“Labo nawana miyo na mwana navilaga, ddahimuhoga mukotti n’efunelo ya ompa. Ddafuna ddimpe bahi.”​—Paul.

“Vatakulu, ddakala wosilidhiwene s’emwahaya. Ddigatatamuwa ddanmwalamwadha dhobo dhetene dha mba ttabwa-ttabwa esile dhaddaddamela.”​—Marco.

Txino enjiya wa iyo kanili ninga attu aba eeli alogiwe. Mbwenye, masaka mena notene ninorutxiwa ovipimelela. Eji enpadduwela sabwa ya iyo okaana ekalelo yotedemanela yottega enittiyedhi Adamu. (Rom. 5:12) Dhahene ninga Paul na Marco, attu ena anorutxiwa ovipimelela. Enagu anokanaga makattamiho a wang’anela dhubuwelo dhawa. Dila dhinjene, awene anofwaseyela wubuwela dhilobo dhawobaniha obe owanana dhubuwelo dhohifwanyelela. Oku ena anorutxiwa orabela mararuwo, omwa dholezeliha dhinattiya ttokoo, obe oja mirobwe dhinobaniha ogogo.

Abale anhiwodha opimelela dhubuwelo dhawa, dhifunelo na merelo awa, anowika egumi yawa vangovini. Mbwenye enowodheya orabela. Namukalelo gani? Mwa okana ekalelo ya ovipimelela. Ovano ninfuna nisekeserhe mavuzo mararu anawodhe onikamihedha wunuwiha ekalelo ya ovipimelela: (1) Txini entapulela ovipimelela? (2) Ekalele nni yofuneya okana ekalelo ya ovipimelela? (3) Ninawodhe dhavi wunuwiha ekalelo eji eli mpaddi wa esile ‘dhimbala muya wokoddela’? (Gal. 5:22, 23) Omamalelowa ninele wona txini enfwanyelihu okosa nigona wila nihivonya weddana ekalelo ya ovipimelela.

Muttu onivipimelela kankosa elobo-txilobo nne vina kanloga na maruru. Ottiya ejo, ole onivipimelela onotamela ologa vina wira dhinimwagalaliha Mulugu.

Yezu ohoniha merelo annisunziha ekalelo ya ovipimelela. Bibilia onologa wi: “Vanyemuliweye, kakulile kambo; asosiwaga, konihile okoya ntxiga; wavilevela Mulugu onthonga n’ebaribari.” (1 Ped. 2:23) Bakomeliwe vapingirhizini, Yezu ohoniha ovipimelela vowi iyene nne kakulile elo vasuttiwiye na amwiddani. (Mt. 27:39-44) Labo nawagiwiye mwano na afwarizi, iyene ohoniha okala muttu wovipimelela. (Mt. 22:15-22) Yezu ohivipimelela nsaka nasilidhiwe Ayuda afunaga onvokela malugu! Ottiya wawiyihedha obure, “Iyene opothowa, obudduwamu muparhani.”​—Joau 8:57-59.

Enowodheya omutagiha Yezu? Ndde, enowodheya. Murumiwi Pedro wahileba: “Kristu vina outabuwelani nyuwo. Iyene outhiyedhani dila, wi mufware mvirileye.” (1 Ped. 2:21) Masiki banilivi attu ohiligana, enowodheya ofwara yotagiha ya Yezu yokala attu ovipimelela. Koddi ekalele nni yofuneya okana yeddelo eji?

Wila nimwagalalihe Yehova enofuneya ovipimelela. Masiki akala nidhile vawalene nimulabelaga  Yehova nororomeleya, ninodha oyelela mandano ehu na iyene nigattiya opimelela dhologa dhehu na dhawira dhehu.

Koona yotagiha ya Mizé, nsaka nttile, iyene “wali muthu wokurumuwa vaddiddi; mukurumuwelo waye kwafwanyiwa mwa muthu mwina mwilaboni”. (Oleb. 12:3) Mizé wahivira mudhidhi mwinjene avilelaga marabwa aloga ana Izrayel, mbwenye mudhidhi wahittiya ovipimelela. Iyene wahisilidhiwa nawene mudhidhi wakumbirhilani manje dila yanawili. Mizé wahawubela owali attu a nlogo, na mazu awi: “Kewani, nyuwo athu avuru-vuru! Apa iyo ninere owodha obuddutxa manje vanluguni apa?”​—Oleb. 20:2-11.

Mizé wahittiya ovipimelela. Iyene kamuttittimihile Yehova wavahile manje na mukalelo wotikiniha. (Masal. 106:32, 33) Yodhavoya jawi, Yehova kamuttiyile Mizé ovolowa Mwilaboni Yolibeliwa. (Oleb. 20:12) Enkala ninga Mizé wahitxinuwa mwigumini mwaye mwetemwene sabwa ya ohivipimelela.​—Olib. 3:23-27.

Ninsunzavo eni? Masiki akala nili mwibaribarini oromana walene, ninofwanyela ologa na mukalelo wa nriho nabale anninyimula obe nabale anfwanyela osisiguliwa. (Ef. 4:32; Kol. 3:12) Nigoluvelaga, masaka mena ninorutxiwaga okala attu ovilela. Mbwenye enofuneya omubuwela Mizé. Iyo kanigafunile otolotxa mandano apama anihuna na Yehova sabwa ya ohivipimelela. Kito ninawodhe dhavi wunuwiha mukalelo obu wamakamaka?

Olobelege okumbiraga muya wokoddela. Sabwaya? Sabwani ovipimelela mukalelo wa dhimbala muya wokoddela wa Mulugu vina Yehova onowavaha muya waye abale animuloba. (Lk. 11:13) Modhela muya waye, Yehova onowodha onivaha guru dhinfunihu. (Fil. 4:13) Iyene onowodha vina onikamihedha wunuwiha mikalelo dhina dhimbala muya wokoddela, ninga okwela okuwene onanikamihedhe okala attu ovipimelela.​—1 Kor. 13:5.

Orabele elobo-txilobo egadhile wurutxiha okala muttu wovipimelela. Motagiha, odhowegevi bugatxatxama mawebisaiti a mwinternetini vina mavego anlagiha mweddelo wonyakuwa. (Ef. 5:3, 4) Mwebaribari, ninofwanyela orabela elobo-elobovi egadhile ovenyihedha ekalelo yehu yokosa eli yabure. (Gano 22:3; 1 Kor. 6:12) Muttu onna ekarho yotedemanela okosa mararuwo, onofwanyela orabela wengesa manivuru anloga dhaliba ofunana vina mavidiyu anlagiha mararuwo.

 Txino ninorutxiwa ovirihamo nlago ntti. Mbwenye nigavibihedha, Yehova onele onivaha guru dhinfunihu wi niwodhe ovipimelela. (2 Ped. 1:5-8) Iyene onele onikamihedha wang’anela dhubuwelo, dhologa vina merelo ehu. Ebaribari ya ejene jijile empadduwele Paul na Marco alogiwe mundduni, awene ahivilibihedha opimelela merelo awa ovuta. Koona yotagiha yina ya mbali waharutxa osilidhiwa, veddihiye karo yaye wanfiyedha wakulana na attu ena a murampani. Txini yakosiliye? Iyene ohiloga: “Masiku otene miyo ddanlobela na murima wotene. Ddahisunza makani anloga mwaha wa ovipimelela vina ddankoya muyubuweloni malebo a Bibilia addikamihedha. Ddannivilibihedha wi ddikane ekalelo ya ovipimelela, nona masiku otene ddanvenya na yimelelo y’okalavi muttu wokurumuwa. Wila ddittawe makani ddambeya vaddiddi ddigadhowaga omabasani wila ddinayeluwe.”

Na mudhidhiya, enodha opadduwa iyo ovonya weddana ekalelo ya ovipimelela. Eji egapadduwa, txino ninokanaga manyazo a omfiyedha Yehova na nlobelo. Mbwenye obu mudhidhi onfwanyelihu olobela venjene nikumbiraga nikamihedho naye. Egali dhawene, momaguva-mwene olobele wa Yehova. Omunlele wi awulevelele, otamele nikamihedho naye vina ogane ohiyelela okosa wili yoddawa yakakene. (Masal. 51:10-12) Yehova kanattiye ovuruwana malobelo ankosiwe na murima wotene. (Masal. 102:18) Murumiwi Joau ononubutxedha wi nikami na Mwana wa Mulugu “ninonikoddeliha nithimihaga dhothega dhehu dhetene.” (1 Joau 1:7; 2:1; Masal. 86:5) Kanidduwale wi Yehova onowawaddela alabeli aye wi alevelelagane mudhidhi wotene. Nona ninokuluvela wi iyene onele okosa yakakene na iyo.​—Mt. 18:21, 22; Kol. 3:13.

Yehova wahinyimuwa na Mizé mudhidhi wavonyileyi ovipimelela bali mwiddeddereni. Masiki dhawene, Yehova wahimulevelela. Mazu a Mulugu anloga wi Mizé wali muttu wororomeleya, nona ninfwanyela omutagiha. (Olib. 34:10; Aheb. 11:24-28) Yehova kamuttiyile Mizé ovolowa Mwilaboni Yolibeliwa, mbwenye onele onvenyiha mukwani wi akale Mparaizu velaboni ya vati vina onele omuttuva egumi yohimala. Enowodheya okana egumi yohimala nigavilibihedha wunuwiha mukalelo obu wa ovipimelela.​—1 Kor. 9:25.