Paulo ohileba: “Miyo kaddinkalawo n’ovirihamo malamulo a Mizé; malamuloya kanddira elo. Ddabuno ddinimukalelawo Mulugu.”—Gal. 2:19.

Elebile Paulo enowiwanana na mutoma munddimuwa watapuleliye abali a milogo dhakala o Galásia kwatti y’o Roma. Akristu ena a wenewale ela opupurutxiwa na anamasunziha awota. Attu abo asunziha wi mugakoodda otxetteliwa ninga munrumeela Malamulo a Mizé, kamunawodhe wakela egumi yohimala. Mbwenye Paulo wanziwa wi Mulugu wahimala ofudha nlamulo nottxetteliwa. Anonihedhagamo na mukalelo wohipipirhiheya, Paulo wahisisigula masunziho onyengetta nanda wahilibiha nroromelo na abali modhela mukutto wa yobolo operhekile Yezu Kristu.—Gal. 2:4; 5:2.

Bibilia onologa mwawakwanawene wi muttu agakwa kanziwa elo-wene. Kuli elobo yina enimpadduwela. (Koh. 9:5) Mulogile Paulo wi: ‘Modhela nlamulo, miyo ddihikwela nlamulona,’ iyene afuna aloge wi Nlamulo na Mizé kanampuriha elobwene. Txibarene, Paulo wahikaana ebaribari wi ‘wamukalelawo Mulugu’ sabwa ya ororomela mukutto wa yobolo.

Matxinjo aba erehile mwigumini mwa Paulo sabwa ya “nlamulo.” Mudhidhi mung’onovi mundduni Paulo wahitapulelamo dhahi: “Niziwa wi muthu kanvulumutxeliwa malamulo a Mizé; enimvulumutxa, omuroromela Yezu Kristu.” (Gal. 2:16) Ebaribari wi Nlamulo nahakwanihedha mabasa a makamaka, dhahene ninga mulogile Paulo awaddelaga akadda Galasiya wi malamuloya: “Akalelewo awonihege athu ottega wawa, mpaka vanadhe oddo ororomelihiwe obudduwa muzizini mwa Abramu.” (Gal. 3:19) Pumwenemo, Nlamulo nannoniha wi attu kagawodhile ‘wiwelela mowakwanamwene.’ Awene anfuna mukutto wowakwana vina wokala-nokalawene. Txibarene, Nlamulo nali ninga mweddiho navelela nlogo ofiyedha odha wa Kristu. Muttu wamuroromela Kristu vamentoni va Mulugu woniwa ninga muttu woligana. (Gal. 3:24) Paulo wahoniwa ninga muttu woligana sabwa yovirihamo Nlamulo, omurumela Yezu vina omuroromela. Sabwa yejuwene, Paulo ‘wahikwa modhela nlamulo’ nanda ‘wahimukalelawo Mulugu.’ Nlamulo kanaana vina ttima mwigumi mwa Paulo, vowi wamukalelawo Mulugu.

Paulo ohileba mazu oladdana mukartani yalebeliye akadda Roma. Iyene ohileba: “Amudhaga yokokene jinireya na nyuwo . . . Nyuwo moboliwaga n’okwa wa Kristu, mutapuliwa mmalamoloni a Mizé. Ovano iyo nitapuliwa Mumlamolimwá anittda, kandha oniwodha vina.” (Rom. 7:4, 6) Nlebo ntti vina na mazu anfwanyeya va Galásia 2:19, anowoniha wi murumiwi Paulo kalogana okwa ninga muttegi wattongiwe na Nlamulo. Ottiya ejuwene, iyene waloga sabwa ya ofuruliwa. Nlamulo kanana vina ewodhelo mwigumini mwaye nne vina mwa attu ena. Awene ahifuruliwa mwa ororomela mukutto wa Yezu Kristu.