ninga mulamuleli Munddimuwa.—Koona kasha, “ Ovolowa Mmakanini Manddimuwa.”
4. Masalmo 135:13 onloga elobo gani mwaha wa nzina na Yehova, vina mavuzo gani anasekeserhe iyo mwari mwa mutoma obu?
4 Nzina ntti Yehova, kaninligana na mazina mena. (Kengesa Masalmo 135:13) Txini enkosiha nzina na Yehova okala na ttima enddimuwa vaddiddi? Vamaromo nzina ntti nivurhaniwe dhavi? Mulugu onttittimiha dhavi nzina naye? Elobo gani enfwanyela iyo okosa wila namelele nzina ntti na Yehova? Ndoweni niloge mwaha wa mavuzo aba.
ELOBO GANI ENVAHA TTIMA NZINA
5. Mavuzo gani ankosaga attu ena ttangwi ya ottittimiha nzina na Mulugu?
5 “Yezu afunaga olobela oromile ologa mazu aba: “Nzina nenyu nithithimihiwe.” (Mt. 6:9) Mazu aba a Yezu anttapulela nni? Wila nttittimihe elobo-txilobo, enofuneya otxeniha, vina weddihaga deretu wi enapigidheye. Koddi nzina na Yehova kanimale otxena, kanimalile okoddela, nihipigedheya? Wila nakule nivuzo ntti ninofwanyela oziwa txini entapulela nzina.
6. Txini enkosiha Nzina okala na ttima?
6 Ttima ya nzina enopitta olebiwa vina oromoliwavi bahi. Karoma woona enloga Bibilia: “Nzina nothithimihiwa thinkala opitha makura onukela.” (Gano 22:1; Koh. 7:1) Nzina ninkanela eni ttima dhahene? Sabwani eji eniwanana na mweddelo wa muttuya vina mukalelo ononiwa muttuya ona nzinana na attu ena. Jijene enkosiha muttu ottomeliwa nzina—obe wittaniwa na nzina naye—ttima ya nzina kindha munzinanimwa, nne, enda mmereloni a muttuya; akalawo attu anttuviwa mazina mowiwanana na merelo awa.
7. Attu antakaliha dhavi nzina na Mulugu?
7 Attu agalogaga dhommagedhana Yehova, awene antakaliha ekalelo yaye. Venevo vantakalihani ekalelo yaye, awene anoveyiha nzina naye. Otakalihiwa wa nzina na Mulugu witeyile mudhidhi mung’onovi mmalele Adamu na Eva opaddutxiwa. Karoma wona dhinasunzehu mwari mwa otakalihiwa wa nzina ntti.
VOROMA-VENE NZINA NA MULUGU NITAKALIHIWE DHAVI
8. Txini yaziwa Adamu na Eva, vina mavuzo gani ambudduwavo?
8 Adamu na Eva anziwa nzina na Yehova vina anziwa ebaribari ya Muliba nzinana. Awene anziwa wi iyene wali Muttanddi wawa, Wavahile egumi, Paraizu wokoddela vina murala wohagalala. (Wita 1:26-28; 2:18) Kito mwa dhotedhene esi dhivahiwani awene ahidhowavi alabaga na yubuwelo yawa wi atamalegena esile dhivahiwani na Yehova? Awene ahunuwiha okwela vina otamalela mwaha wa Mwinya wa nzina ntti? Yowakulaya yoneyile mudhidhi onyengettiwani na mwiddani wa Mulugu.
9. Ninga munlogela Wita 2:16, 17 vina 3:1-5, txini yawaddele Yehova Adamu na Eva vina Satana osaddulile dhavi ebaribari eji?
9 Kengesa Wita 2:16, 17 na 3:1-5. Satana ohika mazu aye mwano mwa nowa, banvuzana dhahi Eva: “Txibarene Mulugu oukoddihani oja milima dha miri dhili muddebe-mpuno?” Ntti nali nivuzo nopela malago vina nopyaga. Yalogile Mulugu yali yawi awene aje miri dhotedhene dhali mwenemwale, mbwenye wakoddihile mmodha bahi. Adamu na Eva ahikana miri dhottiyana-ttiyana mparaizu. (Wita 2:9) Txibarene, Yehova, Mulugu wa murima wovaha. Mbwenye iyene wakoddihile Adamu na Eva oja muri wasasanyeliye n’efunelo ya mmirimani Mwaye. Mbwenye Satana okosile nivuzo niviriganihile ebaribariya. Nivuzo ntti nihakosiha awene wubuwela wi Yehova kahiye Mulugu wa murima wovaha. Enoneya ninga Eva wahivivuza dhahi: ‘Mulugu ononivitela elobo ya deretu?’
10. Satana ovurhanile dhavi nzina na Mulugu vina txini epadduwilevo?
10 Eva wakanamovi wi Yehova wali Mulamuleli waye. Iyene ohimwakula Satana na mazu amwaddele Yehova. Ohejedhedhavi vina wi muriya, elogiwe wi kaniddiginye. Iyene wanziwa wi ohimwiwelela Yehova ogahimuttukulela okwa. Mbwenye Satana ohiloga dhahi: “Nne, kamunakwe.” (Wita 3:2-4) Satana wahapela malago venjene. Iyene txibarene wela opigidha nzina na Yehova mwa omwaddela ottambi Eva. Satana ohidha okala ddiabo obe munyengetti. Eva ohifiyedha opeliwa malago, barumela dhologa dha Satana. (1 Tim. 2:14) Iyene wakuluveletxa dhologa dha Satana ottiya okuluvela dhologa dha Yehova. Eji ehimukosiha Eva ogana elobo edhile omutotela goi enddimuwa. Iyene ohigana ohimwiwelela Yehova. Ohija mulima wa muri wakoddihiwe wila ahije. Vasogorhova, ohinvaha vina mamune Adamu.—Wita 3:6.
11. Nivuru na Gano 27:11 ninnikamihedha dhavi ononelamo ovonya wa amambali oroma?
11 Kobuwela mudhidhi obule waloga Satana na Eva. Kowiliwa iyene wamwakulile dhahi: “Miyo kaddinuziwa weyo, onimuziwemi ddi Babaga Yehova, ddinomukwela vina ddinomukuluvela. Iyene ohiddivaha miyo na Adamu dhotedhene dhinfunihu. Onda dhavi ologa elobo ejo? Kaddivenyelevo!” Kowiliwa Eva walogile dhahene Yehova agahiziveliwa vaddiddi, sabwani agahoniha okala mazu ambudduwa mwano mwa mwana wokweleya! (Kengesa Gano 27:11.) Mbwenye Eva kamukwela Yehova n’ekalelo yebaribari, nne vina Adamu kana ekalelo eji ya omukwela Yehova. Sabwa ya oyeleliwa ekalelo eji ya omukwela Babawa, Adamu na Eva ahivonya venjene ofiyedha ohiwodha wamelela nzina na Mulugu.
12. Satana witile dhavi waganyedha mmurimani mwa Eva, vina txini evonyile Adamu na Eva?
12 Ninga moonelihu, Satana ohita waganyedha mmirimani mwa Eva. Iyene ohikosa nivuzo nimuttukulele Eva waganyedha nzina na Yehova. Adamu na Eva ahivonya obarela nzina na ekaleloya ya Yehova. Awene ahivittiya opeliwa malago na dhubuwelo dha Satana bafiyedha onvanya Babiwa. Masaka abano Satana onlabana dhopyaga dhakakene. Iyene onobeddegela nzina na Yehova na efunelo ya ovurhana. Abale anrumela ottambi wa Satana anokwekwetteyela nomaguva okodda olamulela woligana wa Yehova.
YEHOVA ONOTTITTIMIHA NZINA NAYE
13. Ezekiyel 36:23 onloga muselu gani oli mBibiliani?
13 Yehova onottiya ovurhaniwa wa nzina naye ahikosagavo elo? Nne, ejo kimpadduwa! Mbibiliani muhikala merelo anoniha wi Yehova onokoddeliha nzina naye oromana mudhidhi otakalihiwani mu Edeni. (Wita 3:15) Txibarene, ja malago iyo ogwadda muselu wa Bibilia na mazu aba: Yehova onottittimiha nzina naye na Omwene wimeleliwe na Mwanaye obuwene onadhena murenddele na oligana velaboni ya vati. Bibilia okana muselu mwinjene obuwene onnikamihedha ononelamo mukalelo onakwanihedhe Yehova otxeniha nzina naye.—Kengesa Ezekiyel 36:23.
14. Yehova onakulela dhavi muladdu wotakalihiwa nzina naye witiwe mu Edeni?
14 Satana onokosa guru dhotedhene wila amuttiyihe Yehova okosa efunelo Yaye. Masiki dhawene iyene onovonyaga mudhidhi wotene. Bibilia onolagiha wi dhawira dha Yehova dhinowooniha wi kuli Mulugu mwina onimpitta iyene. Ebaribari wi, osadduwela wa Satana vamodha na otene ali mpaddi waye onomuttukulelaga Yehova wiwa opa vaddiddi. (Masal. 78:40) Muladdu obu wa otakalihiwa wa nzina naye Yehova oneddiha na ononelamo, ovilela vina noligana. Iyene onolagihaga owodha waye na mikalelo dhottiyana-ttiyana. Mbwenye yamakamakaya jawila, dhotedhene dhinkosa Yehova onkosa na okwela. (1 Jo. 4:8) Yehova kantxelela ottittimiha nzina naye.
Satana ohimpela malago Eva, mwari mwa vyaka dhinjene iyene onotakalihavi nzina na Mulugu(Kang’ana ddima 9-10, 15) *
15. Masaka abano Satana omveyiha dhavi nzina na Mulugu, vina txini dhimpadduwa mwaha wa oviyiha oku?
15 Masaka abano Satana onoveyihavi nzina na Mulugu. Iyene onowakosiha attu waganyedha guru dha Mulugu, oligana, eziwelo na okwela waye. Ninga motagiha, Satana onowanyengetta attu na dhubuwelo dhawi Yehova kahiye Muttanddi. Iyene onowanyengetta abale anrumela okalawo wa Mulugu, na dhologa dhawi, malago a Mulugu ahittabwa orutxa weddanawa. Onofiyedha wanyengetta attu na mazu awi Yehova, kana murima wokwela; Mulugu kana supaje, onowaddumeya attu muttoloni mwa motto. Abale anrumela dhottambi esi anottukuleleya wira elobo-txilobo—okodda weddana magano oligana a Yehova. Iyene onela odhowavi na ovurana waye ofiyedha siku ninatolotxiwiye, efunelo yaye ja wukwekwettela epaddi eliye. Koddi onela owodha?
WEYO OHIYAMO MMAKANINI MANDDIMUWA
16. Txini enwodhiwe okosa, ejuwene evonyile Adamu na Eva?
16 Yehova ohattomela attu ottega mabasa a ottittimiha nzina naye. Txibarene, enowodheya weyo okosa merelo avonyile Adamu na Eva. Enowodheya weyo wimelela pwí ebaribari, ottiya okala ninga attu a elabo ejino adhaleliwe merelo amveyiha nzina na Yehova—enowodheya woniha wi Yehova ddwa murima wokoddela, ddoligana, ddapama vina ddokwela. (Iza. 29:23) Weyo ohikana ewodhelo ya okamihedha olamulela wa Mulugu. Weyo ohikana ewodhelo ya woniha wi Yehova bahi dduna owodha wa olamulela onattukulela attu okana murenddele.—Masal. 37:9, 37; 146:5, 6, 10.
17. Yezu wonihile dhavi na merelo aye mazu ali va nivuruni na Joau 17:26?
17 Iyo nigakosaga merelo anttittimiha nzina na Yehova, kuloga nintagiha esile dhikosile Yezu Kristu. (Kengesa Joau 17:26.) Yezu ohiziwiha nzina na Babe; kaziwihile na mazuvi bahi, nne, ohiziwiha vina na merelo wi Yehova Mulugu wokoddela murima. Ninga motagiha, iyene wanakona Afarizi, aloga wi Yehova ddwawuma murima, ddorutxa, kanfiyedheya vina kana nttebwa. Yezu ohasunziha attu wi Babe ddofwewa murima, ddovilela, ddokwela vina ddolevelela. Iyene vina ohakamihedha attu ozinddiyela merelo a Yehova mwari mwa dhokosa dhaye esuwene dhamutagihiye mwawakwana-mwene Babe.—Jo. 14:9.
18. Ninawodhe dhavi wakosiha attu ottittimiha nzina na Yehova?
18 Dhahene ninga Yezu iyo vina nawaddele attu ejile enziwehu mwaha wa Yehova, naziwihaga wi Mulugu ddokwela vina dda nttebwa. Nigakosa dhawene ninovitula ozivaleliwa vina oveyihiwa wa nzina na Yehova. Enowodheya iyo okosiha wi dhubuwela na mirima dha attu dhittittimihe nzina na Yehova. Moligana na Yezu enowodheya iyo otagiha merelo a Yehova. Masiki nikalaga attu ottega. (Ef. 5:1, 2) Dhawira na dhologadha dhehu, dhigaazinddiyeliha attu ejile eli Yehova, kuloga ninttittimiha nzina naye. Ninokuputta nzina na Yehova mwa dhotakaliha dhotene, nigakamihedha attu oziwa mwaha wa esile dhihinziwani dhiniwanana na nzina na Yehova. * Iyo ninowoniha wi enowodheya attu ottega okalavi oweddeyana na Mulugu.—Job. 27:5.
Iyo ninfuna nakamihedhe anamasunza ehu a Bibilia wi anonelemo nttebwa vina okwela wa Mulugu (Kang’ana ddima 18-19) *
19. Mowiwanana na Izaiya 63:7 txini enfwanyelihu okana mmirimani nigasunzihaga attu ena?
19 Karoma wona masunziho mena anfwanyeliho ovirihamo. Nigasunzihaga attu ena Bibilia, ninnonihedhamo olamulela wa Mulugu, venevo attu anononelamo wi Yehova dduna owodha wa olamulela elabo yotene n’oligana. Mbwenye vagakala ofuneya wa okalela txenjewa malamulo a Mulugu, yofuna yehu ja wakamihedha attu ena okana merelo anoniha omukwela vina omwiwelela Yehova, Babi wehu. Iyo ninofwanyela wawaddela attu merelo okoddela a Yehova, nanonihedhagamo nttebwa vina naziwihaga entapulela nzina naye. (Kengesa Izaiya 63:7.) Nigasunzihaga attu dhahene, ninela wakamihedha omukwela Yehova vina omwiwelela sabwani anokana efunelo ya ovirihamo dhologa dhaye.
20. Txini enasunze iyo mwari mwa mutoma ondawo?
20 Iyo ninawodhe dhavi woniha na merelo ehu vina na masunziho ehu wi dhinda munzinani na Yehova vina ninawodhe dhavi wakosiha attu omususela iyene? Mutoma ondawo onela wakula nivuzo ntti.
JIBO 1 Mikalelo dha Yehova
^ par. 5 Makani gani manddimuwa apattiwe dhottanddiwa dhotene dhina yubuwelo? Txini enkosiha makani aba okala manddimuwa? Muttu-muttu wa iyo oyilemo dhavi mmakaninimwa? Dhowakula dha mavuzo aba dhinele onikamihedha wunuwiha mandano ehu na Yehova.
^ par. 18 Nahikalawo nsaka navaha manivuru ehu masunziho awi nzina na Yehova kaninfwanyela okoddelihiwa, sabwani kaliwo wana efunelo ya oziwa emuttukulele Mulugu ovittuva nzina ntti. Mbwenye vamutugumanoni wa yaka ya 2017, masunziho aba ahinonihedhiwamo deretu. Mwimeleli wa epaddiya ohiloga dhahi: “Kinrutxa ononelamowa, kahiye yabure olobelela okoddelihiwa wa nzina na Yehova, sabwani enofuneya wonihiwa wi merelo aye bokoddela.”—Kona programa ya jw.org®, Janeiro 2018. Odhowe mpaddi wa BIBLIOTECA > JW BROADCASTING®.
^ par. 62 FOTO DHA MAKUKU: Ddiyabo ohitakaliha ekalelo ya Mulugu, mwa ologa dhottambi na Eva. Mwari mwa vyaka dhinjene Satana onowazaga masunziho owapelana malago attu, awi Mulugu kana nttebwa vina kahiye Iyene wattanddile attu.
^ par. 64 FOTO DHA MAKUKU: Mbali onloga merelo a Mulugu mwari mwa nsunzo na Bibilia nineddihiye.
