1. Txini ekosile Yehova mwa muttu-muttu wa iyo?

YEHOVA onomukukusa muttu-muttu wa iyo wi nimulabele. (Jo. 6:44) Kobuwela entapulela mazu aba. Yehova wela ofwaseyela wawang’ana attu otene ali velaboni ya vati, venevo owona elobo ya ttima mwa weyo—murima waderetu ogawodhile omukwela. (1 Map. 28:9) Yehova oziwa, vina onowukwela. Oziwa ejene enonipangarhaza!

2. Nladdaniho nilogile Yezu ninnikamihedha dhavi wona wi Yehova onomuzuzumela muttu-muttu wa iyo?

² Yehova onowuzuzumela weyo vamodha na abali awo omuyani. Wila atapulelemo mazu aba, Yezu wahimuladdaniha Yehova na mukumbuzi wa mabila. Mukumbuzi agakaana mabila zana nanda nirimelavo nimodha, txini enkosiye? Iyene “Kanathiye mena makumatanu na manayi na matanu na manai venevo valani, adhowa otamela-tamela nirimelelivo?” Agafwanya nibilana kannyanyuwela sabwa yawi nahirimela. Ottiya ejo onowagalalela. Nladdaniho ntti ninnisunziha eni? Vamentoni va Yehova mabila aye otene bamakamaka. Yezu ohiloga wi: “Babinyu oli wirimu, kanfuna wi arimelevo nne mmodha wa athu aba añgono-ñgono.”—Mt. 18:12-14.

3. Elobo gani enasekeserhiwe mwari mwa nsunzo ntti?

³ Mohaganyedha, kanigaziveliwe wanyimula abali na arogora. Ninarabele dhavi wakwakwattutxa attu ena? Nanda txini enfwanyelelihu okosa niganyimuliwa na attu ena? Mwari mwa nsunzo ntti ninele wona dhowakula dha mavuzo aba. Mbwenye nihinatti, ninofwanyela waziwa bani ali “añgono-ñgono” anlogiwa va Mateu kapitulu 18.

4. “Añgono-ñgono” alogile Yezu bani?

⁴ “Añgono-ñgono” aba ba anamafwara a Yezu. Kintanala vyaka dhobaliwa dhinanina, awene ali ‘ninga aima’ vowi ankala omala nawale wi asunzihiwe na Yezu. (Mt. 18:3) Masiki akalaga a dhilabo na dhilemelelo dhottiyana-ttiyana, vina monelo na mikalelo dhottiyana, awene anomuroromela Yezu Kristu. Nona Yezu agakwelaga venjene.—Mt. 18:6; Jo. 1:12.

5. Yehova oniwamo dhavi akala muttu onomukwakwattutxa obe onomunyimula mudhari waye?

⁵ Muttu-muttu wa “añgono-ñgono” aba, ddwattima vamentoni va Yehova. Wi ononelemo mukalelo oniwamo Yehova, katanalela mukalelo oniwamo weyo sabwa ya aima. Awene ahikana ttima mwigumini mwehu. Iyo ninofuna wabarela sabwani ninoziwa wi kanetxa guru, kanwodha ovibarela woka vina kana eziwelo dhahene ninga muttu munddimuwa. Iyo kaninziveliwa nigamona muttu amutabutxaga muttu mwina—ninosilidheya venjene—makamaka akala ontabutxiwaya mwana. Na mukalelo wakakene, Yehova onfuna anibarele. Iyene ononikubanyedha vina—onosilidhiwa—akala muttu onomukwakwattutxa obe onomunyimula mudhari waye!—Iza. 63:9; Mk. 9:42.

6. Mowiwanana na 1 Korinto 1:26-29, attu amwilaboni anawoona dhavi anamafwara a Yezu?

⁶ Na mukalelo gani mwina ononiwa anafwara a Yezu ninga “añgono-ñgono”? Bani anooniwa mwilaboni ninga amakamaka? Areeli, attu ovuwa, na abale ana owodha w’olamulela. Oku, anamafwara a Yezu anooniwa na attu a mwilaboni ninga “añgono-ñgono” attu ohikana ttima obe ahili elo. (Kengesa 1 Korinto 1:26-29.) Mbwenye Yehova kanawoona dhawene.

7. Yehova onfuna wi nawonege dhavi abali na arogora?

⁷ Yehova onowakwela alabeli aye otene, oromana abale adhile vawale amulabelaga vina abale ali aswa mwibaribarini. Abali na arogora otene bamakamaka vamentoni va Yehova, nona iyo vina ninofwanyelela wawonana ttima. Ninfuna ‘nakwelege abali ali orugunuwa elabo yotene’ nihasakulaga. (1 Ped. 2:17) Ninofwanyela okala omala nawale wi nazuzumele vina nabarele abalihu. Nigaziwa wi nihimunyimula obe nihimulogela muttu mazu ohifwanyela, kanipwaze ekalaga ninga kipadduwile elo, nubuwelaga wi muttuya kanrutxa onyimuleya vina onofwanyela oziwa odduwala makaniya. Txini enattukulela attu ena onyimuleya? Sabwa ya mukalelo oleliwani, abali ena kanvyonana ttima nona kanrutxa onyimuleya. Ena aswa mwibaribarini; anorutxiwa ovilela ohiligana wa attu ena. Kintanala elobo gani enanyimula abalihu, ninofwanyela ovilibihedha wi nogolele makaniya. Vina muttu ohinrutxa onyimuwa onofwanyela osaddula mukalelo waye, ejo enele omukamihedha okana murenddele vina onele okamihedha wiwanana wa attu otene.

8. Monelo gani wa mwilaboni wana Ayuda wapattile anamafwara a Yezu?

⁸ Txini yamuttukulele Yezu ologa sabwa ya “añgono-ñgono”? Sabwani anamafwara aye alonvumza: “Mumweneni wodhulu munddimuwayámo onakale àni?” (Mt. 18:1) Ayuda enjene a nsaka nttile dhavahetxani ttima yali masunzo a vadhulu vina ovuwa. Alogaga sabwa ya monelo obu namasunza dhahi ohiloga: “Ovuwa, nttittimiho, na orihiwa na attu otene dhilobo dhazuzumelani okalawo wawa wotene.”

9. Txini yafwanyelela okosa anamafwara a Yezu?

⁹ Yezu wanziwa wi anamafwara aye anfwanyeela ovilibihedha wi attiye murima wa mavurhano vowi Ayuda anziveliwa venjene  mavurhano. Iyene wahawaddela anamafwara aye: “Olivo munddimuwa, akale ninga mima; onlamula, akale ninga ole onrumiwa.” (Lk. 22:26) Nigawonagana ‘attu ena ttima empitta yehu,’ ninotonyihedha ovyeviha wehu ninga “mima.” (Fil. 2:3) Nigakosa dhawene kaninakwakwattutxe attu ena.

10. Nlago gani na Paulo ninfwanyelihu ovirihamo?

¹⁰ Abali na arogora ehu ahikana ttima opitta iyo. Ejo enoneyetxa nigazuzumela wang’ana mikalelo dhawa dhapama. Ninofwanyela ovilibihedha wi nivirihemo nlago navahile murumiwi Paulo abali o Korinto: ‘Bani onvikosa munddimuwa opitha ena? Dhetene dhina weyo, kahiye Mulugu ouvahile? Akala ovahiwa, ongayelana nni ninga opile na mabasawo?’ (1 Kor. 4:7) Nigoona wi ninoziveliwa ottittimihiwa, osibiwa, wang’aniwetxa vina ovyonana ttima opitta attu ena ninofwanyela okala pasope. Akala mbali onokosa diskursu yoddiginya murima obe akala murogora onowita masunzo menjene a Bibilia, otene aba anofwanyela onvaha matamaloya Yehova.

11. Musibo wa mwene na mudhari waye onnisunziha nni?

¹¹ Mmaleli Yezu watxenjerhiha anamafwara aye sabwa ya wopiya olivo wa omukwakwattuxta muttu, vasogorhova wahiloga musibo wa mudhari wana mangau na mwene. Mweneya wahilevelela mangau manddimuwa ahigawodhiliye opitxa. Vasogorhova, mudhari oddule munfanyeliye mudhari wambolehile kobiri dhing’onovi kawodhile omulevelela. Muziwile mwene oddule, wahimukuweliha bamponyedha mukambura mudhari oddule wawuma murima. Eji ennisunziha nni? Mwinyene Yezu ohitapulelamo: ‘Yakakene jinere Babani na nyuwo, mwakodda walevelela abalinyu na murima wenyu wotene.’—Mt. 18:21-35.

12. Txini enapadduwe nigakoodda walevelela attu ena?

¹² Merelo a mudhari oddule kamputtulile iyenevi bahi, ahaputtula vina attu ena. Yoroma, iyene kana okwela sabwani wahimputtula mudhari mukwaye vowi “omfugeliha mukambura mpaka alive mangauyá.” Yanawili, merelo aye yahanyimula adhari ena. Vowi “anamalaba ena oonile kani eji, thagaraga dhihawedda.” Na mukalelo wakakene, merelo ehu anowapatta attu ena. Akala mbali ononikosela elobo yohikala nanda nikodda omulevelela, txini endaga opadduwa? Voroma, ninomunyimula sabwa ya ohimutanala obe ohimutonyihedha okwela. Yanawili, abali ena a mmulogoni agaziwa, wi kaniniwanana na mbali mmodha, awene anele okala ozuzumene.

13. Txini ensunzihu na ejile empadduweli pionera dhahi?

¹³ Nigalevelela abali na arogora, notene ninowagalala. Jijuwene yonile murogora onamukuwelihu na nzina na Crystal. Iyene wahinyimuliwa na murogora wa mmulogoni. Crystal ohiloga: “Masaka mena mazu aye anddilata ninga mbeni. Nadhowaga omalaleyoni, miyo nne kaddafuna owela karo modhene na iyene. Ddahiroma okumuwela mabasa a olaleya vina ddahiroma oyelela wagalala.” Crystal wona ninga wahikaana sabwa ya okala wosilidhiwene. Mbwenye iyene kakoyile ntxiga. Iyene wahiviyeviha nanda wafwara nlago nafwanyiliye mMwang’anelini wa 15, wa Otuburu wa yaka ya 1999 wana mutoma “Olevelele na murima wotene.” Iyene wahiwodha omulevelela murogora oddule. Crystal ohiloga: “Ovano ddinononelamo wi iyo notene ninovilibihedha wabala omuttu oswa vina Yehova ononilevelela mowakwana mwene malabo otene. Yali ninga ddarulile muttorho wotene wavijelimi. Pavenevo vawodhilimi okana wili wagalala.”

14. Mowiwanana na Mateu 18:21, 22, makattamiho gani agumanilena murumiwi Pedro, nanda txini enanikamihedhe nigapattiwa makattamiho akakene?

 ¹⁴ Iyo ninoziwa wi ninofwanyela olevelela; vowi eji elobo yaderetu enfwanyela okosa muttu. Masiki dhawene enodhaga okala yorutxa olevelela. Enkala ninga murumiwi Pedro masaka mena wewamo dhawene. (Kengesa Mateu 18:21, 22.) Akala oniwamo dhawene txini anawukamihedhe? Yoroma, kobuwela dila ngasi dhuleveleli Yehova. (Mt. 18:32, 33) Masiki nihifwanyelelaga, Yehova oli womala nawale wi anilevelele. (Masal. 103:8-10) “Enofuneya iyo vina nikwelanege.” Nona, nigahalevelele abali ehu enkala ninga nikana mangau na awene. (1 Jo. 4:11) Yanawili, kobuwela empadduwa nigalevelela. Ninomukamihedha muttuya oniddaweli, mmulogoni munokala wiwanana, ninobarela mandano ehu na Yehova vina ninorula muttorho onilemela. (2 Kor. 2:7; Kol. 3:14) Yomariha, kamulobelele Yehova wi auokamihedhe okala Muttu wolevelela. Kumuttiye Satana ogomiha murenddele onihuna na abali ehu. (Ef. 4:26, 27) Na nikamihedho na Yehova weyo onele orabela ogwela vamuregani wa Satana.

15. Mowiwanana na Kolosi 3:13, txini enakose weyo akala mbali obe murogora olowunyimula?

¹⁵ Akala mbali wa mmulogoni ohukosela elobo yunyimulile, obe yunyagulile txini enfwanyeliwe okosa? Kavilibihedhe otamela murenddele. Kampange Yehova dhotene dhili mmurimani mwawo. Kamulobelele wi amukamihedhe muttuya wuttegeli vina okamihedhe wonaga mikalelo dhapama—dhinimonana Yehova. (Lk. 6:28) Ogadhowaga ologa na iyene kudduwale mazu aba. (Mt. 5:23, 24; 1 Kor. 13:7) Ja malago omunonihedhemo wi ekosiliye kakosela oninyimula. Ki akala kanfuna oteyihana na iyo? ‘Nidhowegevi nivilelaga’ vina nimukalelevi ntidi. (Kengesa Kolosi 3:13.) Yattimaya-ttimaya ohikoya ntxiga, vowi  ejo egahidha ononga mandano ehu na Yehova. Txipo kuttiye elobo-txilobo wukwakwattutxa. Ogakosa dhahene onele otonyihedha wi onomukwela Yehova opitta elobo-elobovi.—Masal. 119:165.

16. Muttorho gani ona muttu-muttu wa iyo?

¹⁶ Iyo ninotamaalela sabwa ya omulabela Yehova ‘mumodhani’ na abali ehu nisogorheliwaga na “mukumbuzi mmodha bahi”! (Jo. 10:16) Nivuru Organizados para Fazer a Vontade de Jeová, nikuku 165, vahikala mazu aba: “Vowi ninopurelamo wiwanana oku, muttu-muttu onofwanyela okosa mpaddi waye.” Bili dhawene, ‘ninofwanyela wawoonaga abalihu dhahene ninga munawonela Yehova.’ Vamentoni va Yehova iyo notene nili attima. Weyo onawoona dhawe abali na arogora? Yehova onowona, vina onovaha ttima dhetene dhinkosihu wi nakamihedhe abalihu.—Mt. 10:42.

17. Txini eganilehu okosa?

¹⁷ Iyo ninowakwela abalihu. Nona ninofwanyela ‘ohira elo-ene enakwakwattutxe abalihu.’ (Rom. 14:13) Nawonegena abalihu ttima opitta yehu vina nalevelelege na murima wehu wotene. Kuttiye okwakwattutxiwa na muttu mwina. Ottiya ejo, ‘ninofwanyela otamelaga dhinnifwanyiha murenddele, vina wunuwiha muroromelani.’—Rom. 14:19.