IYO NOTENE ninorumela wi Yehova onoweddiha vina onosapela nlogo naye mpaddi wa omuyani masaka abano “omariha.” (2 Tim. 3:1) Ninononelamo wi muttu-muttu onofwanyela omwiwelela Yehova. Dhinnipadduwela dhinoladdaniwa na dhapadduwele ana Izrayel bali mwiddeddereni. Awene annakulela agewa okuwa wa parhaza.

Yehova wahimuruma Mizé wi afulihe aparhaza eli aparata, mabasa awa “akale oawithanana akadda Izrayel; obeliwege vina othimurha wawa.” (Oleb. 10:2) Anamakutta anfwanyela omoba parhaza n’ekalelo yottiyana-ttiyana wi aanonihedhemo attu enfuneya. (Oleb. 10:3-8) Masaka abano, nlogo na Mulugu ninowakela miselu dha malago na ekalelo yottiyana-ttiyana. Karoma wona mare mararu anakelana iyo miselu dha maswagiho, anladdana na abale a parhaza. Muttengo mwinjene wa nlogo na Mulugu onotugumanihiwa, emeleli attomeliwe weddiha nlogo ntti, anoswagihiwaga mudhidhi na mudhidhi vina dila dhina masasanyedho a weddihiwana mutugumano anosadduliwaga.

Mudhidhi wafuna Yehova wi “athu otene” agumane vamavolowelo va sanjarha, anamakutta awoba aparhaza obili. (Oleb. 10:3) Attu a mahimo otene antugumana vasajarhani, mwari mwa makuru manayi, afwarihedhagamo ezinddiyelo ya mukuwo wa aparaza. Attuya agewa mukuwo wa aparhaza, masiki akalele wolapa antugumana mwari mwa mudhidhi mung’onovi. Ena akalela wolapela vaddiddi anfuna mudhidhi vina ankosa guru enddimuwa wi afiye vasanjarhani. Kiyatanala yampadduwela muttu-muttuvi, yafuna Yehova yali yawi otene akale vasanjarhani.

Masaka abano iyo kaninkuweleliwa vansajarhani, mbwenye ninowaddeliwaga mudhidhi wetene wi jofuneya ovitaganyiha na nlogo na Mulugu. Mukuwo obu bubule onlogiwaga wi ninofuniwana okala vamutugumanoni wa ttattamwa, venevo vanakelihu masunziho a ttima enddimuwa vina ninovahiwaga malago anfwanyelehu weddana. Nlogo na Yehova ninopurelamo masunziho a mutugumano wa ttattamwa orugunuwa elabo yotene. Otene abale anakulela mukuwo wa ovitaganyiha mwari mwa matugumano aba, anohagalalaga vaddiddi okala munikuruni mwa Mulugu. Akalawo ena ankosa oleddo wolapela vaddiddi. Masiki dhawenevi, otene abale anona mutugumano obu anokosa guru ya okalavo.

Kito mwa ologa dha abale ankala mukolokotani, abuwene ahinwodha otugumana dhahene ninga muntugumanihu? Ninohagalala vaddiddi sabwa ya dhipano dhovanene dhinniwodhiha ovavihana miselu dhinjene wi afiyedhiwena abali ankala mukolokotani, awene anowona wi ali mumodhani na nikuru nehu. Ninga motagiha, mudhidhi wadhowile wona mwimeleli wa katti enddimuwa mabasa o’Benin, abali a wenewo ahavavihedha programaya abali o Arlit, Níger vina ahivavihedha mittette minli  dha Eddeddere y’o Sahara. Programaya ehoniwa na abali vina na arogora a wakwana Makumeli na mmodha, ena ali abale ana efunelo ya omusunza Bibilia. Masiki valanivi wolapelana, yali ninga awene ali vamodha na atugumani otene awakwana 44. 131. Mbali dhahi ohileba: “Ninotamalela na murima wehu wotene, mwaha wa onivavihedha progaramaya. Eji ehinoniha onikwela wenyu.”

Mudhidhi wamoba anamakutta parhaza mmodha, “anddimuwa a makuru a Izrayel,” angumana vasanjarhani ya matugumano. (Oleb. 10:4) Awene annakela miselu vina maswagiho a Mizé. Maswagiho aba annakamihedha olaba deretu mabasa awa mwari mwa mahimo asogorhelani. Kowiliwa weyo wali mwimeleli wa masakene abale kugakosa guru wi okalevo vamutugumanoniva wi opurelmo maswagihoya?

Masaka abano, anddimuwa a mulogo kali ninga ‘anddimuwa abale a makuru a Izrayel’, nne vina kanivikosiha anya a mabila a Mulugu abuwene attiyedhiwani mmadani mwawa. (1 Ped. 5:1-3) Mbwenye awene anokosa guru dhotedhene wi asapihe mabila a Mulugu. Awene vina agakuweleliwa maswagiho a Eskola ya Emeleli a Omwene anodhowa na murima wotene. Mwari mwa masunziho aba anddimuwa a milogo anosunzihawiga marhe a ottidda pama mabasa awa a mmulogoni. Oswagihiwa oku onowattukulelaga otene okala olibene mpaddi womuyani. Masiki akala weyo kuwakele maswagiho a eskola eji, kapurelamo masunziho a abale akela wele.

Anamakutta a Izrayel masaka mena annimoba parhazaya na guru enddimuwa vaddiddi. Egapadduwa dhahene, yatonyihedha wi Yehova wafuna wi makuru otene attimurhe. (Oleb. 10:5, 6) Makuru aba attimurha n’ekalelo yosasanyedheya vaddiddi vina yanfuneya okosiwa guru enddimuwa wi wiwananawa wakwane. Masaka mena ankalawo ana Izrayel akodda omwalela mpaddi mwina. Akoddela nni?

Txino yakala ninga mukuwo wa ottimurha wafiya muttuya ahinatti ovisasanyedha wi amwalele mpaddi mwina. “Masiku mena murabo wagonelavo ovenyana txiguwo mpaka membesi”. Masaka mena wangonelavo “malabo meli, peno mweri, peno yaka modha” vadhulu va musagala. (Oleb. 9:21, 22) Nikuru ntti namwala dila ngasi? Olebaliwa kapitulu 33 onologa mimburho 40 dhamwalela ana Izrayel.

Akalawo attu ena afwanya mimburho dha eddima. Mimborho eso dhamwalelani masaka mena kadhakanetxa attu vina dhakala ‘eddeddere enddimuwa yawopiha.’ (Olib. 1:19) Nona eji yanattukulela wubuwela wi omwala ogahafwanyiha mburo wohazivela.

Mudhidhi wavisasanyedha mahimoya wila attimurhe, mahimo mena anfwanyela okala ovilela wi akane ekalelo ya wajedha akwawa. Otene aniwa mukuwo waparhaza wobiwa na guru, mbwenye eteneya kavenya mudhidhi mmodhene. Wobiwa oku wa parhaza na guru wali ezinddiyo ya ottimurha wa makuru asamile omadhelo wa nzuwa, akadda Juda, Isakar vina Zabulau. (Oleb. 2:3-7; 10:5, 6) Awene agamala ottimurha, anamakutta animoba parhazaya n’ezinddiylo yelo yanawili wi avahedhena ezinddiyelo attu a nihimo n’ogusini. Anamakutta andowavi amobagavi parhaza wawa ofiyedha mahimo otene ottimurha.

Enodha opadduwa weyo otanya matxinjo-matxinjovi ankosiwa munikuruni na Yehova. Txino onodha orurumutxiwa na matxinjo ahajedheliwe. Obe onodha ohiziveliwa sabwa ya masasanyedho akosiwe abuwene ahajedheliwe wi anela okosiwa. Egapadduwa elobo-elobovi, oziwe wi wiwelela wawo oli muwehiwani, vina vanofuneya mudhidhi mwinjene wi olemele matxinjoya. Mbwenye akala iyo ninokana murima wa wiwelelana matxinjo-matxinjovi ankosiwa munikuruni, ninela wona mareliho a Mulugu.

Nsaka na Mizé, Yehova ohaweddiha matxikwi menjene a ana Izrayel mwiddeddereni, alobwana, ayana na ayimaya. Mulugu kohakoya, awene kagawodhile okalawo. Malabo abano ehu, iyo ninkalihiwawo na mweddiho wa Yehova. Txibarene, iyo ninkala ninga ninkosa oleddo! Nona, jofuneya notene ogana wiwela mweddiho wa Yehova dhahene ninga mukosele ana Izrayel aroromeleya abuwene amurumelela parhaza, masiki akalaga wolapena na sanjarha!