“ODERETU wa abali na arogora oddittukulela orumela ebaribari” ologile ddi Lisa. * Jijuwene vina epadduwile na Anne iyene ohiloga: “Voroma-vene eddiginyile murima waga ku oderetu wa abali, ottiya esile dhasunza miyo.” Arogora aba anoziveliwa venjene omwengesa Bibilia vina ottiddihedha mabasa dhinengesani. Mbwenye oderetu wa abali budhile wakamihedha venjene.

Ninawodhe dhavi otonyihedha oderetu ofiyedha oddiginya mirima dha attu ena? Ndoweni noone mikalelo minli dha okosa ejuwene na malogelo ehu vina merelo ehu. Ninele woona vina ekalelani yofuneya otonyihedha oderetu.

Mwiyana wamalago onlogiwa va nivuruni na Gano 31 wahikana ‘nlamulo na oderetu’ vanlumini vaye. (Gano 31:26) Iyene wanttiya wi ‘nlamulo’ ntti neddihege malogelo aye. Amambali a ntakulu anofwanyela okana ‘nlamulo’ ntti vanlumini vawa. Amambali enjene anoziwa wi ologa nowali onowaporeya ayima yattukulelaga okala avuruvuru. Akala ababi anologa na okwela, kinarutxa anawa wavuruwana vina wawiwelela.

Masiki akala weyo kuna mwana onasunze dhavi ologa na oderetu? Malago a okosa ejuwene anfwanyeya va nivuruni na Gano 31: 26: ‘Iyene onofugula mulomo na eziwelo.’ Eji entapulela okana eziwelo nigasakulaga mazu ehu vina malogeloya. Enofuneya ovivuza: ‘Enfuna miyo ologa ‘enele wattiya attu ena osilidhewene obe enele odhana murenddele?’ (Gano 15:1) Mohaganyedha otanalela nihinatti ologa ezinddiyelo ya eziwelo.

Gano yina enloga wi: Mazu ohitanaleleya ali ninga ‘niguma na supadda.’ (Gano 12:18) Nigaroma otanalela mukalelo onapatte attu ena malogelo na mazu ehu, ninele wang’anela enfuna iyo ologa. Nigatanalela ‘nlamulo na oderetu’ nigafunaga ologa na attu ena, kaninalabihedhe mazu osuva obe malogelo anasilidha attu ena. (Ef. 4:31, 32) Ottiya ejo ninosaddula dhubuwelo vina mazu awobaniha bakala mazu aderetu vina malogelo a ozivela. Jijuwene ekosile Yehova mwadhowile iyene omulibiha Eliya mudhidhi wattiddiwe iyene wova. Mungelo oddule warumiwe na Yehova wahiloga na ‘okurumuwa vina lizu n’okuwara.’ (1 Amwe. 19:12) Jofuneya wubuwela wi okala muttu waderetu enokwaranya ologa bahi mazu a oderetu. Enofuneya okosaga dhilobo na oderetu. Ninakose dhavi?

Iyo ninomutagiha Yehova ottiya ologa bahi noderetu, ninokosa merelo a oderetu. (Ef. 4:32; 5:1, 2) Lisa ologiwe mundduni, ohiloga dhahi sabwa ya oderetu otonyihedhile Anamoona a Yehova. “Nsaka namageleliwe anamudhi ehu omwala, atelani eli ahijomba omabasani wawa wi anikamihedhe omwala. Mudhidhi obule miyo ddali namasunza wa Bibilia!” Merelo abale a oderetu ahimukamihedha Lisa ofuna ebaribari.

Anne ologiwa omaromo, otamaalela venjene sabwa ya oderetu omulagihile Anamoona a Yehova. Iyene ohiloga: “Sabwa ya mikalelo dha  mwilaboni, miyo ddanaganyedhiwa venjene. Miyo kaddamukuluvela muttu, mbwenye mwaziwele miyo Anamoona a Yehova ddahakuluvela. Ddanivivuza, ‘Abaya anddeddihedha nni na oderetu?’ Namasunziha waga wa Bibilia wali muttu waderetu vaddiddi, noona ddanimukuluvela.” Kito eji yadhilena yopurelamo gani? “Muvirile mudhidhi mung’onovi miyo ddanvaha ttima esile dhasunza miyo.”

Ohiwodha ozinddiyela eddiginyile murima wa Lisa na Anne? Yali merelo a oderetu wa abali na arogora a mmulogoni, noona ejo ehattukulela ofuna osunza ebaribari. Oderetu wa abali ohakamihedha awene omukuvela Yehova vina nlogo naye.

Attu ena ahibaliwana mikalelo dha oderetu, eji elobo yotamaalela. Mbwenye akala ennittukulela otonyihedha oderetu mikalelo dhobaliwana, kuloga wi kanintonyihedha oderetu onda wa Mulugu.—Kaladdiniha na Merelo 28:2.

Oderetu onda wa Yehova onokosa epaddi ya musapo wa muya wokoddela. (Gal. 5:22, 23) Wi nikaane oderetu onda wa Mulugu  enofuneya ottiya muya wokoddela ovahe nipakelo mubuwelo na merelo ehu. Akala ninkosa ejuwene kuloga ninimutagiha Yehova vina Yezu. Ninga Akristu, ninowazuzumela attu. Noona elobo ennittukulela okala attu oderetu ku omukwela Yehova vina wakwela attu ena. Dhawene ninele otonyihedha oderetu onda mmirimani onrumeeliwa na Mulugu.

Elobo yovevuwa omutonyihedha oderetu muttu onimuziwihu vina oddule onitonyihedha oderetu. (2 Sam. 2:6) Motagiha iyo ninokaana efunelo yokosa elobo wi nitamaalele merelo a oderetu anikoseli muttu mwina. (Kol. 3:15) Kito nigoona wi muttuya kanfwanyela otonyihedhiwa oderetu?

Karoma otanalela dhahi; Yehova ohivaha yotagiha yofwanyelela ya watonyihedha oderetu attu etene masiki abale ahinfwanyela. Mbibiliani iyo nihisunza wi enofuneya ovilibihedha wi niwodhe okana mukalelo obu. Mazu anloga ‘mahala ohifwanyela’ anoligiwa dila dhinjene Mmaleboni a Egregu yonihaga wi Yehova ononitonyihedha oderetu. Mulugu onnitonyihedha dhavi oderetu?

Yehova onowatonyihedha oderetu waye attu matxikwi menjene modhela wavaha esile dhinakalihawo. (Mt. 5:45) Mwebaribari masiki nihinatti osunza ebaribari Yehova wahinitonyihedha oderetu waye. (Ef. 2:4, 5, 8) Motagiha, Iyene ohaperhekela mukutto wa Mwanaye Yezu Kristu attu etene. Murumiwe Paulo ohiloga wi Yehova ‘ohiperheka yobolo ninga mahala wa abale ahafwanyelela.’ (Ef. 1:7) Ottiya ejo, Yehova onodhowavi anisunzihaga masiki na dhottega dhehu. Malago a Yehova vina nzu naye dhili ninga “muwasu wa muzogwe.” (Olib. 32:2) Mwebaribari iyo kaninawodhe opitxela oderetu onnikosela Yehova. Kohikala oderetu wa Yehova kanigana njedhelo na musogorho.—Kaladdaniha na 1 Pedro 1:13.

Kavali waganyedha, oderetu wa Yehova mukalelo wa ttima onfwanyela iyo osunza. Ottiya osakulaga bani onfwanyela iyo omutonyihedha oderetu, enofuneya otagiha oderetu wa Yehova. (1 Tes. 5:15) Akala ninowatonyihedha oderetu attu etene, ninele okala ninga motto nsaka na oridha. Ninele okala nipara na nipangarhazo na abalihu, amudhihu vina anamwanddamani ehu.

Katanaalela mazu na merelo awo dhawene anele wakalela a oderetu amudhawo vina abalawo a mmulogoni. Txino enele ofuneya weyo omukamihedha mbali wa mmulogoni na mabasa a vatakulu, odhowa omusika obe mabasa mena. Ottiya ejo oganfwanya muttu mmabasani a olaleya kamukamihedhe na elobo-txilobo enimujombela.

Ndoweni nimutagihe Yehova na mazu vina merelo ehu nifwaraga ‘nlamulo na oderetu.’